Versu eji yofuna ononelamo enloga dhahi: ‘Ogona mwilaboni mwawo ososiwa wa muyelegi, opujiwa wa muligani na wa muttu ohina muladdu, kutikiniheye na dhawiradha eso; vowi mwimeleli wa mabasa ohikana vina munddimuwa waye onimwang’anela, apo obili anowang’aniwa na ole oli munddimuwa wawa.’—Koh. 5:8, Tradução do Novo Mundo.

Attu anubuwela wi dhologa esi dhinatonya alamuleli a mwilaboni. Mbwenye nigatiba ononelamowa, ninela ofwanyamo ebaribari yawi Yehova onoyamo; eji enonipangarhaza vina enonivaha nikuluvelo.

Voroma-vene, nivuru ntti na Kohelét 5:8 ninimuttonya mulamuleli onapuja ayelegi vina onakona attu ahina muladdu. Masiki mulamuleliya munkosiyevi eso, iyene onoziwa wi onowoniwa na muttu ona onddimuwa opitta waye. Txibarene, onddimuwa onottiyana. Mokubanyiha-mwene elabo ehirameyeliwa vaddiddi alamuleli anttonga n’oligana, nona eji enowattukulela attu analamulelani orava ekalelo yawa yogwaragwambi.

Mbwenye masiki dha mwilaboni dhittabwe otakala, iyo kaninatowiwe nikuluvelo nawi Yehova, Mulugu wehu ddule ‘onawang’ana anddimuwa abale eli’ ali mmipaddoni dhawa. Dhiganittabwela, iyo ninomukumbirha nikamihedho Mulugu wehu. Kanidduwaleni wi “Nabuya onowona dhetedhene dhiniriwa mwilaboni; iyene onoatanala abale animuroromela.”—2 Map. 16:9.

Mwa mpaddi mwina, nivuru ntti na Kohelét 5:8 ninoniziwiha kakamwe emanya ya alamuleli a elabo—masaka otene awene anowimeleliwa na munddimuwa wawa. Ennivaha embwenyi-mbwenyi ja oziwa wi Yehova ddulí munddimuwa wa elabo yotene, ndde, iyene Mulamuleli Munddimuwa. Olamulelawa waye ottiyile mmadani mwa Mwanaye, Yezu Kristu, Mwene wa Omwene wa Mulugu. Namawodha-wodha, odduwene onona dhetedhene, ddoligana kanttonga na manyigalo, Mwanaye vina ona ekalelo yakakene.