1-2. Wiwanana gani ona Kohelét 11:6 na mabasa olaleya miselu dhapama dha Omwene?

DHILABO dhina, attuya agaddeliwa miselu dhapama anorumeela. Eji jilobo yamakamaka enfwanyelani okosa! Oku dhilabo dhina attuya kantonyihedha efunelo yinji ya Mulugu obe ya Bibilia. Mmuruddani mwawo attuya anlagiha efunelo gani? Kintanala mukalelo onakulelani, Yehova onjedhela wi nidhowenavi vasogorho mabasa olaleya mpaka vanalogiye wi mabasaya afiya omagomo.

² Yehova ohimala ogana mudhidhi onagome mabasa a olaleya, ngamalá panafiye “ogoma wa elabo.” (Mt. 24:14, 36) Oku nijedhaga eso opadduwa ninalagihe dhavi wi ninovirihamo mazu awi “kufunye myono dhawo”? *—Kengesa Kohelét 11:6.

3. Txini enasekeserhihu mwari mwa nsunzo ntti?

³ Mutoma wa nsunzo ovirile nihisunza ttarho nayi dhinfwanyelihu ofwara wi nikale “anamathadda a athu.” (Mt. 4:19) Mwari mwa nsunzo ntti ninele osekeserha ttarho ttaru dhinanikamihedhe mmabasani a olaleya, masiki nigumanagana makattamiho. Ninele onsunza ekalelani yamakamaka (1) wika mabasa olaleya vamburoni voroma, (2) ovilela, vina (3) olibiha nroromelo nehu.

4. Ninfwanyelela nni ozuzumela mabasa anivahile Yehova?

⁴ Yezu wahiloga vizinddiyelo vina mikalelo dha masaka omariha,  iyene wanziwa wi dhilobo esi dhigahizuzumiha mabasa olaleya. Nona wahawaddela anamafwara aye wila “muvyañganele.” (Mt. 24:42) Masaka abano, iyo ninogumanana dhilobo dhinnizuzumiha dhahene ninga yapadduwile nsaka na Nowé, nsaka na Nowé attuya kaafuna ovuruwana miselu dhapama, mbwenye masiki dhawene Nowé wahizuzumela olaleya mazu a Mulugu. (Mt. 24:37-39; 2 Ped. 2:5) Dhahene ninga Nowé, iyo ninofwanyela ozuzumela mabasa anittomeli Yehova.

5. Merelo 1:6-8 anoniha dhavi ovapeya wa mabasa olaleya?

⁵ Masaka abano mabasa a olaleya anofwanyela okala vamburoni voroma mwigumini mwehu. Yezu ahinatti okwa ohiloga wi mabasa olaleya agahinjivavi ofiyedha omwadheyela elabo yotene. (Jo. 14:12) Mmaleliye okwa anamafwara ena ahiyelela mabasa awa a ottadda. Mmaleli Yezu ovenyihiwa mukwani iyene ohikosa nttikinihiho nakamihidhile anamafwara aye ottadda oba dhinjene. Welela onihe wi mabasa olaleya ali amakamaka opitta mabasa-mabasavi. (Jo. 21:15-17) Yezu ahinatti odhowa wirimu wahawaddela anamafwara aye wi mabasa olaleya etileyi agahimwadheyela mu Jeruzalemi ofiyedha okomoniwa. (Kengesa Merelo 1:6-8.) Muvireli vyaka dhing’onovi, Yezu ohimoniha murumiwi Joau esile dhigapadduwile “siku na Nabuya.” * Mwari mwa dhopadduwa eso dhotene dhonihiwiye, Joau ohimonamu vina anju wimelela mabasa olaleya “muthaka wapama” walaleyeliwa “athu a vilabo dhotene, a mahimo, a vilogelo [vina] a malogo etene.” (Ovuh. 1:10; 14:6) Txibarene, efunelo ya Yehova ja iyo okosa mabasa a olaleya ofiyedha omagomo.

6. Ninawodhe dhavi ozuzumela mabasa olaleya?

⁶ Nigatanalela mukalelo onikamihedha  Yehova wakwaniha mabasa a olaleya panawodhihu olaba na murima wotene. Ninga motagiha, Yehova ononikamihedha na dhoja dhinjene dhomuyani, dhinda mwari mwa manivuru opidiwa na a mudhipanoni, miselu dhovuruwaniwa, mavidiyu na masunziho a mbroadcast. Karoma wubuwela: Mu website wehu muhikala miselu na vilogelo okwaranya 1.000! (Mt. 24:45-47) Elabo ejino muli ogawana wa politika, wa relijiau na ottiyana wa dhokaana, muhikala adhari ororomeleya a Mulugu okwaranya amiliau atanu na araru ali mumodhani orugunuwa elabo yotene. Ninga motagiha, Ishano labo 19 na mweri wa Abrili yaka ya 2019, Anamoona a Yehova orugunuwa elabo yotene ahigumanela onsunza nlebo na siku-nene nttile. Omattiyuya, attu awakwana 20.919.041 ahona muttupo wa Wubuwela Okwa wa Yezu. Iyo ninottukuleleya ozuzumela mabasa aba Omwene nigatanaalela gari enihu ya wona vina ya okosa mpaddi wa matikiniho ampadduwa masaka abano.

7. Yotagiha ya Yezu ennikamihedha ozuzumela nni?

⁷ Mukalelo mwina onanikamihedhe ozuzumela mabasa a olaleya ku ofwara yotagiha ya Yezu. Iyene kattiyile wi elobo-elobovi emuzuzumihe mwari mwa mabasa aye osunziha ebaribari. (Jo. 18:37) Kapeliwe malago na yopyaga ya Satana yawi agahinvaha “vilabo dhotene dha vati na ofumawá olimo”, nne vina kapeliwe malago na yawira ejile yafuna okosa attu ya omuttomela omwene. (Mt. 4:8, 9; Jo. 6:15) Yezu kaaravile ekalelo ya ofunetxa dhorela, nne vina katxutxeyile na ofwara-fwariwa. (Lk. 9:58; Jo. 8:59) Nroromelo nehu nigehiwa, enanilibihe ja wubuwela malago anaddele murumiwi Paulo. Iyene ohatutela Akristu ofwara yotagiha ya Yezu, dhawene ‘kanaleme nne kanendeye guru’!—Aheb. 12:3.

8. Ovilela txini, onfuneyelani ovanene?

⁸ Ovilela ekalalelo ya ojeedha na okurumuwa ofiyedha dhilobodha otxinja. Iyo ninofwanyela okala ovilela wi nikaane ekalelo ya ojeedha wa ogoma dhorutxa dhinnipadduwela obe ya ojedhana wakwanidheya wa elobo-elobovi enjedhihu. Namavuhulela Habakuk wanjeedha ogoma wa ottimbwini wakosiwa mu Juda. (Hab. 1:2) Anamafwara a Yezu ajeedhela wi Omwene wa Mulugu ‘ogahimetxiwa momaguva’ wi avuneye mmadani mwa akadda Roma. (Lk. 19:11) Iyo ninojedhela Omwene wa Mulugu ogomiha makattamiho a mwilaboni vina odhana elabo eswa munakale attu oligana. (2 Ped. 3:13) Egali dhahene, ninofwanyela ovilela vina ojeedhela mudhidhi opimelele Yehova. Katanalela mikalelo dhing’onovi dhinnisunziha Yehova okala attu ovilela.

9. Dhotagiha gani dhinoniha ovilela wa Yehova?

⁹ Yehova yotagiha yawakwana ya muttu wovilela. Iyene ohimujedha Nowé omusasanya pangaya vina olaleya muttaka na mukalelo “wa muthu womyala murima.” (2 Ped. 2:5; 1 Ped. 3:20) Yehova ohinvuruwana Abrahamu na ovilela mudhidhi wanvuziye mwaha wa otolotxiwa wa mittette dha Sodoma na Gomora. (Wita 18:20-33) Mwari mwa vyaka dhinjene Yehova ohivilela venjene nlogo na Izrayel. (Ne. 9:30, 31) Masaka abano iyo ninowona vizinddiyelo dhinoniha ovilela wa Yehova, vowi iyene onojeedhavi na efunelo yawi “etene afwanye mudhidhi worugunutxa murima.” (2 Ped. 3:9; Jo. 6:44; 1 Tim. 2:3, 4) Yotagiha ya Yehova enonivaha mwaha dhapama dha okala ovilela oku nidhowaganavi mabasa a olaleya na osunziha. Iyene vina ononisunziha ovilela oli mwari mwa dhopadduwa dhili Munzuni naye.

10. Yotagiha ya namalima onlogiwa va Tiago 5:7, 8 enisunziha eni?

 ¹⁰ Kengesa Tiago 5:7, 8. Yotagiha ya namalima onjedhela wunuwa wa milima enonisunziha mukalelo onfwayeliho olagiha wi nili ovilela. Ebaribari wi milima dhina dhinowunuwa nomaguva. Mbwenye dhina, makamaka esile dhinbala misapo dhojiwa dhinogonela vaddiddi wila dhitiwe. Muizrayel nsaka na osinanga nangonela ofiyedha mweri mitanu na mmodha. Namalima wawaza beu dhaye muzogwe woroma ahinatti orubwa, ngamala wanjeedha ofiyedha nsaka na osinanga. (Mk. 4:28) Ninele olagiha eziwelo nigatagiha ovilela wa namalima. Mbwenye masaka mena ejo enodha okala yorutxa.

11. Ovilela onnikamihedha dhavi mmabasani a olaleya?

¹¹ Attu ohiligana ahikana efunelo yokaana dhintamelani momaguva. Akala iyo ninofuna wi milima dhehu dhibale ninofwanyela—okurubela osasanyedha vina ohelela manje. Mabasa a wakosa anamafwara anofwanyela okoseliwa guru yokokene. Dhahene ninga munkalihu pasope nigatawulelaga misapo, ninofwanyela okosa yakakene nigeeddihaga nsunzo na Bibilia. Ovilela ononikamihedha okalavi okurumuwa masiki akala attu a mmuruddani mwehu kannivuruwana. Masiki akala attu ena anonivuruwana obe anorumeela osunza ninofwanyelavi okala ovilela. Iyo kaninfwanyela ommagelela namasunza wunuwa omuyani. Masaka mena anamasunza a Yezu kanonelamo momaguva masunzihoya. (Jo. 14:9) Ninofwanyela wubuwela wi iyo ninolaleya na osunziha bahi, mbwenye Mulugu ddinakamihedha okana nroromelo.—1 Kor. 3:6.

12. Ninawodhe dhavi okala ovilela nigalaleyaga anamudhi ehu ahili Anamoona?

¹² Masaka mena enonirutxaga okala ovilela akala ninomulaleya obe ninomusunziha mwana mmudhi ohili Munamoona. Nigano  ninfwanyeya va Kohelét 3:1, 7 ninowodha onikamihedha. Ninloga “Dhetene dhitomeliwa mudhidhi . . . nsaka n’omàla, nsaka n’ologa.” Ninfwanyelela ottiya wi mweddelo wehu wapama ovahe onamoona, oku nijedhelaga mudhidhi onafunani wila nasunzihe ebaribari. (1 Ped. 3:1, 2) Nigavilelaga attu otene otaganyiha na anamudhi ehu, panawodhihu walaleya vina wasunziha.

13-14. Dhotagiha gani dha ovilela dhinfwanyeelihu ofwara?

¹³ Dhotagiha dha adhari ororomeleya a masaka a Bibilia na abale a masaka abano dhinonisunziha okala ovilela. Habakuk wanjeedha na okuluvela ogoma wa obure, iyene ohiloga: “Dhinfuna ddikale vuruwà ddihigonaga.” (Hab. 2:1) Murumiwi Paulo ohiloga wi efunelo ya mmirimani mwaye yali ya “ogomiha” mabasa attomeliweyi. Txibarene, na ovilela iyene ohikosa ‘mabasa a olaleya muttaka wapama.’—Mer. 20:24.

¹⁴ Katanalela yotagiha ya atelani dhahi agomihile masunzo o’Gileade baattomeliwa elabo yahanetxa Anamoona, attu a wenewowa kali Akristu. Attu enjiya kana efunelo ya omusunza Bibilia. Mottiyana-mwene akwawa agomihilanina vamodha masunzo o’Gileade, attomeliwe dhilabo dhina, anaperengezela miselu dhawi ahikana anamasunza a Bibilia opureleyamo. Masiki mmuruddani mpule attuya ahiwelelaga miselu dhapama, atelani abale ankosavi mabasa a olaleya. Omamalelo wa vyaka tanu na ttaru mmuruddani m’oneya ninga kamwali attu ovuruwana, awene ahagalala vaddiddi mwa omona namasunza wawa mmodha ottukule ttarho ya wubatiziwani. Oladdana gani oona dhopadduwa esi dha masaka abano na esile dhawale? Abalihu aba a nroromelo kakumuwile nne vina kafunyile myono dhawa, vina Yehova ohiruriha ovilela wawa. Nona, iyo nikane ekalelo ya wafwara “abale anakela dhapikirhele Mulugu, aneddavi na ntidi, anroromela.”—Aheb. 6:10-12.

15. Na mukalelo gani onwaraliha nroromelo efunelo yehu ya olaleya?

¹⁵ Nihikana nroromelo nawi muselu onlaleyihu ninilela nafwanyena attu enjene egawodheya. Iyo ninokuluvela mapikirhelo anfwanyeya munzuni na Mulugu. (Masal. 119:42; Iza. 40:8) Masaka abano ankalihuwo iyo ninowona wakwanihedheya wa mavuhulo menjene. Ninowawonaga attu enjene atxinjaga dhigumi dhawa mwa ovirihagamo magano a mBibiliani. Dhotagiha esi dhinonittukulela orumela wi muselu wapama wa Omwene onofwanyela ofiyedhiwana attu a malogo otene.

16. Ninga munlogela Masalmo 46:1-3, omuroromela wehu Yehova vamodha na Yezu onnivaha dhavi guru ya odhowaganavi mabasa a olaleya?

¹⁶ Ottiya ejo iyo ninomuroromela Yehova, Mwinya wa muselu onlaleyihu, vina ninomuroromela ole ogilatile vampaddoni Vomwene, Yezu. (Jo. 14:1) Kintanala makattamiho ampadduwa obe angumanihuna, Yehova onela odhowavi akalaga ttawela yehu. (Kengesa Masalmo 46:1-3.) Mwa wenjedhedha, iyo ninokuluvela wi Yezu Kristu ddunimelela mabasa olaleya ovenyedha wirimu, alabagana guru na owodha onvahile Yehova.—Mt. 28:18-20.

17. Kaloga yotagiha enoniha sabwa enfanyeelelihu odegelavi olaleya.

¹⁷ Nroromelo ninehu ninonittukulela orumela wi Yehova onela oruriha guru dhehu, n’ekalelo yahajedhihu. (Koh. 11:6) Ninga motagiha, malabo otene attu enjene anosuselaga vakarinyani vehu dholaleyana wi one manivuru anlaleyihuna. Mukalelo obu wolaleya  onodhana dhopurelamo? Txibarene! Mweri wa Novemburu yaka ya 2014, Mabasa Ehu a Omwene ahiloga muselu wa muzombwe dhahi wakosa masunzo manddimuwa wamulebele karta eng’ono Munamoona dhahi wa Yehova. Iyene ofanyile nivuru nehu oskola waye, nivuruna banimunonihedhamo muselu wa ofiyana Onumbani ya Omwene. Vasogorhova, iyene ohibatiziwa ddabuno onlaba ninga pionero wa mudhidhi wetene. Yotagiha eji enonittukulela owaralela mabasa olaleya sabwani enowooniha wi ahikalawo attu anfuna wiwa miselu dha Omwene.

18. Ninkanela ni ebaribari yawi mabasa olaleya muselu wa Omwene anela wakwanihedheya ninga munfunela Yehova?

¹⁸ Nihikana ebaribari wi mabasa a ovuhiwa Omwene ankosihu anela wakwanihedheya vansakaniva. Karoma wubuwela dhipadduwile nsaka na Nowé. Yehova onowoniha wi iyene Mulugu ohinvonyiha dhipikireliye. Iyene wahiloga n’ottaga mwaha wa Mpulo, mulogeliye dhahivira vyaka 120. Mpuloya ohinatti opadduwa, Yehova wahimuruma Nowé omusasanya pangaya. Nowé wahidhowa alabagavi na guru ofiyedha vyaka 40 obe 50 mpuloya ohinatti oroma. Masiki vahatanaliweye na attu a nsaka naye, iyene wahidhowavi alaleyaga muselu wa nikokomezo, ofiyedha siku nilogile Yehova wi avolotxe vinama mpangayani. Mufiyedhe mudhidhiya, “Nabuya ofuga musuwo.”—Wita 6:3; 7:1, 2, 16.

19. Txini enfwanyelihu okosa wi nihifunye myono dhehu?

¹⁹ Ovanene Yehova onela ogomiha mabasa olaleya, vina onela “ofuga musuwo” wa elabo ya Satana wi adhena elabo yoligana. Ejo ehinatti opadduwa, iyo ninfuna nimutagihe Nowé, Habakuk, na ena ahifunyile myono dhawa.