Kuweliwa ninga wagumanana makattamiho, se waganyedha ogahifuna wi marho wawo webaribari akosevo elabo wi awukamihedhe. Enji agobuwela ejo, kanimoona Mulugu ninga marho wawa. Vowi anowubuwela dhahi: Mulugu kuweliwa ninga wali marho waga agahikosavo elobo-txilobo wi addikamihedhe. Mwebaribari, Mulugu ohinikosela dhilobo dhinjidhene vina onele odhowa akosagavi muli-mwetemwene wi agomihe makattamiho vina goyi engumanihuna masaka abano. Kito txini enakose Mulugu?

Mulugu onele ogomiha obure wotene mwa omutolotxa ole ontota obureyá. Bibilia ononikamihedha omuziwa namatota wa obureyá mwa ologa dhahi: “Oku elabo yotene ekalaga mmadani mwa Satana.” (1 Joau 5:19) Yezu ohiloga wi Satana ddi mulamuleli wa elabo ejino, obe Satana Ddiabo. (Joau 12:31) Ddi Satana onlamulela elabo eji, iyene ddili namatota wa makattamiho otene angumanihuna mwilaboni. Mulugu onamutolotxe dhavi Satana?

Yehova Mulugu onele omulabihedha Mwanaye, Yezu Kristu, wi “amutolotxe oddule ona mikalelo dha otota okwa, kuloga, Ddiabo.” (Ahebreu 2:14; 1 Joau 3:8) Bibilia onologa wi, mwinyene Ddiabo onoziwa wi onele otolotxiwa vina “ohalilena malabo magonovi.” (Ovuhulela 12:12) Mulugu vina onele watolotxa otene ankosa dhilobo dhabure.—Masalmo 37:9; Gano 2:22.

Mulugu agagomiha obure wotene onele wakwanihedha efunelo yaye na attu vina na elabo ya vati. Dhilobo gani dhapama dhinfwanyeliwe ojedhela?

Murenddele vina nibarelo namukalakala. “Vano akurumuwi aner’okala anya a elabo, aner’ojavo murenddele munddimuwa.”—Masalmo 37:11.

Attu otene anele okana oja wapama. “Mminddani munere odhala tirigu, thukuwa dhinere okuneleya na milima ninga eli mwango Líbano.”—Masalmo 72:16.

Nyumba dhofwanyelela vina mabasa opureleyamo. “Athu a nlogo naga anere omaga numba dhawa, akalegemo; anere otxeya mvidera dhawa, ajege anya. . . . Aner’ojaga anya dhopura dha mabasa a mada awa.”—Izaiya 65:21, 22.

Ogahiziveliwa wona dhilobo esi dhipadduwaga? Ohalile mudhidhi mung’onovi wi nikalegewo malabo otene dhahene.

Masaka abano attu otene anobulela vina anokwa, mbwenyi dhilobodhá kadhinakale dhahene namukalakala. Momaguva Mulugu onele okosa dhilobo dhotedhene dhapama esuwene dhinawodheye na mukutto wa yobolo operhekile Yezu Kristu, Mulugu onele okosa ejuwene wi otene anamuroromele Yezu “ahirimele, athidde egumi yohimala.” (Joau 3:16) Kang’ana malebo mang’onovi a mBibiliani anloga mwaha ya ejuwene.

Kunakela vina maredda. “Mu Jeruzalemi kanakalemo analoge: ‘Miyo ddili muredda.’ Jowi nsaka ntho Mulugu onere olevelela dhothega dhawa.”—Izaiya 33:24.

Kavo onattabuwehe vina na okwa. “Onere ogomiha mugomihedho okwa. Nabuya Mulugu, onere okuputha mintori mmentoni mwa athu otene.”—Izaiya 25:8.

Attu anelege okalawo namukalakala. “Yothega enthambirhiha okwa; Mulugu onnithambirhiha mvaho oli egumi yohimala, nikalaga mumodhani na Yezu Kristu Nabuyehu.”—Roma 6:23.

Attu akwile anele wiyelela okalawo. Attu apama na aburhe anele ovenya mukwani. (Merelo 24:15) Mukutto wa yobolo onivahile Mulugu onele owodhiha wakwanihedheya wa dhilobo esi dhotene.

Kito mulugu onawodhe dhavi okosa dhilobo esi dhotene?

Wila akwanihedhe efunelo yaye na attu vina na elabo ya vati, Mulugu analabihedhe Omwene waye. (Masalmo 110:1, 2) Omwene obu oli wirimu, mulamuleliyá ddi Yezu Kristu, Yezu ohasunziha anamafwara aye olobelaga akumbiraga Omwene obu, iyene ohiloga: “Baba wehu muli odhulu, . . . Omwene wenyu odhe.”—Mateu 6:9, 10.

Omwene wa Mulugu onele olamulela elabo ya vati, onele ogomiha goyi na makattamiho otene anapatta attu. Omwene obu bu olamulela wapama onfwanyelela attu otene okana! Nona mudhidhi wali Yezu velaboni ya vati wahivilibihedha venjene olaleya “miselu dhapama adha Omwene”. Vina wahawaddela anamasunza aye wi anfwanyelela okosa yakene.—Mateu 4:23; 24:14.

Yehova ohipikirela okosa dhilobo esi dhetedhene dhapama, sabwani ononikwela vaddiddi. Koddi obu kahiyo mwaha waderetu wa weyo ofuna omuziwa Mulugu vina okala marho waye? Okosa ejuwene enele okala elobo yaderetu mwa weyo, sabwaya? Koona yowakulayá mutoma onfwarela.