Ninfunela Nni Omwene wa Mulugu?
Ovenyana nsaka niromile okalawo wa nlogo na attu, mpaddutxi wehu, onittaniwa Yehova, ddwali Mulamuleli wa elabo. Olamulela waye wali wa okwela. Ddi iyene wattanddile murala wokoddela—mmunddani mwa Edeni—wi attu akalegemo. Iyene vina wahekamo milima dhottiyana-ttiyana, vasogorhova ohimvaha mulobwana mabasa oziva wirawa. (Wita 1:28, 29; 2:8, 15) Nlogo na attu nigahikaana Murenddele korumela wi Mulugu adhowegevi alamulelaga na okwela.
Attu oroma okodda olamuleliwa na Mulugu
Bibilia onologa wi osadduwela wa Anju mmodha, odduwene odhile oziwiwa na nzina na Satana Ddiabo, ohitota ovurana wa olamulela woligana wa Mulugu. Dhopyagela dhaye dhihattukulela attu opeleya malago awi, awene anedde n’ofuru agavilamulelaga anya. Mokubanyiha-mwene amambali ehu oroma, Adamu na Eva, ahipeleya malago na opyaga oku wa Satana, bafiyedha asadduwela ottonga wa Mulugu.—Wita 3:1-6; Ovuhulela 12:9.
Adamu na Eva ahiyelela gari ya okala Mparaizu na egumi yawakwana, mwaha wawi awene kewelele Olamulela wa Mulugu. (Wita 3:17-19) Yosakula yawa ehapatta anawa adhilewo musogorhomwa. Bibilia onologa wi ovanya wa Adamu ovolotxa “othega mwilaboni; othegawá ototelamo okwa.” (Roma 5:12) Ottega ohitotela ngovi yina mwilaboni, ‘muttu onowaguvelaga ompittiha muttu mukwaye, avitotelaga oputtuwa.’ (Kohelét 8:9) Kuloga wi, akala attu agela odhowavi avilamulelaga, txipo masoso a mwilaboni kanagome.
WITEYA WA OLAMULELA WA ATTU
Nemrod osadduwela olamulela wa Yehova
Muttu woroma onimuloga Bibilia wi dduromilena olamulela, ddi Nemrod. Iyene ohisadduwela olamulela wa Yehova. Oromana nsaka na Nemrod attu anlamulela anowapujaga attu analamulelani. Okwaranya vyaka 3.000 mundduni, Mwene Salomau wahileba dhahi: “Nomala ddiroma opima dhopuja dhotene dhiniriwa mwilaboni. Mone: apujiwi anowunla, anokuwela okamyedhiwa.”—Kohelét 4:1.
Yakakene enopadduwa masaka abano ankalihu. Revista dhahi na akadda Nações Unidas na yaka ya 2009 nihiloga wi olamulela wotowa malago wa attu “onowinjiviha obure mmalogoni mwa attu.”
MUDHIDHI ONFWANYELIHU OKOSA ELOBO!
Elabo enonfuna mulamuleli wa malago wi awodhege olamulela na malago. Jijene enipikirele Muttanddi wehu onivaha!
Mudhidhi walamulela Mulugu dhopaddutxa dhaye dhotene dhali dhawiwanana vina dhakana murenddele
Mulugu ohimetxa Omwene obe olamulela onahale vamburoni va ottonga wa attu, omwene obo onele “ogonela okala n’okala-wene.” (Daniyel 2:44) Obu bu Omwene onlobelela attu enjene. (Mateu 6:9, 10) Mbwenye onakale mulamuleli wa Omwene obu kahiye mwinya Mulugu. Iyine omuttomele Omwene ole watukule ekalelo ya omuttu, bakala velaboni ya vati. Bani odduwoya?
