Mwari mwa mitoma dhivirile nihoona vizinddiyelo dhilogile Yezu. Vizinddiyelo esi dhohiruneya dhintonyihedha wi Omwene wa Mulugu omala wimetxiwa wirimu; Yezu Kristu ddittomiwe wi akale Mweneya.

Bibilia onloga wi Yezu muttukuleliye mpaddo wa Omwene, ohimuttamagiha wirimu Satana vamodha na adomonyo aye. Ba awene anang’anela dhimpadduwa velaboni ya vati, nona oromana yaka ya 1914 mpaka ovanene, masoso elabo anodhowavi enjivaga.—Ovuhulela 12:7, 9.

Yezu ninga Mwene wa Omwene wa Mulugu, onokosaga dhinjene wi akamihedhena attu a malogo otene, masiki eziweyaga wi makattamiho a mwilaboni anottabwavi. Ninga mwattageliye ologa, attu ottiyana-ttiyana anosunza muselu wa Bibilia vina anovirihamo mazu a Mulugu; eji jotamaleya. (Izaiya 2:2-4) Attu enjene anosunzaga malago a opimelelana mabasa awa, okana murala wohagalala vina ottangarhama na esile dhimpani mmabasani mwawa; ddabuno kankala vina adhari a dh’amwilaboni. Awene anosunza merelo ampureleyamo mwigumini mwawa, anowedda na zelu dhinoniha wi anofuna olamuleliwa na Omwene wa Mulugu.

Enoziweya wi Yezu onolamulela wirimu, mbwenye mwilaboni mpuno muhikala alamuleli. Nona Mulugu amwaddela Nammodha waye mazu awi: “Wapuranye amwiddanawo.” (Masalmo 110:2) Ovanene Yezu onele watolotxa avanyi otene wi afurule abale animwiwelela Mulugu.

Nsakanene-ntto Omwene wa Mulugu onela

• Ogomiha relijiau dhonyengetta. Relijiau dhinasunziha attu ottambi mwaha wa Mulugu vina dhinrutxihaga okalawo wa attuya dhinela otolotxiwa. Bibilia onoladdaniha relijiau dhonyengetta na muyana wa jeberuwa. Otolotxiwa wa religiau dhonyengetta onela wawumiha milomo attu enjene.—Ovuhulela 17:15, 16.

• Ogomiha olamulela wa attu. Omwene wa Mulugu ‘onele otolotxa-wene olamulela wetene.—Ovuhulela 19:15, 17, 18.

• Watolotxa attu otakala murima. Txini enapadduwele avuti ahinrumela weddana malago a Mulugu? ‘Avuti na asaragundale anere otomoliwa mwilaboni, arayiliwe.’—Gano 2:22.

• Ottolotxiwa wa Satana na adomonyo. Satana na adomonyo kanawodhe vina ‘wanyengetha athu a mwilaboni.’—Ovuhulela 20:3, 10.

Mwari mwa dhotedhene esi, txini enapadduwele abale aniwelela Omwene wa Mulugu?

Yezu agaroma olamulela elabo ya vati, onele wira dhinjidhene dhihinwodha alamuleli a malogo wira. Iyene onalamulelege vamodha na attu 144.000 asakuliwe velaboni ya vati. (Ovuhulela 5:9, 10; 14:1, 3) Onele okosiha wi ofuna wa Mulugu wiriwege velaboni ya vati. Txini yina enakosele Omwene wa Mulugu attu a mwilaboni?

• Ogomiha vireda, na okwa. “[Kanakalewo] onaloge ‘miyo ddilí muredda’” nne “Kunakale vina okwa.”—Izaiya 33:24; Ovuhulela 21:4.

• Ovaha murenddele watxibarene na nibarelo. ‘Winjiva wa murenddele waninyu onere othabwa’ vina “muthu ddi muthu oner’okala wofwasa, mutxiddo mwa miri dhaye dha milima, ahimovaga muthu-wene.”—Izaiya 54:13; Mikeya 4:4.

• Ovaha mabasa ozivela ottiddawa. ‘Aner’ojaga anya dhopura dha mabasa a mada awa. Kanalabelege ebewene.’—Izaiya 65:22, 23.

• Ogomiha masoso a otowa ganyo. “Eddeddere na takwa yawuma dhihagalale! Mathaka odduwa asorhe marhuwa okoddela vaddiddi, abale milima.”—Izaiya 35:1.

• Wasunziha attu dila ya ofwanyana egumi yohimala. “Egumiyá yamukala-kala, jiji: ouziwani nyuwo Mulugu mmodha, webaribari; omuziwa vina Yezu Kristu, omurumilenyu.”—Joau 17:3.

Mulugu onofuna venjene wuvaha mareliho aba. (Izaiya 48:18) Mutoma onfwarela onela ologa txini enfwanyeliwe okosa wi okale mwari mwa abale anfuna wakela mareliho a musogoro.