1. Ninfwanyelela nni omwebedha Yehova na murima wotene?

YEHOVA onofwanyela webedhiwa sabwani ddi Muttanddi wehu, ddiyene Onivahile-Egumi. (Ovuh. 4:11) Mbwenye, ninofwanyela okala txenjewa. Masiki nimukwelaga vina nimurihaga Yehova, ninodha ottiya dhilobo dhina oja mudhidhi womwebedha iyene. Ninofwanyela ononelamo mukalelo ogadhilani opadduwa ejoya. Vamaromo, ninofwanyela oziwa entapulela omwebedha Yehova na murima wotene.

2. Mowiwanana na Obudduwa 34:14, txini entapulela omwebedha Yehova na murima wotene?

² Mbibiliani, omwebedha Mulugu bahi onovaha monelo wa omukwela na murima wotene. Omwebedha Yehova na murima wotene, entapulela omwebedha iyene bahi. Kanittiye wi muttu obe elobo-txilobo ekale vamburoni va omwebedha Yehova na murima wotene.—Kengesa Obudduwa 34:14.

3. Omwebedha wehu Yehova ohinfwanyelela nni okala webewene?

³ Omwebedha wehu Yehova kahiyo wa ebewene. Sabwaya jani? Sabwani ejo eniwanana na ebaribari, mwa dhilobo dhisunzilihu mwaha wa iyene. Iyo ninoziwa vina ninotikina mikalelo dha Yehova. Ninoziwa esile dhinimuzivela vina dhihinimuzivela. Ninononelamo vina ninokamihedha efunelo yaye. Gari enddimuwa okana omarho na Yehova. (Masal. 25:14) Nigasunzagavi mwaha wa Muttanddi wehu ninele okalavi ofiyedheya na iyene.—Tia. 4:8.

4. (a) Txini enlabihedha Ddiabo wi obanihe efunelo yehu ya omwebedha Yehova? (b) Txini enasekeserhihu mwari mwa nsunzo ntti?

 ⁴ Ddiabo ddinang’anela elabo eji yabure, nona iyene onolabihedha elaboya wila apure dhifunelo na dhowobana dhehu. (Ef. 2:1-3; 1 Jo. 5:19) Enfuniye ja ogawa murima wehu wila nihimwebedhe Yehova na murima wotene. Ndoweni none mikalelo minli dhinlabihedhiye wila awodhe onobaniha. Voroma, iyene ononipupurutxa na efunelo yotamela orela, yanawili, ononikwekwettela osakula mavego abure.

5. Ninfunelani okala txenjewa wi ninonuwihe okwela kobiri?

⁵ Notene nibaliwana efunelo yokaana dhoja, guwo dhokoddela, vina okala vamburoni vofwasa. Mbwenye ninofanyela okala txenjewa wi ninarome wunuwiha efunelo yokwela kobiri. Attu enjene ankosa mpaddi wa elabo ya Satana “anamajiwa murima na kobiri” vina anzuzumela dhilobo dhinwodhani ogula na kobiri. (2 Tim. 3:2) Yezu wanziwa wi anamafwara aye agahikwekwetteleya wunuwiha mukalelo obu wa okwela. Iyene wahiloga wi “Kawo onwodha walaba anya eli: agamukwela mmodha, onomwidda mwina; agamulaba mmodha, onompwaza mwina. Nona kamunwodha ovilevela Mulugu, ovilevela muhaku.” (Mt. 6:24) Muttu onimwebedha Yehova oku anongaga mudhidhi mwinji vina guru atamelaga okana dhorela dhamwilaboni mpuno, mwebaribari ontamela walaba anya eli. Muttu oddu kanimwebedha Yehova na murima wotene.

6. Ninsunzavo eni na mazu a Yezu avahiliye mulogo wa Laodiseya?

⁶ Omagomelo wa vyaka zana dhoroma E.C., mulogo wa Laodiseya anyayamo  anvittittimiha eraga “Ddirela, ddiwúgela nifumo, kaddinjombeliwa elo.” Mbwenye vamentoni va Yehova vina va Yezu, awene yali ‘asegedheyi, ahawi, ayelegi, aliba ohona, attu osiwa.’ Yezu wahavaha malago, ottiya sabwa yokala areeli, mbwenye sabwa yawi awene ankwela dhorela vina ampwaza mandano awa na Yehova. (Ovuh. 3:14-17) Akala iyo ninowona wi mmirimani mwehu munowunuwa efunelo eji, momaguva-mwene ninofwanyela osisigula mobuwelo wehu. (1 Tim. 6:7, 8) Nigahisisigule, murimehu onele ogaweya vina Yehova kanarumeele webedha wehu. Sabwani “Mulugu ddwa aje.” (Olib. 4:24) Kobiri egadhile dhavi okala elobo yamakamaka mwigumini mwehu?

7-9. Onsunzavo eni na yotagiha ya munddimuwa dhahi wa mulogo oniliwa David?

⁷ Koona yotagiha ya David, munddimuwa dhahi wa mulogo wa Estados Unidos. Iyene ohiloga wi wali namalaba wokuluveleya. Wahivahiwa ettomo omabasani walabiye vina wahiziweya ninga namalaba wapama wa elabo ejile. David ohiloga wi: “Nsaka nttile miyo dhobuwela wi ddi Yehova waruriha gari ejile yanna miyo.” Mbwenye ddi Yehova waruriha-wene?

⁸ David wahiroma wona vizinddiyelo dhatonyihedha wila mabasaye ela ogwadda mandano aye na Yehova. Iyene ohiloga: “Ddigakala mmatugumanoni vina mmalaleyelo miyo ddobuwela mwaha wa makattamiho omabasani waga. Miyo ddankaana kobiri yinji, mbwenye ddakala onyonyeyene vina vatakulu makani kamalavo.”

⁹ David wahinonelamo wi onofwanyela osisigula dhogana dhaye. Iyene ologa: “Ddahigana osaddulela mukalelo wa mwigumini  mwaga.” David wanfuna otxinja mudhidhi waye wa mabasa, nona wahiloga na mwimeleli womabasani waye. Edhile opadduwa? David wahiyelela ganyo yaye! Iyene wakosile eni? Iyene ohiloga: “Labo nanawili, ddahittikitta njangarha nolaba ninga pionero wokamihedha.” Wila avikamihedhe, David na mwadhiye ahiroma olaba mabasa okuputta mimburo. Na mudhidhiya, David vamodha na mwadhiye ahilaba ninga apionero a mudhidhi wotene. Atelani aba ahisakula okosa mabasa ovevuwa abuwene apwaziwa na attu enjene, mbwenye mwa awene mabasa abale kayali vamburoni voroma. Ottiya ejo, kobiri yattambirhani yali eng’onovi mottiyana na ejile yattambirhani wale, masiki dhawene, vamwerini, awene anwodha ogula esile dhajombela. Efunelo yawa yali ya omwika Yehova vamburoni voroma vina ahinonelamo wi iyene onowakoya abale anzuzumela mabasa Omwene.—Mt. 6:31-33.

10. Ninawodhe dhavi okoya murima wehu?

¹⁰ Masiki akala nili areeli obe ayelegi, ninofwanyela okoya murima wehu. Dhavi? Kanittiye wunuwiha efunelo ya okwela dhorela. Vina kuttiye wi ganyo ekale vamburoni voroma mwigumini mwawo opitta omulabela Yehova. Onaziwe dhavi akala eji enoupadduwela? Kavivuze: ‘Ddigakala omatugumanoni obe omalaleyoni ddinowubuwela mwaha wa ganyo yaga? Dila dhotene ddinozuzumelaga okoya kobiri wila dhiddikamihedhe musogorho? Ddinottiya wi kobiri obe dhorela dhitote makattamiho vamateloni vaga? Ddigahirumela ganyo yovevuwa wila ddiwodhe ovilibihedha mmabasani a Yehova?’ (1 Tim. 6:9-12) Nigavikosaga mavuzo aba, ninofwanyela wubuwela okwela wa Yehova vina nipikirelo naye nabale animwebedha iyene bahi: “Miyo kaddinauthiye weka, kaddinaunyanyale.” Nona murumiwi Paulo oleba: “Kamujiwe murima na muhaku.”—Aheb. 13:5, 6.

11. Mavego ansakula muttu animpatta dhavi?

¹¹ Yehova onfuna wi nikaane egumi yowagalala, vina mavego anowakwanihedha wagalalawa. Nona, Mazu a Mulugu anologa dhahi “Kaiwo elo enimuthabiha muthu ehili oja, omwa, ojavo dhipurileye na mabasaye.” (Koh. 2:24) Mbwenye, mavego menjene amwilaboni anonikwekwettela mubureni. Mavegoya anoveyiha mweddelo wapama wa attu, anowattukulela okosa—obe okwela—dhilobo dhinidda Mulugu.

12. Mowiwanana na 1 Korinto 10:21, 22, ninfwanyela nni osakula mavego nofwaseya?

 ¹² Iyo ninfuna nimwebedhe Yehova bahi na murima wotene, nona kinkala “oja dha Nabuya vina dha muya dhabure.” (Kengesa 1 Korinto 10:21, 22.) Oja vamodha na muttu mwina ezinddiyelo yomarho. Akala iyo ninosakula mavego anlagiha opanga, masarhapitto, mararuwo, obe dhifunelo dhomaningoni na mereloya, entonyihedha wi ninoja dhoja dhisasanyedheliwe amwiddani a Mulugu. Yodhelavoya jawi, enele onipupurutxa vina oputtula mandano ehu na Yehova.

13-14. Mowiwanana na Tiago 1:14, 15, sabwaya jani enfwanyelihu okalela txenjewa mavego ansakulihu? Kavaha yotagiha.

¹³ Na mukalelo mwina, mavego anoladdanihiwa na dhoja. Nigajaga, ninowodha wang’ananiha elobo enfunihu wika mwano. Egafiya mbani enovapeya, mpaddi mwina enonikamihedha, epaddi yina kinttidda mabasa. Yoja yapama enolibiha maningo ehu; yoja yabure enoputtula maningoya. Yodhelavoya kinoneya momaguva-mwene, mbwenye na mudhidhiya enele woneya.

¹⁴ Yakakene jimpadduwa, nigasakulaga mavego, ninowodha wang’ananiha anfwanyelihu wika muyubuweloni mwehu. Mavego ansakulihu anovapeya muyubuweloni vina anopatta murima wehu. Mavego apama anowodha onilibiha; oku mavego a bure anoniputtula. (Kengesa Tiago 1:14, 15.) Dhodhavo dha mavego oputtula kadhinooneya momaguva-mwene, mbwenye na mudhidhiya dhinowooneya. Nona Bibilia ononaddela: “Kamuvipele malago: Mulugu kanvegiwana. Muthu-muthu oner’osinanga yàlileye. Onàla dhinziveliwa maningo, milimadhá dhinsinangiye dhinkala okwa.” (Gal. 6:7, 8) Jamakamaka orabela mavego otene anlagiha dhilobo dhinidda Yehova!—Masal. 97:10.

15. Mvaho gani onivahile Yehova wila nagalale?

¹⁵ Abali enjene anoziveliwa wona vidiyu dhehu dha mu JW Broadcasting^®. Murogora dhahi oniliwa Marilyn ohiloga: “JW Broadcasting onoddikamihedha okala wolibene vina kaddinfwanyela okalela txenjewa miseludha. Ddigakala meka obe ookubanyene, ddinolibiheya ddigonaga madiskursu obe Webedha wa Membesi wa anamudhi o Betel. Eji enoddittukulela okala wofiyedheya na Yehova vina na nikuru naye. Masasanyedho a TV JW Broadcasting ahisaddula egumi yaga.” Weyo onotamalela mvaho obu wa Yehova? Ottiya masasanyedho a vamwerini bahi, TV JW Broadcasting onodhana jibo dhovuruwana vina mavidiyu ottiyana-ttiyana abuwene anawodhiwe wona vina ovuruwana.

16-17. Sabwaya jani enfwanyelihu wang’ananiha mudhidhi onongihu na mavego, nanda ninawodhe okosa dhavi?

¹⁶ Ninofwanyela wang’ananiha mavego ehu, ottiya wang’ananihavi nikale pasope na mudhidhi onongihu na mavegoya. Nigahikose dhawene, ninele ononga mudhidhi mwinjene na mavego opitta mudhidhi onimulabelihuna Yehova. Attu enjene ahifwanyiwa makattamiho o wang’ananiha mudhidhi onongani na mavego. Murogora dhahi oniliwa Abigail wa vyaka 18 ologa: “Ddigavira labo nampu ddilabaga, wona TV enoddikamihedha ovuma. Mbwenye ddigahikale mento, ddinowodha ononga mawora menjene ddang’anaga TV.” Muzombwe oniliwa Samuel ologa: “Ddihinonelamo wi ddinowonaga mavidiyu menjene ohigonela a mu interneti. Ddinroma wona modha-modha, ddigamala ddinrurumuwa bavirile mawora mararu obe manai.”

 ¹⁷ Onawodhe dhavi wang’ananiha mudhidhi onongiwe na mavego? Ttarho yoroma ja ononelamo mudhidhi onongiwe waredhaga. Katamela oleba mudhidhi onongiwe mwari mwa sumana modha. Kalebela va kalendariyuni mawora anongiwe woonaga TV, opepesaga mu interneti, vina waredhaga na muttitto wawo. Oganonelamo wi ononga mudhidhi mwinjene, katamela otxinja masasanyedhoya. Kakana mudhidhi woroma okosa dhilobo dhamakamaka, ngamala mudhidhi mwina wa mavego. Osogorhowa, omukumbirhe Yehova wi awukamihedhe osoriha masasanyedhoya. Nejuwene weyo onele okana mudhidhi vina guru, yozuzumela nsunzo na Bibilia nomwinya, webedha wa ntakulu, wa matugumano a mmulogoni, vina womulabela Yehova mmabasani olaleya na osunziha. Txino weyo onele oziveliwa na mudhidhi onongiwe na mavego sabwa ya omwika Yehova vamburoni voroma.

18-19. Ninawodhe dhavi olagiha wi ninomwebedha Yehova na murima wotene?

¹⁸ Mmaleliye ologa mwaha wa ogoma wa elabo ya Satana vina odha wa elabo eswa, murumiwi Pedro ologa: “Nona amudhaga okweleya, mujyedhege mapadduwo abo, tamelani okalawo na murima ngwirho, muhinna yosumululiwana vamentoni va Mulugu, mweddaga na murenddele.” (2 Ped. 3:14) Nigewelela malago aba vina nigavilibihedha odhowavi nitxenihaga mweddelo wehu womaningoni na womuyani, ninele otonyihedha wi ninomwebedha Yehova na murima wotene.

¹⁹ Satana na elabo yaye anele odhowavi atamelaga osaddula dhogana dhehu. (Lk. 4:13) Mbwenye masiki na makattamiho angumanihuna, kanittiye wi muttu obe elobo-txilobo okala vamburoni va Yehova, mmirimani mwehu. Iyo nihigana onvaha Yehova dhininfwanyelela—omwebedha iyene bahi na murima wotene!