1, 2. Elobo gani ezinddiyele mbali Roberto, nanda txini ekosiliye wi akamihedheye?

ROBERTO obatiziwe bali mwana, mbwenye mwigumini mwaye, kattittimiha ebaribariya. Iyene ohiloga dhahi: “Miyo kaddinakosaga elobo yabure, dhakosimi ddoona ninga dhovegiha bahi. Ddavona ninga ddili wolibene omuyani, sabwani ddandowa omatugumanoni etene vina masaka mena ddanlaba ninga pionero wokamihedha. Mbwenye ekana yaddijombela.”

² Roberto kawodha ononelamo yamujombela mpaka ofiyedha otela. Iyene vamodha na mwadhiye ankosa mavego a ovuzana malebo a mBibiliani. Mwadhiye wanziwa vaddiddi malebo a mBibiliani, noona wannakula mavuzo otene a Roberto. Mbwenye Roberto kawodhetxa wakula mavuzo amukosa mwadhiyeya. Iyene ohiloga: “Ddakala ninga kaddaziwa elobwene. Ddanloga meka-meka: ‘Ddi miyo onimelela murala waga mpaddi womuyani, noona jofuneya okosavo elobo-txilobo.’” Wahikosa-wene guru. Noona, ohiloga: Ddihiroma omusunza Bibilia, omusunza-wene, osunza wohivegana; ohenjedhedha: muromelimi okosa ejuwene nihiroma wiwanana. Ddihidha ononelamo wi yofuneyaya  ja okaana wandana wofiyedhana na Yehova.

3. (a) Yopadduwa ya Roberto ennisunziha nni? (b) Mutomaya-mutomaya onasekeserhe iyo ovanene buvi? Mitoma gani dhofuna okalela mento dhinasekesere iyo veneva?

³ Iyo ninosunzavo na yopadduwa ya mbali Roberto. Enoziweya wi nihikaana ononelamo wa Bibilia, ninodhowaga malobo otene omatugumanoni, mmabasani olaleya; mbwenye kahiyo esenevi dhinanikosihe weddihiwaga na muya. Iyo ninokosaga guru wi nivittiye weddihiwa na muya, mbwenye nigavipima, ninozinddiyela wi enojombavo elobo enfuneya wi nogolele. (Filipi 3:16) Mwari mwa mutoma obu ninele wakula mavuzo mararu ofuneya vaddiddi ononelamo: (1) Niwodhe dhavi ovizinddiyela akala ninoweddihiwa na muya obe nne? (2) Niwodhe dhavi oliba omuyani? (3) Oliba omuyani onakamihedhe dhavi egumi yehu labo na labo?

4. Bani onvahiwa malago aba ali va Éfeso 4:23, 24?

⁴ Varomilehu omulabela Mulugu, iyo nihisaddula vaddiddi dha mwigumini mwehu. Masadduwo aba kagomile vamalilehu obatiziwa nne. Bibilia onipamga: “Muthukule makalelo a muthu muswa, muhabihedhe murima na zelu yenyu.” (Éfeso 4:23, 24) Sabwa yokala attu ohiligana enofuneya odhowavi nivilibihedhaga osaddula egumi yehu wi needdihiwe na muya. Masiki akala niromile wale omulabela Yehova, jofuneya okosavi guru wi nikaane omarho woliba na iyene.​—Filipi 3:12, 13.

5. Mavuzo gani ananiwodhihe ozinddiyela akala ninoweddihiwa na muya obe nne?

⁵ Masiki nikale azombwe obe anddimuwa, notene ninofwanyela ovipepesa deretu. Nivivuze: ‘Ddinozinddiyela-wene omuttu waga na monelo womuyani? Dhokosa dhaga ddigakala mmatugumanoni dhintonyihedha nni? Makani aga anlagiha dhofuna gani mwigumini mwaga? Elemelelo yaga yosunza, ya wabala, yovisasanyedha, vina murumelelo onrumelimi ddigalagiwaga onddoniha na ekalelo gani? Txini enkosa miyo ddigakwekwetteliwaga wira elobo yabure? Miyo ddili Mukristu onzuzumela mabasa a Mulugu?’ (Éfeso 4:13) Mavuzo aba anela onikamihedha ovipima banizinddiyela munuwelo wehu womuyani.

6. Elobo gani yina enaniwodhihe ovipima nivona akala ninoweddihiwa na muya?

⁶ Akalawo masaka anfunihu wi attu akwihu anaddele akala ninoweddihiwa na muya obe nne. Murumiwi Paulo ohiloga wi muttu, obe ole onetxa ekarho ya vidhivi-dhivi dha maningo, kanzuzumela mweddelo waye; kanziwa akala onomuhagalaliha Mulugu obe nne. Mbwenye ole oneddihiwa na muya onoziwa mweddelo onrumeela Mulugu. Iyene onoziwa wi Yehova kanziveliwa nabale ana vidhivi-dhivi dha maningo. (1 Korinto 2:14-16; 3:1-3) Anddimuwa a mmulogoni anubuwela ninga munubuwelela Kristu, anomoona muttu wodeba ona ekalelo ya vidhivi-dhivi  dha maningo, agamala bamususela wi amukamihedhe. Kito nigasuseliwa na anddimuwa a mmulogoni wi anogolele ninorumela nikamihedho nawa, banisaddula mweddelo wehu? Nigarumelaga wogoleliwa na anddimuwa aba, kaninkaana waganyedha, ninoziwa wi nihikaana efunelo ya wunuwiha mpaddi wehu womuyani.​—Kohelét 7:5, 9.

7. Enlogeliwa nni wi muttu oneddihiwa na muya kahiye ole ona eziwelovi ya mazu a mBibiliani bahi?

⁷ Okaana eziwelovi ya Bibilia kinakwana; kahiyo ejuwenevi enaniwodhihe weddihiwa na muya. Mwene Salomau wanziwa vaddiddi magano a Yehova, vina nononelamo wavahiwiye na Mulugu, iyene ohidha oleba mazu ali mBibiliani. Mbwenye musogorhomwa omarho oku waniyena na Yehova wahidha wobana, bafiyedha opatula omuroromela waye Mulugu. (1 Amwene 4:29, 30; 11:4-6) Kito ottiya oziwavi malebo a Bibilia, elobo gani yina enfuniwanihu? Enfuneya ja olikihavi nroromelo nehu. (Kolosi 2:6, 7) Koddi ngani, nroromelo ninlikihiwa dhavi?

8, 9. (a) Txini enaniwodhihe olibihavi nroromelo nehu? (b) Nigobuwelelaga esile dhinsunzihu yofuna yehu enddimuwaya ekalege yokosa eni? (Koona foto eli omaro.)

⁸ Vyaka zana dhoroma, Paulo wahiloga dhahi na Akristu, “Nisogorhena masunziho owarala.” (Ahebreu 6:1) Masaka abano ehu ninawodhe dhavi ovirihamo malago aba? Yoroma ja osunza nivuru, Kalanivi Mukwelani Mwa Mulugu. Nivuru ntti ninela onaddela mweddelo ogeddanihu magano a mBibiliani mwigumini mwehu. Akala omala osunza nivuruna ntti, akalawo manivuru meena ogasunza nroromelo nawo ninokalavi novaddanene. (Kolosi 1:23) Enofuneya vina iyo wubuwelela esile dhinsunzihu nigamala banimukumbirha Yehova wi anilagihe mweddelo onfuniwanihu weddana.

⁹ Iyo nigobuwelelaga esile dhinsunzihu, yofuna yehu enddimuwaya ekalege ya omwiwelela vina omuttittimiha Yehova. (Masalmo 40:8; 119:97) Venevo vansunzihu, ninozinddiyela dhokwakwattutxa dhiganitximihile wunuwa mpaddi womuyani.​—Tito 2:11, 12.

10. Txini enfuniwana azombwe okosa wi akele oliba omuyani?

¹⁰ Akala weyo wamuzombwe ekaana eganiliwe okosa mmabasani a Mulugu? Mbali  dhahi walaba Obetel wahikaana elemelelo ya wavuza azombwe avivelela wi abatiziwe vamutugumanoni wa murudda; wavuzetxa dhinfunani okosa mmabasani a Mulugu agamala obatiziwa. Iyene wanfiyedha ozinddiyela wi akalawo attu anubuwela n’ofwasa vaddiddi mumulabelani mwawa Yehova. Eena anokosa masasanyedho a olaba mabasa a mudhidhi wotene vina eena anowubuwela omwalela mpaddi onfuneya anamalaleya. Mbwenye akalawo azombwe ahinwodha wakula mavuzo aba a ogana omukosela Mulugu mabasa. Kuloga awene kaganile omukosela mabasa Mulugu? Akala weyo wamuzombwe, karoma ovivuza: Miyo ddindowa omatugumanoni vina mmabasani a olaleya sabwa yawi amambali aga anoddimagelela odhowawo? Obe miyo ddamarho wa Mulugu? Koddi ngani, muttu gani oddo ohingana omukosela Mulugu mabasa; masiki akale muzombwe peno mwanakalaba, onogana ngafuna mwana-nibasa ning’onovi. Dhogana esi dhomukosela Mulugu mabasa dhinela olibiha mpaddi wehu womuyani.​—Kohelét 12:1, 13.

11. (a) Txini enfwanyelihu okosa wi neddihiwege na muya? (b) Muttu gani olebiwe mBibiliani onfwanyelihu omutagiha?

¹¹ Nigamala wona vanfwanyelihu wogolela, kanigonele nogolel nomaguva. Ovogolela oku kunvegiwana, sabwani onfwara dhinfuna mwili ongomela wukwani, mbwenye onfwara dhinfuna muya, odduwene ddunkalawo. (Roma 8:6-8) Yehova onoziwa wi iyo nili attegi, noona aganivaha muya waye wokoddela wi oneddihe. Kahiye wi nivittiye debee, sabwa yawi ninovahiwa muya  onnikamihedha. Mbali Jon Bar, walaba vamodha na Nikuru Nolamulela, vengesileyi nivuru na Luka 13:24 ohiloga: “Enjeene ankwakwattuweletxa sabwa yohikaana malago awakwana anwodha wunuwiha zelu dhawa.” Ndoweni nitagihe empadduwele Jakob, iyene wahifiyedha oraba mpaje na anju alogaga mazu awi, kaddinottiye odhowa ohinaddiruriha. (Wita 32:26-28) Masiki omusunza Bibilia ekalaga elobo yoziva, kanijedheni wi Bibiliaya onela okala wovegiha ninga novela. Enofuneya iyo okosa guru ya ompepesa Bibilia wi nifwanye mafumo ananikamihedhe.

12, 13. (a) Txini enaniwodhihe wedda na mazu aba a nlebo na Roma 15:5? (b) Empadduwele Pedro vina na malagoya avahiliye annisunziha nni? (c) Txini enfwanyeliwe okosa wi olikihevi mpaddi wawo womuyani? (Koona kwadru “ Txini Enakose Weyo wi Wunuwe Omuyani.”)

¹² Nigavilibihedha wunuwa mpaddi womuyani, muya wokoddela onela onikamihedha osaddula mubuwelo ehu. Dhawene nigela odhowavi banigarava mobuwelo a Kristu. (Roma 15:5) Muya wokoddela onela onikamihedha orabela mwili wa maningo nigamala banithukula merelo animuttittimiha Mulugu. (Galásia 5:16, 22, 23) Akala iyo ninowona wi murima wehu ontedameletxa dh’ofuma dha elabo obe vidhivi-dhivi dha maningo, kanikumuwe. nikumbirheni muya wa Mulugu wi onikamihedhe orabela vimanya esi. (Luka 11:13) Kanidduwale dhimpadduwele murumiwi Pedro. Iyene wahikaana mudhidhi wattiyiliye ottukula mobuwelo a Kristu. (Mateu 16:22, 23; Luka 22:34, 54-62; Galásia 2:11-14) Mbwenye kakumuwile, eji yahimwagalaliha Yehova noona amururiha. Vasogorhova Pedro wahittukula mobuwelo a Kristu. Nitagiheni yeddelo eji ya Pedro.

¹³ Pedro wakakene ohiloga merelo ankamihedha. (Kengesa 2 Pedro 1:5-8.) Jofuneya iyo okosa guru wi nikale attu ovyang’anela, ovilela, okwelana w’enamudhi, na merelo mena o’sibeya. ‘Malabo otene nivivuzege: Merelo gani anfwanyeela miyo wenjedha ddabuno wi ddilibihe mpaddi waga womuyani?’

14. Weddihiwa na muya ompatta dhavi egumi yehu?

¹⁴ Iyo nigattukula mobuwelo a Kristu, ninela okala ottiyana omabasani vina n’oskolawa, ottiyana oku ogoneya nigalogaga vina nigasakulaga dhokosa dhehu dha labo na labo. Dhokosa dhehu dhiganlagiha akala ninomutagiha Kristu. Iyo kaninfuna wi elobo-elobovi enittiyihe wandana wehu na Yehova, sabwani nineeddihiwa na muya waye. Nigaweteliwaga okosa eli yotakala, ekalelo yehu ya weddihiwa na muya wa Mulugu enela onikamihedha otxima. Nihinatti osakula yokosa, niromeni wimela nigamala nivivuzeni: ‘Magano gani a Bibilia anawodhe oddikamihedha? Kristu kokala veneva agakosile dhavi? Txini enamuttittimihe Yehova?’ Malabo otene nubuwelegeni dhahene nihinatti osakula yokosa. Ndoweni nirome wona dhinkosiwetxa mwilaboni. Veneva ninfuna nang’ananihe dhawira esi modha-modha, na magano a Bibilia.

15, 16. Wubuwela ninga munubuwelela Kristu onaniwodhihe dhavi okaana zelu ya (a) omusakula muttu womutela obe woteliwana? (b) wasakula amarho?

¹⁵ Omutamela muttu womutela obe woteliwana. Magano a Bibilia ali nivuruni na 2 Korinto 6:14, 15. (Kengesa.) Paulo ohiloga wi attu aneddihiwa na muya, dhubuwelo dhawa dhinottiyana na dhubuwelo dha abale aneddihiwa na vidhivi-dhivi dha maningo, abuwene amale oravihiwa dhovuta dh’elabo. Magano aba anokamihedhe dhavi omutamelana muttu womutela obe woteliwana?

 ¹⁶ Omutamela marho. Nigano na Bibilia n’omutamelana marho nili va nivuruni na 1 Korinto 15:33. (Kengesa.) Muttu oneddihiwa na muya kanatamela amarho anaridhihe nroromelo naye. Karoma wubuwela mweddelo ogeddilena weyo magano a nivuru ntti. Ninga motagiha, magano aba anokamihedhe dhavi osakula mipaddi dhovolowa mwinternetini? Anokamihedhe dhavi orabela ovolowa mipaddi dha interneti dhina mavego osumuleleya?

17-19. Okala muttu oneddihiwa na muya onaniwodhihe dhavi (a) orabela merelo amputtula? (b) okaana dhogana dhomuyani? (c) orabela ekalelo yohiwanana?

¹⁷ Merelo ankumula omuttu wehu womuyani. Nivuru na Ahebreu 6:1 (Kengesa.) ninofwanyamo malago a ttima vaddiddi. ‘Merelo antota okwa’ anfuniwanihu orabela bavi? Ba merelo amputtula anfiyedha obwiniha nroromelo nehu. Merelo aba antota okwa anonikamihedha ovikosa mavuzo ninga aba: ‘Dhokosadha esi dhinela oddipurela-elo obe anela oddiputtula? Ddikale munikuruni ntti ninkosa marhondda aba? Ddinkoddela nni ovitaganyiha na nikuru nimpanela osaddula dh’elabo?’

¹⁸ Dhogana dhomuyani. Va Diskursuni ya Vamwangoni, Yezu ohiloga muwodheyelo wa ofwanya dhogana dhinji dhomuyani. (Mateu 6:33) Muttu oneddihiwa na muya onozuzumela vamaromo Omwene wa Mulugu. Magano aba anela oniwodhiha wakula mavuzo oligana na aba: ‘Ddidhowe omasunzoni manddimuwa ddigamariha oskola? Ddisakule ganyo-ganyovi?’

¹⁹ Ohiwanana. Magano aperhengezele Paulo Akristu Oroma ahikaana ewodhelo ya onikamihedha akala ninofwanya ogudulana wohiwanana. (Roma 12:18) Yofuna yehu ja omutagiha Kristu, noona nigavilibihedha ovirihamo mazu ani: “mwandane na athu otene.” Txini enkosihu nigapambihagana na akwihu? Enonirutxa orumela dhinloga akwihu?—Tiago 3:18.

20. Enfuneyela nni wi nikose guru enaniwodhihe weddihiwagavi na muya wa Mulugu?

²⁰ Magano aba otene anlagiha wi Bibilia ohikaana malago anwodha onikamihedha okaana mweddelo onlagiha wi ninorumeela weddihiwa na muya wa Mulugu. Akala iyo ninovittiya weddihiwa na muya, okalawo wehu wotene onela ofuruleya vina murenddele kunanittawe-wene. Roberto omulogilehu vamaromo va nsunzo ntti, ohiloga: “Vamalele miyo olibiha omarho waga na Yehova, ddihidha okala babi vina mamuni waderetu. Ddihifuruleya vina ddilí wohagalala.” Iyo nigakosa guru ninela odhowavi neddihiwaga na muya wa Mulugu, ninela vina okaana dhopurelamo dhinjene. Ninela okala wohagalala ovanene, vina musogorho ninela ottidda ‘egumi yebaribari.’​—1 Timóteo 6:19.