Akala yowakulaya jawi ndde, ninele otamela oziwa mwahaya. Akala jawi nne, ninela ofuna oziwa evonyile.

Kahiye otowa malago, Mulugu ottanddile elabo yokoddela ottiya goi winjiva mwilabonimwa?

Attu ahina relijiau anona goi ninga mwaha wa omukonana Mulugu—obe yawila iyene kawo. Awene anopeleya malago awi goi dhiliwo, ezinddiyelo yawi (1) Mulugu kana ewodhelo ya ogomihana, (2) Iyene kanfuna ogomiha obe (3) Mulugu kawo.

Ebaribari wi attu antabuwela ejuwene?

Mulugu kanittanddele otabuwa.

Iyene onfuna wi iyo nijevo egumi.

“Dhawene miyo ddifiyedha oziwa enimukaleletxa muthu: j’oweddana murima wothukuthedheya ajagavo okalawo; vano oja, omwa, ojavo dha mabasa a mada aye si mivaho dha Mulugu.”—KOHELÉT 3:12, 13.

Mulugu wahavaha attu oroma dhotedhene dhafuneya wi akalegewo s’egoi.

Iyene attanddaga, kanamo ya awene otabuwa—nne vina kafuna wi attu ambaliwa—atabuwege.

“Mulugu àruryaga ologilena dhahi: “Kalanina guru dh’obala, enjivihanina, dhalani mwilaboni, muthongemo. Mweddihe oba dha mbara, balame dhodhulu, vinama dhotene dhinedda mwilaboni.”—WITA 1:28.

Attu oroma Adamu na Eva ahimvanya Mulugu.

Omusadduwela Mulugu, ohatotela goi awene vamodha na aniwaya abalani.

“Ovanya wa muthu mmodha bahi ovolotxa othega mwilibano; othegawá ototelamo okwa. Ddabuno okwa onomuthidda muthu-muthu, vowi etene athega.”—ROMA 5:12. *

Mazu aba “othega” anlogiwa mBibiliani, kanaddiwana merelo bahi abure; anlogiwana vina ekalelo elihu—yapama na yabure—eraviwe na amambali ehu oroma.

Mulugu kanittanddile wi nikalegewo na malago ehu, onittanddeli wi nikalegewo na malamulo aye.

Dhahene ninga munhiwodheyani attu okala mmanjeni, kinwodheya vina attu ovilamulela anya.

“Nabuya, ddiziwa wi muthu kaiye mwinya w’okalawo waye, kanwodha opima yeka tharo dhaye.”—JEREMIYA 10:23.

Mulugu kannifunana otabuwa.

Iyene onfuna wi iyo nikane malago a otxatxamana masoso ofiyedha apale vanwodhelihu.

“Weyo Izrayel kovirihamo dhawurumilemi, gari yawo egali ninga mwinji, osanzaya wawo ogantepuwa ninga manebe a mbara.”—IZAIYA 48:18.