1-2. Mazu a Yehova anfwanyeya va Izaiya 65:16, 17 annilibiha dhavi okalelavi ntidi?

“NIKALELE NTIDI!” bu mutoma wa mutugumano wa ttattamwa wa yaka ya 2017. Mwari mwa matugumano aba nihisunza mukalelo wovilela masiki nifanyiwaga makattamiho. Mmaleli mutugumano obu dhinovira vyaka nai, iyo napanovi ninovilelavi makattamiho a nsaka nttino nomariha.

² Makattamiho gani angumaniwena ovanene? Ohikweliwa mwana-mmudhi obe marho waziveliwana weyo? Opattiwe eredda yikile vang’ovini egumi yawo? Txino oniwanana makattamiho anda sabwa ya wuluvala? Wile ogweliwa dhifoyo dha elabo, otimbwini obe ofwarafwariwa? Onotabuwa na yodhelavoya ninga eredda eji ya COVID-19? Iyo ninojedhela labo ninagome makattamiho—aba otene, siku ntto nigafiya kaninobuwelege vina makattamiho aba anonihu masaka abano!—Kengesa Izaiya 65:16, 17.

3. Txini enfwanyelelihu okosa ovanene, nanda sabwaya jani?

³ Okalawo masaka abano omariha elobo yorutxa, nanda musogorho txino dhilobodha dhinelege odhowavi dhittabwaga. (Mt. 24:21) Nona enofuneya wunuwihavi ekalelo ya ovilela na ntidi. Sabwaya? Sabwani Yezu ohiloga dhahi: “Mukalelevi ntidi, muner’ovuneya.” (Lk. 21:19) Wubuwela mukalelo onkamihedheya attu ena angumanana makattamiho ninga ehu, enele onikamihedha odhowavi nivilelaga.

4. Sabwaya jani nigalogaga wi Yehova yotagiha yamakamaka ya ovilela?

⁴ Bani oli yotagiha yapama ya ovilela? Yehova Mulugu. Yowakulaya enowutikiniha? Karoma wubuwela. Elabo eji enlamuleliwa na Ddiabo, nona sabwa ya ejuwene muhidhala makattamiho. Yehova okana owodha wa ogomiha makattamiho  aba mwa mitala dhing’onovi, mbwenye iyene onojeedhela labo nisakuliliye wi akose ejuwene. (Rom. 9:22) Oku ajedhelaga ofiya wa labo ntto, txini enkosiye ovanene? Onodhowavi avilelaga. Ninela wona makattamiho matanu na manai anvilela Yehova na ntidi.

5. Oromana mu Edeni attu anpigidha dhavi nzina na Yehova, nanda weyo oniwamo dhavi?

⁵ Oveyihiwa wa nzina naye. Yehova onokwela vaddiddi nzina naye vina onfuna wi attu otene arihege nzina ntti. (Iza. 42:8) Mbwenye vanovira vyaka matxikwi matanu na mmodha, nzina naye niveyihiwagavi. (Masal. 74:10, 18, 23) Eji eromile mmunddani mwa Edeni mudhidhi wammagedhile Ddiabo (entapulela “Munyengetti”) Mulugu wi wahavitela Adamu na Eva elobo yafunani wi akane wagalala. (Wita 3:1-5) Napanovi, Yehova onomagedhiwavi wi onowavitela attu enfunani. Yezu kanziveliwa agawonaga attu apigidhaga nzina nokoddela na Babe. Nona iyene wahasunziha anamafwara aye olobela: “Baba wehu muli odhulu, nzina nenyu nithithimihiwe.”—Mt. 6:9.

6. Yehova onttiyela nni mudhidhi mwinjene ovira akoddaga woniha wi ddina owodha wa olamulela wirimu na elabo ya vati?

⁶ Attu enjene amukoodda Mulugu vina olamulela waye. Yehova bahi ddinfwanyelela olamulela wirimu na elabo ya vati, iyene bahi ddinziwa mukalelo wapama wa ottonga. (Ovuh. 4:11) Masiki dhawene Ddiabo ohanyengetta anju na attu wi obuwelege wila Mulugu kanfwanyelela ottonga. Makani aba atotile Satana a olamulela kahiyo makani angwaddiwa mwa mudhidhi mung’onovi. Yanfuneya mudhidhi wi attu a mwilaboni aziwe wi ovilamulela anyene akoddaga omwiwelela muttanddi wawa, kagapurilena elo. (Jer. 10:23) Sabwa ya ovilela wa Yehova attu otene anele oziwa wi iyene ddina ewodhelo ya olamulela wirimu na elabo ya vati. Attu anele oziwa wi Yehova ddi mulamuleli wapama vina Omwene waye bunadhena murenddele wa txibarene na ofwasa wa dhetene.

7. Omusadduweli Yehova bani, nanda txini enakosiye sabwa ya ejuwene?

⁷ Osadduwela wa anaye ena. Yehova attanddaga anju na attu wattanddile oligana. Anju mmodha omusadduwela Mulugu badha okala Satana (entapulela “Musadduweli”) wanyengettile atelani oroma Adamu na Eva attanddiwe na mukalelo woligana, omusadduwela Yehova. Vasogorhova anju enagu na attu ena ahivitaganyiha na asadduweli aba. (Juda 6) Mwa ovira wa mudhidhi, ana Izrayel, nlogo nasakulile Mulugu, nahinyanyala omwebedha Yehova baniroma wawebedha amilugu ottambi. (Iza. 63:8, 10) Nona Yehova wahikana sabwa ya osilidhiwa. Masiki dhawene, iyene onovilelavi, ajedhelaga ofiya mudhidhi wofanyelela onatolotxiye atabala otene. Eji enele wawagalaliha aroromeli otene anvilela makattamiho aba vamodha na iyene!

8-9. Dhozivala gani dhimmagedhiwa Yehova, nanda txini enfwanyelela iyo okosa?

⁸ Dhozivala dhinlogetxa Ddiabo. Satana ohimmagedha Job, vamodha na alabeli otene a Yehova ororomeleya wi kanimulabela yovi. (Job 1:8-11; 2:3-5) Napanovi Ddiabo onowamagedha alabeli a Mulugu. (Ovuh. 12:10) Iyo ninofwanyelela okosa mpaddi wehu nonihaga wila Satana muttambi, ninoonihe ejuwene sabwa ya ovilela na ntidi dhomageedha dha Satana vina okalavi oweddeyana na Yehova. Nigatagiha ovilela wa Job, iyo vina ninele orurihiwa.—Tia. 5:11.

⁹ Satana onowalabihedha asogorheli a  marelijiau onyengetta wila ammagedhe Yehova wi iyene ddwabure vina ddunatotela attu makattamiho ali mwilaboni. Ena anofiyedha ologa wi, mwana agakwa Mulugu ddimuttukulile wi akale anju. Oku otowiwa nriho na Mulugu! Iyo ninomuziwa pama Mulugu. Nigakala aredda obe nigakweliwa mmudhihu wamukwelihu, kanimmagedha Mulugu. Mottiyana, nihikana nroromelo wi labo nimodha onele ogomiha maredda na okwa. Enofuneya wapanga attu otene anfuna oniwa wi Yehova, Mulugu wokwela. Dhahene ninomukamihedha Yehova omwakula oddule oninveyiha.—Gano 27:11.

10. Txini ennisunziha Masalmo 22:24, 25 sabwa ya Yehova?

¹⁰ Otabuwa wa emeleli aye okweleya. Yehova Mulugu onowaweddela ttagaraga emeleli aye. Iyene onokubanya aganoonaga nitabuwaga na—ofwarafwariwa, oredda vina ohiligana wehu. (Kengesa Masalmo 22:24, 25 [Masalmo 22:23, 24 Tradução do Novo Mundo].) Yehova onowiwa opa iyo nigatabuwaga; iyene onofuna ogomiha makattamiho vina onele ogomiha-wene. (Kaladdaniha na Obudduwa 3:7, 8; Izaiya 63:9.) Ninele ofiya nsaka ‘ninakuputte Mulugu muntori bu muntori mmentoni mwehu. Kunakalewo vina okwa, kutto, obulela vina segedho.’—Ovuh. 21:4.

11. Yehova oniwamo dhavi mwa alabeli aye ororomeleya akwile?

¹¹ Okwa wa akwaye. Yehova oniwamo dhavi sabwa ya okwa wa akwaye ororomeleya alobwana na ayana? Iyene onofuna venjene wawona wili! (Job 14:15) Onowodha wubuwela onukeliwa ona Yehova na mukwaye Abramu? (Tia. 2:23) Obe mukwaye Mizé, walogiyena “kove na kove”? (Obud. 33:11) Iyene vina ononukeliwa omwiwa David vina anamaleba masalmo ena amwibelaga jibo dhapama  dhomuttittimihana! (Masal. 104:33) Masiki emeleli aba ororomeleya vakwilani, Yehova kadduwalile. (Iza. 49:15) Iyene onowubuwela deretu omuttu wawa na mikalelo dhawa. Muyubuweloni mwa Mulugu awene “akalawo, vowi onakalihawo ddi iyene.” (Lk. 20:38) Ninele ofiya labo ninavenyihe Yehova mukwani, venevo onele wiwa wili malobelo anakosege awene na murima wawa wotene vina onele orumela webedha wawa. Akala weyo okweliwa, mazu aba anele wupangarhaza.

12. Txini enimuttiya Yehova wokubanyene masaka abano omariha?

¹² Attu abure anatabutxa attu ena. Varomile ovanya mu Edeni, Yehova wanziwa wi dhilobodha dhihinatti osasanyedheya dhigahittabwa. Yehova kanziveliwa wona mwilaboni obure, ohiligana vina otimbwini. Iyene onowazuzumela venjene attu owobana vina ahinwodha—ovibarela ninga anapawi na aziye. (Zak. 7:9, 10) Masiku abano, elobo enimuttiya Yehova wokubanyene otabutxiwa na ofugeliwa wa adhari aye ororomeleya. Okaane ebaribari wi Yehova onowakwela otene anvilela ninga iyene.

13. Mukalelo gani wonyakuwa onfwanyeyana attu ovanene, nanda txini enakose Yehova?

¹³ Mweddelo wonyakuwa wa attu. Satana oziwa wi attu attanddiwe m’oladdana na Mulugu nona kanavaha ttima. Vonile Mulugu “obure wa athu othabwa” nsaka na Nowé, ‘iyene otuta murima n’ompaddutxa muttu, amwika mwilaboni; murima waye omuwawa.’ (Wita 6:5, 6, 11) Dhilobodha ovanene dhihikala? Newene! Satana onohagalala wona mukalelo wonyakuwa onfwanyeya attu. Mukalelo wotene wa mararuwo onokosiwa na alobwana, ayana vina attu a vyano dholigana. (Ef. 4:18, 19) Iyene onziveliwetxa mulabeli wa Yehova agakosa yoddawa enddimuwa. Mbwenye ovilela wa Yehova onogoma. Mohigonela onele woniha mukalelo oniddiye mararuwo atolotxaga attu otene ankosa mararuwoya akoddaga otxinja mukalelo wawa.

14. Txini enkosana attu elabo na dhinama?

¹⁴ Onongiwa wa dhottandda dhaye. Mulugu ohattomela attu mabasa a weddiha obe wang’anela dhilobo dhittanddiliye. Mwebaribari ‘attu ena ana owodha anowatabutxa ena’ mukalelo obu onononga elabo vina dhinenama. (Koh. 8:9; Wita 1:28) Anamapepesa ena ahiloga wi sabwa ya attu onongagavi dhottandda dhaye vyaka dha musogorho dhitagano * dhottiyana-ttiyana dhowakwana miliau mmodha dhindaga ohikalawo. Ninowodha ononelamo sabwaya enzuzumela attu elabo! Johagalaliha oziwa wi Yehova onele watolotxa “abale annonga elabo” vina onele osaddula elabo bikala parayizu wokoddela.—Ovuh. 11:18; Iza. 35:1.

15-16. Txini ennittukulela ovilela vamodha na Yehova? Kavaha yotagiha.

¹⁵ Kobuwela dhinvilela Yehova mwa vyaka dhinjidhene. (Koona kasha “ Txini Envilela Yehova na Ntidi.”) Yehova kofuna agahitolotxa elabo eji mudhidhi-mudhidhivi. Mbwenye iyene onovilelavi, ejo elobo yaderetu mwa iyo! Ndowe nubuwele makani aba dhahi. Motagiha, atelani anjedhela okana mwana opangiwa dhahi na dotori: Mwaninyu ohikana makattamiho a egumi nona agabaliwa kanakalewo mudhidhi mwinjene. Omunuwiha mwana oddu enakale elobo yorutxa vaddiddi. Masiki dhawene, ababe anomwakela na okwela. Bu okwela-wene oku onakamihedhe  ovilela vina omulela mwanawa n’egumi yottugareya eninfwanyela.

¹⁶ Dhahene ninga mwana oddule, ana Adamu na Eva abaliwe ohiligana. Masiki dhawene, Yehova onowalela vina onowakwela. (1 Jo. 4:19) Mbwenye ababi omaningoni alogiwe vanladdanihoni ahittiyana na Yehova. Yehova onele ogomiha makattamiho angumanana anaye vowi onowakwela, ohisakula labo ninakosiye ejuwene. (Mt. 24:36) Okwela wa Yehova bunnittukulela ovilela vamodha na Iyene.

17. Yotagiha ya Yezu enfwanyeya va Ahebreu 12:2, 3 ennikamihedha dhavi odhowavi nivilelaga?

¹⁷ Yehova yotagiha yapama ya ovilela. Yezu ohitagiha mowakwana-mwene ovilela wa Babe. Agali velaboni ya vati, Yezu ohivilela oruwaniwa, manyazo vina okomeliwa vapingirhizini. (Kengesa Ahebreu 12:2, 3.) Mohaganyedha, yotagiha ya ovilela wa Yehova ehinvaha Yezu guru ya ovilela. Eji enowodha onilibiha vina.

18. Mowiwanana na 2 Pedro 3:9 ovilela wa Yehova ondhana dhopurelamo gani?

¹⁸ Kengesa 2 Pedro 3:9. Yehova ohiziwa mudhidhi wofanyelela onfuniye otolotxa elabo eji enlamuleliwa na Satana. Sabwa ya ovilela wa Yehova, mwa ovira wa mudhidhi attu enjene ahibaliwa, ahisunza sabwa ya Mulugu vina ahibatiziwa. Attu aba masaka abano anokosa mpaddi wa muttitti munddimuwa vina anomutamaalela sabwa ya ovilela waye. Musogorho, Yehova onele woniha wi ovilela elobo yaderetu ekosiliye agarurihaga attu matxikwi na matxikwi anavilele ofiyedha omagomo!

19. Txini enfwanyelihu ogana okosa, nanda ninapurelemo eni?

¹⁹ Yotagiha ya Yehova enonisunziha ovilela n’owagalala. Masiki na makattamiho otene antota Satana, Mulugu onodhowavi ‘attabaga.’ (1 Tim. 1:11) Iyo vina ninovilela nottaba nijedhaga mudhidhi onatxenihe Yehova nzina naye, onabareliye olamulela waye, vina onagomihiye matabuwo otene angumanihuna masaka abano. Nikalele ntidi ovilela nihidduwalaga wi Babihu wa wirimu onovilelavi. Nigakosa ejuwene, muttu-muttu wa iyo onele ononelamo mazu aba a Tiago anloga: “Wagari ddi muthu onziwa ovilela muwehiwani: Agawarálamo, onere othuviwa egumi yohimala, epikirhele Mulugu wavaha abale animukwela.”—Tia. 1:12.