1, 2. Okalawo onkalelani worutxa wa nlogo na Mulugu masaka abano? (Koona foto eli omaromo.)

ANG’ANGA enjene a mmasipitale, anowalaba attu anna eredda enraveya momaguva. Awene anowaweddiha noderetu sabwani anafunana wi avulumuwe. Masiki dhawene, aweneya anofuna ovibarela wi anadhe arave oredda ontamelelani murobwe. Ninga emeleli a Yehova, nili mmakattamihoni oligana na abene. Enjiya mwa iyo ninkala vina ninlaba na attu adhalile merelo na mikalelo dhihiniwanana na esile dhinfuna Mulugu. Ejoya enonikattamiha vaddiddi-vene.

² Masaka abano omariha a elabo ejino ya Satana, attu ahinimukwela Mulugu anopwazaga malamulo anzinddiyeliha obure n’opama. Murumiwi Paulo wahiloga obure wa mweddelo obo vamulebeliye muzombwe Timóteo. Paulo wahiloga wila mikalelo eso dhabure, dhigadha wooneya ttabwa-ttabwa masakene aba omariha. (Kengesa 2 Timóteo 3:1-5, 13.) Masiki noonaga mikalelo eso dhabure vakuvi vehu, masaka meena ninokwekwetteleyaga na merelo mobuwelo vina mulogelo wa attu annirugunuwa. (Gano 13:20) Mmutomani obu, ninele  woona ottiyana wa mikalelo dha attu a elabo ejino na esile dhiina attu a nlogo na Mulugu. Ninele woona txini enakosihu wila nivibarele na mapakelo a mikalelo dhabure makamaka nigasunzihaga attu wi amuziwe Yehova.

3. Mikalelo gani dha attu dhilogiwe va 2 Timóteo 3:2-5?

³ Paulo wahileba yawi “masaka omariha aner’odhana dhawopiha.” Nomala iyene oleba muddonddonddo wa mikalelo dhabure dhowakwana 19 esuwene dhinoneya ovanene. Mikalelodha eso minadha dhinoligana n’esile dhilebile Paulo va Roma 1:29-31, mbwenye muddonddonddo oli va kartani ya Timóteo, bolaba vina vakala mazu menjene ahilogiwetxe Mmaleboni a Egregu. Paulo oromile n’ologa wi “athu anere okala.” Apa, “athu” entapulela ‘nlogo notene na attu’ sabwani mikalelo dhabure kadhinimusakula akala mulobwana obe muyana. Masiki dhawene kayo nlogo notene n’attu nina mikalelo eso dhabure dhilogile Paulo. Akristu akaana mikalelo dhottiyana n’esi dhilogiwe.—Kengesa Malakiya 3:18.

4. Na monelo wawo ovittukulela ontapulela nni?

⁴ Paulo mulogiliye wila attu anere okala anamakumbela vawa, anamajiwa murima na kobiri, wahenjedhedha eraga anere okala anamagaya vina anamavittukulela. Attu anna mikalelo esi dila dhina anivyona ninga alitxi attima opitta akwawa, sabwa ya mukalelo onubuwelani, dhinkosani obe yimelelo yawa. Attu abo anotamela otikiniwa vaddiddi. Muziwetxi dhahi oleba sabwa ya muttu wa mikalelo esi eraga “mmurimani mwaye mukala ebuwa enivebedhiyevo mwinyene.” Attu eena anloga, ovittukulela kwabure, sabwani masiki aboya anvittukulela kanziveliwa wawona anamavittukulela akwawa.

5. Adhari a Yehova ororomeleya adhile dhavi opanela?

⁵ Yehova onowidda ovittukulela ologiwe mBibiliani ninga “mwañganelo wa muliba opanela.” (Gano 6:16, 17) Txibarene ovittukulela, onomukosiha muttuya okala wolapelana na Mulugu. (Masalmo 10:4) Ovittukulela, eji ekalelo ya Ddiabo. (1 Timóteo 3:6) Yokubanyihaya jawi, emeleli enjene a Mulugu aahivittiya ojiwa na ekalelo eji yovittukulela. Motagiha, Mwene Oziya, w’o Judá wali muttu wororomela mwari mwa vyaka dhinjene. Mbwenye Bibilia onloga: “Moneliye omwene waye wimela pwi, oroma opanela; ejiyá emutotela otolowa.” Oziya wadhowile mumparhani ohela mukutto, nanda aba kali mabasa attomeliwiye. Musogorhomwa, Mwene Ezekiya masiki valiye muroromeli, wahiroma opanela wakawene mudhidhi mung’onovi.—2 Mapadduwo 26:16; 32:25, 26.

6. Txini egamuttukuleli David oroma ovittukulela? Owodhile dhavi okalavi woviyeviha?

⁶ Attu enjene anoroma opanela sabwa y’osibiwetxa n’attu, jibo dhinvuruwanani, obe oliba wa maningo awa. David wali muttu ninga abene mbwenye wali woviyeviha okalawo waye wotene. Motagiha, David mumpeliye Goliya, Mwene Sauwul wahinvaha mwanaye wi amutele. David wahakula: “Miyo ddil’àni; miyo amambalaga, okalawo wehu wotene kanili elo mw’Izrayel, ddinwodha dhavi okala mwasano wenyu nyuwo mwene?” (1 Samuwel 18:18) Txini emukamihedhile David okala woviyeviha dhawene? Iyene wanziwa yawi mikalelo dhetene  dhinneye, vamodha na eziweloya dhadhile wa Mulugu, wanfunilena. (Masalmo 113:5-8) David wanziwa yawi dhapama dhetene dhaniye dhinda wa Yehova.—Kaladdaniha 1 Korinto 4:7.

7. Txini enanikamihedhe otonyihedha ekalelo y’oviyeviha?

⁷ Ninga David, emeleli a Yehova masaka abano, anokosa guru wi akale oviyeviha. Ejo enoddiginya murima wehu nanda enonikamihedha ononelamo yawi Yehova muttanddi w’elabo vina muttu woviyeviha. (Masalmo 18:35) Ninokosa guru wi nivirihemo mazu anloga: “Thukulaní meddelo a thagaraga, ovyeviha, ofwasa okurumuwa, ovilela.” (Kolosi 3:12) Ninoziwa yawi onkwela “kanpanela, kanvithukulela.” (1 Korinto 13:4) Attu eena agona wila nili attu oviyeviha, txino anele ofuna osunza dila dha Yehova. Dhahene ninga munttukuleleya osunza dila dha Yehova mamuni ohili mukristu na yeddelo ya mwadhiye, attu enjene anottukuleleya osunza ebaribari sabwa ya yeddelo yapama ya emeleli aye.—1 Pedro 3:1.

8. (a) Attu enjene nsaka nttino anonamo dhavi na ekalelo y’owasadduwela amambalawa? (b) Bibilia onakokomeza aima wi akose nni?

⁸ Paulo wahiloga mukalelo ogeddihana attu masaka abano omariha. Wahiloga wila aima anelege wasadduwela amambalawa. Ddabuno, manivuru menjene, mavidiyu vamodha na porogarama dha TV, dhinolagiha ekalelo ejo ninga yorumeeleya, wattukulelaga aima enjene wasadduwela amambalawa. Mbwenye ebaribariya jawi wasadduwela amambali onowobaniha murenddele vamuralani. Attu aziwile wale nlamulo ntti. Motagiha, nlamulo n’o Gresia, naloga muzombwe oninvada mambali waye wandhowiwana wolapela. Oku akadda Roma aloga muttu onvadile mambali waye, muladduya onoligana na ole ompile muttu. Malamulo aba ali Mmaleboni a Ebraiko obe Egregu, anfuna akokomeze aima wariha amambali awa.—Obudduwa 20:12; Éfeso 6:1-3.

9. Txini enakamihedhe azombwe wawiwelela amambalawa?

⁹ Txini enakamihedhe aima wariha amambali awa masiki akala anamwanddamani kankosa yakakene? Aima agatanaalela dhoderetu dhetene dhinakosela amambali awa, ejo enele wattukulela watamaalela vina wawiwelela. Muzombwe onofuniwana ononelamo yawi Mulugu oli Babi wa dhetene, onojedhela wila mwana awiwelelege ababe. Akala muzombwe onowaloga n’oderetu amambali aye, ejo enowakamihedha akwayeya wariha vina ababiwa. Joziweya vina wila akala amambaliya kanarhemeza anawa, aniwaya txino anele orutxiwa wawiwelela. Mbwenye muzombwe agona wila onorihiwa vopitta na amambali aye, ejo enomukamihedha wawiwelela masiki erutxe. Muzombwe dhahi wa mbali belaga: “Masiki dila dhinjene vavyonimi ninga ddittawe malamulo etile ababaga, awene ahilibelavi malamuloya,  addipanga sabwa yiteliwani malamuloya ottiya eji kanitxelele ologa vamodha makani mena. Ejo eddikamihedha okalavi wowiwelela. Ejo vina eddittukulela woona yawi awene anddizuzumela, nanda ddantamela marhe wila ddahagalalihena.”

10, 11. (a) Mikalelo gani dhinlagiha yawi attu kaana okwelana muttu na mwina? (b) Akristu ebaribari anakwela dhavi attu eena?

¹⁰ Paulo wahiloga mikalelo mina dhinlagiha yawi attu kaana okwelana muttu namukwaye. Mulogeliye yawi anere “wasadduwela amambalawa” ologa wila kanaziwege otamalela. Eji ebaribari sabwani attu ahina eziwelo yomuyani kanika ttima oderetu onkoseliwani na akwawa. Novenya ologa vina wi attuya kanaziwege oriha dhileveliwe Mulugu. Ohenjedhedhavi eraga aboya kanattiddeyege myeddo, kuloga kanarumelege okosa murenddele na attu ena. Anamamagedha akwawa, ahinwodha winanela, kuloga anelege wamagedha ottambi attu eena obe Mulugu, wila amputtule. Amwiddani a dhapama dhotene, entapulela muttu onkosa dhilobo n’efunelo yotakaliha yimelelo ya muttu mukwaye. *—Koona yowenjedha.

¹¹ Emeleli a Yehova bottiyana vaddiddi n’attu a mwilaboni ejino sabwani awene anokwelana muttu na mwina. Eji ebaribari oromana walene. Yezu wahiloga wi mmalamuloni a Mizé ninddimuwana, napitta nttile naloga omukwele muttu mukwawo nali omukwele Mulugu na murima wawo wotene. (Mateu 22:38, 39) Yezu wahiloga vina yawi Akristu ebaribari agadha ozinddiyeliwa n’okwelana wawa muttu na mwina. (Kengesa Joau 13:34, 35.) Akristu ebaribari anowariha masiki amwiddani awa.—Mateu 5:43, 44.

12. Yezu olagihile dhavi wakwela attu eena?

¹² Yezu olagiha wila wanakwela attu mwebaribari. Olagihile modhela odhowa mmamiruddani, vina mmimburoni dhetene wi alaleye attu otene miselu dha Omwene wa Mulugu. Wanavulumutxa attu abaliwe ohoonene, aragali, aliba maranya vamodha na abale aheewa. Ottiya ejivi, wanavenyiha mukwani abale akwile. (Luka 7:22) Yezu ovaha egumi yaye wi avune nlogo na attu, masiki veddiwa iyene. Yezu wasaza okwela woligana wa Babe. Mwilaboni muzima, Anamoona a Yehova anomutagiha Yezu vina anokwelana muttu na mwina.

13. Okwelana wehu onattukulela dhavi attu eena omuziwa Yehova?

¹³ Nigaalagiha attu wila ninowakwela, txino ejoya enele wattukulela omuziwa Babi wehu wodhulu. Motagiha, mulobwana dhahi w’o Tailandia, wadhowile woona mutugumano wa ttattamwa wahitikina vaddiddi na mukwelelo wakwelana abali na arogora. Mmaleli matugumanoya, wahikumbirha nsunzo na Bibilia nanda wasunza malabo meli vasumanani. Nomala wahiroma walaleya vina wawoba amudhaye otene. Myeri mitanu na mmodha musogorhomwa, iyene wakosa epaddi ya Wengesa wa Bibilia mmulogoni mwaliye. Iyo ninowakwela wene attu eena? Kavivuze wamyinya: ‘Ddinokosaga kukuttu wi ddakamihedhe amudhaga, abali a mmulogoni mwaga obe abale andhowa mmalaleyoni na miyo? Ddinowawoona attuya abo ninga munawonela Yehova?’

14, 15. Mikalelo gani dhabure dhinlagiha attu enjene ovanene? Kito enjiya asaddulile dhavi yimelelo ya omuttu wawa?

¹⁴ Attu a masaka abano omariha, anolagiha ekalelo yabure enfwanyelihu orabela. Motagiha enjiya kanziveliwa omuriha Mulugu. Awene anowidda dhapama dhotene ofiyedhaga okodda kakamwe. Kavali waganyedha yawi attuya abo, kanwodha winanela vina awali. Enjiya mwa abuwene kanovelela elo-wene. Kuloga anokosa elobo masiki yabure nanda kantanaala yodhavo enatote merelo awa mwa attu eena.

¹⁵ Enjiya ana yubuwelo ninga enama yawopiha, asaddula omuttu wawa. Ovisaddula ninga oku, wamala ottagiwa mmavuhuloni a Bibilia. (Kengesa Izaiya 11:6, 7.) Nimala wengesa yawi dhinama dhawopiha ninga mwinji na poddogoma dhinele okala mmurenddeleni na mbuzi vina mwana-nibila. Awene anakaanele nni murenddele ninga obwene? Mavuhuloya anologavi: “Vowi mwilaboni mudhala malago a Nabuya, ninga endhala manje mbara.” (Izaiya 11:9) Vowi anenama kansunza elobwene sabwa ya Yehova, musibo wa nivuhulo ntti, onawaddana attu abuwene agadhile osaddula yimelelo ya omuttu wawa.

16. Bibilia wakamihedhile dhavi attu enjene osaddula omuttu wawa?

¹⁶ Abali na arogora enjene ali awali ninga minji, ddabuno attu apama. Kengesa dhotagiha esi mu jw.org epaddi enloga “A Bíblia Muda a Vida das Pessoas”. Abale amuziwile Yehova vina asakulile  omulabela, anottiyana vaddiddi n’abale anoneyana ekalelo yomuriha Mulugu, oku akoddaga guru ya nroromelo elimo. Awene anovikosiha ninga animwebedha Mulugu, oku yeddelo yawa kintonya mwenemo. Munlogoni na Yehova, mukala attu omaromo aligi awali, mbwenye ovano attukula “makalelo a muthu muswa, opaddutxeliwe oladdana na Mulugu, weddagana oligana murima, omukoddelela Mulugu mwibaribarini.” (Éfeso 4:23, 24) Attu agasunza dila dha Mulugu, anofiyedha ononelamo yawi anofuniwana ovirihamo malamulo aye. Ejo enonikamihedha okosa masadduwo muyubuweloni, modhela dhorumeela dhehu vina namereloya. Okosa masadduwo aba kayo elobo yovevuwa, mbwenye muya wa Mulugu onowakamihedha abale etene antamela omwagalaliha.

17. Ninarabele dhavi okwekwettiwa na attu a mikalelo dhabure?

¹⁷ Ovanene kinrutxa wazinddiyeliha attu animulabela Yehova vina abele ahinimulabela. Nikale pasope wi mikalelo dhabure dhabale ahinimulabela Yehova dhinanipupurutxe. Nifware dila dha Yehova wila narabele attu anlogiwa va 2 Timóteo 3:2-5. Ndde, joziweya yawi kaninawodhe warabela attu otene a mikalelo dhabure. Dila dhina ninele olabaga omabasani na awene, osunzana vamodha oskola obe okala vakuvi vawa. Mbwenye enfuniwana iyo jawi kanikale ninga elani na merelo awa. Txini enanikamihedhe? Jofuneya olibiha omarho wehu na Yehova modhela omwengesa Bibilia, wasakula amarho apama animukwela Yehova.

18. Ninakamihedhe dhavi attu omuziwa Yehova na merelo vina malogelo ehu?

¹⁸ Notene, ninofuna wakamihedha attu eena wi amuziwe Yehova. Katamela gari wi ovahe onamoona, vina kamukumbirhe Yehova wi okamihedhe ologa dhilobo dhapama mmudhidhini wapama. Nattiye attu aziwe wi nili Anamoona a Yehova. Venevo, mweddelo wehu onele odhana matamalo wa Yehova ottiya osibiwaga iyo nanya. Txibarene Yehova onisunziha “otxinuwa obure wotene, vina dhinthopa maningo ehu, wi neddege mwilaboni-mpuno na winanela, omyala murima, wiwananeyana na Mulugu.” (Tito 2:11-14) Nigamutagiha Yehova, oku nikosa dhetene dhinnifuniyena, attu eena anele woona mereloya abo. Enaya txino anele ologa: “Iyo ninfuna ndhowe vamodha na nyuwo, sabwa niziwa wi Mulugu oli na nyuwo.”—Zakariya 8:23.