Venevo vandhowa iyo nisunzaga mikalelo dha muttu ninodhowa nimuziwagavi muttuyá, dhahene mandano ehu na iyene anoliba. Na mukalelo wakakene vandhowa iyo nisunzaga mikalelo dha Yehova, ninomuziwa deretu vina mandano ehu na iyene anoliba. Yehova ohikana mikalelo dhinjidhene, mbwenyi minai sili dhamakamakadha: Owodha waye, eziwelo yaye, oligana waye vina okwela waye.

“Nabuya, Mulugu, ddi nyuwo opaddutxile odhulu na vati n’owodha wenyu onddimuwa.” —JEREMIYA 32:17.

Dhottandda dha Mulugu dhinowoniha wi iyene ddowodha. Motagiha, ogemela vanzuwani nsaka na elimwe, txini eniwamo weyo? Oviha wa nzuwa. Weyo onoziddiyela, owodha wottandda onna Mulugu. Nzuwa ninna ewodhelo gani? Enologiwa wi, temperatura enfwanyeya mu núcleo ya nzuwa enowaddamela 15.000.000 dha grau Célsio. Mwari mwa segundu mmodha-mmodha, nzuwa ninowita guru enligana na oruma wa matxikwi na matxikwi dha bomba nuclear.

Nzuwa nihiyeva nigaladdanihiwa na mabilioes a dhineneri dhili wirimu. Motagiha, mwa dhineneri dhinddimuwa dhiliwo modhaya ekuweliwa UY Scuti, asientista anologa wi neneri eji ehunuwa vaddiddi, ottiyana wa munuwelo wa neneri eji na nzuwa bwa 1.700 diâmetro. Neneri eji enkuweliwa UY Scuti ehunuwa vaddiddi, kottihiwa vamburhoni va nzuwa, elabo na mapalaneta mena ali wolapela ninga motagiha, Marte na Júpiter dhigali mwari mwa neneri eji. Eji txino  enonikamihedha ononelamo pama elogile Jeremiya yawi, Yehova Mulugu na owodha waye onddimuwa ohittandda erimu na elabo; kuloga elabo yotene.

Nimpurelamo dhavi owodha wa Mulugu? Attu anokalawo sabwa ya dhilobo dhittanddile Mulugu, ninga motagiha, nzuwa na dhilobo dhotikiniha dhinfwanyeya mwilaboni. Ottiya ejo, Mulugu onolabihedha owodha waye wi amukamihedhe muttu ddi muttu. Dhavi? Vàli Yezu velaboni ya vati, Mulugu wahinvaha owodha wa okosa matikiniho. Bibilia onologa: “Aliba ohona anowoona, aragali anowedda, aliba maranya anovulumutxiwa, aliba ohiwa anowiwa, akwile anovenyihiwa mukwani.” (Mateu 11:5) Txini ennikosela Mulugu masaka abano? Bibilia onowoniha wi: “Iyene onomulibiha okukumuwile,” Bibilia onologa vina: “Vano abale animuroromela Nabuya, guru dhawa dhinolibihiwavi.” (Izaiya 40:29, 31) Ottiya ejo, enowodheya Mulugu onivaha owodha onddimuwa wi anikamihedhe owanana makattamiho a mwigumini. (2 Korinto 4:7) Kahiyo elobo yapama okala marho wa Mulugu oddu, onlabihedha owodha waye wi anikamihedhe?

“[Nabuya Yehova], wunuwa gani wa mabasa a mada enyu! Mupaddutxa dhetedhene na [Eziwelo].”—MASALMO 104:24.

Venevo vandhowihu nisunzagavi mwaha wa dhottandda dha Mulugu, ninotikina vaddiddi eziwelo yaye. Okalawo mpaddi wa masunzo onkuweliwa, biomimética (maladdaniho a dhilobo dhottanddiwa), mwari mwa masunzo abo asientista anofwaseyela dhottandda dha Yehova na efunelo ya otagiha dhottandda esi agakosaga dhilobo dhawa. Ninga motagiha, musoneliwo wa guwo obe musasanyeliwo wa aviyawu.

Yotagiha yotikinihetxa ya eziwelo ya Mulugu bu mukalelo ottanddiwe maningo ehu. Katanalela vang’onovi, meteyelo a muttu vina mukalelo onunuwiye. Mwari mwa Selula modha ena ewodhelo yobalana (Célula fertil), munokala material genético. Selula eji enogaweya badhikala dhinji dholaddana. Venevo na mudhidhiyá selula esi dhinogaweya badhikala matxikwi na matxikwi a selula dhottiyana-ttiyana, ninga células sanguíneas, nervosas vina ósseas. Mwa mudhidhi mung’onovi dhinowunuwa badhiroma olaba deretu. Mwari mwa myeri mitanu na nai bahi, selula ejile yoroma enowunuwa mpaka witeya mwana, odduwene onkana matxikwi na matxikwi a selula. Eziwelo eji enowattukulela attu enjene orumela mazu a namaleba Bibilia ologile dhahi: Ddinowutamalani sabwani muddittandda na mukalelo wotikiniha vina na mukalelo wozumeya.—Masalmo 139:14.

Nimpurelamo dhavi eziwelo ya Mulugu? Muttanddi wehu onoziwa enfuna iyo wi nikane wagalala. Iyene onolabihedha eziwelo vina ononelamo waye, wi anivahe malago modhela Nzu naye Bibilia. Motagiha, Bibilia ononilaga: “Mulevelelagane dila dhetene dhinthegelana nyuwo.” (Kolosi 3:13) Koddi malago aba ba eziwelo? Ndde. Dhopepesa dhinowoniha wi okala namalevelela onokamihedha ogona pama, ovugula pressão sanguínea vina  ngovi yokana eredda ya muyubuweloni; ottiya ejo, olevelela onodhana dhopurelamo dhina. Mulugu oli ninga marho wa eziwelo, onnizuzumela iyo notene vina onnivaha malago apama. (2 Timóteo 3:16, 17) Weyo kugaziveliwe okana marho ninga oddwene?

Yehova onokwela oligana.—MASALMO 37:28.

Dhetene dhinkosa Mulugu s’oligana. Bibilia onologa, “Mulugu kanira-wene dhohifwanyelela, Namawodha-wodha kanira dhokoromana!” (Job 34:10) Ottonga wa Yehova k’omyala, nona munasalmo aloga: “Munowathonga athu n’oligana.” (Masalmo 67:5 [Masalmo 67:4 NM]) Agwarhagwambi kanwodha omunyengetta Yehova sabwani iyene onowona dha mmurimani. (1 Samuwel 16:7) Yehova onoziwa ejile eli ebaribari vina ottonga waye k’oligana okala-nokalawene, ottiya ejo, Mulugu onowona ohiligana vina obure wotene odhalile mwilaboni, nona iyene opikirhela wi mohigonela avuti . . . anele otolotxiwa mwilaboni.—Gano 2:22.

Yehova Mulugu, kahiyo namattonga wabure onfuna onisosotta. Egakala yofuneya walevelela attu, iyene onowalevelela. Bibilia onologa wi: “Nabuya ddanthebwa, ddathagaraga,” na attu otene, masiki na attu abureyá antxinuwa mwa dhottega dhawa. Oku oligana webaribari, kahiyo mwenemo?—Masalmo 103:8; 2 Pedro 3:9.

Nimpurelamo dhavi oligana wa Mulugu? Murumiwi Pedro ohiloga: “Mulugu kanimuthiyani muthu. Iyene onomukwela muthu ddi muthu onimurumela, oneddana enimfuniyena.” (Merelo 10:34, 35) Vowi Mulugu kana nsakulano ninopurelamo oligana waye. Ejo entapulela wi kintanala ttebe yehu, nlogo nehu, masunzo akosilihu, obe ettomo enihuna, enowodheya iyo okala amarho a Mulugu vina omwebedha.

Mulugu onfuna wi muttu-muttu wa iyo anonelemo mukalelo onttongiye na oligana vina aziwe empurelihumo na oligana waye, nona iyene ohinivaha mubuwelo.  Bibilia onloga wi mubuwelo oli ninga nlamulo nilebiwe mmurimani, ninvaha onamoona kuloga onnaddela akala elobo jaderetu obe jabure. (Roma 2:15) Ejo ennipurihamo dhavi? Mubuwelo wehu ogashagihiwa deretu, onodhaga onikamihedha orabela dhilobo vina mweddelo wabure. Nigattega mubuwelo wehu ononikokomeza otxinuwa vina osisigula merelo ehu. Se waganyedha, niganonelamo oligana wa Mulugu ninele okana efunelo ya onfiyedha!

“Mulugu ddi okwela.”—1 JOAU 4:8.

Mulugu onolagiha ewodhelo, eziwelo vina oligana, mbwenyi Bibilia kanloga wi Iyene ddi owodha, ddi eziwelo obe ddi oligana. Bibilia onloga wi iyene ddi okwela. Sabwaya? Enowodheya ononelamo na yotagiha eji: Mulugu onowodha okosa dhilobo sabwani ddewodhelo, oligana vina eziwelo sineddiha dhilobo dhinkosiye. Mbwenyi okwela bunimuttukulela Yehova okosa elobo. Okwela buneddiha dhetene dhikosiye.

Ninfuna none dhotagiha dhing’onovi, okwela bumuttukuleli Yehova wattandda anju wirimu vina attu velaboni ya vati, abuwene ampurelamo okwela waye. Yehova kakosile ejuwene sabwa yawi wela ojombeliwa elobo. Okwela oko vina ohimuttukulela osasanyedha elabo wila okale mburho wofwanyelela wa attu. Ottiya ejo Mulugu onodhowavi àlagihaga okwela attu otene vowi “onowapattutxela nzuwa attu apama na abure. Vina onowarubwihedha muzogwe attu oligana murima na ohiligana.”—Mateu 5:45.

Yehova vina “ddodhala thagaraga na nthebwa.” (Tiago 5:11) Iyene onowaweddiha noderetu abale otene anvilibihedha omuziwa vina anfuna omususela. Mulugu onomuzuzumela muttu ddi muttu, kuloga iyene onowukoya—1 Pedro 5:7.

Nimpurelamo dhavi Okwela wa Mulugu? Kobuwela mukalelo onkoddela wang’ana oddowela wa nzuwa. Kobuwela vina mukalelo oziveliwihu omwiwa mwana mung’ono bagateya. Bani onhiziveliwa okweliwa na anamudhi? Koddi dhilobo esi sofuneya-wene wi nikalewo? Newene; kito kunrumela wi vizinddiyelo esi dha okwela wa Mulugu dhinonidhelana wagalala mwigumini mwehu?

Ottiya ejo, ehikalawo ezinddiyelo yina ya okwela wa Mulugu empurelihumo: Nlobelo. Bibilia ononaddela dhahi: “Kamugulugudheye na elo-ene. Makathamiho enyu, mumperekele Nabuya na malobelo, mmunlelaga, mmutamalelaga.” Mulugu oli ninga babi wokwela vina iyene onofuna wi nitamele nikamihedho naye wila niwodhe owanana mazuzumo ehu, masiki abale agahiwodhilihu omwaddela muttu mwina. Nigakosa ejuwene, Yehova na okwela waye, ononipikirhela onivaha “murenddele wa Mulugu, onpitha thontho ya muthu.”—Filipi 4:6, 7.

Ninojedhela wi ononihedhiwamo oku vang’onovi wa mikalelo dha makamaka dha Mulugu—ninga owodha waye, eziwelo yaye, oligana waye vina okwela waye—onele wukamihedhe ononelamo ejile eli Mulugu. Elobo yina enokamihedhe omuziwa pama Mulugu, osunza ejile yukoseliye vina enakosiye musogorho, jijuwene enasekeserhihu mutoma onfwarela.