1, 2. Nigaroma owaraliha wandana wehu na Yehova, ninasunze okosa nni? Katagiha.

KATANALELA, mwana ovahiwa elobo na muttu-muttuvi. Mambalaye omwaddela dhahi, “kaloga ddinotamalela.” Mwanaya otamalela sabwa yowaddeliwa. Venevo agonuwaga, onele ozinddiyela mwaha wakokomeza amambali aye ologaga mazu otamalelana. Vang’ono-vang’ono onelege okaana elemelelo y’otamalela sabwani ohisunzihiwa.

² Yakakene jinipadduwele. Varomilihu omuziwa Yehova, iyo nihisunza wila jamakamaka wiwelela dhinlogiye. Mbwenyi nigaroma owaraliha wandana wehu na iyene, ninosunza dhubuwelo dhaye, dhinimuzivela, dhihinimuzivela vina monelo waye mwa dhilobo dhottiyana-ttiyana. Nigewananihaga dhosakula dhehu na dhubuwelo dha Yehova, kuloga ninfuna wi dhubuwelo dhehu dhikale ninga dhaye vina.

3. Enrutxela nni wiwananiha dhubuwelo dhehu na dha Yehova?

³ Enoziweya wi yofuna yehu ja wiwananiha dhubuwelo  dha Yehova na dhehu, mbwenye masaka meena enorutxaga vaddiddi sabwani iyo nili attegi. Ninga motagiha, iyo ninoziwa wi Yehova onowidda mararuwo, ozuzumela dhorela, wikiwa nikami na dhina dhottiyana-ttiyana. Masaka mena enokala yorutxa ononelamo sabwaya eniddeliye dhilobo esi. Veneva ninawodhe dhavi wiwananiha dhubuwelo dhehu na dhaye? Txini enanikamihedhe okosa dhosakula dhaderetu ovanene vina musogorho?

4. Txini enfuniwanihu okosa wi nogolele dhubuwelo dhehu?

⁴ Kengesa Roma 12:2. Va nleboni ntti murumiwe Paulo ohiloga enfuniwanihu okosa wi nogolele dhubuwelo dhehu vina nisunze weddana mweddelo onrumeliwa na Yehova. Iyene ohiloga, “kamufware yeddelo y’elabo ejino.” Sumana evirile, nihisunza txini entapulela orabela mubuwelo na dhawinanela dha mw’ilaboni. Paulo ohiloga vina wila ninofwanyela otxeniha mubuwelo wehu. Eji entapulela wi jofuneya osunza Mazu a Mulugu, ononelamo dhubuwelo dhaye, winanela, vina ovilibihedha wi nirave dhubuwelodha dhaye.

5. Kaloga ottiyana olivo mwari mwa osunza na wengesa.

⁵ Osunza kahiye wengesavi bahi, nne vina kahiye ozinddiyela dhowakula dha mavuzo anfunihu. Nigasunzaga, jofuneya oroma wubuwelela merelo ehu mowiwanana n’esile dhinfuna Yehova; iyene okosele nni dhotedhene dhiliwo n’ekalelo elani, txini dhinubuweliye. Ninofuniwana vina ozinddiyelaga mwaha onnipangela Yehova wi nirabele merelo amputtula. Niromege wang’ana merelo ehu, wi nizinddiyele vanihu efunelo ya osaddula. Wubuwela dhotedhene dhinsunzihu enorutxa. Masiki dhawenevi, ninofwanyela ogilati, ngafuna midhidhi dhing’onovi mwari mwa nsunzo nimodha-nimodha wi ninanelege dhinengesihu.​—Masalmo 119:97; 1 Timóteo 4:15.

6. Elobo gani empadduwa iyo nigatamela mudhidhi wotanalela Nzu na Mulugu?

⁶ Nigatamelaga mudhidhi wotanalela Mazu a Mulugu enopadduwa elobo yotikiniha. Elobo gani? Ninokana ebaribari wila dhubuwelo dha Yehova s’owakwana. Otanalela onela oniwodhiha oziwa dhinfuna Yehova, ninofiyedha ononelamo wi dhinfuna Yehova sowakwana. Mubuwelo wehu onotxena vina ninosunza mukalelo muswa wotanalela. Vang’ono-vang’ono ninoroma wubuwela ninga Yehova.

7, 8. (a) Yehova ononamo dhavi dhofuma? (Koona foto dhili omaromo.) (b) Akala monelo wehu wa mafumo a mwilaboni onoligana na wa Yehova, txini enakalege vamburoni voroma mwigumini mwehu?

⁷ Dhinubuwelihu si esile dhinirehu. (Marko 7:21-23; Tiago 2:17) Ndoweni nirome ologa yotagiha enanonihedhemo makani aba. Yezu ohiloga musibo wa balame onihaga-wene wi Yehova onowawika ekotti abale anzuzumela dhofuma dh’elabo. Mulugu ohimusakula José na Maria wila amulele mwanaye masiki akalaga attu oyelega. (Onamakutha 12:8;  Luka 2:24) Mubaliwe Yezu, Maria “omugunantiha munigulani; werele ohifwanya mburo mba mwa aleddo.” (Luka 2:7) Yehova kofuna agahikosa elobo-txilobo wila Yezu abaliwe mburo waderetu. Eji epadduweli sabwa yawi Yehova wafuna wi Yezu abaliwe vamuralani vali attu anzuzumela dha Mulugu. Enfunetxa Yehova, ku omuzuzumela iyene voroma.

⁸ Obaliwa wa Yezu ononisunziha wi Yehova kanttittimiha dhofuma. Amambali ena anjedhela wila aniwa akane dhilobo dhomaningoni gwé, ottiya walibiha okana wandana waderetu na Yehova. Iyo ninkaana ttima nigandana na Yehova. Weyo onorumela monelo wa Yehova mwa dhilobo dhomaningoni? Dhokosa dhawo dhinuzinddiyeliha omuttu gani?​—Kengesa Ahebreu 13:5.

9, 10. Txini enatonyihedhe wila ninowubuwela ninga munubuwela Yehova?

⁹ Yotagiha yanewili mukalelo onimona Yehova muttu onimukakattutxa mukwe vina agamuttegiha obe ompupurutxa wila attiye omulabela Yehova. Yezu ohiloga: “Onimuthegiha mmodha mwa ayma aba anddiroromela, wanfwanyela omageleliwa libwe ninddimuwa mukothi, aririmihiwena mwiko.” (Marko 9:42) Yologa eji jovadda vaddiddi! Iyo ninoziwa wila Yezu oli ninga Yehova. Ninononelamo wila Yehova ononyonyeya mmirimani akala ninomukwakwattutxa namafwara wa Yezu.​—Joau 14:9.

¹⁰ Weyo onowona omukakattutxa muttu ninga munonela Yehova na Yezu? Dhokosa dhawo dhintonyihedha eni? Motagiha, mwabalelo wehu vina mukalelo ovisasanyedha. Mukalelo wawo wowabala onowakosiha attu ena wubuwela bure obe okana mubuwelo wodhugudha? Akala ninowakwela abalihu ninatxatxame dhavi mwabalelo obu?​—1 Timóteo 2:9, 10.

11, 12. Txini enaniwodhihe widda enidda Yehova vina ninawodhe dhavi okaana elemelelo ya ovyang’anela?

¹¹ Yotagiya yaneraru: Yehova onowidda opujana. (Izaiya 61:8) Txibarene, iyene onoziwa wi iyo ninorutxiwa wira dholiganavi, sabwani nili attegi. Yehova onfuna wi iyo nitanyege ejile entanyiye. (Kengesa Masalmo 97:10.) Iyo nigatanalela mwaha oniddela Yehova obure obe opujana, ninela owodha wubuwela ninga iyene vina ninela okaana ewodhelo ya orugunuwa obure.

¹² Iyo nigasunza widda obure, ninela wona wi dhihikalawo dhilobo dhihinfwanyela okosiwa, masiki Bibilia ahilogaga mputtuleloya. Ninga motagiha, omutxetta katongola, na jibo dhina dha masaka abano dhintakaliha omuttu wehu. Anamatxettaya ani, kavali yabure vowi kinligana na ogonihana na muttu, noona mmirimani mwawa elimo ja ohitxelela  otxettawa. * (Koona yowenjedhedha.) Yehova ononamo dhavi ejene? Kudduwale wila Yehova onowidda dhilobo dhotene dhili dhabure. Noona ninfuna nirabele-wene elobo-elobovi yabure, nisunzaga elemelelo ya ovyang’anela mwa widda enidda Yehova.​—Roma 12:9.

13. Nigasunzaga ninfuneliwanani wang’ananihaga museluya na esile dhinnifunana Yehova?

¹³ Nigasunzaga, ninofuniwana wang’ananiha museluya na esile dhinnifunana Yehova, okosa eji onela oniwodhiha weddana malago. Dhahene panawodhihu weddana malago, masiki nigafwanyiwa rurumutxani wa dhorutxa, kaninazuzumetxe. (Gano 22:3) Ndowe nitanalele yotagiha eli mBibiliani.

14. Mazu amwakulena José mwadhi Putifar annisunziha nni?

¹⁴ Mwadhi Putifar wafuna wila José agone na iyene, mbwenye José wahikodda. José momaguva-mwene wahinonelamo monelo wa Yehova wa oriha matelo. (Kengesa Wita 39:8, 9.) Iyene ohimwaddela mwadhi Putifar: “Ddinwodha dhavi wira elobo ninga eji, yothabwetxa otakala, ddimuddawelaga Mulugu?” Veneva, kuloga José wela wiwananiha dhubuwelo dhaye na dha Mulugu. Kito iyo? Akala muttu onlaba na weyo onoroma wugayela txini enakosiwe? Obe akala onottabirha foto yonyakuwa mmuttittoni? * (Koona yowenjedhedha.) Nigakala womala na wale na dhubuwelo dha Yehova, ninela owodha wona ngoviya momaguva.

15. Niwodhe dhavi okala wororomeleya na Yehova dhahene ninga mukosile azombwe abale araru a Ahebreu?

¹⁵ Katanalela yotagiha ya azombwe araru a Ahebreu akuweliwa, Sidrak, Mizak na Abedenago. Mwalogele Mwene Nabukodonosor wila attu etene akokorele engamuttu yobihiliye, awene ahikodda ahovaga elo. Yowakula yawa ehilagiha wi ahimála oziwa yafuna wapadduwela sabwa ya omuroromelavi wawa Yehova. (Obudduwa 20:4, 5; Daniyel 3:4-6, 12, 16-18) Kito iyo masaka abano? Txini enakosiwe ogakumbiriwa na muzugwawo sokela ya osasanyedhiwana mattanga ankosiwa na marelijiau onyengetta? Enfwanyelihu okosa ja oroma wubuwela na mutanene yowakula yehu nihinatti opadduweliwa, enofwanyela oromana ovanene otanalela ennifunana Yehova wi nikose. Egapadduwa ninele okana yokosa ninga ekosile azombwe abale araru.

16. Wiwananiha dhubuwelo dhehu na dha Yehova onanikamihedhe dhavi nigafwanyiwa rurumutxani?

 ¹⁶ Wiwananiha dhubuwelo dhehu na dha Yehova ononiwodhiha omuroromelavi, masiki nigafwanyiwa eredda yofuna omaguveliwana murobwe. Mwebaribari, iyo nihimala-wene omuja namakwanttani wa okoodda wekiwa vipaddi dh’onai (4) dha nikami. (Merelo 15:28, 29) Mbwenye akalawo marhe meena a oja mirobwe dhintaganyiheya na nikami, venevo Mukristu yeka onowinanela eddihiwaga na magano a Bibilia. Esidha dhininaneliwa mudhidhi gani? Dhininaneliwa onumbani yegumi, mubulelanimwa, obe mudhidhenne obule ommageleliwa weyo wikiwe nikamina? Mudhidhiya kahiye obuwene. Akala weyo wamugumi, baza oviparhapattela, okane njangarha nttile ninkoddiha wikiwa nikami vina okale womala na wale wi wakule mavuzo aniwanana na nikame. * (Koona yowenjedhedha.)

17-19. Ekaleleni yofuneya wiwananiha dhubuwelo dhehu na dha Yehova ovanene? Katagiha.

¹⁷ Ovano, kobuwela mazu amwakulena Yezu Pedro mwaha wa iyene ologa dhotowa zelu dhawi: ‘Nabuya, kaveddeleni ttagaraga! Yezu wahirumela momaguva-mwene, enkala ninga iyene wantanalela sabwa ya mavuhulo a mBibiliani wila iyene agatabuwa vina agakwa. Mubuwelo obu ohinvaha Yezu ewodhelo yororomeleyavi na Yehova ofiyedha oleva egumi yaye bikala mukutto onttimiha dhottega dhehu.​—Kengesa Mateu 16:21-23.

¹⁸ Masaka abano, Mulugu onfuna wi iyo nandane na iyene vina nikose muli mwetemwene wila nilaleye miselu dhapama. (Mateu 6:33; 28:19, 20; Tiago 4:8) Attu ena anoveda onipupurutxa ninga ekosile Pedro na Yezu. Ninga motagiha, akala muzugu wawo onoruwiha mabasa awo na nlívona, mbwenye venevo wona wi mabasaya anela ovuvurutxa mudhidhi onfunigiwe omukosela Yehova mabasa, ninga odhowa mmabasani olaleya n’omatugumanoni; venevo  onakosevo nni? Obe akala wa muzombwe onsunza, oskola wawo ogobeliwa okosa masunzo manddimuwa, txini enakosiwe? Egapadduwa dhahene, onela ofuna olobela, opepesa, vina ologa na attu a vamuralani obe anddimuwa a mmulogoni enfwanyeliwe okosa? Esi dhorutxa dhina, voroma-vene jofuneya oziwa txini enfuna Yehova ovanene, mwa wiwananiha dhubuwelo dhehu na dhaye. Ogafwanya dhilobo ninga esi kunazuzume. Onele oziwa yokosaya, sabwa yawi ohimala ogana ozuzumela mabasa a Yehova.

¹⁹ Enkala ninga weyo onoziwa elobo yina enuwobaniha mumuroromelani mwawo Yehova. Txibarene onofwanyela okale ovisasanyedhela-wene wila opemberhe ogafwanyiwa dhorutxa ninga esi. Mbwenye nigewananihaga dhubuwelo dhehu na dha Yehova mwari mwa nsunzo nehu na Bibilia, kaninarutxiwe wubuwelaga vina okosaga dhosakula dha malago. Nona nigasunzaga nivilibihedhe wubuwela ninga munubuwela Yehova, nigakosa dhahene ninele okamihedheya okosa dhosakula ovanene vina musogorho.

20, 21. (a) Ofuru gani onakanihu mwilaboni eswa? (b) Ninajevo dhavi egumi masaka abano?

²⁰ Iyo ninofuna wila elabo eswa efiye. Enjene mwa iyo anojedhela okala namukalakala mparaizu. Omwene wa Mulugu onele wafurula attu mutabuwani. Attu etene anele okana ofuru wosakula enfunani okosa vina ehinfunani okosa, masiki mwilaboni eswa.

²¹ Eji kintapulela wila yosakula yehu kinakane maddile. Akurumuwi anowodha weddana dila dha Yehova ewananihaga dhubuwelo dhawa na dhaye. Noona awene anere ojavo murenddele. (Masalmo 37:11) Masiki nikalaga mwilaboni mpuno, enowodheya okana wagalala; wagalala oku onda nigewananihaga dhubuwelo dhehu na dha Yehova.