Ogafuna omuziwa deretu muttu elobo enokamihedhe otamela oziwa esile dhikosiliye mwigumini mwaye vina makattamiho apemberhiliye. Na mukalelo wakakene, nigafuna omuziwa deretu Mulugu, ninofwanyela oziwa dhilobo dhikosiliye. Txino, onodhaga otikina ogasunza wi Mulugu okosa dhilobo dhinjidhene dhinnipurela masaka abano, esuwene dhinniwodhiha iyo okana njedhelo napama na musogorho.

Yehova Mulugu ddi Muttanddi Munddimuwa-nddimuwa, enowodheya “wona makalelo aye ohoneya mvitaganoni dhipaddutxileye.” (Roma 1:20) Bibilia onologa wi: Nabuya bahi na owodha waye opaddutxa elabo, na eziwelo yaye ohimetxa pwi elaboyá, na ononelamo waye ohittanika erimu. (Jeremiya 10:12) Ottiya Bibilia onilagihavi mikalelo esi dha Mulugu, dhilobo dhetedhene dhotikiniha dhittanddiliye dhinotonyihedha wi iyene onomuzuzumela muttu-muttu wa iyo.

Motagiha, Yehova ohikosiha egumi yehu okala yavawoka mwa onittandda “woladdana na iyene.” (Wita 1:27) Eji entapulela wi Yehova onittandda na ewodhelo yotagiha mikalelo dhaye dhohiladdaniheya, vina ononelamo monelo waye mwaha wa ejile eli yapama vina yabure. Nigavilibihedha ovirihamo magano a Mulugu, ninele okana egumi yohagalala vina enna ttima. Ottiya ejo, Mulugu onittandda na ewodhelo yowunuwiha mandano na iyene.

Nigang’ana elabo ya vati na dhotene dhilimo, ninowodha oziwa mukalelo onviwamo Mulugu mwaha wa iyo. Murumiwi Paulo ohiloga wi, Mulugu “katxelele oviziwiha eliye, awirelaga athu dhapama: odhulu oliye, ourubwihedhani muzogwe, ouvahani vilo nsaka nawa-nawa, onousapelani, onodhaliha othaba mmurimani mwenyu.” (Merelo 14:17) Mulugu onivaha dhinjidhene opitta esile dhafunihu wi nikalewo. Iyene ottandda dhilobo dhinjidhene vina dhottiyana-ttiyana dhininvaha wagalala. Dhotedhene esi vizinddiyelo dha dhilobo dhapama dhinifuniyena.

 Yehova ottandda elabo wi attu akalegemo okala nokala-wene. Bibilia onologa: “Elabo ya vati, wavahile athu,” vina onologa “Kapaddutxele okala yovi, ofunile mukaliwege.” (Masalmo 115:16; Izaiya 45:18) Attu agakalile mwilaboni agali a mukalelo gani vina agakalilemo mwari mwa mudhidhi mungasi? Bibilia onowakula dhahi “Athu apama aner’okala anya a elabo, akalegemo masiku etene.”—Masalmo 37:29.

Yehova wela wakwanihedha efunelo yaye na attu vina na elabo, venevo vamuttanddiliye mulobwana woroma vina muyana woroma Adamu na Eva, bawika mparaizuni velaboni ya vati wi “alimemo, akoyemo.” (Wita 2:8, 15) Mulugu wahavaha mabasa amakamaka: “Kalanina guru dh’obala, enjivihanani, dhalani mwilaboni muthongemo.” (Wita 1:28) Adamu na Eva ahikana njedhelo napama vaddiddi na okalawo namukalakala velaboni ya vati. Mokubanyiha-mwene awene asakulile ohimwiwelela Mulugu, nona awene ahiyelela gari ya okala vamodha na “aligani” abuwene “anajevo elabo.” Masiki egalivi dhahene, ejile ekosile Adamu na Eva, kisaddulile efunelo ya Yehova na attu vina na elabo ya vati, dhahene ninga munfunelihu wona musogorho. Mbwenyi vamaromo, ninfuna none elobo yina enikosele Mulugu.

Bibilia onoziweya vina ninga Nzu na Mulugu. Yehova onivahele nni Bibilia? Sabwani iyene onfuna wi iyo nimuziwe. (Gano 2:1-5) Ebaribari wi Bibilia, kanakula mavuzo ehu etene anloga mwaha wa Mulugu—kaniwo nivuru nigawodhile okosa ejuwene. (Kohelét 3:11) Mbwenyi dhetene dhinloga Bibilia dhinonikamihedha omuziwa Mulugu. Mbibiliani ninowengesamo mukalelo onaweddiha Mulugu attu ena vina attu anziveliwiyena na ahiziveliwiyena. (Masalmo 15:1-5) Nzu na Mulugu vina ninonisunziha ejile enubuweliye mwaha wa webedha, ejile eli yapama vina yabure, kobiri na dhokaana. Ottiya onaddelavi dhikosile vina dhilogile Yezu Mwana Mulugu, Bibilia ononikamihedha okana monelo wowakwana sabwa ya mikalelo dha Yehova.—Joau 14:9.

Mwaha mwina omuttukuleli Yehova, onivaha Bibilia, bwawi iyene onfuna wi nikane wagalala vina egumi ena ttima. Mbibiliani, Yehova ononaddela enfuneya okosa wi nikane murala wohagalala vina nagalale na dhinihuna. Ottiya ejuwenevi ninga munatapuleliwani musogorho, Bibilia onovaha dhowakula dha mavuzo amakamaka a mwigumi, ninga: Okalelini goyi dhahene? Txini enapadduwe musogorho? Vina onotapulelamo ejile ekosile Mulugu wi awodhe wakwanihedha efunelo yaye na elabo ya vati vina na attu.

Ndoweni noneni mwaha dhina dhinkosiha nivuru ntti—na Mulugu—okala navawoka. Bibilia olebiwe mwari mwa vyaka 1.600 na attu owakwana 40, masiki dhawene mutomayá bwakakene, elagihaga wi Mwinya wa Bibilia ddi Mulugu. (2 Timóteo 3:16) Mottiyana na ejile epadduwile na manivuru awale, muselu wa mBibiliani kutxinjile na ovira wa mudhidhi. Matxikwi na matxikwi a mapapi awale, anolagiha ejuwene, ottiya ejo attu ejene ahitamela otximiha otapuleliwa, ogawiwa vina wengesiwa wa Bibilia. Masaka abano tti nivuru nintapuleliwetxa vina ningawiwa vaddiddi. Ejo enowoniha wi “nzu na Mulugu wehu ninokalawovi.”—Izaiya 40:8.

Elobo yina ekosile Mulugu ja okosa mwilimwete-mwene wi efunelo yaye na attu yakwanihedheye. Ninga monelihu omaromo, Mulugu wafuna wi attu akalegewo namukalakala velaboni ya vati. Mbwenyi, vakoddile Adamu omwiwelela Mulugu vina attega, iyene na etene abaliwe ahiyelela gari ya okalawo namukalakala. Bibilia onloga: “Ovanya wa muthu mmodha bahi ovolotxa othega mwilaboni; othegawá ototelamo okwa. Ddabuno okwa onomuthidda muthu-muthu, vowi etene athega.” (Roma 5:12) Ovanya wa Adamu ogahinonihedhamo ninga efunelo ya Mulugu na attu vina na elabo kigakwanihedheyile. Yehova okosile eni?

Ekosile Yehova enowiwanana na mikalelo dhaye. Iyene ohoniha oligana mwa ologa wi epadduwile muladduyá wali wa Adamu na Eva, Yehova vina olagiha okwela mwa okosa elobo wi akamihedhe otene adhile mwa Adamu na Eva. Na eziwelo iyene ohigana mukalelo ogeddihiwe makani aba vina momaguva ohiloga mugwaddeliwo wa makaniyá. (Wita 3:15)  Yehova agahiwodha wavuna attu muttegani vina mukwani modhela Mwanaye Yezu Kristu. Iyene agawodhile dhavi okosa ejuwene?

Wi avune attu mwa dhodhelavo dha ohiwelela wa Adamu, Yehova ohimuruma mwanaye Yezu velaboni ya vati. Vàliye velaboni ya vati Yezu ohasunziha attu ejile yafwanyelelani okosa wi akalewo namukalakala, vina “operheka egumi yaye wi ekale mukutto wowawobolelana attu enjene.” a (Mateu 20:28; Joau 14:6) Yali yowodheya Yezu oniperhekela egumi yaye sabwani iyene wali muttu woligana dhahene ninga mwali Adamu. Mbwenyi mottiyana na Adamu, Yezu txipo kanvanyile Mulugu, mpaka okwa waye. Iyene kafwanyelela okwa, nona Yehova wahinvenyiha mukwani wi akalege wirimu. Dhahene Yezu ohiwodha wavaha attu ehiwodhile Adamu wavaha—njedhelo nokana egumi yohimala. Bibilia onloga: “Akala ovanya wa mmodha bahi oakaliha athegi athu etene; orumela wa mwina mmodha bahi, onowakaliha etene, athu oboleliwe mmuladduni mwawa.” (Roma 5:19) Sabwa ya mukutto wa yobolo opitxile Yezu, Mulugu onele wakwanihedha efunelo yaye ya attu okala velaboni ya vati namukalakala.

Ninowodha osunza venjene mwaha wa Yehova nigona mukalelo weddihiliye dhodhelavo dha ovanya wa Adamu. Nihona wi kayiwo elobo enwodha omutximiha Yehova ogomiha eromiliye; dhinloga Yehova dhinowakwanihedheya dila dhetedhene. (Izaiya 55:11) Vina nihisunza wi Yehova ononikwela vaddiddi, Bibilia onloga: “Mulugu ohoniha okwela waye n’eji: Mulugu omúruma Nammodha waye mwilaboni wi n’ovilevela waye nakele egumi. Okwela ononeya apa: kaiye iyo omukwelile Mulugu; onikwenle ddi iyene, onirumele Mwanaye wi akale mukutho wonobolelana muthegani mwehu.”—1 Joau 4:9, 10.

Vowi “Mulugu kovelele onivaha Mwanaye, onilevela iyo notene;” nikane ebaribari wi kanakodde onivaha dhetedhene n’opama waye. (Roma 8:32) Txini epikirhele Mulugu onivaha? Koona yowakulayá mwari mwa mutoma onfwarela.