1. Yezu wakuwelele mabasa gani anamattadda anayi, vina awene akulile dhavi?

MURUMIWI PEDRO, Andre, Tiago na Joau ali anamaguliha dhottadda. Karoma wubuwela otikina wawa mmwiwalani Yezu alogaga mazu awi: “Muddifware, miyo ddinowirani anamathadda a athu.” * Awene akulile dhavi? Bibilia onloga dhahi: “Aweneyá athiya milaba dhawa, amfwara Yezu.” (Mt. 4:18-22) Yogana eji egahisaddula egumi yawa okala nokala-wene. Ddabuno agahittiya okala anamattadda a esavi, bakala “anamathadda a athu.” (Lk. 5:10) Malabo abano, Yezu onowakuwela abale anna murima waweddeyana vina ankwela ebaribari. (Mt. 28:19, 20) Weyo ohirumela mukuwo wa Yezu wokala namattadda wa attu?

2. Okala namattadda wa attu akalele nni mabasa ohivegana, vina txini enaniwodhihe okosa mabasa aba?

² Txino oromile omusunza Bibilia walene, ddabuno ohifiyedha ttarho ya ogana okala namalaleya. Akala weyo onowaganyedha efunelo ya orumela mukuwo wa Yezu, kukumuwe. Wova wawo onowoniha wi weyo onoziwa yawi mabasaya kahiye ovegana. Ejo ebaribari, sabwani Bibilia onloga wi Pedro vamodha na akwaye “athiya” milaba dhawa bamfwara Yezu. Mbwenye kakosile ninga elobo yorurumuwela. Awene aromile omuziwa Yezu, muvirele myeri mitanu na mmodha bamurumela ninga muttikitteliwi wawa. (Jo. 1:35-42) N’ekalelo yakakene, enodha opadduwa weyo okana eziwelo yawakwana  mwaha wa Yehova naYezu. Ogamala bukana efunelo ya wakosela mabasa wi omarho wawo na awene okalevi woliba. Mbwenye kunakose ejuwene, ohinatti ogilati buroma ovipimelela. Txini emuwodhihile Pedro, Andre, vamodha na attu ena omfwara Yezu?

3. Txini enawodhihe olibiha efunelo yawo ya orumela mukuwo wa Yezu?

³ Yattukulele anamafwara oroma a Yezu ottidda mabasa akuweleliwani, yali yawi awene ali attu ononelamo, oliba murima vina oleleya. Kinaganyedheya wi ekalelo eji yanani ehawodhiha okala anamattadda attu a ttotto. Makani aba a ddabuno munele ologiwa malago anawukamihedhe okana ekalelo yakakene wi okale namafwara wowarala wa Kristu.

4. Txini emuwodhihile Pedro okala namattadda wa attu?

⁴ Pedro wattadda esavi wi asapelena murala waye, keliwe wi mabasa aba wakosela n’efunelo y’osapelena murala waye bahi. Yamukosiha yali yawi, iyene wankwela ottadda oba. (Jo. 21:3, 9-15) Mbwenye iyene ohisunza okwela mabasa a wattadda attu. Na nikamihedho na Yehova iyene ohiwodha okala namalaba wapama.—Mer. 2:14, 41.

5. Ninga munlogela Luka 5:8-11, txini emuttukulele Pedro wova, vina txini enanikamihedhe opuranya wova?

⁵ Ennittukulela olaleya ja omukwela Yehova; enddimuwaya-enddimuwaya jijuwene. Omukwela wehu Yehova ononiwodhiha opuranya wova wotene. Yezu mmukuweleliye Pedro wi akale namattadda wa attu, iyene ohimwaddela: “Kuhove.” (Kengesa Luka 5:8-11.) Keliwe wi Pedro wova ejile egampadduwele mudhidhi ogaliye namafwara wa Yezu. Emuttukulele Yezu ologa kuwove, jawi iyene wela otikina venjene na ntikiniho nakosile Yezu n’ottadda oba gwé; nona Pedro wali wawumene milomo mwaha wa oziwa wi afuna alabege na Yezu. Na  mukalelo wakakene ejo enodha wupadduwela weyo ogaziwa wi onfuna okale namafwara wa Kristu. Akala jijuwene enupadduwela, jofuneya weyo winjiviha mmirimani mwawo omukwela wawo Yehova, Yezu na attu akwawo. Ogakosa ejuwene onele okana ewodhelo ya orumela mukuwo wa Yezu wokala namattadda wa attu.—Mt. 22:37, 39; Jo. 14:15.

6. Txini yina ennittukulela olaleya?

⁶ Katanalela mwaha mwina onnittukulela olaleya. Yezu ohinaddela: ‘Dhowani . . . Mwasunzihe, akale anamafwara aga.’ (Mt. 28:19, 20) Yina ennittukulela olaleya jawi ninowaweddela ttagaraga attu sabwani ‘awindeya guru vina akumuwa,’ awene ahikana nttona na osunza ebaribari ya Omwene. (Mt. 9:36) Yehova onfuna wi attu a malogo otene aziwe ebaribari yawakwana enattukulele ovuneya.—1 Tim. 2:4.

7. Roma 10:13-15 ononiha dhavi wi mabasa olaleya bamakamaka?

⁷ Yopurelamo enkanihu mmabasani aba a ovuna egumi, enonittukulela ovingelavi mabasaya. Iyo nihitiyana na namattadda oba, sabwani namattadda oba onoguliha vina onojanavo esaviya, iyo “ninattadda” attu wi afwanye egumi yohimala.—Kengesa Roma 10:13-15; 1 Tim. 4:16.

8-9. Txini enfwanyela oziwa namattadda, vina sabwaya jani?

⁸ Masaka a Yezu, ana Izrayeli akosa mabasa ottadda amfwanyela oziwa mwinje munkwa oba. (Onam. 11:9-12) Awene amfwanyela oziwa mwakala obadha. Oba dhinziveliwetxa vankala manje ofwasa vina mufwanyeya dhoja na waguva. Yotagiha eji enomvaha malago ole onkosa mabasa a wattadda attu? Karoma wona elogile mbali wa suwa y’o Pacífico, eniwanana na mabasa ottadda; iyene wamukumbirhile misiyonário dhahi wi attadde vamodha. Misiyonáriyuya wahiloga dhahi: “Ninele ogumana mangwana, mudhidhi wa wora tanu na nayi dha membesi.” Mbaliya ohimwakula, “Weyo kunnonelamo. Iyo nindowa mudhidhi ofwanyeya obadha, kanindowa mudhidhi onnizivela.”

⁹ N’ekalelo yakakene, mabasa a wattadda attu akosiwa vyaka zana dhoroma, anamattaddaya antamela mburo wafwanyeya “obadha” vina mwari mwa mudhidhiya. Ninga motagiha, anamafwara a Yezu anlaleya mumparhani, mmasinagoga, mmawani vina mmiburhoni mwa marhondda. (Mer. 5:42; 17:17; 18:4) N’ekalelo yakakene iyo vina ninofwanyela waziwa anamurala ehu. Iyo ninofwanyela oviparhapattela mmalaleyoni nitamelaga oziwa mudhidhi na mburo onkala attuya.—1 Kor. 9:19-23.

10. Dhipano gani dhinnivaha nikuru na Yehova?

¹⁰ Namattadda onofwanyela okana milaba dhaderetu. Iyo ninofwanyela okana dhipano dhowakwana-dhene dhottiddana mabasa ehu. Vina ninofwanyela oziwa olabanawa. Yezu ohavaha anamafwara aye maswagiho a wattaddana attu. Iyene ohasunziha mulabeloya, ohalagiha wolabawa vina ohapanga dhologadha. (Mt. 10:5-7; Lk. 10:1-11) Masaka abano, nikuru na Yehova ninosasanyedha dhipano dhinniwodhiha olabana ninga munfuneyelani. * Vina ninosunzihiwa olabanawa. Maswagiho aba anoniwodhiha owaralela vina olaba na ttotto mabasa ehu.—2 Tim. 2:15.

11. Ekaleleni yofuneya namattadda wa attu oliba murima?

¹¹ Anamaguliha dhottadda anofwanyela oliba murima. Awene dila dhina anofwanyiwa otagala mwiko. Masaka mena anottadda na  mattiyu, na pevo obe na muzogwe. Anamattadda attu, anofwanyela vina oliba murima. Iyo nigaroma olaleya, nivizinddiyelihaga wi nili Anamoona Yehova, ninotabuwa na “otagala” w’ofwara-fwariwa na amudhihu, oveyihiwa na avuti vina okoddiwa wa miselu dhehu. Mbwenye esi kadhinitikiniha. Yezu wahawaddela anamafwara aye wi agarumile vari va attu agavanyile miselu dhawa.—Mt. 10:16.

12. Ninga munlogela Josuwé 1:7-9, txini enaniwodhihe oliba murima?

¹² Onawodhe dhavi winjiviha oliba murima wawo? Voroma, onofwanyela orumela wi Yezu dduneddiha mabasa olaleya ovenyana wirimu. (Jo. 16:33; Ovuh. 14:14-16) Vasogorhova, owaralihe nroromelo nawo, nawi Yehova onele okala na weyo ninga mpikirheliye. (Mt. 6:32-34) Oliba wawo murima onenjedheye ogonuwihaga nroromelo nawo. Pedro vamodha na akwaye ahoniha nroromelo mwa ottiya mabasa awa asapela, baroma omfwara Yezu. Yakakene jimpadduwa na weyo, enottukulele woniha nroromelo nddimuwa ja wawaddela attu antamela wuveyiha na amudhawoya wi weyo ohiroma omusunza Bibilia na Anamoona a Yehova vina onodhowaga omatugumanoni wawa! Kavali waganyedha wi weyo ohisaddulela ekalelo yawo na dha mwigumini-mwawomwa wi wedde ninga munfunela Yehova. Okosa eji onofuna nroromelo vina oliba murima. Mudhidhi ogenjivavi oliba wawo murima pavenevo vagenjedheya mmirimani mwawo ebaribari yawi, “Nabuya Mulugu wawo, onokala na weyo, vego pa vego vanadhowege weyo.”—Kengesa Josuwé 1:7-9.

13. Otanalela na nlobelo dhinuwodhiha dhavi oliba murima?

 ¹³ Txini yina enaniwodhihe oliba murima? Okumbirha munlobeloni guru dha olibihana murima wehu. (Mer. 4:29, 31) Yehova onele wakula malobelo awo, nne txipo kanawuttiye. Iyene onkala na weyo mudhidhi wotene wi okamihedhe. Otanalelege vina mukalelo wavunile Yehova attu ena a masaka awale. Wubuwelege nikamihedho nuvahiliye wi okwaranyena dhorutxa. Kahiye iyene wuvahile ewodhelo ya osaddulana egumi yawo? Txibarene, Ole wumihile manje a Mwinje Wofila wi nlogo naye nivire vamattakani, onowodha wukamihedha okala namafwara wa Kristu. (Obud. 14:13) Kaana nikuluvelo nakakene nana munasalmo; iyene ohifiyedha ologa: “Nabuya oli na miyo, kaddinova elo; yabure gani enawodhe oddikosela athu?”—Masal. 118:6.

14. Dhimpadduwele Masae na Tomoyo dhinnisunziha nni?

¹⁴ Akalawo attu abaliwe n’ekalelo yohiwodha ologa, mbwenye Yehova ohakamihedha bafiyedha okaana ewodhelo ya ologa; oziwa dhopadduwa esi enonilibiha. Karoma wona empadduwele murogora onkuweliwa Masae. Iyene kawodha ologa vattuni, wahifiyedha wubuwela wi kanawodhe olaleya vattaddo. Mwa iyene, ologa na anawedda yamukalela ninga owela mwango wobuweliye wi kanawodhe ofiya okomoniwa. Nona iyene wahikosa guru enddimuwa vaddiddi wi enjivihe omukwela waye Mulugu na anamwanddamani aye. Wahidha wubuwela wi mudhidhi ohalihuna oli mung’onovi, n’eji wahilobela wi avahiwe ewodhelo ya olaleya. Vasogorhova ohipemberha makattamiho aye balaba ninga pionera wa mudhidhi wotene. Yehova ohikana efunelo ya wakamihedha anamalaleya aswa wi “alibihe murima.” Koona yina empadduwele murogora onkuweliwa Tomoyo. Varomiliye olaleya numba na numba, numba yoroma efiliye mwanamuralaya wile omunyanyuwela na mazu awi: “Miyo kaddinafuna Anamoona a Yehova vatakuluvaga!” mmaleliye bafuga musuwoya. Tomoyo ohimuzugunuwela mukwaye walaleya na iyene banvuza dhahi: “Ohiwa elogiliye? Bela nili Anamoona a Yehova. Iyene oziwile dhavi? Ddihagalala vaddiddi!” Ddabuno Tomoyo pionera wa mudhidhi wotene.

15. Ovingela mabasa-mabasavi entapulela nni, vina enfuneyela nni Mukristu okana ekalelo eji?

¹⁵ Wila namattadda ape oba dhinji iyene onofwanyela ovingela mabasaya. Ovingela mabasa-mabasavi, kuloga “okanela ntidi mabasa awo, okosaga n’ewodhelo yotene eniwe.” Munyamarhondda wa dhottaddiwa onovingela mabasa aye vina; iyene onovenya membesene wi akose marhondda aye, masiki na muzogwe obe n’eridho. Iyo vina ninofuniwana ovingela mabasa ehu ofiyedha opuliha.—Mt. 10:22.

16. Niwodhe dhavi ovingela mabasa?

¹⁶ Iyo kanibaliwe n’ekalelo ya ovingela mabasa. Efunelo ya attu enjene ja ottidda mabasa ohirutxetxa. Enofuneya muttu ovikoma wi avingele mabasa aye. Nona, iyo ninofuna nikamihedho na oviwaralihana wi niwodhe okosa mabasa annirutxa. Yehova na muya waye wokoddela ononivaha nikamihedho ntti.—Gal. 5:22, 23.

17. Nlebo na 1 Korinto 9:25-27, ninooniha dhavi wi Paulo wankosa guru ya ovingela mabasa aye?

¹⁷ Murumiwi Paulo wanvingela mabasa aye. Mbwenye iyene wanziwa wi wanfwanyela “okurumutxa” mwili waye wi awodhege okosa dhapama. (Kengesa 1 Korinto 9:25-27.) Iyene ohatutela Akristu akwaye wi avingelege  mabasa awa, ohifiyedha ologa wi “dhetedhenedhá dhiriwege n’orihana, na mukalelo wotadeya.” (1 Kor. 14:40) Iyo ninofwanyela ovingela mabasa oviwaralihana mpaddi womuyani antaganyiheya na olaleya muttaka wapama, onladdanihiwa na mabasa a ottadda.—Mer. 2:46.

18. Yehova ompima dhavi muttengo wa mabasa ehu?

¹⁸ Namattadda ompima mabasa aye mowiwanana na muttengo wa oba dhinttaddiliye. Mbwenye iyo kanimpima mabasa ehu na muttengo wa attu anattukulelihu munikuruni na Mulugu. (Lk. 8:11-15) Yehova ddumpima muttengo wehu wa mabasa; vina niziweni wi muttengoyá oninjiva venevo vankalihu mudhidhi mwinjene nasunzihaga vina nalaleyaga attu ena. Ninlogela nni dhawene? Sabwani mabasa ankosihu anoniha wi ninomuriha iyene na Mwanaye.—Mk. 13:10; Mer. 5:28, 29.

19-20. Yamakamakaya txini ennittukulela ovingela mabasa olaleya ovanene?

¹⁹ Dhikalawo dhilabo dhinrumelihiwa ottadda mwari mwa mudhidhi onlaganeliwa. Dhilabo eso, mudhidhi wa ottadda onlaganeliwe ogafiyaga omagomelo anamattadda anovingela venjene mabasa awa. Iyo ninga anamattadda attu, ninofwanyela ovingela mabasa a olaleya ovanene sabwani: Ogoma wa elabo ejino oli vakuvi! Mudhidhi ohaliwo wa okosa mabasa anvuna egumi onovuguwa venjene. Kukale goddo, nne vina kuwubuwele dha ojedha mudhidhi wofanyelela wa okosa mabasa aba a ttima enddimuwa vaddiddi.—Koh. 11:4.

²⁰ Kakosa guru ovanene ya winjiviha efunelo yawo, ya wenjedha ononelamo wawo wa Bibilia, ya owaraliha oliba murima wawo vina ya okana ekalelo ya ovingela mabasa awo. Kavitaganyihe na attu okwaranya amiliyau atanu na araru ankosa mabasa a wattadda attu, onela wagalala mumulabelani mwawo Yehova. (Ne. 8:10) Kagana okamihedha mabasa aba ofiyedha omagomo. Mutoma ondawo onela ologa mitoma miraru dhinaniwodhihe owaraliha efunelo yehu ya odhowavi na mabasa a olaleya Omwene ninga anamattadda attu.