Yehova onfuna wi atelani agalale, ewanane vina ahimwalane. (Mt. 19:4-6) Akala weyo onuwubuwela otela obe oteliwa, onawodhe dhavi onfwanya muttu wofwanyelela? Muttanddi wehu Yehova, onoziwa txini enfunihu wi nikaane weddelelana vina matelo owagalala. Nona, ogafara magano anivahiliye, onele okana wagalala webaribari. Koona magano mang’onovi.

Yoroma, ninofwanyela oziwa wi: ‘Kawo onwodha onona murima wa muttu, murima obo kunlagaye.’ (Jer. 17:9) Venevo vanziwana attu eli ana efunelo yotela obe yoteliwa agaroma weeddelelana efunelo yawa ya okala vamodha enuwunuwa momaguva, vasogorhova enorutxa otanalela makaniya na zelu. Muttu ongana otela obe oteliwa afwaraga murimaye na efunelo yaye, onokana makattamiyo. (Gano 28:26) Nona, kigakalile ya malago attu eli ahinziwana deretu oroma waddelana dha mmirimani mwawa. Vina egahikala ya malago awene oroma wubuwela dha otelana agaziwana deretu.

Gano 22:3 onloga: “Muthu wotxenjerha onozinddiyela mutanene dhawopiya onowere-wera, oku wotowa malago adhowelaga enimutotela goi mwinya.” Yowopiya gani eliwo ya olabiyedha saite dhinkamihedha onfwanya muttu womutela obe w’oteliwana? Mokubanyiha-mwene, ahikalawo attu anyegettiwe na attu ena aziwilani mu internetini. Ottiya ejo, ena anotxinja foto yawa mu internetini wi awiyele kobiri attu ohitxenjera. Mudhidhi mwina, attu aba anologa wi Anamoona a Yehova.

Koona yowopiya yina. Saiti dhina dhomagana matelo dhinolabihedha kalkulu dha matematika wi awodhe wona akala attu eli anofwanyelelana. Mbwenye marhe aba kanlaba. Kudduwale wi, matelo elobo yohivegiwana. Wonamo wawo, ogafunaga onveda muttu womutela obe woteliwana egahikala ya malago okuluvela saiti dha mwinternetini dhisasanyiwe na attu? Kalkulu dha matematika dhinofwanyelela oladdanihiwa na magano a mBibiliani?—Gano 1:7; 3:5-7.

Va Gano 14:15 ninofwanyamo nlago namakamaka ninloga: “Ole ohitxenjerile, onorumela dhetedhene dhiniweye; wamalago onoroma wubuwela dhiniweye.” Wila okane ebaribari wi muttuya onele okala mamuni obe muteliwi wa pama onofwanyelela voroma omuziwa deretu.  Jorutxa okosa ejuwene mwinternetini. Nyuwo txino munovahedhelana mafoto vina olebelana miselu, mbwenye onubuwela wi ejo jowakwana ofiyedha ologe wi onomuziwa deretu muttuya? Akalawo attu obuwela wi ahifwanya okwela webaribari mwinternetini mbwenye vagumanilani kove na kove ahitxutxeya.

Munasalmo ohiloga: “Kaddinedda na athu anawebedha amulugu ebewene, kaddinandana na abale anna mirima mili.” (Masal. 26:4) Wila akale attu okoddela ena kanikamo foto dhawa dhebaribari mwinternetini vina mu saiti yomagana matelo. Agalogaga na attu ena anovita elani dhinlogani sottapiravi. Jamakamaka oroma opima mavuzo aba: Akala muttu onologa wi Munamoona wa Yehova, iyene ohibatiziwa wene? Iyeneya ddoliba mpaddi womuyani? Okana mandano ofiyedheya na Yehova? Muttu oriheya mmulogoni? Yotagiha yohifwanyelela obe ‘mandano abure’? (1 Kor. 15:33; 2 Tim. 2:20, 21) Iyene txibarene muttu wotapuleya onfwanyela otela mowiwanana na magano a mBibiliani? Wila okane dhowakula dha mavuzo aba onofwanyela ologa na Munamoona wa Yehova onimuziwa deretu muttuya oninfuniwe. (Gano 15:22) Ebaribari wi, kawo Munamoona wa Yehova agafunile otela obe oteliwa na muttu ohili mwibaribarini vina bafiyedha ovijela ‘kanga yakokene.’—2 Kor. 6:14; 1 Kor. 7:39.

Ninga musunzilehu, olabihedha saiti dhomagana matelo jowopiha, mbwenye ahikalawo mare aderetu omuziwa muttu omagana matelo. Onanfwanye wuvi muttu wofwanyelela? Egahikalewo elobo enabarela okala vamodhavene, Anamoona a Yehova anogumanaga mmatugumanoni a mmulogoni, a murudda vina a ttattamwa.

Egahikale yowodheya otugumana vamodhavene, ninga motagiya, sabwa ya ezini eji ya COVID-19, iyo ninotugumana nilabihedhaga interneti. Mmatugumanoni-mwene mpu abali na arogora a aziye ahikana gari yoziwana muttu na mukwaye. Ninowodha vina ovuruwana mukalelo onkosa muttu muttu epaddaye na diskursu yaye ottiya ejo ovuruwana dhowakula dhaye dhinlagiha omuroromela waye Mulugu. (1 Tim. 6:11, 12) Ottiya ejo, ninologa na abali omagomelo wamatugumano. Ogatugumanaga na Anamoona ena mwinternetini, weyo onele okana gari yomona muttu onziweliwa na weyo mukalelo onaweddihiye abali ena vina ejo enele wukamihedha omuziwa deretu muttuya. (1 Ped. 3:4) Movira wa mudhidhi, enele okala yovevuha wona akala mukana dhogana na dhifunelo dhakene.

Aziye agafwara magano a mBibiliani anele okamihedheya okosa dhosakula dhaderetu mwaha wa matelo vina okana wagalala mwigumini. Ninga mulogela Gano: ‘Onimutela muyana wapawa, ofwanya nifumo; Mulugu omururya.’—Gano 18:22.