1. Txini dhinavaha Yehova emeleli aye ororomeleya?

YEHOVA oli namavaha wokwela, onowavaha emeleli aye ororomeleya mabasa wi akose mmutugumanoni mwaye. Masiki mabasa ankosihu mmutugumanoni akalaga ottiyana, iyo notene nihikana ttima vina notene ninofuna okamihedhana muttu na mukwaye. Murumiwi Paulo ohinivaha nikamihedho ninaniwodhihe ononelamo masunziho aba a ddabuno. Onivahile dhavi?

2. Ninga munlogela Éfeso 4:16, ninfwanyelelani wariha attu ena vina nilabaga mumodhani?

² Paulo ohikokomeza wi kakalewo mulabeli wa Yehova onimulogela mukwaye mazu awi: “Weyo kunddir’elo”; nona mutoma wehu wa ddabuno ogaloga wi jofuneya oriha ettomo ya attu akwihu. (1 Kor. 12:21) Iyo ninofuniwana olaba vamodha vina na wiwanana wi mutugumano wehu weddege mmurenddeleni. (Kengesa Éfeso 4:16.) Iyo nigalabaga mumodhani vina na wiwanana, mutugumano onelege owaralela mabasa vina okwelana wehu ogela winjivavi.

3. Txini enasunzehu mwari mwa mutoma obu?

³ Mpaddi gani onfwanyelihu walagiha nriho Akristu ena a mmulogoni? Nsunzo ntti ninele otapulelamo mukalelo onfwanyela anddimuwa a mmulogoni orihana. Vasongorova ninele ononihedhamo mukalelo onfwanyelihu notene walagiha  nriho abali na arogora ali aziye. Omagomelowa ninele wona mukalelo ewa wariha abale ahinnonelamo mwawakwana elogelo yehu.

4. Nigano gani nivahile murumiwi Paulo ninfwanyeya va Roma 12:10 ninfwanyela anddimuwa a mmulogoni ofwara?

⁴ Anddimuwa otene a mmulogoni asakuliwe na muya wokodela wa Yehova. Ewodhelo ya munddimuwa mmodha-mmodha enottiyana na yamukwaye. (1 Kor. 12:17, 18) Anddimuwa a mmulogoni attomiwe ovanenevi kalemeletxi mabasaya. Ena kanwodha ottidda mabasa na guru sabwa ya wunuwelavo obe makattaniho a mwigumini. Masiki dhawene kawo munddimuwa wa mulogo onfwayela omwang’ana mukwaye nanda bafiyedha ologana, “Weyo kundir’elo.” Munddimuwa wa mulogo mmudha-mmudha onofwanyela weddana malago alogile murumiwi Paulo ali va Roma 12:10.—Kengesa.

5. Anddimuwa a mmulogoni anonihe dhavi wi anorihana vina ekaleleni yofuneya okosa ejuwene?

⁵ Anddimuwa a mmulogoni anolagiha wila anorihana, agakala attu anavuruwana akwawa na ofwaseya. Eji enfuneyetxa mudhidhdi ontugumana anddimuwa a mmulogoni wila alogele makani manddimuwa. Sabwaya jani? A Sentinela de 1 de Otuburu de 1988, ohiloga: “Anddimuwa a mmulogoni aziwe wi Kristu na muya wokoddela onowodha onvaha munddimuwa mmodha zelo dhinfuneya dha magano a Mbibiliani wi dhigomihiwena makani anlogiwa. (Mer. 15:6-15) Kakalewo munddimuwa wa mmulogoni onfwanyela wubuwela wila iyene bahi ddina ewodhelo ya ottonga makani.”

6. Anddimuwa a mmulogoni anfwanyelelani olaba mumodhani vina na wiwanana nanda agakosa ejuwene mulogo ompurelamo dhavi?

⁶ Munddimuwa wa mmulogoni onlagiha wila anowariha akwaye kankala oromaya olaga agakana matugumano awa. Iyene kankala ologavi mudhidhi wotene vina kantamela woniha ttima ya dhologa dhaye. Ottiya ejo iyene onloga enubuweliye noviyeviha vina novipimelela.  Iyene onovuruwana nofwaseya dhologa dha akwaye. Yamakamakaya jawi onokana ekalelo ya wiwelela malago a “mwimeleli wororomeleya.” (Mt. 24:45-47) Anddimuwa a mmulogoni agalogelaga makani nekalelo yokwelana vina norihana muya wokodela wa Mulugu onela okala nawene, onela wakamihedha osakula dhogona dhinlibiha mulogoya.—Tia. 3:17, 18.

7. Yezu wawona dhavi aziye?

⁷ Masaka abano mmulogoni muhikala atelani vina anamudhi. Ena mwa abaya abali ahitelile na arogora ahiteliwe. Ninfwanyela wawona dhavi aziyeya aba? Nddoweni nitanaleleni mukalelo wobuwela Yezu mwaha wa oziye. Mudhidhdi wakosa Yezu mabasaye velaboni ya vati katelile. Mwaha wokala muziye olabihedha mudhidhi waye wetene mmabasani attomeliweye. Yezu kalogile wila nali nikokomezo na Akristu okala aziye obe otela. Iyene walogile wi Akristu ena anosakula okala aziye. (Mt. 19:11, 12) Yezu wanariha abale ali aziye. Iyene kawona aziye ninga attu ahina ttima nne vina kawona ninga attu ayelela dhilobo dha mwigumini.

8. Ninga munlogela 1 Korinto 7:7-9, Paulo wakokomezile Akristu otanalela eni?

⁸ Dhahene ninga Yezu, murumiwi Paulo ohikosa mabasa a olaleya valiye muziye. Paulo kalagihile wi Mukristu agatela onokosa elobo yabure. Iyene wannonelamo wila yogana eji jomwinya. Masiki dhawene Paulo wahakokomeza Akristu wila anofwanyelela otanalela akala anela owodha omulabela Yehova oku bali aziye. (Kengesa 1 Korinto 7:7-9.) Txibare Paulo kawona Akristu aziye ninga attu ahina ttima obe kalitxi amakamaka ninga abale atelile. Ejo yoneyile mwaha womusakula mozombwe Timóteo wali muziye, wila asogorhele mabasa manddimuwa. * (Fil. 2:19-22) Nona kaninaganyedha wila elobo yabure wubuwela wi mbali onofwanyela ovahiwa ettomo obe ohivahiwa ettomo mwaha wa iyeneya okala muteli, obe muziye.—1 Kor. 7:32-35, 38.

9. Monelo gani onfwanyelihu okana mwaha wa otela vina okala muziye?

⁹ Nne Yezu nne Paulo, kasunzihele wila Akristu anofwanyela otela obe okalavi aziye. Monelo gani onfwanyelihu okana mwaha wa otela vina okala muziye? A Sentinela de 1 de Otuburu de 2012, ohitapulelamo makani aba  dhahi: “Mwebaribari, [otela vina oziye] onofwanyela woniwa ninga mivaho dha Mulugu. . . . Yehova kanloga wi okala muziye onotota manyazo obe onodhana okubanya.” Nubuwele ejuwene, ninofwanyela oriha ettomo ena abali na arogora aziye mmulogoni.

10. Ninalagihe dhavi wi ninowariha abali na arogora ehu ali aziye?

¹⁰ Ninatonyihedhe dhavi wi ninoriha dhubuwelo na ekalelo ya abali na arogora ali aziye? Ninofwanyela wubuwela wila Akristu ena ahitelile elosakula anya okala aziye. Elobo yina jawi Akristu ena anofuna otela, mbwenye enarutxa jawi kanifwanya muttu wofwanyelela. Oku enaya amamukwela. Egali dhawene, egahikala abali a mmulogoni wavuzaga Akristu ali aziye sabwaya ehintelani, obe ologa wi ninowukamihedha onfwanya muttu oninfuniwe? Masaka menagu Akristu ali aziye anokumbiraga wila akamihedhiwe onfwanya muttu onazivela. Ki akala muttuya kankumbirha nikamihedho ntto, onubuwela wi mbaliya obe murogoraya onaviyonemo dhavi akala weyo onovilevela omutamelela muttu womutela? (1 Tes. 4:11; 1 Tim. 5:13) Ndoweni nivuruwaneni dhilogile abali na arogora ali aziye.

11-12. Elobo gani egadhile wawobaniha bale ali aziye?

¹¹ Nameddelela milogo dhahi wa muziye onvaha ttima mabasaye, ohiloga wila okala muziye enodhana dhopurelamo dhinjene. Mbwenye iyene onowobanaga akala abali na arogora ana efunelo yomukamihedha anonvuza: “Weyo onkoddela nni otela?” Mbali dhahi wa muziye onlaba o Betel ohiloga: “Masaka mena abali na arogora onofiyedhaga wubuwela wila abale ali aziye anoweddiha ttagaraga. Awene anubuwela wila okala muziye muttorho ottiya okala mvaho.”

¹² Murogora dhahi wa muziye onlaba o Betel ohiloga: “Anamalaleya ena anubuwela wi aziye otene animutamela muttu wila amutele obe ateliwena, nona agadhowa mmatugumanoni manddimuwa anopura gari yomutamelawo muttu wofwanyelela wa omagana matelo. Nsaka dhahi, ddahirumiwa o’Betel wi ddakose mabasa elabo yina; mufiyedhimi ddahidhowa omatugumanoni. Murogora waddakele vatakulu-vaye wahiddiziwiha wi mmulogonimwa mwahikala abali eli ana vyaka dhakakene na miyo. Wahiddipanga wila efunelo yaye kayali y’odditamelela alobwana. Mbwenye mvolowelihu Munumbani Yomwene iyene ohiddittukulela vali abaliya, wila ddiloge na awene. Enoddirutxa ologawa, n’oraru nahikana manyazo.”

13. Yotagiha gani emulibihile murogora dhahi wa muziye?

¹³ Murogora mwina wa muziye onlaba o Betel ologa dhahi: “Miyo ddinowaziwa apionero awunuwelavo ali aziye, ovipimelela anzuzumela mabasa ankosani, ovivelela vina anangalala na nikamihedho ninvahani mmulogoni. Awene akana monelo wopimeleleya mwaha wa oziye, kanubuwela wila ahikana ttima mwaha wokala aziye vina kankubanya sabwa ya ohinfwanya muttu womutela obe ohikana anamudhi.” Eji enokosiha mulogo okala mburo onrihiwa vina omvahiwa ttima attu otene. Kankalamo muttu onvikubanyedha nne vina muttu-muttu kanimusirirha mukwaye, kawo ompwaziwa vina ohinrihiwa. Otene anoziwa wi ahikana ettomo vina anokweliwa.

14. Ninalagihe dhavi wi ninowariha aziye?

¹⁴ Abali na arogora ehu ali aziye anotamalela venjene akala anorihiwa mwaha wa mweddelo wapama onfwarani ottiya sabwa ya otela obe ohiteliwa. Ottiya wakubanyedha ninofwanyelela watamalela mwaha wa ororomeleya wawa. Nigakosa dhawene abali na arogora ehu ali aziye kanafiyedhe wubuwela wila  ninowalogela dhahi: “Weyo kunddir’elo.” (1 Kor. 12:21) Ottiya ejo awene anela ononelamo wila iyo ninowariha vina ninoziwa ettomo ena awena mmutugumanoni.

15. Matxinjo gani ankosa ena wila enjedhedhe mabasa awa olaleya?

¹⁵ Mwa vyaka dha ovanene anamalaleya enji anogana osunza elogelo eswa wila enjedhedhe mabasa awa a olaleya. Wila akwanihe yogana ejo awene ahikosa matxinjo mwigumini mwawa. Abali na arogora aba, ahittiya milogo dha elogelo yawa ahimwalela milogo dha elogelo yina vina onfuneya anamalaleya Omwene. (Mer. 16:9) Yosakula eji yogana enkosa Mukristu yeka wila awodhe omulabela Yehova venjene. Masiki attukulaga vyaka dhinjene wila anonelegemo mowakwana elogeloya awena anokamihedha venjene mulogoya. Mikalelo dhawa dhapama na dhotagiha dhinkanani dhinolibiha mulogoya. Txibarene abali na arogora aba ovileva anofwanyela orihiwa venjene!

16. Txini enfwanyela ofwara anddimuwa a mulogo agafunaga omuttoma mbali ninga mundimuwa wa mulogo obe mudhari wokamihedha?

¹⁶ Nikuru na anddimuwa a mmulogoni kaninfwanyela omuttiyiha mbali ottomeliwa onddimuwa wa mulogo obe mudhari wokamihedha, sabwa yawi iyene kanloga mwawakana elogelo ya mulogoya. Enfwanyela anddimuwa a muloga okosa ja ofwaseyela wang’ana akala mbaliya onovirihamo magano a Mbibiliani animurumeliha ottomiwa ninga muddimuwa wa mulogo obe mudhari wokamihedha, ottiya wona akala onologa obe nne elogelo ya mulogoya.—1 Tim. 3:1-10, 12, 13; Tito 1:5-9.

17. Mavuzo gani anivikosa anamudhi ena agamwalela elabo yina?

¹⁷ Anamudhi ena Akristu anomwalela dhilabo dhina wila atamele vottawela obe afwanye mabasa. Masaka mena anawa anosunza mmaskola elogelo ya elabo emwalelani. Enofuneya vina amambali awa osunza elogelo ya elaboya wi afwanye ganyo. Awene anakose eni akala mwilabonimwa mukala mulogo obe nikuru na elogelo yawa yobaliwana? Anfwanyela wona matugumano na mulogo wa elogelo gani? Anadhowege mulogo wa elogelo ya elabo emwalelani, obe anodhowege otugumana na mulogo wa elogelo yawa yobaliwana?

18. Mowiwanana na Galásia 6:5, ninonihe dhavi wi ninoriha yogana ya mwimeleli wa ntakulo?

¹⁸ Mwimeleli wa ntakulo ddinfwanyela osakula mulogo gani onadhowege anamudhiya otugumana. Vowi muttu-muttu ddunsakula enfuniye iyene onofwanyela winanela deretu dhinfuna amudhaye. (Kengesa Galásia 6:5.) Iyo ninofwanyela oriha yogana ya mwimeleli wa ntakulo. Ninofwanyela oriha yogana enkosiye mwa wamoyela anamudhiya nawonaga ninga attima mmulogoni mwehu.—Rom. 15:7.

19. Txini enfwanyela mwimeleli wa ntakulo otanalela munlobeloni?

 ¹⁹ Enodhaga opadduwa anamudhi wonaga matugumano mmulogoni mwa elogelo yawa yobaliwana, mbwenye anawaya kuhinonelagamo mwawakwana elogeloya. Akala mulogoya oli murudda onlogiwa elogelo ya mwilabonimwa, enodha warutxa anawa ononelamo matugumanoya vina wunuwa mpaddi womwiyani. Enarutxele nni? Txino anawaya oskola wawa ansunzihiwa na elogelo ya elaboya, ottiya na elogelo ya amambalawa. Ejo egapadduwa, mwimeleli wa ntakulu onofwanyelela otanalela na nlobelo wi one txini enfwanyeliye okosa wila akamihedhe anawa wunuwiha manddano awa na Yehova vina na nlogo naye. Kuloga wi amambali anofuniwana wakamihedha aniwa wi awodhege ologa elogelo yobaliwana, obe egakala yofuneya awene anofwanyela omwalela mulogo ononani wi aniwa anowodha ononelamo elogeloya. Mwimeleli wa ntakulu agasakula elobo-elobovi enofwanyelela orihiwa, mulogo onsakuliye abaliyamo anofwanyela woniha wi anomuttittimiha iyene vamodha na amudhayeya.

20. Ninawodhe dhavi woniha wi ninowariha abali na arogora ansunza elogelo eswa?

²⁰ Mwari mwa milogo dhinjene, abali vamodha na arogoraya anokana efunelo ya osunza elogelo eswa, mwaha wa dhotedhene esile dhilogiwe mwari mwa ddima dhivirile. Ejo enowattukulela awene orutxiwa otapulelamo esile dhinrumelani. Mbwenye nigahizuzumeletxe dhovonya dhawa agavilibihedhaga ologa elogelo yehu, ninela ozinddiyela wi awene ahikana efunelo enddimuwa ya omukwela vina omulabela Yehova. Nigatamela wang’ana mikalelo dhawa dhapama ninele owodha oriha venjene guru enkosa abali aba vamodha na arogoraya. Kaninalogele, “Weyo kunddir’elo” sabwa yawi awene kannonelamo mwawakwana-mwene elogelo yehu.

21-22. Gari gani enddimuwa enihu?

²¹ Yehova ohinivaha gari enddimuwa ya okala wa ttima mmutugumanoni. Mwa iyene, kantanala akala nili ayana peno alobwana, aziye peno ateliwi, azombwe peno anakalaba, akala ninowodha obe ninorutxiwa ologa elogelo; notene nili a ttima vamentoni va Yehova, vina ninofunana muttu na mukwaye.—Rom. 12:4, 5; Kol. 3:10, 11.

²² Nidhowegevi banigavilibihedha ovirihamo nladdaniho na mwili nisunzihile murumiwi Paulo. Nigakosa dhawene ninela otamela wona mukalelo wa olagiha wi ninoriha ettomo ena abali ena mmutugumanoni mwa Yehova.