1, 2. Yehova otonyihedhile dhavi wi iyene ddovaha?

YEHOVA, ddi Mulugu wovaha. Dhetene dhinehu, dhinda mwa iyene. Dhetene dhili mwilaboni mwinyaya ddi iyene, nanda onolabihedha esuwene wi asapelena egumi yehu. (Masalmo 104:13-15; Ajewu 2:8) Mbibiliani ninosunzamo mukalelo walabihedha Yehova dhilobo eso dha ttima wi avahe nlogo naye.

² Motagiha, mwari mwa vyaka 40, ana Izrayel bali mwiddeddereni, Yehova wanavaha maná na manje wila asapelena nlogo naye. (Obudduwa 16:35) Yodhavoya, jawi Yehova wanavaha dhetene dhafunani dhajombela. (Nehemiya 9:20, 21) Musogorhomwa, Yehova onvaha namavuhulela Eliya ewodhelo ya winjiviha makura mang’onovi na ottuya wa mamukwela dhahi wororomeleya. Nvaho obo, omukamihedha mamukwelaya opitxa mangawo otene anniye, vina ovisapela iyene na anaye. (2 Amwene 4:1-7) Na nikamihedho na Yehova, modhela matikiniho, Yezu wanwodha ovaha yoja muttitti munddimuwa, obe kobiri egafuneya.—Mateu 15:35-38; 17:27.

3. Txini enalogiwe mmutomani obu?

 ³ Yehova onowodha olabihedha elobo-txilobo enfuniye wila asapelena dhottandda dhaye. Masiki dhawene, iyene onowakokomeza emeleli aye wi alabihedhe dhinnani wi akamihedhena mabasa a nikuru naye. (Obudduwa 36:3-7; kengesa Gano 3:9.) Kito, Yehova onjedhela nni wi nilabihedhe dhilobo dhattima dhinehu wila nimwiyihedhe iyene? Emeleli a Yehova a masaka a Bibilia akamihedha dhavi mabasaya abo? Nikuru na Yehova ninnlabihedha dhavi kobiri dha sokela masaka abano? Mutoma obu onele wakula mavuzo aba.

4. Txini enimutonyihedha iyo Yehova nigakamihedhaga mabasa aye?

⁴ Sabwaya-sabwaya ennittukulela onvaha Yehova, jawila ninomukwela vina ninomuriha. Nigatanaalela dhetene dhinikosele Yehova, mirima dhehu dhinosanzaya. Notene ninorumeela etanaalelo yana Mwene David, mmaleliye waddeliwa dhilobo dhafuneya wila dhimagiwena mparha. David wahiloga wila dhetene dhinakela iyo, dhinda wa Yehova vina dhetene dhininvaha iyo Yehova nininvahela sabwa ddi iyene oromile onivaha.—Kengesa 1 Mapadduwo 29:11-14.

5. Bibilia ontonyihedha dhavi wila operheka nvaho onokosa epaddi ya webedha webaribari?

⁵ Sabwa yina ennittukulela onvaha Yehova, jawi ejoya enokosa mpaddi wa webedha. Mu woneyeliwa wa murumiwi Joau, iyene wahawona emeleli a Yehova wirimu alogaga: “Nyuwo Nabuya Mulugu wehu muli mwinya, munofwanyela othithimihiwa, orihiwa, vowi mupaddutxa dhetedhene; dhetene dhinokalawo n’ofuna wenyu.” (Ovuhulela 4:11) Txibarene, Yehova onofwanyela ottittimihiwa vina orihiwa, noona ninfuna nikose mpaddi wehu. Modhela Mizé, Yehova wahaddela nlogo naye wila nikosege mittupo miraru vayakani. Epaddi modha ya mittupo eso, mwankosiwa mvaho. Nlogo nahaddeliwa wila “Kakalevo muthu onafiyevo omuthithimiha Nabuya madavi.” (Olibiha 16:16) Masaka abano vina okosa nvaho wa Yehova, enokosa epaddi ya webedha wehu. Nigakosa dhawene, ninolagiha wila ninoriha vina ninokamihedha mabasa a nikuru na Yehova.

6. Ovaha okalelini elobo yaderetu? (Koona foto eli omaromo.)

⁶ Japama mwa iyo okosa nvaho ottiya okalaga ojedhavi wakela. (Kengesa Gano 29:21.) Kobuwela mwana ovahiwa kobiri eng’onovi na amambali aye, mbwenye n’ofuna waye ottukula kobiriya wila agule elobo anvahe babe. Onubuwela wi nvahoya obo onatapulele nni mwa amambali aye? Obe kamubuwele pionero onkala na amambali aye, agamala wavaha kobiri wila apitxena numba obe agulena yoja ya vamuralani. Amambali abo, txino kanjedhetxa wila mwanawa akose ejuwene, mbwenye anele otamaalela agoona ejiya epadduwaga. Sabwa yani? Sabwani eji ekosile mwana, ttarho enlagiha wila iyene onotamaalela dhetene dhinimwirela ababe. Na mukalelo wakakene Yehova onoziwa wi japama mwa iyo onvaha dhattima dhinnehu.

7, 8. Nlogo na Mulugu masaka a Bibilia nivahile yotagiha gani vakosani sokela (a) yoweddihana mabasa manddimuwa? (b) wi asogorhihena mabasayá?

⁷ Mbibiliani, ninosunzamo wila nlogo na Yehova nankosaga sokela enddimuwa wi eddihena mabasa. Nsaka dhahi awene ahikosa sokela wi eddihena mabasa manddimuwa. Motagiha, Mizé wahikokomeza nlogo na Izrayel wi akose sokela wi omagiwe musana wowebedhamo. Musogorhomwa, Mwene David wahiloga yakakene wila omagiwe mparha. (Obudduwa 35:5; 1 Mapadduwo 29:5-9) Nsaka nalamulela Mwene Jowás, anamakutta alaba mumparhani, anlabihedha kobiri dhaperekiwa. (2 Amwene 12:5, 6) Mu vyaka zana dhoroma, Akristu ahiwa wila o Judá dala yattidda motto, noona abali a wenewale anfuna nikamihedho momaguva-mwene. Akristu abo, ahitanaalela ovaha dhilobo dhattima dhanani wi avahedhe akwawa.—Merelo 11:27-30.

⁸ Nlogo na Yehova vina, nanakamihedha na kobiri abale asogorhela mabasaya. Mowiwanana na Malamulo a Mizé, Aleviti, kaana mperhe wowakela nifumo ninga mahimo meena. Noona ana Izrayel angwaddawo ninga nèkumi wa esile dhanani wi aperhekele Aleviti. Ejo ehakamihedha Aleviti okalela mento mabasa attiddani mumparhani. (Olebeliwa 18:21) Yakakene vina, ayana aziwiwana okala anamavaha, alabihedha dhilobo dhattima dhanani wi amukamihedhena Yezu na anamafara aye.—Luka 8:1-3.

9. Sokela yakosiwe masaka a mundduni yadhela wuvi?

⁹ Sokela eji yadhile mu dhipaddi dhottiyana-ttiyana. Ana Izrayel akosile sokela wila omagiwe musana wowebedhamo, awene avahile dhilobo dhattimadha dhattapattilani mw’Ejipitu. (Obudduwa 3:21, 22; 35:22-24) Mu vyaka zana dhoroma, Akristu ahiguliha dhilobo dhannani ninga mindda na numba kobiriya waperhekela arumiwi. Nomala, Arumiwiyá ahittukula kobiriya badhowana wakamihedha abali na arogora afwanyiwe dala. (Merelo 4:34, 35) Akristu eena ankoya kobiri eng’onovi wila awodhe okamihedhana mabasa. (1 Korinto 16:2) N’ekalelo ejo, areli vamodha na ayelegi, anwodha okosa nvaho wa elobo-txilobo.—Luka 21:1-4.

10, 11. (a) Ninawodhe dhavi watagiha emeleli ovivelela a masaka a Bibilia? (b) Ononamo dhavi egeliwa okamihedhe mabasa a Omwene?

¹⁰ Masaka abano, txino ninokokomeziwa okosa sokela wi nikamihedhena mabasa manddimuwa. Txino mulogo wawo onfuna osasanyedhe Numba ya Omwene obe emagiwe yina. Obe ngafuna dhinfuna dhenjedhedhiwe kambirhinya dh’okatti. Txino enofuniwa wila nikamihedhe na esile dhinjomba va muttuponi wa matugumano a ttattamwa. Obe akala abali a dhilabo dhina alofwanyiwa ngovi nanda bagafuna nikamihedho nomaguva. Mivaho dhehu dhinowakamihedha abale anlaba ninga amisionário, apionero a mudhidhi wotene, anameddelela  milogo, vamodha na abale anlaba obetel. Mulogo wawo txino poddi ovahedha nvaho wa abali wila okamihedhiwena omagiwa Numba dha Omwene obe mpule munkosiwa Matugumano a murudda, dhilaboni dhottiyana-ttiyana.

¹¹ Notene nikaana gari ya operheka nvaho onakamihedhe mabasa a Yehova masaka abano omariha ankalawo iyo. Mivaho eso kadhinekiwa nzina na namavahaya. Nigaperhekaga nvaho wehu mu Numbani ya Omwene obe nakosaga mu online, modhela site jw.org, kaninattiya attu eena oziwa muttengo enekamo iyo. Kito onakose nni ogoona wila muttengo wa nvaho operhekile weyo mung’ono mowiwanana na mabasaya? Ebaribariya jawi mivaho dhinjene dhinakela nikuru na Yehova, enkala sokela eng’ono ottiya muttengo munddimuwene. Masiki abali ahina mikalelo dhogumelana kobiri yowinjiva, anowodha wasaza Akristu o Masedónia. Akristuyá abo “athabwilevi oyelega” amperheka na murima wohagalala mivaho dhowinjiva.—2 Korinto 8:1-4.

12. Nikuru na Yehova ninlabihedha dhavi na ttotto vina zelu sokela engumelani?

¹² Nikuru Nolamulela, ninolabihedha na malago vina n’ororomeleya mivaho dhinakelani. (Mateu 24:45) Vamaromo awene anolobela akumbirhaga malago wila akose dhosakula dhapama vina wi awodhe olabihedha kobiridha na zelu. (Luka 14:28) Mmasakani a Bibilia, alobwana ororomeleya akoya kobiri eso dha sokela, ankosa guru wila kobiri ettiddiwena mabasa a Yehova. Motagiha, Ezdra eyelelaga o Jeruzalemi, wahittukula mvawo wa mwene w’o Persia, mwali wero, parata, vamodha na dhilobo dhina dha muttengo wokwaranya amilhau 100 dha dolare (kobiri dha w’Amerika). Ezdra wahona nvaho obu ninga sokela yakoseliwa Yehova. Noona wahivaha maswagiho obarelana korowa eso makamaka mudhidhi wadhowiwanina o Jeruzalemi, aviraga dila dhawopiya. (Ezdra 8:24-34) Vyaka dhinjene musogorhomwa, murumiwi Paulo wattukula kobiri dha sokela dhafuniwana wi akamihedhiwe abali ajombeliwe o Judeya. Iyene vina wahikaana ebaribari yawi abale aperhekeliye kobiridha aali attu azuzumela “wedda pama vamentoni va Mulugu na va athu.” (Kengesa 2 Korinto 8:18-21.) Masaka abano, nikuru nehu ninomutagiha Ezdra na Paulo nanda ninolabihedha kobiri ejo ya sokela na ttotto vina zelu.

13. Nikuru na Yehova ninkoselani matxinjo menjene ovanenevi?

¹³ Mirala dhinjene, dhinokosaga masasanyedho a weddihana muhaku wawa wila ananonge mopitta esile dhingumelani. Obe anamuralaya anokosa guru yovevutxa mikalelo dha egumawa wila attiddevi mabasa a Yehova. Eji ebaribari mwa nlogo na Yehova. Ovanenevi enowoneya wila vanokosiwaga mabasa menjene munikuruni na Yehova, nanda onolabihedhiwa muhaku opitta obule ogumeliwe. Mwadhahene nikuru, ninokosa masasanyedho ninga munkosela anamudhi vamuralani, wi akose mabasa owinjiva na kobiri ya sokela egumeliwe.

14-16. (a) Nvaho wawo onkosiwana mabasa gani? (b) Mabasaya abo anukamihedha dhavi?

¹⁴ Attu enjene aromilena wale ebaribari, anologa wila masaka a ovanene anowakelaga mivaho dha nikuru na Yehova opitta mwa wale. Ovanene nikaana gari  y’okaana jw.org vamodha na JW Broadcasting. Nikaana Tradução do Novo Mundo da Bíblia Sagrada, na dhilogelo gwé. Yaka ya 2014/2015, wakala mutugumano wa ttattamwa wana musorhoya waloga “Tamelaní Voroma Omwene wa Mulugu na wira Enfunani!” mitugumano dhinddimuwa dhikosiwa mwari mwa sidadi 14, dhinddimuwadha dhili orugunuwa elabo yotene. Etene adhowile, ali osanzaya sabwa y’okala vamburoni apale.

¹⁵ Abali enjene ahitamaalela vopitta, sabwa ya nvaho obo wattimaya wa nikuru na Yehova. Motagiha atelani dhahi ankala o’Asia aleba: “Nittomeliwe sidadi dhahi eng’ono. Sabwa y’ejuwene, dila dhina nankubanyaga vina nandduwalaga okosa kukuttu na mabasa a Yehova. Mbwenye vonilihu porogarama ya JW Broadcasting, nihubuwela wila ninokosa epaddi ya nikuru n’obali oli orugunuwa elabo yotene. Abali vamodha na arogora anoziveliwa vaddiddi wona porogarama eji ya JW Broadcasting. Dila dhinjene anologaga wila agamala woona porogarama eji anovyona ninga ali vakuvi na abali a Nikuru Nolamulela. Ovano anosanzayela okosa epaddi ya nikuru na Yehova opitta mwa wale.”

¹⁶ Orugunuwa elabo yotene, Numba dha Omwene dhowakwana 2.500, dhimagiwa dhinadha dhivenyihedhiwa. Abali dhahi a mulogo oli o’Honduras, aloga wila, dila dhinjene anrohedhaga okaana Numba ya Omwene yawene, mbwenye ovanene yorohedhaya ehakwanihedheya. Awene aleba: “Ninowagalala vaddiddi okosa epaddi ya murala munddimuwa wa Yehova mwilaboni yotene, vina ninojavo murenddele na wiwanana na abali ali mwilaboni mwetemwene.” Mazu ninga abene anologiwaga abali agamala omwakela Bibilia obe manivuru meena a elogelo yobaliwana, agakela nikamihedho sabwa ya ngovi, obe agoona yopurelamo ya mabasa awa olaleya mmuruddani mwawa.

17. Ninziwa dhavi wila ddi Yehova onkamihedha nikuru naye masaka abano?

 ¹⁷ Enjiya ahili Anamoona a Yehova kanwodha ononelamo mukalelo onttiddiwana masaba menjene kobiri eng’onovi ya sokela. Mwimeleli wa empreza enddimuwa, wahidhowa woona kambirinya mumpidiwa manivuru ehu. Iyene wahitikina vaddiddi mwaddeliwiye wila abale etene alaba mwenemwale akosela ovivelela wawa, akamihedhiwaga na kobiri dha sokela, vina wila txipo nikuru ntti kannalogosaga kobiri mmittuponi dhawa. Yalogileye yali yawi enkosihu, kinwodheya bure-bure. Ndde, nahirumeela monelo waye. Ninoziwa ddabuno wila enowodheya sabwa ya nikamihedho na mwinya Yehova.—Job 42:2.

18. (a) Mareliho gani ankanihu nigakamihedha Omwene? (b) Ninasunzihe dhavi anihu vina anamasunza Bibilia okosa yakakene?

¹⁸ Yehova onivaha nttittimiho vina gari yokamihedhana mabasa a Omwene. Iyenene belaga nigavivelelela okosa mabasa abo, onele onireliha vopitta. (Malakiya 3:10) Belaga vina, niganvaha na murima wotene, dhilobodha dhinelege oneddela deretu. (Kengesa Gano 11:24, 25.) Ologa vina wila nigakala anamavaha ninele osanzaya sabwani “ovaha onothabiha opitha ovahiwa.” (Merelo 20:35) Dhinlogihu vamodha na mereloya, ninele wasunziha anihu vina anamasunza ehu ononelamo mukalelo wokamihedhana mabasa abo wi akale mareliho menjene.

19. Nsunzo ntti nupangarazile dhavi?

¹⁹ Dhetene dhinehu, dhinda wa Yehova. Nigamwiyihedha iyene, ninolagiha omukwela wehu vina wila ninowika ttima dhetene dhinnivahiye. (1 Mapadduwo 29:17) Ana Izrayel vakosilani sokela wi omagiwe mparha “athu otene aziveliwa vaddiddi na mivahodhá eso, vowi aperekile n’ofuna wawa wotene.” (1 Mapadduwo 29:9) Nikose kukuttu wila nifwanye wagalala vina osanzaya modhela omwiyihedha Yehova dhetene dhinivahiliye.