1. Txini enkosa Yehova wi akwanihedhe efunelo yaye?

YEHOVA ononiwodhiha okosa enfunihu wi nakwanihe efunelo yaye. Motagiha, Yehova onokalaga Namasunziha, Namapangarhaza, Namalaleya Muttaka, esi dhotagiha dhing’onovi mwaha wa eliye. (Iza. 48:17; 2 Kor. 7:6; Gal. 3:8) Egali dhawene, iyene onowalabihedha athu wi akwanihedhe efunelo yaye. (Mt. 24:14; 28:19, 20; 2 Kor. 1:3, 4) Yehova onowodha onivaha eziwelo vina guru dhinfunihu wi niwodhe wakwaniha pama efunelo yaye. Dhetedhene esi dhiniwanana na ejile entapulela nzina na Yehova, ninga munlogela aziwetxi enjene.

2. (a) Dila dhina ninaganyedhela nni akala nigahiwodha olabihedhiwa na Yehova? (b) Txini enasekeserhihu mwari mwa mutoma obu?

² Notene iyo ninofuna olabihedhiwa na Yehova, mbwenye ena txino anowaganyedha akala Yehova agahifuna walabihedha. Sabwaya? Sabwani awene ankubanya mwaha wa vyaka, makattamiho obe ewodhelo. Mwa mpaddi mwina, ahikalawo ena anziveliwa na esile dhinkosani vina kanoona mwahaya wozuzumela okosa mabasa mena. Mwari mwa mutoma obu, ninele wona mukalelo onwodha Yehova onisasanyedha wila nakwanihedhe efunelo yaye. Nomala, ninele osekeserha dhotagiha dha mBibiliani dhinlagiha wi Yehova wahavaha adhari aye—alobwana na ayana—efunelo vina guru dhawirana mabasa. Omagomelowa, ninele osunza mukalelo onawodhihu ovittiya olabihedhiwa na Yehova.

3. Mowiwanana na monelo onlaga Filipi 2:13, Yehova onwodha dhavi onivaha efunelo yawirana mabasa?

³ Kengesa Filipi 2:13. * Yehova onowodha onivaha efunelo yawirana mabasa. Onwodha okosa dhavi? Txino ninoziwa wi mmulogoni mwehu mukala dhofuneya. Obe anddimuwa a mulogo anowengesa njangarha nindela o katti nilogaga mwaha wa dhofuneya dhili murudda wolapela na mulogo wehu. Yobuwelo yehu txino enakale, ‘Ddinawodhe okosa eni wila ddakamihedhe?’ Obe txino ninottomeliwa mabasa orutxa, mbwenye ninovivuza akala ninele owodha wakwaniha mofwanyela-mwene. Obe nigamalile wengesa nlebo na Bibilia, txino ninovivuza, ‘Ddinawodhe dhavi ovirihamo dhinsunzilemi wi ddakamihedhena attu ena?’ Yehova kanindidela okosa elobo-txilobo. Mbwenye agoona wi iyo nikana mubuwelo wa okosa mabasa, Yehova onowodha onivaha efunelo yodhowanavi vasogorho mubuwelo onihu, wokosa mabasaya.

4. Yehova onwodha dhavi onivaha guru dhawira mabasa?

⁴ Vina Yehova onowodha onivaha guru dhawirana mabasa. (Iza. 40:29) Iyene onowodha onivaha muya waye wokoddela wi onuwihe ewodhelo yehu. (Obud. 35:30-35) Modhela nikuru naye, Yehova ononisunziha owodha okosa mabasa ottiyana-ttiyana. Akala weyo kunawodhe wakwaniha mabasa attomeliwiwe, kakumbirha nikamihedho. Vina kakala wotapuwa wi omukumbirhe Babihu wokweleya wi awuvahe “owodha oku onddimuwa.” (2 Kor. 4:7; Lk. 11:13) Bibilia okana dhotagiha dhinjene dhinoniha mukalelo wavahile Yehova alobwana na ayana efunelo vina guru dhawirana mabasa. Mudhidhi onasekeserhegihu dhotagiha esi, katanalela mukalelo onawukamihedhe Yehova ninga yakoseliye attu ena.

5. Ninsunzavo eni na mukalelo omulabihedhi Yehova Mizé wi afurule nlogo Naye?

⁵ Yehova wahimukamihedha Mizé owodha wafurula ana Izrayel. Yehova omulabihedhi mudhidhi gani? Bu mudhidhi obule wali Mizé womala nawale mmaleliye “osunza onona wetene wa akadda Ejipitu?” (Mer. 7:22-25) Nne, Yehova omulabihedhi Mizé mmaleliye omusunziha okala muthu woviyeviha vina wokurumuwa. (Mer. 7:30, 34-36) Yehova wahinvaha Mizé oliba murima wi aloge na mulamuleli wa mu Ejipitu. (Obud. 9:13-19) Yehova omulabihedhi Mizé na mukalelo gani? Yehova onowalabihedha abale antonyihedha mikalelo dhapama vina ankuluvela guru dhaye.—Fil. 4:13.

6. Ninsunzavo eni na mukalelo omulabihedhi Yehova Barzelai wi amukamihedhe Mwene David?

⁶ Osogorhowa, Yehova wahimulabihedha Barzelai wi amukamihedhe Mwene David. David na attu aniyena ahitabuwa vaddiddi na “dala na nthona” mudhidhi wamuttawani mwana David, Absalau. Nsaka nttile, athu ena vamodha na Barzelai, mulobwana dhahi wa mwanakalaba, wahika egumi yaye vangovini wi amukamihedhe David na attu aniyena. Barzelai kobuwela wi sabwa ya wuluvala, kagawodhile olabihedhiwa na Yehova. Ottiya ejo, na murima wotene iyene wahivaha dhaniyena wila akamihedhena dhojombeliwa dha alabeli a Mulugu. (2 Sam. 17:27-29) Nsiminsunzavo eni na yotagiha eji? Kintanaala vyaka dhinehu, Yehova onowodha onilabihedha wi  nakwanihe dhojombeliwa dha abali a elabo yehu obe a elabo yina, abuwene anfuna nikamihedho. (Gano 3:27, 28; 19:17) Masiki akala kaninwodha wakamihedha nanyene, enowodheya operheka mivaho wila dhikamihedhiwena abali na arogora anjombeliwa ali mwilaboni mwetemwene.—2 Kor. 8:14, 15; 9:11.

7. Yehova omulabihedha dhavi Simeau, nanda ninawodhe olibiheya dhavi na yotagiha yaye?

⁷ Yehova wahinpikirela Simeau, mwanakalaba ororomeleya wakala mu Jeruzalemi, wi iyene kagakwile ahinatti omoona Mesiya. Simeau wahilibiheya vaddiddi na nipikirelo ntti, nona iyene wahijedhela vyaka dhinjene ofiya wa Mesiya. Iyene wahittuviwa sabwa ya nroromelo vina ovilela waye. Labo nimodha, “eddihiwaga na muyayá” iyene wahidhowa mumparhani. Wenewo wahimoona nyenye Yezu, vina Yehova wahimulabihedha Simeau wila avahe nivuhulo mwaha wa mwana oddule agakalile Kristu. (Lk. 2:25-35) Simeau kakalilewo mudhidhi mwinjene wi one mabasa akosile Yezu velaboni ya vati, masiki dhawene Simeau wahitamalela sabwa ya gari yaniye, vina njedhelo na musogorho! Mwilaboni eswa, mulobwana oddu wororomeleya onele wona mareliho anakele nlogo na attu velaboni ya vati na olamulela wa Yezu. (Wita 22:18) Iyo vina ninofwanyelela otamalela sabwa ya gari ennivaha Yehova mmabasani mwaye.

8. Yehova onilabihedha dhavi dhahene ninga emulabihedhiye Barnabé?

⁸ Vyaka zana dhoroma E.C., mulobwana dhahi wettaniwa José wali namavaha wahivivelela wi alabihedhiwe na Yehova. (Mer. 4:36, 37) Txino sabwa ya José oziveliwaga wavaha attu ena nipangarhazo, arumiwi ahimukuwela na nzina na Barnabé, nintapulela “namalibiha murima.” Motagiha, mmaleli Saulo okala Mukristu, abali ena ela wova omwaddamela sabwani iyene wahivuweya nekalelo yaniye yofwara-fwara milogo. Mbwenye, nokwela Barnabé wahimukamihedha Saulo, vina kavali waganyedha wi Saulo wahimutamaalela vaddiddi. (Mer. 9:21, 26-28) Osogorhowa, anddimuwa a mulogo a mu Jeruzalemi ahona wi abali o Antiokiya a Siria anfuna olibihiwa. Bani arumiwewo? Barnabé! Awene ahisakula apama. Sabwani Barnabé mudhowiliyewo “oakokomezela etene odidela wiwananeyana na Nabuya na murima wowarala.” (Mer. 11:22-24) Masaka abano, Yehova ononikamihedha okala a “namalibiha murima” dha Akristu akwehu. Motagiha, iyene onowodha onilabihedha wila napangarhaze abale akweliwe amudhawa okweleya. Obe, iyene ononilabihedha odhowa wawaredhela obe waligarela abale ali aredda obe ankubanya. Weyo onovittiya olabihedhiwa na Yehova dhahene ninga emulabihedhiye Barnabé?—1 Tes. 5:14.

9. Ninsunzavo eni na mukalelo omukamihedhile Yehova mbali oniliwa Vasily okala mukumbuzi wapama womuyani?

⁹ Yehova ohimukamihedha mbali oniliwa Vasily okala mukumbuzi wapama womuyani. Vasily ottomeliwe okala munddimuwa wa mulogo na vyaka 26, iyene wobuwela wi kagawodhile okamihedha mulogo, makamaka abali abale apattiwa makattamiho. Mbwenye, iyene wahakela nikamihedho na anddimuwa ena vina wahikosa Eskola ya Anamalaleya Omwene. Vasily wahivilibihedha vaddiddi na mabasa aye. Motagiha, iyene wahilebela dhogana dhafuniye wakwaniha. Vakwanihiye yogana modha-modha, wanwodha okwaranya wova waniyena. Iyene ohiloga: “Yadditxutxa mundduni ovanene enoddizivela. Yehova ohiddikamihedha ofwanya malebo a makamaka wila ddapangarhazena abali na arogora mmulogoni, eji enoddivaha wagalala.” Abali,  enowodheya nyuwo osunza na yotagiha ya Vasily, mukale womala nawale wi mulabihedhiwe na Yehova, iyene onowuvaha ewodhelo ya weddiha muthorho munddimuwa mmulogoni.

10. Txini ekosile Abigaíl, nanda onsunzavo eni yotagiha yaye?

¹⁰ David na alobwana aniyena ahiroma otxigiwa na Mwene Saul vina anfuna nikamihedho. Alobwana a David ahimukumbirha dhoja dhing’onovi mureli dhahi wa mu Izrayel wettaniwa Nabal. Awene koova okumbirhawa sabwani ahibarela mabila a Nabal ali mwiddeddereni. Mbwenye Nabal wali namakumbela waye nona kavahile elobwene. David wahisilidhiwa vina wahigana ompa Nabal vamodha na amudhaye otene. (1 Sam. 25:3-13, 22) Mbwenye, Abigaíl, mwadhi Nabal, wali wamalago. Wahitonyihedha oliba murima, wahinfiyedha David bamukokorela vina ahimukumbirha wi anampe Nabal na alobwana aye wi anakaane muladdu wa nikami. Noderetu Abigaíl wahimwaddela David wi akuluvele nikamihedho na Yehova. Na mazu oviyeviha vina a malago iyene wahiddiginya murima wa David. David wahinonelamo wi ddi Yehova omurumile Abigaíl. (1 Sam. 25:23-28, 32-34) Abigaíl wahikaana mikalelo dhapama nona wahilabihedhiwa na Yehova. Yakakene, arogora agonuwiha mikalelo dhoviyeviha vina amalago anowodha olabihedhiwa na Yehova wila aalibihe murala wawa vina walibiha abali ena a mmulogoni.—Gano 24:3; Tito 2:3-5.

11. Ana Salum akosile eni, vina masaka abano bani anatagiha?

¹¹ Osogorhowa, Yehova wahalabihedha ana Salum wila akamihedhe ovenyihedha ngome dha mu Jeruzalemi. (Nem. 2:20; 3:12) Masiki babiwa valiye musogorheli, anamwali aba ahivilevela okosa mabasa orutxa vina a wopiha. (Nem. 4:15-17) Awene ahittiyana na alobwana enaya avittukulela akadda Tekwa, “kafunile olaba afwaraga dháruma anameddiha mabasa”! (Nem. 3:5) Kobuwela wagalala wana ana Salum mugomeli mabasaya ovenyihedha ngome mwari mwa malabo 52! (Nem. 6:15) Masaka abano, arogora anowagalala modhela okamihedha mabasa avawoka—omaga vina ovenyihedha numba dhimperekeliwa Yehova. Ewodhelo, oziveliwa, vina weddeyana wawa onowawodhiha wakwaniha mabasaya.

12. Yehova onawodhe dhavi onilabihedha dhahene ninga Tabita?

¹² Yehova wahimulabihedha Tabita wunuwiha “murima munddimuwa, wazuzumela wakamyedha ahawi” makamaka amamukwela ayana. (Mer. 9:36) Attu enjene ahikubanya okwa waye, sabwani iyene wali namavaha vina wali muttu wa ttagaraga. Mbwenye awene agalala vaddiddi muvenyihedhiwiye mukwani na murumiwi Pedro. (Mer. 9:39-41) Ninsunzavo eni na yotagiha ya Tabita? Iyo notene masiki akala nili azombwe obe anddimuwa, alobwana obe ayana, ninowodha wavaha nikamihedho abali na arogora ehu.—Aheb. 13:16.

13. Yehova omulabihedhi dhavi murogora oniliwa Ruti wali muttu wa manyazo, nanda txini enoneliyemo?

¹³ Murogora dhahi oniliwa Ruti wali muttu wa manyazo, wahikala misionaria. Valiye namwali, iyene anttamaga numba na numba attiyaga mafolheto. Iyene ohiloga, “miyo ddanziveliwa vaddiddi mabasa abale.” Mbwenye, wawaddela attu ena miselu dha Omwene wa Mulugu yannimurutxa vaddiddi. Masiki bali muttu wa manyazo, Ruti wahiroma olaba ninga pionera wa mudhidhi wotene na vyaka 18.  Yaka ya 1946, iyene wahikosa Eskola ya Gileade vina osogorhowa wahidhowa olaba elabo yo Havaí vina Japão. Yehova ohimulabihedha na mukalelo wotikiniha wi alaleye miselu dhapama mu dhilabo esi. Mvireli vyaka 80 alaleyaga, Ruti ohiloga: “Yehova onoddilibihaga. Iyene ohiddikamihedha opemberha manyazo. Ddinorumeela wi Yehova onowodha omulabihedha muttu onimukuluvela.”

14. Mowiwanana na Kolosi 1:29, txini enfanyeelihu okosa akala ninofuna olabihedhiwa na Yehova?

¹⁴ Masaka otene, Yehova onowalabihedha adhari aye owodha wakwaniha mabasa ottiyana-ttiyana. Weyo onele ovithiya olabihedhiwa na Yehova? Eji eniwanana na mukalelo onvilibihedhiwe. (Kengesa Kolosi 1:29.) Akala weyo oli womala nawale, Yehova onowodha wulabihedha okala namalaleya wapama, namasunziha, namapangarhaza, namalaba oyesa, marho onkamihedha obe elobo-txilobo enfuniye wila wakwanihedhe efunelo yaye.

15. Mowiwanana na 1 Timóteo 4:12, 15, masaka abano elobo gani enfwanyela azombwe omukumbirha Yehova wila akamihedhe okosa?

¹⁵ Kito mwaha wa azombwe anaddamela onddimuwa? Mmulogoni munofuneya alobwana anna guru wi alabe ninga adhari okamihedha. Milogo dhinji dhikaana anddimuwa a milogo enjene vina adhari okamihedha. Akala weyo wa muzombwe, onowunuwiha efunelo yokamihedha mabasa a mmulogoni? Dila dhina abali ena anologaga: “Ddinowagalala sabwa yolaba ninga namalaleya bahi.” Akala onubuwela dhawene, kamukumbirhe Yehova wila awukamihedhe wunuwiha efunelo yokala mudhari wokamihedha vina awuvahe guru dha owodha olaba mmabasani mwaye. (Koh. 12:1) Iyo ninofuna nikamihedho nawo!—Kengesa 1 Timóteo 4:12, 15.

16. Txini enfwanyelihu omukumbirha Yehova, nanda sabwaya jani?

¹⁶ Yehova onowodha wulabihedha wila wakwanihedhe efunelo yaye. Nona, kalobela okumbirhaga efunelo yokosa mabasaye, vina omukumbirhe Yehova awuvahe guru dhinfuniwe. Masiki akala wa azombwe obe wa munakalaba, kalabihedha mudhidhi, guru, vina ewodhelo yawo wila omuttittimihena Yehova ovanene. (Koh. 9:10) Kuttiye wi wova obe dhubuwelo dhohifwanyelela dhuyelelihe gari ya ovilibihedha mmabasani a Yehova. Nikana gari enddimuwa ya okosa ninga munfunelihu wi ninvahe Babihu wokweleya nttittimiho nininfanyeelela!