Mitoma dha mundduni, nihisunza dhilobo dhing’onovi dhinnikamihedha wakula nivuzo ntti, Mulugu bani? Vamaromo nihona wi Bibilia onologa wi nzina naye ddi Yehova vina mukalelo waye wamakamaka bu okwela. Iyo nihona ejile enkosile Mulugu vina ejile enakoseliye nlogo na attu. Dhikalawo dhilobo dhinjene dhinawodhihu osunza sabwa ya Mulugu, mbwenyi onodhaga ovivuza dhahi: Sabwaya jani osunza mwaha wa Yehova elobo yapama mwa miyo?

Yehova onopikirela wi ogamutamela, onele onfwanya. (1 Mapadduwo 28:9) Ogamutamela Mulugu vina ogamuziwa, onele wakela mvaho wamakamaka—omarho wofiyedheya na Yehova! (Masalmo 25:14) Dhopurelamo gani dhinakaniwena sabwa ya omarho oku?

Wagalala webaribari. Bibilia onologa wi Yehova Mulugu wohagalala. (1 Timóteo 1:11) Okala marho wa Mulugu vina otagiha mukalelo onkosiye dhilobo onele wukamihedha okana wagalala webaribari, eji enele okala yapama mpaddi wa muyubuweloni vina womanigoni. (Masalmo 33:12) Vina onele okana egumi yohagalala—modhela wunuwiha mikalelo dhapama, orabela mweddelo woputtula vina okana mandano apama na attu ena. Mwa dhawene onele orumela na ejile elogile munasalmo: “Miyo, osanzaya waga kukala vamodha na Mulugu.”—Masalmo 73:28.

Obareliwa vina ozuzumeliwa na Mulugu. Yehova ohapikirela dhahi alabeli aye: “Ddinfuna dhuwañganele, dduvahege malago.” (Masalmo 32:8) Yehova onowakoya alabeli aye vina onowavaha enfunani. (Masalmo 139:1, 2) Ogonuwiha mandano ofiyedheya na Yehova, onele ozinddiyela wi enowodheya omukuluvela iyene mudhidhi wotene.

Njedhelo napama. Ottiya wukamihedha oziwa ejile enfwanyeliwe okosa wi ohagalale, Yehova Mulugu vina onowuvaha gari yokana njedhelo napama. (Izaiya 48:17, 18) Bibilia onologa: “Egumiyá yamukala-kala, jiji: ouziwani nyuwo Mulugu mmodha, webaribari; omuziwa vina Yezu Kristu, omurumilenyu.” (Joau 17:3) Masaka abano orutxa ankalihu, njedhelo na egumi yamukalakala ninkala ninga nángura ninnilibiha vina ninnimetxa.—Ahebreu 6:19.

Esi si mwaha dhing’onovi dhamakamaka dhinnittukulela omuziwa pama Mulugu vina okala amarho aye, vowi dhihikalawo mwaha dhina dhinjidhene. Onofuna oziwavi mwaha wa ejuwene? Kaloga na Munamoona wa Yehova obe kadhowa mu saiti www.pr418.com.