1-2. Mowiwana na 1 Timóteo 6:20, mabasa gani avahiwe Temóteo?

NINOWAKULUVELANA attu ena dhokaana dhehu dha ttima wi anikweyele. Ninga motagiha, ninodhowa okweyiha kobiri dhehu mbanko. Nigakosa dhawene ninojedhela wi kobiri yehu enele okoyeya vina kineyiwe. Nona ninononelamo txini entapulela omukuluvelana muttu elobo ya ttima.

² Kengesa 1 Timóteo 6:20. Murumiwi Paulo wahimuttiyedha muzombwe Timóteo dhilobo dha ttima—ebaribari yawakwana na efuneloya ya Mulugu na attu a vati. Timóteo vina wahikuluveliwana mabasa a ‘olaleya nzu’, vina odhowaganavi ddima yattomeliwe iyene ya “olaleya muthaka.” (2 Tim. 4:2, 5) Paulo wahimulibiha Timóteo wi attiddelevi dhattomeliwiye. Dhahene ninga Timóteo, iyo nihikuluveliwana dhilobo dha ttima. Dhilobo gani esuwodha? Vina iyo ninfwanyelelani ottiddelavi dhilobo dhinivahile Yehova?

3-4. Enlogeliwa nni wi ebaribari ya Mbibiliani ja ttima vaddiddi?

³ Yehova ohinivaha ebaribari yawakwana enfwanyeya Munzuni mwaye, Bibilia. Ebaribari eji ja ttima vaddiddi, vowi enonittukulela wandana na Yehova vina enonitapulelamo txini enfwanyelihu okosa wi nikane egumi yohagalaliha. Nigarumela ebaribari eji vina nivirihagamo mwigumini mwehu, ninela ofuruleya mmasunzihoni ottambi vina mmereloni onyakuwa.—1 Kor. 6:9-11.

⁴ Mwaha mwina ononiha wi ebaribari enfwanyeya Munzuni na Mulugu ja ttima, bubu: Yehova onavuwihedha attu oviyeviha bahi vina abale ‘anrumela dila dhaye.’ (Mer. 13:48) Muttu-muttu onorumela miselu dha mudhari wororomeleya  odduwene oli nipara ninlabana Yehova wi avuwihena ebaribari masaka abano. (Mt. 11:25; 24:45) Enowodheya iyo osunza ebaribari eji nanya, vina kayiwo elobo-txilobo elitxi yattima empitta ebaribari eji.—Gano 3:13, 15.

5. Elobo gani yina enikuluvelena Yehova?

⁵ Yehova vina ohinikuluvelana mabasa a wasunziha attu akwihu ebaribari yaye vina wawaddela dhinfuniye okosa. (Mt. 24:14) Ttima ya muselu onlaleyihu kimpimeya, jawinjiva-wene, sabwani muselu obu onowawodhiha attu okala munamudhini mwa Yehova vina onowavaha gari ya okana njedhelo na wakela egumi yohimala. (1 Tim. 4:16) Guru enkosihu ya ovuwiha muselu obu enowoniha wi ninkamihedha mabasa ahinakalagawo, kintanala akala mudhidhi onlaleyihu mwinjene obe mung’onovi. (1 Tim. 2:3, 4) Ya ttimaya-ttimaya ja olaba mumodhani na Mulugu!—1 Kor. 3:9.

6. Txini epadduwile na abale akoddile okala mento?

⁶ Attu eena akalawo masaka a Timóteo, kawodhile wakela gari ya olaba mumodhani na Mulugu. Demas sabwa ya okweletxa dhelabo, wahinyanyala gari ya olaba na murumiwi Paulo. (2 Tim. 4:10) Enoneya ninga Fijelo na Hermójenes, anyanyalele mabasa awa a olaleya sabwani ova otabutxiwa mufwara-fwariwani dhahene ninga epadduweliwe Paulo. (2 Tim. 1:15) Hemeneu, Alexandre, na Fileto ahirava ovuru-vuru wa elabo bakala asadduweli a ebaribari. (1 Tim. 1:19, 20; 2 Tim. 2:16-18) Nigang’anani pama ninowona wi alobwana aba otene ali attu azuzumela vina attittimiha mabasa a Mulugu, mbwenye otowa malago wawa ohattukulela oyelela ttima ya ebaribari.

7. Dhopyaga gani dhinlabana Satana wi anipelena malago?

⁷ Txini dhinkosa Satana wila anake ebaribari enikuluvelena Yehova? Karoma wona dhopyaga dhaye. Iyene onlaba na miselu dhinvavihiwa mudhipanoni wi apele malago attu, enjivihaga dhubuwelo dha onyanyalana ebaribari. Iyene ononitxutxa vina onisegedha wottabwawa obe ofwara-fwara winjene wi anittiyihe mabasa olaleya. Iyene ononikwekwettela ovuruwana “ovanyihana wa athu anivikosa ‘aziwetxi’” na dhologa dha asadduweli n’efunelo ya onittiyiha ebaribari.—1 Tim. 6:20, 21.

8. Yotagiha ya mbali Daniel yusunzihile nni?

⁸ Iyo nigahikale pasope, ninodha oyelela ttima enihu ya ottiddela ebaribari. Karoma wona empadduwele Daniel, * waziveliwetxa ojugari vidiyu gemi. Iyene bela: “Miyo ddiromile ojugari vidiyu gemi, mwakwanihedhimi vyaka kumi. Voroma-vene dhajugarimi  kadhali dhosumuleleya. Mbwenye vasogorhova ddahiroma ojugari gemi dhopanga.” Malabo mena, Daniel wanjugari gemi oromana menbesi ofiyedha txiguwo. Iyene ohilogavi: “Mugilatele miyo ddubuwela deretu, ddihidha ozinddiyela wi gemi dhajugarimi, na mudhidhi wanongimi, dhanddittukulela vang’ono-vang’ono omunyanyala Yehova. Ddihifiyedha wubuwela wi malago a mBibiliani kalebeliwe miyo.” Iyo nigahikalele mento dhovegana dhehu, dhinela onittukulela omunyanyala Yehova. Ejo egapadduwa ninoyelela dhilobo dhattima dhinikuluvelana Yehova.

9. Ninga munlogela 1 Timóteo 1:18, 19, Paulo omuladdanihile Timóteo naani?

⁹ Kengesa 1 Timóteo 1:18, 19. Paulo ohimuladdaniha Timóteo na munyakoddo vina ohimukokomeza “oraba koddo yapama”. Paulo kalogana koddo ya muttu na muttu mukwaye, nne, iyene walogana koddo yomuyani. Akristu akale dhavi ninga anyakoddo ali mukoddoni? Txini dhinfwanyelihu okosa ninga anyakoddo a Krsitu? Ndoweni none masunziho matanu a nladdaniho na Paulo. Masunziho aba anela oniwodhiha ottiddelavi ebaribari.

10. N’ekalelo gani enfwanyelihu omukwela Mulugu, vina ekalele nni yofuneya?

¹⁰ Omukwela Mulugu. Munyakoddo wapama kampela malago. Iyene onowana na guru dhotene wi amvune muttu onimukweliye obe avune elobo txilobo enttittimihiye. Paulo ohimututela Timóteo winjiviha omukwela waye Mulugu—kuloga omukwela Mulugu wohipela malago. (1 Tim. 4:7) Omukwela na omuriha wehu Mulugu ogenjiva, ninela okana efunelo enddimuwa vaddiddi ya ottiddelavi ebaribari.—1 Tim. 4:8-10; 6:6.

11. Iyo ninfwanyelela nni okana ekalelo ya omyala murima?

¹¹ Omyala murima. Munyakoddo onofwanyela olibiha maningo mudhidhi wetene, dhahene onele okala womala na wale wi awane. Timóteo wanfwanyela oviwaraliha mpaddi womuyani sabwani yanfuneya iyene wiwelela malago a Paulo a ottawa vidhivi-dhivi dha mwili, attidde merelo apama, vina akane ekalelo ya ovitaganyiha na aroromeli akwaye. (2 Tim. 2:22) Wira eji enofuna omyala murima. Iyo ninofwanyela omyala murima wi niwane na vidhivi-dhivi dhabure. (Rom. 7:21-25) Mwawenjedhedha, iyo ninofwanyela omyala murima wi niwodhe orula omuttu wa wale nabale omuttu oswa. (Ef. 4:22, 24) Ninofwanyela okosa guru ya odhowaga omatugumanoni.—Aheb. 10:24, 25.

12. Niwodhe dhavi winjiviha ttotto yehu ya olaba na Bibilia?

¹² Munyakoddo onofwanyela oziwa olabana supadda naye. Wi asunze pama, iyene onofwanyela oviswagiha malabo otene. N’ekalelo yakakene iyo ninofwanyela oziwa olaba na Mazu a Mulugu. (2 Tim. 2:15) Malago aba a olabana pama Mazu a Mulugu, ninosunzihiwa omatugumanoni wehu. Akala iyo ninfuna nikane ttotto ya wanonihedhamo pama attu wi Bibilia ohikana muselu wa ebaribari vina wa ttima, ninofwanyela ohitxelela omusunza Bibiliayá. Jofuneya olaba na Mazu a Mulugu wila niwaralihe nroromelo nehu. Eji enopitta omwengesavi Bibilia. Enofuneya otanalela enengesihu vina ninofwanyela otamelaga ononelamo dhengesilehudha mmanivuruni mwehu; dhahene panawodhe iyo ovirihamo dhinloga Malebo. (1 Tim. 4:13-15) Venevo panawodhihu olaba na mazu a Mulugu wila nasunzihe abale ana efunelo. Ninga mulogelihu, wila eji epadduwe, ninofwanyela okosa venjivene ottiya wengesavi maleboya a  mBibiliani. Yofuna yehu ja wanonihedhamo abale annivuruwana vina wawoniha mpattelo onapatta nlebona. Nigakana elemelelo ya omusunza Bibilia, ninela okana ttotto ya owodha olabana Mazu a Mulugu wila nasunzihe attu akwihu.—2 Tim. 3:16, 17.

13. Ninga munlogela Ahebreu 5:14, txini dhinfwanyelihu opimelela?

¹³ Ziwá opimelela. Munyakoddo onofwanyela okala txenjewa wi azinddiyelege ngovi momaguva. Iyo vina ninofwanyela okala pasope wi niwodhege wona merelo agadhile oniputtula obe onika vangovini. (Gano 22:3; kengesa Ahebreu 5:14.) Ninofwanyela osakula mavego ehu na malago. Dhinlagihiwa mu Televizauni na dhipano dhina dhinvaviha miselu dhinotakaliha omuttu. Merelo a omuttu wotakala anomunyimula Mulugu vina anomuttukulela muttu ogwela muputtuwani. Mwawenjedhela, iyo ninorabela mavego agadhile wobaniha omukwela wehu Yehova.—Ef. 5:5, 6.

14. Opimelela omukamihedhile dhavi Daniel?

¹⁴ Daniel ologiwe vamoromo ohipima, bazinddiyela wi ojugari vidiyu gemi ya muya dhabure yannimutotela makani. Iyene ohitamela ononelamo makaniya mu Watchtower Library wi aziwe txini yafwanyeliye okosa wi agomihe makaniya. Txini epadduwile vasogorhova? Iyene ohittiya ojugari vidiyu gemi. Ohittimiha vipano dhotene dha mmuttittoni mwaye dhewanana na joguya. Vasogorhova ohiloga: “Ottiya ojugarigi vidiyu gemi, miyo ddadhowa waredha na abali a mmulogoni.” Ddabuno Daniel onlaba ninga munddimuwa wa mulogo.

15. Miselu dhottambi dhikalele nni dhawopiha?

¹⁵ Dhahene ninga Timóteo, iyo ninofwanyela orabela miselu dhigadhile onitotela ngovi, esuwene dhinvapa asadduweli. (1 Tim. 4:1, 7; 2 Tim. 2:16) Ninga motagiha, awene anodha ovuwiha miselu dhottambi mwaha wa abalihu, obe ologa mazu anda onitotela waganyedha nikuru na Yehova. Miselu esi dhotowa malago dhihikana ewodhelo ya wobaniha nroromelo nehu. Iyo ninofwanyela orabela oravihiwa dhovuwihiwa esi. Ninrabelela nni? Sabwani miselu dhinvuwihiwa na “athu anongeyile zelu, alapelane na ebaribari”. Yofuna yawa ja ‘otota makani na opambihana.’ (1 Tim. 6:4, 5) Awene anfuna wi iyo nirave obure wawa, wi nirome wawaganyedha abalihu.

16. Dhozuzumiha gani dhinfwanyelihu orabela?

 ¹⁶ Orabela ozuzumela mabasa mena. Timóteo wanfwanyela ozuzumela mabasa a olaleya ottiya ozuzumela dhamwilaboni, sabwani iyene wali “munyakodddo wororomeleya wa Yezu Kristu”. (2 Tim. 2:3, 4) Dhahene ninga Timóteo, iyo kaninfwanyela ozuzumela dha mwilaboni. “Ojiwa murima na dhorela” onodha ohoga omukwela wehu Yehova, otamalela wehu Mazu a Mulugu vina na efuneloya yehu ya wawaddela attu akwihu. (Mt. 13:22) Iyo ninofwanyela oluluviha dha egumi yehu wi nitamele “voroma Omwene wa Mulugu”.—Mt. 6:22-25, 33.

17-18. Txini enfwanyelihu okosa wi nivibarele mwa esile dhigadhile onitotela ngovi mpaddi womuyani?

¹⁷ Kala womala na wale wi olabe na namaguve. Munyakoddo onofwanyela ovisasanyedha wi aziwe yokosa. Akala iyo ninfuna nittiddelevi dhinikuluvelena Yehova, jofuneya okala womala na wale wi nizinddiyelege dhawopiha. Txini enaniwodhihe okana ekalelo ya namaguve? Ninofwanyela oziwa n’ottaga txini enfwanyelihu okosa egapadduwa elobo-elobovi.

¹⁸ Ninga motagiha, abale ankalaga mmatugumanoni manddimuwa matugumanoya ahinatti oroma, anowaddeliwaga musuwo wobudduwa na namaguve. Anaddeleliwani? Sabwani eji enele wakamihedha obudduwa momaguva vagapadduwa ngovi. N’ekalelo yakakene, iyo ninfwanyela ovisasanyedha n’ottaga wi nikale womala na wale; niwodhege “omurudha” rurumutxani wetene, ninga merelo onyakuwa, opanga, miselu dha asadduweli, nigonaga TV obe porogarama dhina. Akala ninovisasanyedhela n’ottaga mwa esile dhigadhile onipadduwela, ninela okala omala na wale wi nivibarele mpaddi womuyani, nittawaga ngovi ya onyakuwa vamentoni va Yehova.—Masal. 101:3; 1 Tim. 4:12.

19. Mareliho gani anakelihu, nigavilibihedha ottiddela na mada omeli dha ttima dhinikuluvelena Yehova?

¹⁹ Iyo ninofwanyela ottittimiha dhapama dhinikuluvelena Yehova—ebaribari ya Bibilia na gari ya wasunziha attu ena. Nigakosa dhawene ninela okana mobuwelo wottororha, egumi yebaribari, vina ninele ottabela mabasa a wakuwela attu ena odha omuziwa Yehova. Na nikamihedho naye ninele owodha ottiddelavi na mada omeli esile dhinikuluveliyena.—1 Tim. 6:12, 19.