NAMANG’ANELA balau onroma wona etagano mwipanoni mwaye ya wonana balau onedda odhulu. Etagano eji enzinddiyeliha wi okala mpaddi onkala athu enjene onapadduwe pevo ya mutokora obe muzogwe munddimuwa vaddiddi. Namang’anela balau ole onothamagela wawaddela athu a murudda obule sabwani onowova wi athuya anapadduweliwe efoyo.

Yakakene, Yehova onowawaddela athu amwilaboni mwaha wa “pevo ya guru” yawopiha vaddiddi enaddamela, ngovi eji enokwaranya ngovi-ngovivi enlogiwaga na abale anzinddiyela ngovi dhimpadduwa mwilaboni. Yehova onvaha dhavi muselu obu? Vina ninfwanyelela nni okana ebaribari yawi iyene onowavaha mudhidhi mwinjene athu wi akose elobo-txilobo? Nihinathi wakula mavuzo aba, ndoweni nirome wona muselu walogile Yehova masaka a mundduni.

Mmasakani a Bibilia, Yehova wahiloga sabwa ya “pevo ya guru” enddimuwa vaddiddi obe othonga waye ogathongiliyena abale akoodda omwiwelela. (Gano 10:25; Jer. 30:23) Mbwenye iyene wanawaddela athu abo n’othaga vina wanawaddela txini yafwanyelani okosa wi onihe wiwelela wawa. (2 Amwe. 17:12-15; Nem. 9:29, 30) Wila akamihedhe attu abale, Yehova wanaruma emeleli aye ororomeleya a velaboni ya vati wi awaddele muselu wafuniyena, erelega wi awene asaddule merelo awa mowaguva.—Am. 3:7.

Mmodhavo wa aroromeli aba wali Nowé. Mwari mwa vyaka dhinjene iyene wahalaleya athu ali atimbwini vina awuma murima mwaha wa mpulo wafuna opadduwa mwilaboni ejile. (Wita 6:9-13, 17) Iyene wanawaddela txini yafwanyelani okosa wi avuneye—nona musogorhomwa elogiwa wi Nowé “wasunziha mukalelo wa muthu womyala murima.”—2 Ped. 2:5.

Masiki vawaddelavi Nowé athu abale, awene kafunile wiwa. Ali addiyamaru, nne karoromela esile dhaloga Mulugu na mulomo wa Nowé. Mbwenye oddiyamaru wawa ohaputhula vaddiddi, mudhele mpulo obule “wamedha etene,” nne mmodha kahalevo. (Mt. 24:39; Aheb. 11:7) Kawo muthu ogalogile wi Mulugu kawaddele.

Masaka menjene Yehova wanloga n’othaga ahinathi odhana “pevo ya guru” oli othonga waye. Masiki valogiye n’othaga, wanthiya wi ovire mudhidhi mwinjene ahinathi ogwiha ‘othongawa waye’, welela wi athuya atxinje ekalelo yawa. Yehova ahinathi ogwihedha Milili Kumi elabo ya Ejipitu, iyene waromile wawaddela anamakalamoya n’othaga. Ninga motagiha, iyene wahimuruma Mizé na Aroni wi amwaddele Faraó vamodha na emeleli aye wi mulili wa n’otanu na wili, ogali muzogwe wa mararala aganongile dhilobo dhinjene. Koddi mwari mwa labo nimodha muthu agahiveda mburo wi athawelevo? Bibilia onowakula: “Mwa emeleli a Faraó, ena amova Nabuya, athaweliha mmawani adhari awa na dhifuwo dhawa; vano abale ahamova Mulugu, aathiya adhari awa na dhifuwo dhawa mwalani.” (Obud. 9:18-21) Apa kavali waganyedha wi Yehova wahawaddela n’othaga emeleli a Faraó wi avisasanyedhe. Abale ewelele n’owaguva, kafwanyiwe efoyo ejile efwanyiwe athu ena.

Mulili wa n’okumi ohinathi opadduwa, Faraó vamodha na emeleli aye  ahaddeliwa wili. Mbwenye awene ali atolo, kafunile wiwelela dh’ologa esile. (Obud. 4:22, 23) Oputhuwawa wali wa wawona aniwa a athajiya akwaga. Yali ngovi yokubanyiha vaddiddi! (Obud. 11:4-10; 12:29) Koddi awene ahikaana mudhidhi wa wiwelela muselu wa ngovi eji n’othaga? Ndde! Mizé wahawaddela sabwa ya ngovi ejile vina wahava maswagiho a wavunana amudhawa. (Obud. 12:21-28) Athu angasi avuruwanile muselu obule wa Mizé? Mowiwanana  na dhopepesiwa, athu owakwana amiliau araru, a ana Izrayel vamodha na “athu enjene a vilabo dhothiyana-thiyana” ahali ana Izrayel vina akadda Ejipitu, otene ahivuruwana othonga wa Mulugu vina ovenyamo mu Ejipitu, nona ahivuneya.—Obud. 12:38.

Dhotagiha esi dhinowoniha wi Yehova wanavaha mudhidhi athu wila asaddulele merelo awa. (Olib. 32:4) Iyene wawaddelela nni athu aba? Murumiwi Pedro ohitapulelamo wi Yehova “kanfuna orimela wa muthu nne mmodha; onfuna wi etene afwanye mudhidhi worugunutxa murima.” (2 Ped. 3:9) Txibarene, Yehova wanafuna athu abale. Iyene wafuna wi awene asaddule merelo awa othonga waye ohinathi ofiya.—Iza. 48:17, 18; Rom. 2:4.

Masaka abano attu otene anowaddeliwa muselu wa namaguve, nona etene anofwanyela okosa elobo-txilobo. Yezu bali velaboni ya vati, wahawaddela athu wi elabo ejino enela ofwanyiwa ‘goyi enddimuwa’, enatolotxe dhilobo dhinjene. (Mt. 24:21) Iyene ohiloga mavuhulo, abuwene agonile anamafwara aye vina ohiloga dhopadduwa dhigoneyile waddamana na masaka a goyi enddimuwa. Mwari mwa mavuhulo abo iyene ohiloga dhawireya esuwene dhimpadduwa masaka abano.—Mt. 24:3-12; Lk. 21:10-13.

Vowi ninkala masaka aba anakwanihedheya mavuhuloya, Yehova onowawaddela athu otene muselu wawi awene anofwanyela ovisaddula. Iyene onfuna wi otene amwiwelele, sabwani ole onimwiwelela onokaana murenddele ovanene vina onela wakela mareliho apama mwilaboni eswa. (2 Ped. 3:13) Yehova onfuna wi athu aroromele mavuhulo aye—nona iyene onowavaha “Muthaka wapama,” Yezu wahiloga wi muselu obu onvuna dhigumi onela olaleyiwa “mwilaboni mwetemwene, wi malogo otene ewe.” (Mt. 24:14) Yehova onowaweddiha emeleli aye ororomeleya wi “avuwihe” muselu obu, obe aalaleye muselu wa Mulugu mu dhilabo dhina dhowakwana 240. Yehova onfuna wi athu otene avuruwane muselu waye wi avuneye nsaka na “pevo ya guru” enddimuwa wa othonga wa Mulugu onaddamela.— Sof. 1:14, 15; 2:2, 3.

Makaniya kahiye awi Yehova kanavaha athu mudhidhi wa ovisasanyedha. Ninga moonelihu, iyene mudhidhi wetene onowavaha athu gari ya ovisaddudulela. Mwaha wa makani aba, vanobudduwa nivuzo nthi: Athu anela wiwelela dhologa dha Mulugu mwari mwa mudhidhi obu ohalilewo? Mulugu ohinivaha gari ya olaleya muselu waye, nona onofwanyela okosa guru dhinwodhiwe wila wakamihedhe athu wi avuneye nsaka ninatolotxiwe elabo ejino.