NSUNZO 41
Nikalevi Ororomeleyene “Mmasosoni Manddimuwa”
“Nyuwo motene munandana na Nabuya, mukweleni! Iyene onowakapelela animuroromela.”—MASAL. 31:24.
JIBO 51 Nikalevi na Yehova
DHINASUNZE IYO *
1-2. (a) Mukuwo gani onavuwihe alamuleli a mwilaboni mohigonela? (b) Mavuzo gani anfwanyelela wakuliwa?
KOBUWELA wi alamuleli a mwilaboni amala ovuwiha muselo wajedheliwa wawi “dhetedhene dhifwasa, kulí yawopiha.” Awene txino anele ologa na nikuluvelo wi mwilaboni mufwasa kamuli yawopiha. Alamuleliya anele wakwekwettela attu wubuwela wi anowodha wang’anela makattamiho a mwilaboni. Mbwenye awene kanawodhe wang’anela dhilobo dhinapadduwe! Sabwaya? Mowiwanana na nivuhulo na Bibilia, “panarurumutxiwani na segedho dhinatolotxa. . . . Kawo onavuluwevo.”—1 Tes. 5:3.
2 Akalawo mavuzo a makamaka anfanyelela wakuliwa: Txini enapadduwe “mmasosoni manddimuwa”? Txini enjeedhela Yehova wi iyo nikose mwari mwa nsakanene ntto? Vina ninawodhe ovisasanyedha dhavi wi nikalevi ororomeleyene mu goini enddimuwa?—Mt. 24:21.
TXINI ENAPADDUWE “MMASOSONI MANDDIMUWA”?
3. Mowiwanana na Ovuhulela 17:5, 15-18, Mulugu onamutolotxe dhavi “Babilónia, muthethe munddimuwa”?
3 Kengesa Ovuhulela 17:5, 15-18. “Babilónia, muthethe munddimuwa” onele otolotxiwa! Ninga mulogeliwe mundduni, alamuleli a mwilaboni kanawodhe wang’anela dhilobo dhinapadduwe nsakanene ntto. Sabwaya jani? Sabwani “Ddi Mulugu wikile mmirimani mwa amwene abale kumi mobuwelo aba owirana dhitadileye.” Mobuwelo gani? Otolotxa makuru etene a marelijiau ottambi. * Mulugu onele wika dhitadileye mmirimani mwa “manyaga kumi” na mwa “enama enddimuwa yofila.” Manyaga kumi antonya makuru otene a politika anang’anela “enama enddimuwa”—eli akadda Nações Unidas. (Ovuh. 17:3, 11-13; 18:8) Vanarome alamuleli osadduwela marelijiau onyengetta, enele olagiha wi goi enddimuwa ehiroma. Nipadduwo ntti ninele otxutxa elabo yotene.
4. (a) Txini enatukulele alamuleli ofuna otolotxa marelijiau ottambi? (b) Txini enakose abale ankosa mpaddi wa marelijiau ottambi?
4 Iyo kaninziwa mowakwana-mwene txini enattukulele alamuleli ofuna omutolotxa Babilónia Munddimuwa. Txino awene anele ologa wi marelijiau anozuzumiha murenddele wa mwilaboni vina anovowelana na politika. Obe txino anele ologa wi makuru a marelijiau anohugela dhorela dhinjidhene na mafumoya. (Ovuh. 18:3, 7) Enkala ninga, wi otolotxiwa oku kunapatte emeleli otene a marelijiau aba ottambi. Ottiya ejo, entonyihedha wi alamuleli enjene anele orabela okala na makuru aba a marelijiau. Marelijiau otene ottambi agatolotxiwa, emeleliya anele ononelamo wi asogorheli awa awobana vina anele okala wolapelana-wene na marelijiau abale.
5. Txini elibelile okosa Yehova mudhidhi wa goi enddimuwa, nanda sabwaya jani?
5 Bibilia kanlagiha mudhidhi gani onagonele otolotxiwa wa Babilónia Munddimuwa, mbwenye iyo ninoziwa wi kunattukule mudhidhi mwinjene. (Ovuh. 18:10, 21) Yehova olibela wi iyene onele ‘ovugula masiku’ a goi enddimuwa sabwa ya “abale asakulileye” vina wi Akristu ebaribari avuneye. (Mk. 13:19, 20) Mbwenye txini ennifunana Yehova wila nikose goi enddimuwa ehinatti oroma vina koddo ya Armageddo?
NIDHOWEGEVI NIFWARAGA WEBEDHA WEBARIBARI
6. Ottiya ogwadda bahi mandano na marelijiau ottambi ninfwanyelela okosa eni?
6 Ninga musunzelihu mutoma ovirile, Yehova onjedhela wi alabeli aye avirabelihe Babilónia Munddimuwa. Nona okosa eji, enopitta ogwadda mandano na marelijiau ottambi. Ninofwanyela odhowavi nifwaraga webedha webaribari—oli omwebedha Yehova mowakwana-mwene. Ndoweni none mikalelo minli dhinaniwodhihe okosawa.
Masiki na makattamiho kanittiye otugumana mumodhani (Koona ddima 7) *
7. (a) Ninawodhe dhavi okala ovikomene na magano oligana a Yehova? (b) Ninga munlogela Ahebreu 10:24, 25 ekalele nni yamakamaka otugumana vamodha?
7 Woroma, ninofwanyela okala ovikomene na magano oligana a Yehova. Iyo kanifwara magano vina yeddelo ya elabo ejino. Motagiha, iyo kaninrumela mukalelo bu mukalelo wa mararuwo wonyakuwa, oli otelana wa attu a vyano modhene vina mikalelo dhina dhoraruwa. (Mt. 19:4, 5; Rom. 1:26, 27) Wanawili, nidhowegevi nimwebedhaga Yehova vamodha na abalihu. Iyo ninodhowavi nitugumanaga, masiki Onumbani Dhomwene, mmawani mwa abali, vina mmimburoni dhoviteya. Masiki na dhilobo dhinapadduwe, iyo kaninattiye otugumanaga vamodha nimwebedhaga Yehova. Txibarene, ninofwanyela otugumana vamodha “apa vanziwehu wi siku na Nabuya nli vakuvi.”—Kengesa Ahebreu 10:24, 25.
8. Matxinjo gani txino anapadduwe musogorho na miselu dhinlaleyihu?
8 Mu goini enddimuwa, txino miselu dhinlaleyihu ovanene dhinele otxinja. Ovano, iyo ninlaleya miselu dhapama dha Omwene vina ninovilibihedha wakosa anamafwara. Mbwenye mu goini enddimuwa, miselu dhehu txino dhinakale dhovadda, ninga maralala manddimuwa-nddimuwa. (Ovuh. 16:21) Txino ninalaleyege wi elabo ya Satana enele otolotxiwa. Mudhidhene obo, ninele oziwa pama museluya onalaleyihu vina mukalelo onalaleyihu. Ninalabihedhe marhe akakene alabihedhihu okwaranya vyaka zana wila nakwanihe mabasa ehu olaleya? Obe ninele olabihedha marhe mena maswa? Kaninaaziwa. Masiki nihiziwaga, enakale gari olaleya muselu wothonga wa Yehova!—Ezek. 2:3-5.
9. Alamuleli amwilaboni anoonemo dhavi muselu onalaleyehu, nanda txini enfanyeelihu okuluvela?
9 Enkala ninga wi, muselu onalaleyigihu onele wasilidha alamuleli a mwilaboni atamelaga onimaaliha kakamwe. Iyo ninomukuluvela Yehova onnikamihedha mmabasani olaleya ovanene, nona ninokuluvela wi onele onikamihedha vina musogorho. Kavali waganyedha wi Mulugu wehu onele onivaha guru yokosana dhinfuniye.—Mik. 3:8.
OKALE OMALA NAWALE NSAKA NINALUPELIWE NLOGO NA MULUGU
10. Mowiwanana na Luka 21:25-28, nlogo na attu ninewelemo dhavi dhilobo dhinapadduwe mu goini enddimuwa?
10 Kengesa Luka 21:25-28. Mu goini enddimuwa, athu anele odhaala marimaddi ovaga dhawopiha dhinfuna opadduwa mwilaboni. Awene anele ‘odhugudheya,’ nona anele wova okwa mudhidhi onapadduweliwe nlogo na athu dhilobo dhawopiha. (Sof. 1:14, 15) Nsakanene-ntto, txino attu a nlogo na Yehova anele ofwanyiwa dhorutxa. Vowi kaninkosa mpaddi wa elabo, txino ninele ofwanyiwa makattamiho orutxa. Mohaganyedha ninele ojombeliwa dhilobo dhamakamaka.
11. (a) Anamoona a Yehova anaganeliweni otolotxiwa? (b) Sabwaya jani ehinfanyeelihu wova goi enddimuwa?
11 Mudhidhene obo, attu abale akosa mpaddi wa marelijiau atolotxiwe anele wona wi Anamoona a Yehova anodhowavi akosaga webedha webaribari. Kobuwela mbigiddi onakalewo, awene anele osilidhiwa vamodha na attu anvaviha miselu. Alamuleli amwilaboni vamodha na Satana, anele onidda sabwani relijiau yehu kinatolotxiwe. Awene kanawodhe wakwaniha yogana yawa ya ogomiha marelijiau otene velaboni ya vati. Nona awene anele ofuna wi anitolotxe. Mudhidhene obo, alamuleli amwilaboni anakale ninga Goge wa Magoge. * Awene anele ovitaganyiha wila alupele nlogo na Yehova. (Ezek. 38:2, 14-16) Eji txino enele onittukulela oroma wova mwaha wa dhilobo dhinapadduwe, makamaka sabwa yohiziwelamo pama. Mbwenye ninofwanyela okuluvela elobo modha: Yehova onele onivaha malago wila niviluwe. Nona kaninfwanyela wova goi enddimuwa. (Masal. 34:19) Ninele wakwanihedha mazu awi “libihaní murima, thukulelaní kove odhulu, vowi woboleliwa wenyu oli vakuvi-kuvi.” *
12. Txini ennikosela “mwimeleli wororomeleya, wamalago” wi niviluwe siku na Yehova?
12 “Mwimeleli wororomeleya, wamalago” ononishagiha wi nikalevi ororomeleyene mmasosoni manddimuwa. (Mt. 24:45) Iyene onlabihedha mikalelo dhottiyana-ttiyana, kobuwela yotagiha modha: mitugumano dha ttattamwa dha vyaka ya 2016-2018. Mmitugumanoni esi, muhilogiwa mikalelo dhinfanyeelihu wunuwiha wi niviluwe siku na Yehova. Ninele wubutxedhana mikalelodha esi.
KALANIVI OWEDDEYANA NA YEHOVA, NIKALELE NTIDI, VINA OLIBE MURIMA
Ovisasanyedhe ovanene wila oviluwe “mmasosoni manddimuwa” (Koona ddima 13-16) *
13. Ninawodhe dhavi wunuwiha weddeyana wehu na Yehova, nanda ovanene ninfwanyelela okosa eni?
13 Oweddeyana: Mutoma wa mutugumano wa ttattamwa wa 2016 wali “Kalanivi oweddeyana na Yehova!” Mutugumano obu ohinisunziha wi, wila nikane mandano na Yehova, ninofwanyela okala oweddeyana na iyene. Diskursudha dhihilagiha wi enowodheya okana mandano ofiyedheya na Yehova modhela olobela na murima wotene vina okosa masunzo otibeleya a Bibilia. Okosa dhilobo esi dhinonivaha guru dha okwaranya makattamiho orutxa. Velani ninowaddamela omagomo wa elabo ya Satana, ninojeedhela ogumanana makattamiho anehe weddeyana wehu na Mulugu vina na Omwene waye. Txino attu anele odhowavi anibeddaga. (2 Ped. 3:3, 4) Eji enapadduwe makamaka sabwa yohikosa mpaddi wa elabo ya Satana. Ninofwanyela wunuwiha weddeyana wehu ovanene, dhawene ninele okalavi oweddeyana nsaka na goi enddimuwa.
14. (a) Dhosadduwa gani dhinapatte abali annisogorhela velaboni ya vati? (b) Ninfanyelela nni okala oweddeyana nsakanene ntto?
14 Nsaka na goi enddimuwa, anele okalawo masadduwo anaapatte abali abale annisogorhela velaboni ya vati. Na mudhidhiya, Akristu otene ottikitteliwa anele ottukuliwa odhulu wila arabe koddo ya Armageddo. (Mt. 24:31; Ovuh. 2:26, 27) Eji entapulela wi Nikuru Nolamulela kaninagoneele vamodha na iyo velaboni ya vati. Mbwenye, muthithi munddimuwa onele okalavi wowiwanana. Anele okalawo abali a malago ananisogorhele. Enele ofuneya wi nitonyihedhe weddeyana wehu modhela wavilela vina ofwara malago anvahiwani na Mulugu. Wila nivuneye enofuneya wiwelela malago aba!
15. Ninawodhe dhavi wunuwiha ovilela wehu, nanda ekalele nni yamakamaka okosa ovanene?
15 Nikalele ntidi: Mutoma wa mutugumano wa ttattamwa wa 2017 wali “Nikalele ntidi!” Mutugumano obu, onikamihedha wunuwiha ewodhelo yehu ya ovilela makattamiho. Nihisunza wi okana ntidi kuniwanana na makalelo ankalihu. Ninawodhe wunuwiha ovilela wehu modhela omukuluvela Yehova. (Rom. 12:12) Kaninfwanyela odduwala elibelile Yezu: “Ole onadidele oddiroromela ofiyana omagomelo, odduwene ddinavulumuwe.” (Mt. 24:13) Nipikirelo ntti nintapulela wi ninofwanyela okalavi ororomeleya masiki na makattamiho ottiyana-ttiyana angumanihuna. Nigavilela magudulano angumanihuna ovanene, ninele owodha okana ntidi nsaka ninarome goi enddimuwa.
16. Oliba murima webaribari onda wuvi, nanda ninawodhe dhavi wunuwiha oliba murima ovanene?
16 Olibe murima: Mutoma wa mutugumano wa ttattamwa wa 2018 wali “Olibe murima!” Mutugumano obu ohinubutxedha wi oliba murima kundela sabwa ya ewodhelo yehu. Dhawene ninga okana ntidi, oliba murima webaribari ondela mwaha wa omukuluvela Yehova. Ninawodhe dhavi wunuwiha omukuvela wehu iyene? Modhela omwengesa Bibilia malabo otene vina otanalela mukalelo ovunile Yehova nlogo naye nsaka nawale. (Masal. 68:20; 2 Ped. 2:9) Alamuleli a mwilaboni aganilupela mudhidhi wa goi enddimuwa, iyo ninofwanyela okala oliba murima vina omukuluvela Yehova vopitta. (Masal. 112:7, 8; Heb. 13:6) Nigamukuluvela Yehova ovanene, ninele okana oliba murima onfuneya wila nivilele olupela wa Goge. *
KAJEEDHELA OFURULIWA WAWO
Yezu na anyakoddo aye a wirimu mohigoneela anele ovolowa mukoddoni ya Armageddo wi atolotxe amwiddani a Mulugu! (Koona ddima 17)
17. Sabwaya jani ehinfanyeelihu omova Armageddo? (Koona foto ya kapa.)
17 Ninga moonelihu mutoma ovirile, iyo ninkalawo masiku omariha. Mbwenye ninojeedhela wi ninele oviluwa nsaka na goi enddimuwa. Koddo ya Armageddo enele ogomiha kakamwe elabo eji yabure. Egali dhawene, kaninfwanyela wova. Sabwaya? Vowi ddi Mulugu onawane nawene. (Gano 1:33; Ezek. 38:18-20; Zak. 14:3) Sabwani Yehova agavaha ezinddiyelo, Yezu Kristu onele osogorhela nikuru na anyakoddo. Iyene onakale vamodha na attikitteliwi anavenyihiwe mukwani vina na matxikwi menjene a anju. Vamodha, otene anele oraba koddo na Satana, adomonyo aye, vina alamuleli a velaboni ya vati.—Dan. 12:1; Ovuh. 6:2; 17:14.
18. (a) Txini elibelile Yehova? (b) Mowiwanana na Ovuhulela 7:9, 13-17 nikuluvelo gani ninihuna mwaha wa musogorho?
18 Yehova olibela wi: “Nona kaiwo epano enawodhe ounonga.” (Iza. 54:17) “Muthithi munddimuwa” wa emeleli ororomeleya a Yehova anele oviluwa “mmasosoni manddimuwa”! Nomala awene anelege odhowavi amulabelaga Yehova. (Kengesa Ovuhulela 7:9, 13-17.) Japama oziwa nikuluvelo ninnivaha Bibilia mwaha wa musogorho! Iyo ninoziwa wi Yehova “onowakapelela animuroromela.” (Masal. 31:24) Otene animukwela vina animuttittimiha Yehova anele wagalala wona okoddelihiwa wa nzina naye.—Ezek. 38:23.
19. Njedhelo gani nowagalaliha ninihuna na musogorho mpu munaddamela?
19 Kobuwela egakalelani yapama mazu aba ali va 2 Timóteo 3:2-5 kulogaga mwaha wa elabo eswa munakale attu ahinpattiwa na dhubuwelo dha Satana. (Koona kasha “ Mukalelo Onakale Athuya.”) Mbali George Gangas, * olabile mpaddi wa Nikuru Nolamulela, ohiloga: “Mwilaboni munele okala mowagalala mugakala abali obe arogora bahi! Mohigonela weyo onele okana gari yokala mwilaboni eswa. Onelege okalawo ninga munkalelawo Yehova. Ninele okana egumi yohimala.” Txibarene ntti njedhelo nowagalaliha!
JIBO 32 Nikale Ovikoma, S’ohittekenyeya!
^ par. 5 Iyo ninoziwa wi mohigoneela ninele ogwela “mmasosoni manddimuwa.” Txini enapadduwele emeleli a Yehova mudhidhene obo? Txini enafune Yehova wi nikose? Mikalelo gani dhinfwanyeelihu wunuwiha ovanene wi nikalevi ororomeleyene? Ninele osunza mwari mwa mutoma obu.
^ par. 3 MAZU MEENA ATAPULELIWE: Makapela Okristu nikuru na marelijiau ninloga aninfara Kristu mbwenye kaninsunziha omwebedha Yehova mowiwanana na magano aye.
^ par. 11 MAZU MEENA ATAPULELIWE: Nzu ntti Goge wa Magoge (obe Goge bahi) enaddiwana ogumanihiwa wa malogo otene abuwene anfuna olupela nlogo na Yehova nsaka na goi enddimuwa.
^ par. 11 Wi ononelemo dhopadduwa dhinattukulele koddo ya Armageddo, koona kapitulu 21 ya nivuru O Reino de Deus já Governa! Wila niziwe mwaha wa olupela wa Goge wa Magoge vina mukalelo onabarele Yehova nlogo naye mwari mwa Armageddo, koona kapitulu 17 na 18 ya nivuru A Adoração Pura de Jeová É Restaurada!
^ par. 16 Mutugumano wa ttattamwa wa 2019 na mutoma ‘Okwela txipo kunamale-wene!’ ononilibiha oziwa wi enowodheya okala obareleyene na okwela wa Yehova.—1 Kor. 13:8.
^ par. 19 Koona mutoma: “Suas obras o seguirão,” mu A Sentinela de 1.° de Dezembro de 1994.
