1, 2. (a) Mulogele Pedro mazu aba awi, Nabuya, kaveddeleni ttagaraga, txini emwakule Yezu? (Koona foto eli omaromo.) (b) Yezu wakulele nni dhahene?

ANAMAFWARA a Yezu ahinyonyeya! Sabwa ya Yezuya ologa wi mudhidhi waye wa otabutxiwa ofiyedha okwa wela waddamela, awene obuwela wi iyene agahimetxa omwene wa Izrayel mudhidhe-nne obule. Murumiwi Pedro muziweliye dha otabutxiwa waye ohiloga: ‘Nabuya, kaveddeleni ttagaraga; Esodhá kadhinaupadduweleni.’ Yezu omwakula: ‘Ddivenyelevo, satana we! Weyo onfuna oddiviriganihe, dhintameliwe kahiyo dhinfuna Mulugu, zelu yawo j’omuttu bahi.’—Mateu 16:21-23; Merelo 1:6.

² Dhologa esi dha Yezu, dhihoniha wi vahikala ottiyana mwari mwa mubuwelo wa Yehova na dhawinanela dha elabo ejino eli mmadani mwa Satana. (1 Joau 5:19) Pedro wamukwekwettela Yezu okaana dhubuwelo dhomaningoni esuwene dhimale odhaleliwa attu a mwilaboni. Mbwenye Yezu wanziwa yawi efunelo ya Yehova yali ya iyene okala wovikomene sabwani  otabuwa n’okwawa wahimwaddamela. Yowakula ya Yezu ehoniha-wene wi iyene wobuwela dhahene ninga mobuwelela Yehova, ehoniha vina wi onoruna dhawinanela dh’elabo.

3. Enrutxela nni wubuwela ninga munubuwelela Yehova, nakulu dhubuwelo dha attu a mwilaboni kadhinrutxa okanawa?

³ Mwa iyo? Ninubuwela ninga Yehova obe ninga attu amwilaboni? Vowi nili Akristu, jofuneya okosa nttokoso wi dhawira dhehu dhimuttittimihe Mulugu. Dhawubuwela dhehu sivi? Ninovilibihedha wubuwela dhahene ninga munubuwela Yehova, kuloga, ninoweddana merelo anrumeliye? Ninofuna guru dhinjene wi nire dhinfuna Yehova. Mbwenye kinrutxa-wene wubuwela dhahene ninga munubuwela attu a mwilaboni. Noona mweddelo wabure wa elabo ejino odhala mwilabonimwa. (Éfeso 2:2) Yinaya jawi, mwilaboni, attuyamo anonikwekwettela okaana ekalelo ya ovittukulela, venevo ninodha ottukuleleya oravihiwa dhotolo-dhene eso. Veneva ningwaddavo dhahi: okana mubuwelo wa Yehova enorutxa vaddiddi, mbwenye wa attu kunrutxa.

4. (a) Txini enapadduwe nigattiya dh’elabo odhala muyubuweloni mwehu? (b) Ninasunze eni mwari mwa mutoma obu?

⁴ Nigattiya dh’elabo odhala muyubuweloni mwehu, ninele okala amukumbela vaye vina ninela orava elemelelo ya okosa esile dhinfunihu bahi. (Marko 7:21, 22) Nona jofuneya wabala “zelu dha Mulugu,” nirulaga ‘esile dh’omuttu.’ Mutoma obu onele oniwodhiha weddana dhubuwelo dha Mulugu. Ninele wona yopurelamo ya weddana merelo anrumela Yehova, kahiye wi ninkoddihiwa dhinfuna murima wehu; mbwenye ninvahiwa malago annipurhihamo. Vina ninele osekeserha dhinfwanyelihu okosa wi nirabele odhalihiwa, obe oravihiwa dha mwilaboni mpuno. Mutoma ondawo, ninasunze marhe ananiwodhihe ottukula dhubuwelo dha Yehova niwananihaga na merelo ehu.

5. Yeddelo gani ena attu?

⁵ Akalawo attu ahinfuna-wene malago akwawa. Awene ani: “dhinubuwelimi saga-dhene.” Kuloga eli muyubuweloni mwawa jawi, awene ahikaana ewodhelo ya okosa enfunani. Kanfuna malago akwawa, yofuna yawa ja okaana yeddelo yawene bahi. * (Koona yowenjedhedha.)

6. (a) Ofuru gani onnivaha Yehova? (b) Ofuru obu kuna maddile?

⁶ Yehova kannimagelela iyo okosa elobo ehinfunihu, mbwenye niziwe wi wira dhinfuna Yehova enonivaha murenddele. Korinto Wanawili 3:17 onologa: “Vali Muya wa Nabuya, pali ofuru.” Ofuru onivahile Yehova, wilele wi muttu-muttu asakule enfuniyena egumi yaye. Nihikaana ofuru wa osakula ennizivela. Yehova onittanddile dhahene. Mbwenye eji kintapulela wila ofuru wehu kuna maddile. (Kengesa 1 Pedro 2:16.) Akala iyo ninfuna nittiyanihe yapama na yabure, yofuna ya Yehova jawi nang’ananihe na Nzu naye wila ninikamihedhe ozinddiyela enfwanyelihu osakula. Ejiya enovugula ofuru wehu, obe enonipuriha?

7, 8. Wira ennifunana Yehova onovugula ofuru wehu? Kavaha yotagiha.

 ⁷ Katanalela yotagiha eji. Amanbali anomulela mwaniwa wila onuwe na malago. Awene anomusunziha okala wokuluveleya, owodha olaba na guru, vina anomwaddela elemelelo ya watanala attu akwaye. Nlelo ntti ninovugula ofuru wa mwanaya? Kahiye mwenemo, amambali aba animuswagiha mwanawa wi onuwe na zelu. Iyene ageddana nlelo nivahiwiye na amambali aye, dhamwigumini mwaye dhinela omweddela pama. Kanafwanyiwe dhorutxa, kanawalamuwele dha mwilaboni, vina kanakose dhinamulemelihe musorho.

⁸ Yehova onoliganihiwa na mambali onimulela mwanaye na malago opureleyamo, yofuna yaye jawi nikaane zelu dha weddana. (Izaiya 48:17, 18) Noona aganisunziha magano a mweddelo woriheya vina oziwa waweddiha attu akwihu. Kuloga wi, enfuniye ja iyo osunza yeddelo ennivaha ttima mwigumini mwehu. Yeddelo eji kinvugula ofuru wehu. Yeddelo ennivaha ononelamo veli-veli eneddihaga na malago. (Masalmo 92:5; Gano 2:1-5; Izaiya 55:9) Nigakala attu ana murima wa wiwelela, ninele weddana malago mwilaboni-mpuno vina ninele okala n’osanzaya. (Masalmo 1:2, 3) Dhubuwelo dha Yehova dhinonipurihamo, dhinosogorhela dila dhehu!

9, 10. Txini enoniha wi ottukuwa wa dhubuwelo dha Yehova onottiyana na wa dhubuwelo dha elabo?

⁹ Yina enikosiha ottukula mubuwela wa Yehova jawi mubuwelo waye bottukuwa-ttukwa opitta wa mwilaboni. Mwilaboni monosunzihiwa malago a weddana, munovahiwa zelu dha walagana anamurala, magano ofwanyana ganyo yoranjuliha na dhina dhottiyana-ttiyana dha mwigumini. Malago aba otene anogudulana na mubuwelo wa Yehova. Ninga motagiha, mwilaboni attu anovahiwa malago anakosiha ovizuzumela awenevi bahi, eji enowattukuleliha attuyamo wubuwela wi ogonihana bure-bure kahiye makani. Akalawo malago anlogani wi atelani agona makattamiho awa avinga, kavali mugomihedho mwina ehili omwalana. Malago aba anottiyana na masunziho a Bibilia. Kito mwa wonamo wawo, masaka abano ankalihuwo malago gani annipurhihamo, ba elabo obe ba Bibilia?

¹⁰ Yezu ohiloga: “Vano aneddana zelu ya Mulugu anowoniha wi dila yaye jawakwana-wene.” (Mateu 11:19) Enoziweya wi elabo enoruwihavi dha tekinolojiya, mbwenye esidha kadhingomiha makattamiho anihu; obure w’elabo ejino ohittabwa-wene, owana-wana kungoma, otanyana wa malogo onottabwavi, nne ngovi kadhinvuguwa. Mararuwo anoniwa ninga merelo orumeliwa. Attu anoziwa wi ekalelo eji ya ogonihagana bure-bure, enononga murala, enotota viredda dhinjene, vina ehikaana dhoputtula  dhina. Esene dhinovahana na malago a Yehova? Akristu etene anrumela malago a Yehova, murala wawa onkala wohagalalene, egumi kinajombela ali mumodhani na alabeli akwawa ali orugunuwa elabo yotene. (Izaiya 2:4; Merelo 10:34, 35; 1 Korinto 6:9-11) Dhawireya esi dhotene dhinowoniha-wene wi ottukuwa wa dhubuwelo dha Yehova onottiyana na wa dhubuwelo dha elabo.

11. Bani osiringile mubuwelo wa Mizé, vina txini epurelemu iyene?

¹¹ Alabeli a Mulugu a masaka awale kana waganyedha wi mubowelo wa Yehova bottukuwa-ttukuwa. Empadduwele Mizé enowoniha ebaribari eji, iyene “osunza onona wetene wa akadda Ejipitu,” mbwenye wanziwa wi ononelamo wawakwana niparhana ddi Yehova. (Merelo 7:22; Masalmo 90:12) Noona afiyedha omwaddela Yehova wi: “Ddiziwihení mobuwelo enyu.” (Obudduwa 33:13) Mizé wahimuttiya Yehova osirhinga mubuwelo waye, noona Yehova wahinvaha mabasa manddimuwa vaddiddi a ovirihamo yofuna Yaye, iyene wahivahiwa nttittimiho afiyedhaga okuweliwa mulobwana wa nroromelo.​—Ahebreu 11:24-27.

12. Niparha-niparhana na dhosakula dha Paulo nidhilo?

¹² Murumuwi Paulo wanziwa dhinjidhene, wali mulobwana wasunzile, iyene waziwa ologa dhilogelo bili. (Merelo 5:34; 21:37, 39; 22:2, 3) Mbwenye wahinyanyala ononelamo wotene wa elabo. (Kengesa Merelo 17:2; 1 Korinto 2:6, 7, 13.) Vasogorhova, iyene wahikosa mabasa manddimuwa vaddiddi a olaleya muttaka vina wanjedhela Ottuviwa waye wa musogorho.​—2 Timóteo 4:8.

13. Bani ona mabasa a wang’anela mobuwelo ehu?

¹³ Iyo kannaganyedha wi ottukuwa wa mubuwelo wa Yehova onopitta wa mwilaboni. Ofwara magano a Mulugu ononivaha osanzaya wawakwana vina onoruviha ttima mwigumini mwehu. Mbwenye Yehova kanimagelela ottukula dhubuwelo dhaye. “Mwimeleli wororomeleya, wamalago” na anddimuwaya a mmulogo kanang’anela mubuwelo wehu. (Mateu 24:45; 2 Korinto 1:24) Muttu-muttu wa iyo dduna mabasa a okoddeliha vina wogolela mobuwelo aye wi niwodhe weddana dhinrumela Yehova. Mubuwelo onogoleliwa dhavi?

14, 15. (a) Txini enfwanyelihu okosa wi niwananihe dhubuwelo dhehu na dha Yehova? (b) Ekalele nni yofuneya wurudha dhubuwelo dhotene dha mwilaboni? Katagiha.

¹⁴ Roma 12:2 enologa: “Kamufware yeddelo y’elabo ejino; vithiyení osadduliwa na Mulugu, muthukulaga mobuwelo maswa wi muwodhe ononelamo enufunanina Mulugu, eli yapama, enimuzivela, eli yawakwana.” Masiki ekalewo elobo-elobovi etakalihile mubuwelo wehu nihinatti osunza ebaribari, enowodheya orula mobuwelo aba a wale baniwananiha dhawubuwela dhehu na dha Yehova. Enoziweya wi dhohirabuliha dhinttukulihu na amambali ehu vamodha na dhetedhenedha dhinipadduwela mwigumini, dhinoraviha mubuwelo wehu, mbwenye niziweni yawi mubuwelo kunrutxa osadduliwa. Osadduwa oku wa dhubuwelo dhehu ompadduwetxa mwaha wa esile dhintanaleletxihu. Nigakoselaga guru wiwananiha dhubuwelo dhehu na dha Yehova, ninele wona wi dhotedhene  dhinfuna Yehova sinvaha ttima egumi yehu vina sili dhapamadha. Nigamala nigankana zelu dha wirana dhinfuna Mulugu wehu.

¹⁵ Mbwenye wila niwananihe mubuwelo wehu na wa Yehova, jofuneya iyo ottiya ofwara “yeddelo y’elabo ejino”. Kuloga nikale pasope wona, wengesa, vina ovuruwana elobo-elobovi endana mazu angudulana na mobuwelo wa Yehova. Wila ninonelemo ndoweni noneni empadduwa na oja. Muttu ona efunelo y’okana egumi yowarala, onoja dhoja dhinvaddiha egumi. Mbwenye akala onoja dhoja dh’olula obe dhonongeya txipo kanakane-wene egumi yoliba! Yakakene jinipadduwela iyo nigakosaga guru wila niwananihe mubuwelo wehu na mubuwelo wa Yehova oku nihirabelaga winanela dh’elabo ejino.

16. Ekalele nni yofuneya okala pasope?

¹⁶ Enowodheya iyo orabela kakamwe mubuwelo wotene wa mwilaboni? Nne, sabwani malabo etene ninowonaga dhawireya dhinnittukulela okaana dhubuwelo esi dha mw’ilabonimwa. (1 Korinto 5:9, 10) Masiki mulaleyani ninowafwanyamo attu a marejiau onyengetta, ena anloga mazu otowa malago. Enoziweya wi dhotedhene esi kadhinrabeleya, mbwenye masiki dhawenevi iyo kaningilatela wubuwela dhologiwa esi dhotowa malago vina kannika mmirimani mwehu. Yezu karumele nne-wene mazu opela malago a Satana; noona iyo ninfuna nitagihe merelo aba aye. Elobo yina enanikamihedhe, ku wurudha dhawinanela dhotene dha mw’ilaboni esuwene dhihinnipurihamo elo-wene.​—Kengesa Gano 4:23.

17. Niwodhe dhavi orabela mubuwelo wa mw’ilaboni obuwene ohinpuriha elo-wene?

¹⁷ Jofuneya vina wakalela pasope abale anveganihu. Bibilia onologa wila nigasakula attu ahinimulabela Yehova ninga amarho ehu ninodha oroma wubuwela ninga awene vina okosa dhinkosani. (Gano 13:20; 1 Korinto 15:12, 32, 33) Yina yofuna okalela pasope, ba mavegoya ansakulihu. Nigarabela mavego annitotela waganyedha ottanddiwa wa elabo, annittukulela merelo opanga, vina a mararuwo, kuloga ninuwurudha “ovittukulela wetene ongudulana na onona wa Mulugu.”​—2 Korinto 10:5.

18, 19. (a) Ninfanyelela nni okalela pasope ttabwa-ttabwa na miselu dhinvavihiwa mudhipanoni dhovavihana mazu? (b) Mavuzo gani anfwanyela iyo ovikosa, vina ninivikosela nni mavuzoya aba?

 ¹⁸ Dh’elabo dhinkala ninga mattapi-ttapi, dhinopela malago vaddiddi, noona jofuneya okalela mento. Vipano esile dhinvaviha mazu, munowikiwaga miselu dhinanyengetta attu wi amusakule mulamuleli onfuna owela vampaddoni. Miselu dhina dhinaloga attu ovuwa. Dhipano dhina miseludha attuya agasunza, anokana yubuwelo yopanela yawi, “miyo kavo onddipitta” ena ani, “anatabuwela miyo ba amudhaga bahi;” esi dhinowattukulela ovyona ninga ana mweddelo wapama. Awene kanfuna wiwa miselu dha Bibilia. Enloga Bibilia kinruneya, ttima ya egumi yehu vamodha na wagalalawa onda mumukwelani Yehova na murima wotene. (Mateu 22:36-39) Dhihikalawo vina dhisangu-sangu dhinkoseliwa ayima dhini awene agona, osazaga, dhigamala otakalihaga omuttu wawa.

¹⁹ Eji kintapulela wila jabure waredha. Mbwenye ninofwanyela ovivuza: ‘Ddinowodha ozinddiyela dh’opela malago dh’elabo? Miyo vamodha na anagaya ninorabela wona programa dh’ohifwanyelela wona esuwene dhinlagihiwa mu Televizauni? Ddinowakamihedha anaga ofiyedha wira dhinfuna Mulugu, badha okaana ewodhelo yohigilatela wang’ana obe ovuruwana dhubuwelo dh’elabo?’ Nigaziwa ottiyana wa mubuwelo wa Yehova na mubuwelo wa elabo ninele owodha orabela “yeddelo y’elabo ejino”.

20. Niwodhe dhavi ozinddiyela niparha na miselu dhinwutehu?

²⁰ Miselu dhili mwilaboni mpuno dhindda mwari mwa maparha meli. Niparha noroma tta Yehova, nina tta elabo ya Satana. Weyo onwuta niparha gani? Yowakulaya kinrutxa, ninowubuwela miselu dhinengesihu dhinvuruwanihu vina dhinonihu. Akala iyo ninorumela mubuwelo wa mwilaboni, bahi-to, bubwene onsaddula dhawira dhehu; merelo ehu kagattiyana na a attu a mwilabonimwa. Nona jofuneya okalela pasope enonihu, enengesihu envuruwanihu vina enubuwelihu.

21. Txini enasunze iyo mwari mwa mutoma ondawo?

²¹ Mutoma obu nihisunza wila akala ninofuna okana mubuwelo wa Yehova jofuneya otxatxama mubuwelo wa mwilaboni. Nikaane elemelelo ya ogilatela winanela dhubuwelo dha Mulugu, ninela owodha oliganiha mobuwelo wehu na waye. Ejiya empadduwa dhavi, ninela wona mwari mwa mutoma ondawo.