• Agasakuliwe na Mulugu. “Ddi miyo omuthikithele mwene waga . . . Ddinouvaha malogo otene akale awo, elabo yotene ekale mmadani mwawo.”—Masalmo 2:6, 8.

• Agagilatile vampaddoni va Mwene David. ‘Txibarene nibaleliwa mwana, nivahiwa mwana mulobwana . . . Othonga waye onofiya mwetemwene na murenddele ondhowavi. Omwene waye onere wimela pwí; Onere ogilati vampaddoni va David; othonga waye onofiya mwetemwene.’—Izaiya 9:6, 7.

• Agabaliwe o Belém. ‘Weyo Belém . . . , mwa weyo punabudduwe ole onathonge . . . Iyene onele okala munddimuwa mwilaboni mwetemwene.’—Mikeya 5:2, 4.

• Agahikoddiwa na malogo vina agahipiwa. “Otuguliwa, obabaddiwa ninga muthu wa goyi olemélele otabuwa. . . . Apo olateliwe miladdu dhehu, otataritxeliwe obure wehu.”—Izaiya 53:3, 5.

• Agahivenyihiwa mukwani vina agahittittimihiwa. “Nyuwo kamunaddileve mmasiye, kamunamuthiye mwimeleli wenyu ototowa. . . . Vamentoni venyu pali othaba wawakwana, vali nyuwo pali ojavo wohimala.”—Masalmo 16:10, 11.

Oromana nsaka niromile okalawo attu mwilaboni, kawo opadduweliwe dhotene esi dhilogiwe, ahili Yezu Kristu. Txibarene, iyo ninowubuwela nsaka nttile nidhile anju bamwaddela dhahi Maria Maye wa Yezu: “Nabuya Mulugu onere omuhabihedha mpaddo wa nikolo naye David, . . . omwene waye kunagome-wene.”—Luka 1:31-33.

Yezu kanakalaga mwene wa elabo ya vati. Agaroma olamulela malogo a attu, onakale wirimu ninga Mwene wa Omwene wa Mulugu. Txini enimukosiha okala Mwene wofwanyela? Karoma wona dhikosile Yezu bali velaboni ya vati.

•   Yezu wanaweddiha pama attu. Iyene ohakamihedha alobwana na ayana, azombwe na anakalaba, ahitanalaga nihimo na muttu-muttu. (Mateu 9:36; Marko 10:16) Muliba marhanya dhahi wahimukumbirha: ‘Eh Nabuya, mwafuna ddivulumutxeni’, Yezu omweddela ttagaraga omutapulela nlada ohimvulumutxa.—Marko 1:40-42.

• Yezu ohinisunziha malago a omuzivelihana Mulugu. Iyene ohiloga wi: “Kamunwodha ovilevela Mulugu, ovilevela muhaku.” Ohiloga vina wi ninofwanyela waweddihaga akwehu ninga munfunelihu wi awene aneddihege iyo—nlago ntti nihidha ononiwa ninga Yeddelo ya Nddarhama. Iyene ohoniha wi Mulugu kanzuzumela bahi dhawira dhehu, iyene onotamela oziwa dhubuwelo dhehu vina na dhotedhene dhimbeddegela murima wehu. Nona wila nimwagalalihe Mulugu jofuneya wang’anela dhubuwelo dha mmirimani mwehu. (Mateu 5:28; 6:24; 7:12) Ohinipanga wi enaniwodhihe wagalala ja osunza dhinnifunana Mulugu wi nikose, nigamala nivirihamo malagoya.—Luka 11:28.

• Yezu ohinisunziha merelo okwelana. Mazu na merelo a Yezu ankana guru ya ofiya mmirimani mwa abale amvuruwana. “Vamalile Yezu ologa mazu aba, muthithi walivo othikina masunziho aye. Iyene wanloga n’omunya.” (Mateu 7:28, 29) Ohasunziha dhahi: “Mwakwele anuwiddani.” Iyene wahiziwa wi attu abale ampile ahikana muladdu munddimuwa vaddiddi, mbwenye masiki dhawene ohalobelela na mazu awi: “Babani, mwalevelele vowi kanziwa dhinirani”. —Mateu 5:44; Luka 23:34.

Txibarene Yezu ddinfwanyela Olamulela, iyene ddwa nemi, supaje yaye kingoma. Iyeneyá oromile olamulela mudhidhi gani?