1. Mudhidhi gani onrutxa omulaba Yehova?

MUDHIDHI gani ononiwe wi bofwanyelela omulaba Yehova—mudhidhi wa makattamiho orutxa obe mudhidhi wa mmurenddeleni? Iyo nigafwanyiwa dhorutxa ninimukuluvela Yehova. Mbwenye txini enkosihu nigakala mmurenddeleni? Ninodduwalaga wi obu mudhidhi womulabela Mulugu? Yehova wahawaddela ana Izrayel wi ahimudduwale.—Olib. 6:10-12.

2. Yotagiha gani ettiyile Mwene Asa?

² Dhawira dha mwene Asa dhotagiha dhawakwana dha muttu weddilena malago, vowi ohimukuluvela Yehova. Iyene ohimulaba Yehova; kahiye mudhidhivi worutxa, ohimulaba vina mudhidhi wa murenddele. Asa “murima waye wotene wali wawiwananeyana-wene na Nabuya okalawo waye wotene.” (1 Amwe. 15:14) Elobo yoroma yoonihile wi Asa wali wawiwananeyana na Mulugu jawi iyene wahikuputta webedha wetene wabure wakosiwa mu Judá. Bibilia onologa wi, “mmithetheni dhotene dh’o Judá, otolotxamo miparha dhamagiwe vathukuwani, vina vibuwa dhaleveliwe amulugu.” (2 Map. 14:3, 5) Iyene vina ohifiyedha omwaka bibe Maaka izo yokala musano. Wamwakihedhe nni? Sabwani wanattukulela attu webedhaga dhingamuttu.—1 Amwe. 15:11-13.

3. Txini dhinasunzehu mwari mwa mutoma obu?

³ Ottiya ogomihavi webedha wabure, Asa ohikosa dhina dhinjene. Iyene ohattukulela attu orugunutxela murima webedha  webaribari, akamihedhaga omwene wa Juda wiyelela wa Yehova. Yehova wahimururiha Asa na ana Izrayeliya mwa wavaha mudhidhi wa murenddele. * Mwari mwa vyaka kumi dhilamulile Asa “nlogo nafwasa.” (2 Map. 14:1, 4, 6) Nsunzo ntti ninela woniha mukalelo olabihedhe Asa mudhidhi wa murenddele. Ninela wawonamo vina Akristu a nsaka zana noroma abuwene amutagihile Asa mwa opura mudhidhi wa murenddele. Omagomelo ninele wakula nivuzo ntti: Akala weyo onkala mwilaboni muli ofuru wa webedha onawodhe dhavi olabana eziwelo mudhidhi obo wa murenddele?

4. Ninga munlogela 2 Mapadduwo 14:2, 6, 7, Asa opurile dhavi mudhidhi wa murenddele?

⁴ Kengesa 2 Mapadduwo 14:2, 6, 7. Asa wahawaddela attu a nlogo naye wi Yehova ‘wahawandaniha na malogo otene addamananina.’ Asa kobuwela wi mudhidhi obule wa murenddele wali mudhidhi wofwasa. Mottiyana-mwene, iyene orugunutxela ngome mittettedha, ohimetxamo miringotti, ohikamo misuwo na mipangadhá. Iyene ohawaddela akadda Juda dhahi: “Elabo ddabuno eli mmadani mwehu.” Iyene afuna anonihedhemo nni? Kuloga awene agahiwodha okosa mabasa-mabasavi afunani vowi ahivahiwa murenddele na Mulugu, kaliwo amwiddani agawodhile watximiha. Noona Asa wahakokomeza attuya wi apure mudhidhi obule wa murenddele.

5. Asa wawenjedhele nni anyakoddo aye?

⁵ Asa vina ohipura mudhidhi obule wa murenddele wi awenjedhe anyakoddo aye. (2 Map. 14:8) Enfuna etapulele wi iyene kamukuluvela Yehova? Nne-wene. Asa wanziwa wi yanfuneya mwene okosa masasanyedho  mwaha wa dhorutxa dhigagumanilanina musogorho. Iyene wanziwa wi murenddele obule wa Ayuda kugagonele mudhidhi mwinjene; ejoya yahipadduwa.

6. Akristu a nsaka zana noroma alabihedhi dhavi mudhidhi wa murenddele?

⁶ Mugomeli ofwara-fwariwa wa Akristu a nsaka zana noroma awene ahifanya mudhidhi wa murenddele. Arumiwi apurile dhavi gari eji? Alobwana na ayana abale ororomeleya ahidhowanavi mabasa a olaleya muttaka wapama. Mapadduwo ali munivuruni na Merelo anowoniha wi awene ‘aneedda n’omukurumuwela Nabuya.’ Awene andowavi alaleyaga muttaka wapama, yodhelavoya jawi ‘aroromeliya annijivavi.’ Yehova wahirurhiha guru dhawa dha olaleya mwari mwa nsaka nttile na murenddele.—Mer. 9:26-31.

7-8. Paulo vamodha na arumiwi ena apurile dhavi gari yananina? Katapulela.

⁷ Akristu a nsaka zana noroma ahipura gari dhotene wi avuwihe muttaka wapama. Ninga motagiha, murumiwi Paulo bali o Éfeso, wahinonelamo wi wahifuguleliwa gari enddimuwa vaddiddi, nona wahipura gari ejo wi alaleyena vina asunzihena muttaka wapama.—1 Kor. 16:8, 9.

⁸ Gari yina yana Paulo vamodha na Akristu ena yali ya yaka ya 49 N.K., mudhidhi wamale wiwananeliwa makani a otxetteliwa. (Mer. 15:23-29) Mmaleli yogana ejile olaleyeliwa milogo dhotene, anamafwara ahikosa guru enddimuwa vaddiddi ya ‘osunziha vina olaleya mazu a Nabuya.’ (Mer. 15:30-35) Yopurelamoya yali evi? Bibilia onologa wi, “mitugumano dhanliba muroromelani; muthengo wa akristu wanunuwa siku-siku.”—Mer. 16:4, 5.

9. Dhilabo dhinjene ovanene dhili dhavi, vina txini enfwanyelihu ovivuza?

⁹ Masaka abano ankalihuwo, dhihikalawo dhilabo dhinwodheya olaleya s’ozuzumihiwa. Weyo onkala mwilaboni muli ofuru wa webedha? Akala jijuwene, kavivuze, ‘Miyo ddinlabihedha dhavi ofuru obu oliwo?’ Mwari mwa malabo aba omariha ahalewo, nikuru na Yehova ninowimelela mabasa olaleya vina a osunziha orugunuwa elabo yotene, kanakalagawo mabasa oligana na abene. (Mk. 13:10) Ehikalawo gari enddimuwa vaddiddi enfuguleliwa attu otene.

10. 2 Timóteo 4:2 onnikokomeza okosa nni?

¹⁰ Txini enakosiwe wi opure mudhidhi wa murenddele? (Kengesa 2 Timóteo 4:2.) Onkoddela nni ovipimelela woona akala weyo vamodha na amudhawo munela owodha wenjedhavi mabasa a olaleya, txino mwa olaba ninga apionero? Obuno kahiye mudhidhi wa olodhowela mafumo obe dhokanetxa—kanizuzumeleni dhilobo dhinfuna otolotxiwa mugoyini enddimuwa.—Gano 11:4; Mt. 6:31-33; 1 Jo. 2:15-17.

11. Txini dhinkosaga ena wi awodhe wavuwihedha attu enjene muselu wapama?

¹¹ Anamalaleya enjene anosunzaga dhilogelo dhina wi awodhe olaleyana vina osunzihana. Nikuru na Mulugu ninowakamihedha mwa osasanyedha manivuru a dhilogelo dhottiyana-ttiyana. Ninga motagiha, yaka ya 2010, manivuru ehu aliwo na dhilogelo 500. Masaka abano, nihikana manivuru na dhilogelo dhokwaranya 1.000!

12. Attu ampurelamo eni agewa miselu dha Omwene na elogelo yawa yobaliwana? Kavaha yotagiha.

¹² Txini empadduwa na abale anvuruwana ebaribari ya Mazu a Mulugu na elogelo yawa  yobaliwana? Karoma wona yotagiha ya murogora dhahi woonile matugumano a ttattamwa o Memphis, Tennessee, E.U.A. Matugumanoya akosiwa na elogelo ya Ekinyaruwanda, elogelo enlogiwetxa o Ruanda, mpaddi wa Kongo (Kinshasa), vina na o Uganda. Mmaleli matugumanoya, murogora dhahi onloga elogelo ya Ekinyaruwanda, ohiloga: “Eji dila yoroma ennonelamo miyo matugumano mwawakwana-mwene oromana nsaka nimwalele miyo o Estados Unidos baddina vyaka 17.” Txibarene, murima wa murogora oddule wahifwasa mwiwaliye matugumano abale na elogelo yaye yobaliwana. Akala weyo onowodha, onkoddela nni osunza elogelo eswa wi wakamihedhena attu anloga elogelo yina mmuruddani munkaliwe? Ogafanya mmuruddani munlaleyiwe attu a elogelo yina ogamala bulogana na elogelo yawa, kunoona wi enela okala yozivela vaddiddi? Guru dhinakosiwe dhinela orurihiwa.

13. Abalihu o Rússia apurile dhavi mudhidhi wa murenddele?

¹³ Kahiyo abali otene ankaana ofuru wa olaleya. Akalawo masaka ankooddiha alamuleli mabasa ehu a olaleya. Ninga motagiha, karoma wubuwela dhinapadduwela abalihu o Rússia. Vyaka dha mundduni awene ahifwara-fwariwa venjene, mbwenye mweri wa Marsu yaka ya 1991 alamuleli ahavaha ofuru wa webedha. Nsakanene ntto o Rússia ahikalawo anamalaleya Omwene 16.000. Muvireli vyaka makumeli muttengo wa anamalaleyaya ahinjiva ofiyedha 160.000! Txibarene, abali ehu ahilaba na eziwelo, muziwelani wi obule wali mudhidhi wa olaleya na ofuru. Mudhidhi obu wa murenddele kugoneletxe. Mbwenye masadduwoya kavugule efunelo yawa ya okamihedha webedha webaribari. Awene anodhowavi amulabelaga Yehova na ekalelo yotene enwodhani.

14-15. Yehova wonihile dhavi ewodhelo yaye amukamihedhaga Asa?

¹⁴ Mudhidhi wa murenddele wa nsaka na Asa wahidha ogoma. Mwilaboni mwawa mwahifiya—anyakoddo awakwana miliau mmodha—adhana elabo ya Etiyópiya. Kazembe wawa Zera, wahikaana nikuluvelo notene nawi agahimigonjiha Judá. Mbwenye Mwene Asa kakuluvela ewodhelo yaye, iyene wamukuluvela Mulugu, Yehova. Asa ohiloga dhahi munlobeloni: “Nikamihedhenì Nabuya Mulugu wehu, vowi ninouroromelani nyuwo, na nzina nenyu bahi nindha owana na anyakoddo aba.”—2 Map. 14:10.

¹⁵ Masiki anyakoddo adhana o Etiyópia akalaga awinjiva dila bili, Asa wannonelamo owodha wa Yehova vina guru yaniye ya owanela nlogo Naye. Yehova kamunyapwarihile; anyakoddo adhile o Etiyópia ahitoteya manyazo vamentoni va Asa.—2 Map. 14:8-13.

16. Ninziwa dhavi wi mudhidhi wa murenddele onela ogoma?

¹⁶ Iyo ninoziwa wi elabo ejino elihuwo, murenddele wa nlogo na Mulugu kungonela, masiki nihiziwaga enampadduwele muttu-muttu wa iyo musogorho mundhowelihu. Txibarene, Yezu ohiloga wi masaka omariha, anamafwara aye anere “widdiwa na athu etene.” (Mt. 24:9) Na mukalelo wakakene, murumiwi Paulo ohiloga dhahi: “Pumwenemo, etene anfuna wiwananeyana na Mulugu, aluwelana na Yezu Kristu, anofwanya widdiwa.” (2 Tim. 3:12) Satana ohikana ‘owali onddimuwa’ vaddiddi vina kavo muttu wa iyo ohinafwanyiwe owali oku.—Ovuh. 12:12.

17. Nroromelo nehu ninadhe wehiwa dhavi?

¹⁷ Ovanene apa, nroromelo nehu ninele wehiwa. Mwilaboni munela opadduwa ‘goi dhinattabwe-wene, dhihinoneyaga oromana omaromelo wa elabo ofiyedha ddabuno, kadhinoneye vina.’ (Mt. 24:21) Nsakanene ntto, enele opadduwa anamudhi ehu onisadduwela, vina mabasa ehu anele odha otximihiwa. (Mt. 10:35, 36) Dhahene ninga Asa, muttu-muttu wa iyo onela okuluvela wi Yehova onele ombarela?

18. Mowiwanana na Ahebreu 10:38, 39, txini enanikamihedhe ovisasanyedhela ogoma wa murenddele?

¹⁸ Yehova onolibiha nroromelo nehu nihinatti  widdiwa. Iyene onomusogorhela “mwimeleli wororomeleya, wamalago” onosasanyedha oja womuyani mwa ‘ogawa poso mudhidhiya ogafiya’ wi anikamihedhe odhowanavi webedha wehu. (Mt. 24:45) Mbwenye ninofwanyela okosa mpaddi wehu vina nivaddihe nroromelo nehu na Yehova.—Kengesa Ahebreu 10:38, 39.

19-20. Ninga munlogela 1 Mapadduwo 28:9, mavuzo gani anfanyeelihu ovikosa, vina sabwaya jani?

¹⁹ Dhahene ninga Mwene Asa, ninofwanyela “omutamela Nabuya.” (2 Map. 14:4; 15:1, 2) Iyo niromile omutamela mmuziwelihu ofiyedha obatiziwa. Ninokosa guru dhotene wila nunuwihegevi omukwela wehu Yehova. Akala ninfuna niziwe wi omukwela wehu Yehova onowinjivavi, nivivuze dhahi, ‘Miyo ddinodhowaga wona matugumano otene a mmulogoni?’ Iyo nigoonaga matugumano a munikuruni na Yehova, ninowakela miselu dhinniwaraliha. (Mt. 11:28) Ninofwanyela vina ovivuza, Miyo ddihikaana elemelelo ya omusunza Bibilia? Akala weyo onkala na amudhawo, onokosaga masasanyedho a webedha wa ntakulu sumana dhotedhene? Akala onkala weka, onoviwoona ninga muttu oli munikuruni na anamudhi? Vina, onokosaga guru dhotedhene wi okamihedhe ofiyedha vanwodheliwe mmabasani a olaleya?

²⁰ Ekalele nni yofuneya ovikosa mavuzo ninga aba? Bibilia onologa wi Yehova onowona dha mmurimani mwehu, nona iyo ninofwanyela ovikosa yakakene. (Kengesa 1 Mapadduwo 28:9.) Akala iyo ninowana wi jofuneya osaddulela dhofuna dhehu, merelo ehu, na dhubuwelodha, ninofwanyela omukumbirha Yehova wi anikamihedhe. Ovano obu mudhidhi wa ovisasanyedhela dhorutxa dhinfuna onifwanya. Kuttiye elobo-txilobo otodiha zelu eniwe ya olaba mudhidhi wa murenddele!