1. Yehova witele nni egumi?

NAHIKALAWO nsaka nakalawo Yehova yeka. Mbwenye iyene kakubanya. Sabwani iyene ddawakwana mwa dhetedhene. Masiki dhawene ohifuna wi enagu ajevo egumi vina wagalala. Nona mwaha wa okwela waye, iyene wahiroma ottandda dhilobo.—Masal. 36:9; 1 Jo. 4:19.

2. Yezu na anju akale dhavi na dhottanddiwa dha Yehova?

² Vamaromo, Yehova ompaddutxile mukamihedhi wa mabasa aye. Vamodha na Mwanaye oddo woroma dhipaddutxiwa, ‘dhilobo dhetedhene na guru dha mada aye,’ otaganyiheya na matxikwi menjene a anju. (Kol. 1:16) Yezu wanziveliwana gari yolaba vamodha na Babe. (Gano 8:30) Anju a Mulugu ahikana mwaha dhinji dha ottaba. Awene ahikana gari ya woona na mento awa mudhidhi oromile Yehova vamodha na Mukamihedhi waye wa Mabasa, Yezu, ottandda erimu na elabo ya vati. Koddi anju aba onilemo dhavi? Awene ‘anttaba’ vina ahidhowa attabagavi mudhidhi wonani dhilobo dhotedhene dhipaddutxiwaga mpaka ottanddiwa wa attu. (Job 38:7; Gano 8:31) Dhottandiwa esi modha-modha dhinolagiha okwela na eziwelo ya Yehova.—Masal. 104:24; Rom. 1:20.

3. Ninga munlogela 1 Korinto 15:21, 22, mukutto wa Yezu onwodhiha okosa eni?

³ Yehova wafuna wila nlogo na attu nikalegewo na mukalakala velaboni yokoddela yattanddileyi. Mbwenye Adamu na Eva amuttegela Babi wawa wokwela, yodhelavoya jawi ottega na okwa onopatta nlogo notene na attu. (Rom. 5:12) Ki Yehova ogwaddile dhavi makaniya? Momaguva-mwene, iyene ohoniha  mukalelo ogavuniliye nlogo na attu. (Wita 3:15) Yehova ohigana okosa mukutto wa Mwanaye, ogawodhihile ana Adamu na Eva woboleliwa muttegani vina mukwani. Iyene omuttiya muttu-muttu osakula mwinya omulabela Iyene wila akele egumi yohimala.—Jo. 3:16; Rom. 6:23; kengesa 1 Korinto 15:21, 22.

4. Mavuzo gani anasekeserihu mwari mwa mutoma obu?

⁴ Nipikirelo na Mulugu na wavenyiha abale akwile ninowita mavuzo menjene. Motagiha, ovenyihiwa mukwanimwa onadhe okosiwa na mukalelo gani? Ninelege owodha wazinddiyela wili amudhihu na amarho okweleya ageyelela okalawo? Akala jijuwene ovenyihiwa mukwani onadhena wagalala gani? Nanda otanalelaga mwaha wa ovenyihiwa mukwani onawodhe dhavi wunuwiha otamalela wehu okwela, eziwelo vina ovilela wa Yehova? Ndoweni nisekeserheni nivuzo nimodha-nimodha.

5. Ninlogelani wi ovenyihiwa mukwani onakosiwe na wiwanana vina vang’ono-vang’ono?

⁵ Yehova onele omulabihedha Mwanaye wila avenyihe attu matxikwi na matxikwi, mbwenye niziweni wi otene kanavenyihiwe mudhidhi mmodhene. Sabwaya jani? Sabwani kowiliwa mwilaboni mwila winjiva attu vaddiddi kamugakalile wiwanana. Vina Yehova txipo kankosa dhilobo na mukalelo wovidiganya se’wiwanana. Iyene onoziwa wi, wila mwilaboni mukale murenddele dhilobodha dhinofwanyela okosiwa mowiwanana-mwene. (1 Kor. 14:33) Yehova, Mulugu wa eziwelo vina wovilela, iyene ohilaba vamodha na Yezu asasanyaga elabo vang’ono-vang’ono, ahinatti wattandda attu. Nona Yezu onele olagiha mikalelo dhakakene nsaka na Olamulela wa Vyaka Txikwi, agalabaga vamodha na abale anavuneye mu  Armagedón wila asasanyele elabo abale anfuna ovenyihiwa mukwani.

6. Ninga munlogela Merelo 24:15, bani anakale vamodha na abale anavenyihe Yehova?

⁶ Elobo yamakamakaya jawi abale anavuneye mu Armagedoni anele wasunziha anamavenyihiwa mwaha wa Omwene wa Mulugu vina efunelo ya Yehova. Sabwaya jani? Sabwani enji mwa abale anfuna wiyelela okalawo anakale vamodha na abale ‘akosile dhilobo dhabure.’ (Kengesa Merelo 24:15.) Enele ofuneya awene okosa matxinjo menjene mwigumini mwawa wila akele mareliho anawodheye sabwa ya mukutto wa Kristu. Kobuwela mabasa anakalewo a wasunziha ebaribari ya Mulugu matxikwi menjene attu ahimuziwile Yehova. Kuloga muttu-muttu wa abale anavenyihiwe onelege okana namasunza waye dhahene ninga empadduwa ovanene nigamusunzihaga muttu Bibilia? Aboya anela ottomeliwa milogo munaswagihiwagani wila awodhe wasunziha abale anavenyihiwe musogorhomwa? Ninofwanyela ojeedhela wi none. Mbwenye enziwehu jawi mpaka omagomelo wa Vyaka Txikwi dha Olamulela wa Kristu ‘mwilaboni mwetemwene munela odhala malago a Nabuya Yehova.’ (Iza. 11:9) Txibarene, mwari mwa vyaka eso txikwi ninele okana mabasa menjene owagalaliha!

7. Enafuneyeleni wi nlogo na Mulugu nikale a ttagaraga vina ovilela wila asunzihe anavenyihiwe mukwani?

⁷ Mwari mwa Vyaka Txikwi dha Olamulela wa Kristu ana etene a Yehova a velaboni ya vati anela okosa matxinjo mwigumini mwawa wila amwagalalihe. Oteneya anele okala a ttagaraga vina ovilela wila akamihedhe anamavenyihiwaya okwaranya dhubuwelo dhabure vina okalawo afwaraga magano a Yehova. (1 Ped. 3:8) Mohaganyedha abale anavenyihedhiwe okalawo anele ogana okosa mpaddi wa nlogo n’oviyeviha na Yehova, oku ‘alabelaga n’oribela murima ovulumutxiwa wawa.’—Fil. 2:12.

8. Mwaha gani dhinnittukulela orumela wi ninele owodha wazinddiyela abale anavenyihiwe?

⁸ Nihikana mwaha dhinjene dhinnittukulela orumela wila ninelege owodha omuzinddiyela muttu-muttu wa abale anavenyihiwe mukwani. Motagiha, nigaladdaniha na ovenyihiwa akoseyile mundduni, ninowona wi Yehova onanvenyihe muttu-muttu na mwang’aneloya, mulogeloye vina mobuwelo na mikalelo dhakakene dhaniyena ahinakwa. Kanidduwale wi Yezu oladdaniha okwa na ogona vina ovenyihiwa mukwani na orurumuwa mutturoni. (Mt. 9:18, 24; Jo. 11:11-13) Akala muttu onovenyihiwa mutturoni, iyene onowiwa, onowona dhahene ninga mwakoseliye ahinagona, vina onowiyelela dhubuwelo dhaye. Ndoweni noone ejile epadduwile na Lázaro. Iyene wahimala malabo manai bakwile vina maningo aye ahiroma ovudda. Mbwenye muvenyihedhiwiye na Yezu, arogoraye aahimuzinddiyela momaguva, vina Lazaroya wahiwodha wawubuwela awene.—Jo. 11:38-44; 12:1, 2.

9. Attu anakoddeleni ovenyihiwa na mubuwelo vina maningo oligana?

⁹ Yehova ohipikirela wila Kristu agalamulelaga kawo onalogege wi: “Miyo ddili muredda.” (Iza. 33:24; Rom. 6:7) Dhahene, abale aneyelele okalawo anavenyihiwe na maningo awa egumine. Mbwenye awene kanakale oligana momaguva-mwene. Kowiliwa avenyihiwa bali owakwana, txino amudhawa na akwawa kagawodhile wazinddiyela. Nona mwari mwa Vyaka Txikwi dha Olamulela wa Kristu, attu otene anelege odhowa vang’ono-vang’ono akalaga oligana. Omagomelo wa vyaka eso txikwi Yezu Kristu onele omperhekela Babe  Omweneya. Mudhidhene obo Omwene onele wakwaniha mabasa aye otene, vamodha na wattukulela attu okala oligana obe awakwana.—1 Kor. 15:24-28; Ovuh. 20:1-3.

10. Ovenyihiwa mukwani onupatta dhavi?

¹⁰ Kobuwela mukalelo onakalani yowagalaliha omwakela wili mwanamudhi peno marho wokweleya. Weyo onela wunla obe oteya mwaha wa wagalala? Obe weyo onele oroma omwibela Yehova jibo dhomutamalana? Mohaganyedha onela wenjedhedha omutamala wawo Babi wehu wokwela vamodha na Mwanaye mwaha wa mvaho obu wa ovenya mukwani.

11. Ninga munlogela mazu anfwanyeya va Joau 5:28, 29, txini enapadduwe na abale anfwara magano oligana a Mulugu?

¹¹ Karoma otanalela wagalala onakaane abale anavenyihiwe mukwani venevo vanattiyagani ekalelo yawa ya wale oku afwaraga magano oligana a Mulugu. Abale anatxinje egumi yawa anele ovenyihedhiwa wakela egumi yohimala. Abale anamusadduwele Mulugu kanawodhe ozuzumiha murenddele wa Mparaizu.—Iza. 65:20; kengesa Joau 5:28, 29.

12. Yehova onarurihe dhavi etene anakale velaboni ya vati?

¹² Omwene wa Mulugu ogalamulelaga elabo, attu otene a nlogo na Mulugu anele ologa mazu aba a Gano 10:22 ani: “Nruriho na Nabuya ninoreliha, guru dhehu kadhinenjedhedhavo elo.” Na nikamihedho na muya wa Yehova, adhari a Mulugu anela orela mpaddi womuyani, kuloga anelege oladdana na Kristu vina anele okala awakwana. (Jo. 13:15-17; Ef. 4:23, 24) Siku na siku maningo ehu anelege ovadda, oku nikalaga attu apama. Dhawene egumi enakale yowagalala vaddiddi! (Job 33:25) Koddi osunza mwaha wa ovenya mukwani ononikamihedha ovanene?

13. Ninga munlogela Masalmo 139:1-4, ovenyihiwa mukwani ononiha dhavi wi Yehova onomuziwa muttu-muttu wa iyo?

¹³ Ninga mulogelihu vamaromo, Yehova agavenyihaga attu onela wawiyihedha ewodhelo yawa ya wubuwela vina onele wavaha omuttu onakosihe okala ninga mwalani. Karoma otanalela eniwanana na okosa mabasa ninga aba. Yehova onowukwela venjene, nona iyene onokoyavi dhubuwelo dhawo, dhologa dhawo na dhawira dhawo. Akala Yehova onogana wuvenyiha mukwani, kinamurutxe wuwiyihedha ewodhelo yawo ya wubuwela, merelo na ekalelo ya omuttu wawo. Mwene David wanziwa mukalelo onimuzuzumela Yehova muttu-muttu wa iyo. (Kengesa Masalmo 139:1-4.) Ononelamo mukalelo onimuziwa Yehova muttu-muttu onnikamihedha okosa eni ovanene?

14. Ononelamo wi Yehova onomuziwa muttu-muttu wa iyo onnittukulela okosa eni?

¹⁴ Niganonelamo muziwelo onimuziwana Yehova muttu-muttu wa iyo kaninattukuleleye wova. Ninlogelani dhawene? Kanidduwale wi Yehova onomukwela muttu-muttu wa iyo. Iyene onoziwa mikalelo dhawo dhinukosiha ohiligana na muttu mwinagu. Iyene onofwaseyela wang’ana dhinnipadduwela mwiguni mwehu esuwene dhinnikaliha elihu. Ninopangarhazeya mwaha wa oziwa dhilobo esi! Txipo kanubuweleni wi nili nooka. Yehova oli na iyo mudhidhi wetene wa kadda siku atamelaga wona mukalelo wonikamihedha.—2 Map. 16:9.

15. Ovenyihiwa mukwani onlagiha dhavi eziwelo ya Yehova?

¹⁵ Wopiha wa okwa onkala ninga otxutxiwa na supadda nawiva vaddiddi. Abale animeleliwa na Satana anokosihaga wi okwa oku okale totela ya omwalaniha omarho wa attu  vina onyanyaliha dhorumela dhawa. Mbwenye dhotxutxa esi kadhinoviha. Iyo ninoziwa wila akala amwiddani ehu anonipa Yehova onela oniyihedha egumiya. (Ovuh. 2:10) Iyo ninokuluvela ologa wi kayiwo elobo enawodhe awene okosa mpaka onimwalaniha na Yehova. (Rom. 8:35-39) Yehova ohoniha eziwelo enddimuwa vaddiddi mwa onivaha njedhelo na ovenyihiwa mukwani! Njedhelo ntti ninogonjiha murega onlabihedhetxa Satana vina ninonittukulela okala oliba murima masiki na elobo-elobovi ennirela mwiddani wehu.

16. Mavuzo gani anfwanyeliwe ovikosa, nanda yowakula ya mavuzoya enawukamihedhe dhavi oziwa akala onomukuluvela Yehova?

¹⁶ Akala amwiddani a Yehova anowutxutxa bagela wi anela wupa, wehu onela okuluvela wi onovenyihiwa mukwani? Weyo onaziwe dhavi wi onela ovenyihiwa? Mukalelo mmodha wa oziwa bwa ovivuza, ‘Dhosakula dhaga masiki dhing’ono, dhinowoniha wi ddinomukuluvela Yehova?’ (Lk. 16:10) Nivuzo nina ttintti, ‘Miyo ddinokuluvela nipikirelo na Yehova nawi onela wakwaniha dhojombeliwa dhaga ddigatamela voroma Omwene waye?’ (Mt. 6:31-33) Akala mavuzo aba weyo wakulile ndde, ejo enlagiha wi onomukuluvela Yehova vina ohimala ovisasanyedha wila owodhe opembera elobo-txilobo enapadduwe musongorho.—Gano 3:5, 6.

17. (a) Ovenyihiwa mukwani onlagiha dhavi ovilela wa Yehova? (b) Ninalagihe dhavi wi ninotamalela ovilela wa Yehova?

¹⁷ Yehova omala wimetxa mudhidhi na sikuna ninfuneye ogomiha elabo ejino. (Mt. 24:36) Iyene kanalemena ovilela mpaka ofiyedha ogomiha elabo mudhidhiya ohinakwanela. Masiki Mulugu akanaga efunelo enddimuwa ya wavenyiha akwile, iyene onojedhavi n’ovilela. (Job 14:14, 15) Iyene onjedhela mudhidhiya ofiye wi avenyihe akwile. (Jo. 5:28) Iyo nikana mwaha wa omujedhela Yehova n’ovilela. Karoma wubuwela: Sabwa ya Yehova okala Mulugu wovilela attu enjene vamodha na iyoya nihifwanya mudhidhi “worugunutxa murima.” (2 Ped. 3:9) Yehova onfuna wi egawodheya attu enjene akane gari ya ojavo egumi yohimala. Nona ninofwanyelela olagiha wi ninotamalela ovilela waye. Na mukalelo gani? Mwa watamela voroma-vene “abele athomeliwe egumi yamukala-kala” nakamihedhaga omukwela vina omulabela Yehova. (Mer. 13:48) Dhahene awene anele ojavo vamodha na iyo ovilela wa Yehova.

18. Ninfuneliwanani wavilela ena?

 ¹⁸ Yehova onela ojedhela novilela ofiyedha vyaka txikwi vanakalihu attu oligana. Mudhidhi obo ohinafiya Yehova aganlevelelavi dhoddawa dhehu. Txibarene iyo nihikana mwaha munddimuwa wa wawonana opama attu akwihu vina okana ekalelo ya wavilela. Kona yotagiha ya murogora dhahi wana mamune wattiyile odhowa omatugumanoni sabwa ya iyene otabuwaga na dhozuzumiha dhinjene. Murogoraya ohiloga: “Ddahikubanya vaddiddi. Dhotadela dhehu dhotene dha vamuralani dhahimala ofudheya.” Mbwenye mwa dhotedhene esi, murogorha ole wannivilelavi mamune. Iyene wil’omukuluvela Yehova, vina txipo kakumuwile. Dhahene ninga enkosa Yehova, iyene kafwaseyele wang’ana dhovonya dha mamune, wavilibihedha wona opama wamukoseliye. Vasogorhova ohiloga: “Mamunaga muttu wa murima vaddiddi, dhahene onovilibihedha wi akwaranye makattamiho aniye.” Jofuneya vaddiddi wavilela amudhihu vina abalihu a mmulogoni, abuwene anrutxiwa okwaranya dhorutxa dhinfwanyiwani!

19. Txini enfwanyelihu ogana okosa?

¹⁹ Yezu vamodha na anjuya ahittaba muttanddeliwe elabo ya vati. Ovano karoma otanalela, awene ang’anaga elabo ya vati bamudhaliwe attu oligana, animukwela vina animulabela Yehova. Karoma wubuwela ottaba onakane abale anavenyihiwe velaboni ya vati wi adhowe alamulele vamodha na Kristu wirimu, awonaga attu apurelagamo egumi mwaha wa mabasa akosilani. (Ovuh. 4:4, 9-11; 5:9, 10) Karoma wubuwela okala mwilaboni munasadduliwe mintori dha wiwa opa na mintori dha ottaba, muhinakale vina obulela, okubanya na okwa. (Ovuh. 21:4) Esidha dhihinapadduwa, ganá omutagiha Babi wawo wokwela, weziwelo, vina wovilela. Ogakosa dhahuwene onela okalavi wohagalala masiki ofwanyiwe makattamiho-makattamihovi. (Tia. 1:2-4) Txibarene, iyo ninotamalela venjene sabwa ya mapikirelo a Yehova awi “athu apama na abure anere ovenyihiwa mukwani”!—Mer. 24:15.