Iyo nigakalaga wubuwelavi ottiyana onihu na wa akwihu, nigampeleya malago awi ovonya wawa obe obure wawa ohittabwa. Ninodha wubuwela wi awene kana ttima obe kannipurihamo elo. Dhubuwelo esi dhigenjiva mmirimani mwehu, pavenevo vanarutxiwehu waweddiha attu akwihu na supaje.

“Thabaní na abale anthaba, onlaní na abale anunla.” —ROMA 12:15.

Eji enttapulela eni? Dhologa esi dhingwaddiwa na ononelamo omodha—waweddiha attu na supaje. Supaje ekalelo ya wakubanyedha abale antabuwa, wunla na abale anunla.

Iyo nigamwenddihaga muttu na supaje, dhotedhene dhinimpadduwela ninowona ninga dhinnipadduwela iyo vina. Ninofiyedha odhugudheya na okubanya vina na otabuwa wawa, dhawira dhawa dhinonipatta. Supaje enoniwodhiha ozinddiyela wi notene ninoligana, nihitanalaga ziza na muttu-muttu; supaje enonika mumodhani. Nigaroma wona wi notene ninoligana, kavanakale ekalelo ya otanyana.

Supaje enonittukulela wariha attu akwihu. Anne-Marie onkala elabo y’o Senegal, wannapwaza venjene attu a nikuru nobuweliwa wi kanina ttima. Supaje ehimukamihedha venjene, iyene ohiloga: “Vonimi goyi dha attu a nlogo nttile, ddannivivuza meka-meka; kowiliwa miyo ddali munlogoni mwawa? Muromelimi wubuwela dhawene, ddahidha ononelamo wi ttima yaga—kimpitta ya attu a nikuru nttile.” Iyo nigatamela ononelamo makattamiho anapatta attu akwihu, ninele ottukuleleya waweddiha na supage ottiya okalaga wakonavi.

Tamela ozinddiyela ottiyanawa ogamalaga wang’ananihe wi ofwanyemo oladdana obe oligana oniwena na attuya anatanyiwe. Ninga motagiha, karoma wubuwela ekalelo yawa

• agajaga vamodha na amudhawa

• agakosaga mabasa orutxa oromana membesi ofiyedha txiguwo

• agaredhaga na amarho awa

• agavuruwanaga jibo dhawa dhinazivela

Ogamala ovubuwele bulí ninga awene. Vasogorhova ovivuze:

• ‘Txini egakosile miyo kowiliwa ddela weddihiwa ninga muttu ohinna ttima?’

• ‘Miyo ddinakale dhavi akala attu a nlogo nina anoddeddiha bure sabwa ya wiwa miselu dhopela malago?’

• ‘Kowiliwa miyo ddali munikuruni na abale aneddihiwa n’ekalelo ya otanya, ddigali dhavi?’