1. Mareliho gani anjavo iyo?

OKALA mmulogoni mwa Yehova mareliho manddimuwa vaddiddi! Iyo ninkala mparaiso womuyani munkala attu anna murenddele vina wagalala. Iyo nihikana ttima mmulogoni?

2. Nladdaniho gani nilogile murumiwi Paulo mmakartani menjene alebiliye?

² Mutoma obu onela onisunziha nladdaniho nilogile murumiwi Paulo mmakartani menjene alebiliye. Mwari mwa karta modha-modha, Paulo ohiladdaniha mutugumano na mwili. Iyene vina ohimuladdaniha muttu mmodha-mmodha wa mmulogoni ninga yano ya mwiliya.—Rom. 12:4-8; 1 Kor. 12:12-27; Ef. 4:16.

3. Masunziho gani mararu anasekeserihu munsunzoni ntti?

³ Mwari mwa makani aba a ddabuno, iyo ninfuna nonemo masunziho mararu a ttima a nladdaniho na murumiwi Paulo. Voroma, ninfuna noneni wi muttu-muttu wa iyo ohikana ttima * mmutugumanoni mwa Yehova. Yanawili, ninfuna noneni txini enfwanyelihu okosa akala ninohivonana ttima mmutugumanoni. Yanonaru, ninfuna noneni ekalelani yofuneya ozuzumela wakwanihedha mabasa anvahiwehu mmutugumanoni mwa Mulugu.

4. Roma 12:4, 5 onnisunziha nni?

⁴ Elobo yoroma ensuzavo iyo mwari mwa nladdaniho na Paulo, jawi muttu-muttu wa iyo ohikana ttima mulogoni  mwa Yehova. Paulo oromile nladdaniho naye na mazu awi: “Mmwilini, vyano dhihinjivamo, kadhinlaba nibasa nimodha-nene. Jaquene eli iyo: ninjivilevi, ninowira mwili mmodha na Kristu, ninoluwelana ninga vyano dha mwili mmodhene.” (Rom. 12:4, 5) Paulo afuna anonihedhamo nni? Muttu-muttu wa iyo ohikana mabasa ottiyana mmutugumanoni, mbwenye notene nili a ttima.

5. “Mvaho” gani ovahile Yehova mmutugumanoni?

⁵ Vagalogiwaga attu ana ttima mmutugumanoni, txino onodha otamagela wubuwela wi ba abale animelela mutugumanoya. (1 Tes. 5:12; Aheb. 13:17) Ebaribari wi na mukutto wa Kristu, Yehova “oagawela athu mivaho” mmulogoni Mwaye. (Ef. 4:8) “Athu” aba agawiwe baba: Abali a Nikuru Nolamulela, akamihedhi a Nikuru Nolamulela, Emeleli a Katti, anameddelela milogo, anamasunziha, anddimuwa a mmulogoni, na adhari okamihedha. Abali aba otene ansakuliwa na muya wokoddela wi asapihe mabila a Yehova vina attidde mabasa a mmutugumanoni.—1 Ped. 5:2, 3.

6. Ninga munlogela 1 Tesalónika 2:6-8, txini enfwanyela okosa abali ottomiwe na muya wokoddela?

⁶ Abali anottomiwa na muya wokoddela wi akose mabasa ottiyana-ttiyana. Mwili ohikana vyano dhottiya-ttiyana, mada na manyalo anolaba wi apurihemo mwili wetene; n’ekalelo yakakene, abali asakuliwe na muya wokoddela anolaba mumodhani wila mutugumanoya wetene opurelemo. Awene kantamela ottittimihiwa na attu. Ottiya ejo awene anokosa guru wi awaralihe vina alibihe abali vamodha na arogoraya. (Kengesa 1 Tesalónika 2:6-8.) Iyo ninomutamalela Yehova onalabihedha alobwana aba aneddihiwa na muya wokoddela ahinzuzumela dhawavi bahi!

7. Mareliho gani anakela abale anlaba mabasa a mudhidhi wetene?

⁷ Ena anottomeliwa mmutugumanoni mabasa a omisiyonário na opionero. Txibarene, abali vamodha na arogoraya orugunuwa elabo yotene anolevaga mudhidhi wawa wi alaleye vina asunzihe muselu wa Mulugu. Mabasa aba anowattukulelaga enjene okala anamafwara a Yezu Kristu. Enoziweya wi anamalaleya aba kahiye attu ana mafumo menjene, mbwenye Yehova onowarurihaga na mareliho ottabiha. (Mk. 10:29, 30) Iyo ninowariha abali aba vamodha na arogoraya, vina ninottaba sabwa ya awene okala mmutugumanoni mwehu!

8. Anamalaleya otene akalele nni a ttima vamentoni va Yehova?

⁸ Ana ttima mmutugumanoni ba abali asakuleliwe mabasa na abaleya anlaba mabasa a mudhidhi wetene? Kahiye mwenemo! Anamalaleya otene a muttaka wapama ahikana ttima vamentoni va Mulugu vina mmulogoni. (Rom. 10:15; 1 Kor. 3:6-9) Mwebaribari, yofuna ya mutugumano ja wakosa anamafwara a Nabuyehu Yezu Kristu. (Mt. 28:19, 20; 1 Tim. 2:4) Anamalaleya otene a mmutugumanoni, obatiziwa na ohibatiziwa, efunelo yawa jimodhene.—Mt. 24:14.

9. Iyo ninattittimihedha nni arogorihu a Akristu?

⁹ Yehova onowavaha ttima enddimuva vaddiddi arogora a Akristu ali mmutugumanoni mwaye. Iyene onowattittimiha arogora ali ateliwi, amambali na amamukwelayá abuwene animulabela na nroromelo. Malebo anologa venjene merelo a ayana amwagalalihile Mulugu. Awene anosibiwa na merelo okala ayana a eziwelo, nroromelo, ozuzumela mabasa, oliba murima, a murima wovaha a mabasa apama. (Lk. 8:2, 3; Mer. 16:14, 15; Rom. 16:3, 6; Fil. 4:3; Aheb. 11:11, 31, 35)  Ninofwanyela omutamalela venjene Yehova sabwa ya okana mmutugumanoni mwehu, Akristu a ayana anna yeddelo yakakene ya ororomeleya!

10. Iyo ninavahedha nni ttima anakalaba a mmutugumanoni mwehu?

¹⁰ Iyo vina nihirurihiwa na anakalaba a mmutugumanoni. Milogo dhina dhihikana abali vamodha na arogoraya a anakalaba aromile omulaba Yehova egumi yawa yotene. Ena asunzile ebaribari ovanene. Masiki dhawenevi, anddimuwa aba ehu anotabuwaga na obulela, sabwani egumi yawa jawobana. Makattamiho aba anowarutxiha odhowa omatugumanoni vina mmabasani a olaleya. Mbwenye awene anokosa vanwodhelani mmabasani mwa olaleya, vina anolaba na guru dhotene dhinani wi alibihe vina asunzihe ena a mmulogoni! Iyo ninopurelamo ononelamo wawa. Txibarene awene ahikana ttima enddimuwa vamentoni va Yehova.—Gano 16:31.

11-12. Onlibiheyaga dhavi na azombwe a mmutugumanoni mwawo?

¹¹ Karoma watanalela azombwe a mmutugumanoni mwawo. Awene anofwanyiwa dhorutxa dhottiyana-ttiyana, sabwani ali mwilaboni enang’aneliwa na Satana Ddiabo, ontameletxa waraviha dhopyagela dhaye. (1 Jo. 5:19) Txibarene, iyo ninolibiheya nigawonaga azombwe akulaga omatugumanoni, adhowaga mmabasani a olaleya vina abarelaga nroromelo nawa na oliba murima. Ndde, nyuwo azombwe, muhikana ttima enddimuwa vaddiddi vamentoni va Yehova vina va mutugumano!—Masal. 8:2.

¹² Ahikalawo abali vamodha na arogoraya anubuwela wi kana ttima mmutugumanoni. Txini enamuwodhihe muttu-muttu wa iyo ovonana ttima mmutugumanoni? Ndoweni none.

13-14. Attu ena anttukuleyela eni wubuwela wi kana ttima mmutugumanoni?

¹³ Kona elobo yanawili enfwanyelihu osunza na nladdaniho na murumuwi Paulo. Iyene ologiletxe makattamiho anfwanyiwa attu  enjene masaka abano, a orutxiwa ovyonana ttima mmutugumanoni. Paulo ohileba: “Nnyalo kowiliwa nàloga: “Miyo kaddili nlada, nona kaddili mmaningoni”; n’ologawá kanigathiyile okala mmaningonimwá. Niyaru kologa: “Miyo kaddili ninto, nona kaddili mmaningoni”; n’ologwá kanigathiyile okala mmaningonimwá.” (1 Kor. 12:15, 16) Elobo gani yafuna onisunziha Paulo?

¹⁴ Akala weyo onovildaddiniha bure na abali ena a mmutugumanoni, onodha orutxiwa ovyonana ttima. Mmutugumanoni muhikala attu avahiwe ewodhelo ya osunziha, osasanyedha dha mmutugumanoni, obe ttotto ya waweddiha abali a mmulogoni. Enopadduwa weyo wubuwela wi kuna mivaho eso. Eji enoniha wi oli muttu wovyeviha vina wovipimelela. (Fil. 2:3) Mbwenye okale pasope. Weyo ogaviladdanihaga na abale ana ewodhelo yosibeya mmulogoni, onodha okumuwa. Dhahene ninga mulogele Paulo, onodha okana dhubuwelo dhopela malago dhawi kuna ttima mmutugumanoni. Txini enawukamihedhe ottiya okana dhubuwelo ninga esi?

15. Ninga munlogela 1 Korinto 12:4-11, txini enfwanyelihu oziwa mwaha wa mivaho dhinihuna?

¹⁵ Katanalela ebaribari eji: Nsaka zana noroma Yehova wahikosa matikiniho a wavaha Akristu mivaho dha muya wokoddela, mbwenye Akristu otene kakelile mvaho wokokene. (Kengesa 1 Korinto 12:4-11.) Yehova wahagawela mivaho vina ewodhelo yottiyana, mbwenye Mukristu mmodha-mmodha wanriha ejile yakeliye. Masaka abano, kawo mattikiniho owakela mvaho na muya wokoddela. Mbwenye maganoya bakakene. Txino notene kanina ewodhelo yakakene, masiki dhawenevi notene nili a ttima vamentoni va Yehova.

16. Malago gani avahile murumiwi Paulo anfwanyela iyo ofwara?

¹⁶ Ottiya oviladdaniha na Akristu akwihu, jofunye ovirihamo malago alogile murumiwi Paulo: “Muthu-muthu onfwanyela avipimena merelo aye: agafwanyamo dhinimuthabiha, agayena ahañganaga merelo a athu ena.”—Gal. 6:4.

17. Txini enapurelemu iyo nigavirihamo malago a Paulo?

¹⁷ Akala iyo ninovirihamo malago avudheleliwe  murumiwi Paulo oleba, nang’anaga merelo ehu bahi, ninela wona mvaho ovahiwehu vina dhinwodhihu okosa. Ninga motagiha, munddimuwa wa mulogo onodha ohikana ewodhelo ya okosa diskursu yaderetu, mbwenye mottiyana-mwene, iyene onodha okala namalalaya wa ttotto. Enodha vina opadduwa munddimuwa wa mulogo ohikana ewodhelo ya ovisasanyedha dhahene ninga anddimuwa ena, mbwenye iyene onodha okala mbali ona murima wofwewa onattukulela anamalaleya otene ofuna omukumbiraga malago a mBibiliani. Obe onodha okana ekalelo ya wawakela aleddo. (Aheb. 13:2, 16) Iyo nigafwaseyelaga ovyonana ewodhelo yehu na dhivahiwehu, ninele okana mwaha wa ovonana opama onawodhihu olabana mmulogoni. Vina kaninakane ekalelo enddimuwa ya ovang’ananiha na abalihu ana mivaho dhottiyana na dhehu.

18. Ninawodhe dhavi wunuwiha ewodhelo yehu?

¹⁸ Wila nunuwihe ettomo enihuna mmutgumanoni, notene ninofwanyelela otamela wenjedhedha mabasa ehu vina wunuwiha ewodhelo yehu. Munikuruni mwa Yehova ninovahiwa maswagiho owarala vaddiddi aniwodhiha wunuwiha ewodhelo yehu. Ninga motagiha, mmatugumanoni mwehu a vari va sumana ninovahiwaga malago a olaleyana. Weyo onopurelagamo masasanyedho aba a maswagihiwa?

19. Onawodhe dhavi wunuwiha efunelo ya okosa Eskola ya Anamalaleya a Omwene?

¹⁹ Masasanyedho mena a wunuwiha ewodhelo yehu, ba okosa Eskola ya Anamalaleya a Omwene. Eskola eji esasanyedhiwe abali na arogora ankosa mabasa a olaleya wa mudhidhi wetene, ankuweliwa babale ana vyaka 23 ofiyedha 65. Enokala ninga weyo kunawodhe ofwanya yogana eji. Mbwenye ottiya okosaga muddonddonddo wa dhorutxa dhinawuttukelele ohidhowawo, katanalela mwaha dhinuttukulela okana efunelo ya odhowawo. Ogamala olupelege ttarho dhinottukulele okuweleliwawo. Akala Yehova onokamihedha guru enkosiwe, kayiwo elobo enawurutxihe wakwaniha yogana yawo.

20. Txini ensunzehu na mazu aba a Roma 12:6-8?

²⁰ Elobo yanawuraru ensunzihu munladdanihoni na murumiwi Paulo eli va nivuruni na Roma 12:6-8. (Kengesa.) Apa Paulo ohoniha wila abele ali mmutugumanoni akana mivaho dhottiyana. Mbwenye iyene walogana olabana mvaho-mvahovi onihu wi niwaralihena vina nilibihena mutugumanoya.

21-22. Yotagiha ya Robert na Felice ennisunziha nni?

²¹ Kona yotagiha ya mbali dhahi onkuweliwa Robert. Mmaleliye omulabela Yehova elabo ya otakulu, iyene wahittomeliwa olaba Betel ya elabo yaye. Wahaddeliwa wi kanttiyihiwa mabasaya sabwa yawi ohikana evonyiliye, mbwenye masiki dhawenevi iyene ohiloga: “Mmurimani mwaga miyo ddavona ninga mvonyi—ddahikanavi yubuwelo eji—mwari mwa myeri dhinjene. Sabwa ya ejuwene ddahifiyedha wubuwela ottiya mabasa Obetel.” Iyene owodhile dhavi oroma oziveliwaga na mabasaya? Munddimuwa mukwaye wa mmulogoni ohimubutxedha wi Yehova ononiswagiha mmabasani anakelihu n’efunelo ya onivaha ewodhelo ya olabana mabasa mena anvahiwehu. Robert ohinonelamo wila onofwanyela ottiya wubuwela dhamundduni wi afwaseyele wang’ana esile dhinwodhiye okosa ovanene.

²² Mbali Felice Episcopo ogumanana magudulano akakene. Iyene na mwadhiye ahikosa eskola y’o Gileade yaka ya 1956, mmalelani  attomeliwa mabasa a weddelela milogo elabo y’o Bolivia. Yaka ya 1964 awene akana mwana. Felice ohiloga: “Yahinirutxa vaddiddi ottiya mabasa attomeliwehu. Sabwa ya ejuwene ddahimala yaka yantero ddikubanyaga. Mbwenye Yehova wahiddikamihedha, miyo ddahiroma ottiya dhubuwelo dhaga baddifwaseyela mabasaga okala babi.” Dhinupadduwela dhinoligana na dha Robert obe Felice? Weyo onokala wukumuwene sabwa ya ohikana gari ya mabasa aniwe? Akala pumwenemo, enawukamihedhe okala wohagalala ja osaddulela dhubuwelo dhawo, ozuzumelaga esile dhinwodhiwe okosa ovanene wi omulabe Yehova vamodha na abaloya. Ozuzumelege okosa mabasa, olabihedhaga mvaho na ewodhelo yawo, wila wakamihedhena attu ena; ogakosa dhawene onela ofwanya wagalala vina onele olibiha mutugumano.

23. Txini enfwanyelihu okosa, vina txini dhinasunzihu mwari mwa mutoma onfwarela?

²³ Muttu-muttu wa iyo ohikana ttima vamentoni va Yehova. Iyene onfuna wi iyo nikose mpaddi wa nikuru na amudhaye. Nigatamela mudhidhi wa otanalela merelo a walibihana abalihu vamodha na arogorehuya, nivilibihedhaga ovirihamo, ninela ottiya dhubuwelo dhawi iyo kaninetxa ttima mmutugumanoni! Mwa mpaddi wehu, ninawona dhavi attu ena ali mmutugumanoni? Ninalagihe dhavi wi ninowariha? Mutoma ondawo onela wakula mazu aba ofwanyela oziwa.