Omwene wa Mulugu Onalamulele Mwilaboni Mudhidhi Gani?
Anamafwara ororomelaya a Yezu ahikana vina efunelo ya oziwa mudhidhi ogaromile olamulela Omwene wa Mulugu. Yezu wahakula nivuzo nawa na dhologa dhawi, kiyali yawa oziwa mudhidhi otonyile Nabuya Yehova siku ninalamulele omwene waye elabo ya vati. (Merelo 1:6, 7) Mbwenye iyene ohawaddela dhopadduwa dhigazinddiyelihile odha wa omwene, vasogorova ohiloga wi: “Mugona vina mapadduwo alogilemi, ziwani wi Omwene wa Mulugu owaddamelani.”—Luka 21:31.
DHOPADDUWA GANI DHATTAGILE YEZU OLOGA?
Iyene ohiloga: “Nlogo ninere oraba koddo na nlogo nina, elabo na elabo yina. Mmimburoni dhinjene munere opadduwa othekenyeya wa elabo, viredda dhoraveya, dala.” (Luka 21:10, 11) Dhopadduwa esi dhotedhene dhizinddiylo dhawi “Omwene wa Mulugu oli vakuvi.” Vanowoneya opadduwa wa dhizinddiyelo esi, nsaka nimodhene? Karoma wona.
1.KODDO
Yaka ya 1914, yaka eromile koddo ehinakalagawo oromana nsaka nipaddutxiwe elabo! Anamaloga dhopadduwa ahiloga wi yaka ya 1914, ehisaddula okalawo wa attu, sabwani ji yaka erabiwe koddo elabo yotene. Koddo eji ehitiha osasanyiwa wa vipano dhinji dha orabana koddo ninga, futti dhinddimuwa, migi, mabilindadi, dhopomuwa, na dhipano dhina dhopana. Vahiteya vina koddo yanawili, etotele osasanyiwa dhopomuwa dhinjene. Oromana yaka ejile ya 1914, ofiyedha ovanene, attu a malogo ottiyana-ttiyana anorabaga koddo dhinapaga attu enjene.
2.OTHEKENYEYA WA ELABO
Mowiwanana na miselu dha mparha wa Acadêmia Britânica, mwari mwavyaka dhinjene onopadduwa ottekenyeya wa mattaka dila 100 ontota “onongeya wa dhinjene”. Akadda Pesquisa Geológica dos Estados Unidos ahiloga: “Ninga munonelihu, dhihikalawo miselu dhinloga wi (oromana yaka ya 1900), ninojedha ottekenyeya wa mattaka onddimuwa vaddiddi onapadduwe dila 16 mwari mwa yaka modha. Anamapepesa ena ahiloga wi enoneya ninga ottekenyeya wa mattaka onela winjiva. Ebaribariya jawi, ottekenyeya wa mattaka onotatamulaga okwa vina otabuwa wa attu enjene
3.DALA
Koddo dhinrabiwetxa orugunuwa elabo yotene dhinotatamulaga dala, opujana, manyingalo, orameyeliwa dhokaliha, orameya wa bewu obe otowiwa ewodhelo ya osasanyedha milima dha nsaka nimodha-nimodha. “Muselu wa Yaka ya 2018”, ovuwihiwe na Programa Mundial de Alimentação onloga: “Ofiyedha muttengo wa attu amiliyawu 821 anotabuwavi na dala—mwari mwa muttengo obu muhikala amiliyawu 124 ahinkana-wene yoja.” Oja wohifwanyela, onotota okwa wa ayima owakwana amiliyawu 3.1 vyaka dhotedhene. Nona jijene ettukulele okwa wa aima purusentu 45 orugunuwa elabo yotene yaka ya 2011.
4.VIREDDA DHORAVEYA
Nikuru na Organização Mundial de Saúde, nihivuwiha muselu wawi: “Yaka ya 2001 ezinddiyeleya na viredda dhottiyana-ttiyana. Viredda dha wale—ninga ovaluwa, dhiredda dhoraveya, mudagwe—dhinopadduwavi, dhikalawo dhina ninga—makwiyo Síndroma respiratória do Oriente Médio, Ebola na Zika. Anamapepesa na adotoroyá anosunzaga mwaha wa viredda dhinjene, mbwenye masiki dhawenevi awene kanwodha ofwanya mirobwe dhogomihana viredda dhotene.
5.MABASA A OLALEYA ELABO YOTENE
Yezu ohiloga ezinddiyelo yina na mazu awi: ‘Muthaka obu wapama wa Omwene wa Mulugu onele olaleyiwa elabo yotene wi malogo etene ewe, ngamala panafiye ogoma w’elabo.’ (Mateu 24:14) Masiki malogo a attu afwanyiwaga masoso orutxa, okwaranya attu amiliau atanu naararu a malogo otene anovuwiha muttaka wapama wa Omwene wa Mulugu vilabo 240 na dhilogelo ofiyedha 1.000. Oromana nsaka niromile okalawo attu, eji yaligi ehinapadduwa.
VIZINDDIYELO ESI DHINFUNA DHINITAPULELE ENI?
Dhinapadduwela attu a malogo otene dhinlagiha wi vizinddiyelo dhalogile Yezu dhinowakwanihedheya. Ekaleleni yamakamaka ozuzumela dhopadduwadha? Sabwani Yezu wahiloga: “Mugona vina mapadduwo alogilimi, ziwani wi Omwene wa Mulugu owaddamelani.”—Luka 21:31.
Ovanene, Omwene onela okosiha wi ofuna wa Mulugu wiriwege mwilaboni
Vizinddiyelo dhivahile Yezu na muddonddonddo wa dhopadduwa dha mBibiliani, dhinonikamihedha ononelamo wi Mulugu ohimetxa wirimu Omwene yaka ya 1914. * Nsakanene nttile iyene ohimuttuva Mwanaye, Yezu Kristu ninga mwene. (Masalmo 2:2, 4, 6-9) Ovanene Omwene wa Mulugu ogaroma olamulela velaboni ya vati, onela watolotxa amwene otene anwanela olamulela wi mwilabonimwa mwimetxiwe paraizu attu akalegemo okala nokala-wene.
Ovanene mazu a nlobelo ninkosetxa attu enjene ninela wakwanihedheya: “Omwene wenyu odhele iyo, ofuna wenyu okosiwege vati apano ninga odhulu.” (Mateu 6:10) Txini enkosa Omwene oromana yaka 1914 yimetxiwani? Vina mareliho gani anjedhelihu wakela Omwene ogaroma olamulela malogo a attu? Kengesavi.
^ par. 17 Miselu dhina dhinloga mwaha wa yaka ya 1914 dhili munivuruni Txini Ennisunziha Bibilia? nilebiwe na Anamoona a Yehova, yowenjedha 22, eli makuku 217-220.
