Attu enjene anologa wi anomuroromela Mulugu. Mbwenyi ogaavuza Mulugu bani, dhowakula dhawa dhinkala dhottiyana. Mwa ena, Mulugu namattonga wowopiha vaddiddi onfuna bahi watabutxa attu sabwa ya dhottega dhawa. Ena anona wi Mulugu ddokwela vina onolevelela dhottega dhawa dhotedhene ehitanalaga enkosani. Oku ena anona wi Mulugu oli wolapela vaddiddi vina kanatanala attu. Na monelo esi dhottiyana mwaha wa Mulugu, attu enjene anona ninga kinwodheya oziwa mowakwana-mwene eliye.

Koddi jamakamaka oziwa eli Mulugu? Ndde. Ogamuziwa deretu Mulugu onele owodha oziwa ttima ya egumi yawo. (Merelo 17:26-28) Ogakana mandano ofiyedheya na Mulugu, iyene onele wukwela vina wukamihedha. (Tiago 4:8) Ottiya ejo, ogamuziwa deretu Mulugu onodhaga okana gari yokana egumi yohimala.—Joau 17:3.

Onawodhe dhavi omuziwa Mulugu? Karoma omubuwela muttu onimuziwiwe deretu, txino mukwawo-mukwawoyá. Mandano enyu aromile dhavi vina adhile dhavi wunuwa? Txino weyo waromile oziwa nzina na muttuyá, mikalelo dhaye, dhinziveliwiye na dhihinziveliwiye, esile dhikosiliye mwigumini mwaye vina dhinakosiye musogorho na dhilobo dhina. Txini yuttukuleli okala marho waye—ku omuziwa deretu.

Na mukalelo wakakene, enowodheya omuziwa Mulugu nigaziwa dhowakula dha mavuzo aba anfwarela:

• NZINA NAYE TTIVI?

• IYENE OLI DHAVI?

• TXINI EKOSILIYE?

• TXINI ENAKOSIYE?

• OZIWA MWAHA WA MULUGU ONTAPULELA ENI MWA WEYO?

Mwari mwa revista ntti munofwanyeya dhowakula dhinvaha Bibilia mwaha wa mavuzo aba. Mitoma dhinfwarela kadhinokamihedhe bahi omuziwa Mulugu, mbwenyi vina dhinele oukamihedha ononelamo mukalelo onakalani yapama mwa weyo ogakala marho waye.