1, 2. Yehova wamunyanyaleli eni Saul? (Koona foto omaromo.)

NSAKA nisakuliwe Saul na Yehova wi akale mwene, Saul wali muttu woviyeviha. (1 Samuwel 9:1, 2, 21; 10:20-24) Mbwenye mukaleliye mwene, iyene oroma ovittukulela. Mudhidhi dhahi anyakoddo txikwi a akadda Filisti adha oraba koddo n’akadda Izrayel. Namavuhulela Samuwel wamala omwaddela wila agadha okosa mukutto wi amperhekele Yehova. Mbwenye onaga wila Samuwel wela ogonela, ana Izrayel attiddiwa wova, nanda enjiya aroma omuttawa Saul. Sabwa yokoodda okurumuwa, vina olema sabwa ya omujeedha Samuwel, iyene okosa mukuttoya mwinya. Saul kattomeliwe okosa ejiya, nanda Yehova karumeeli.—1 Samuwel 13:5-9.

² Samuwel mfiyeliye, omusaddeya Saul sabwa yomusadduwela Yehova. Masiki dhawene Saul katanaalile wila yakosiliye yali elobo yawopiha. Iyene wahitamela marhe ottiya muladdu waye baroma wamagedha attu eena. (1 Samuwel 13:10-14) Oroma mudhidhene-obule mpaka musogorho, Saul wankosa dhilobo dhinjene dhabure. Noona  Yehova wahimukoodda iyene wi akalevi mwene. (1 Samuwel 15:22, 23) Musogorhomwa egumi ya Saul kidhile ogoma n’oderetu.—1 Samuwel 31:1-6.

3. (a) Attu enjene anubuwela dhavi sabwa ya okurumuwa? (b) Mavuzo gani anfunihu wakula?

³ Attu enjene anubuwela wila kinwodheya muttu okurumuwa, oku bana dhorela obe ganyo envaha kobiri enddimuwa. Awene anovittukulela afunaga wapittiha akwawa. Motagiha mulobwana dhahi oli mukadda politika ologa: “Miyo okurumuwa kunddipatta—vina ddinoona wila txipo kannaddipatte.” Kito Mukristu onfanyeelela eni okala muttu wokurumuwa? Okurumuwa oku txini? Mwari mwa mutoma obu, ninele wakula mavuzo aba. Mutoma ondawo ninele woona mukalelo onfanyeelihu okala ookurumuwa masiki egali yorutxa.

4. Merelo opanela txini?

⁴ Bibilia onolagiha wila maruru (opanela), ottiyana na okurumuwa. (Kengesa Gano 11:2.) David wahimuloba Yehova: “Ddirabeliheni opanela miyo mwimeleli wenyu.” (Masalmo 19:14) Opanela, txini? Eji empadduwa akala ninokosa elobo ehittomeliwehu, n’gafuna sabwa y’olema ojeedha obe ovittukulela. Mudhidhi mwina ninokosaga dhilobo n’opanela, sabwani n’attu ohiligana. Mbwenye ninga esunzile iyo na yotagiha ya Mwene Saul, akala merelo aba anodha okala elemelelo yehu Yehova kanziveliwa. Masalmo 119:21 enloga wila Yehova “onowalaga aliba [opanela].” Iyene onkoselani ejiya?

5. Merelo opaneela akalile dhavi yottega enddimuwa?

⁵ Voroma, akala ninokosa elobo n’opanela, nintonyihedha wila kannimuriha Yehova oli Mulugu wehu vina Mwene. Vanawili, akala ninokosa elobo ehittomeliwehu okosa, ninotatamula wakulana obe ohiwanana na attu eena. (Gano 13:10) Vanoraru, attu eena agoona wila nihira dhabure, ananoonege ninga azimorha. (Luka 14:8, 9) Mohaganyedha, ovano ninowodha woona sabwa enfunela Yehova wila nikale attu okurumuwa.

6, 7. Okurumuwa onlagiha dhavi oviyeviha?

⁶ Okurumuwa onoligana na oviyeviha. Mukristu woviyeviha kampanela vina onottiya wila attu eena akale anddimuwa opitta iyene. (Filipi 2:3) Dila dhina muttu woviyeviha, ddokurumuwa. Onononelamo wila dhilobo dhina kanwodha, vina na oviyeviha onorumeela dhovirigana dhaye. Onorumeela osunzihiwa na attu eena vina wiwelela malago awa. Muttu woviyeviha onomutamaalela Yehova.

⁷ Bibilia onloga wila muttu woviyeviha onoviziwa pama vina onorumeela wila dhikalawo dhilobo dhihinwodhiye okosa obe dhinfanyeeliye ottiya okosawa. Ejo enomukamihedha wariha attu eena vina wawoona na oderetu.

8. Wi nikale okurumuwa yubuwelo gani enfanyeelihu orabela?

⁸ Txino iyo ninokosaga elobo na mukalelo wovittukulela, nihinonelagamo. Empadduwela  eni? Txino ninoroma ovittiyaniha na attu eena sabwa yoziwa wila ninele ottomeliwa mabasa maswa mmulogoni. (Roma 12:16) Obe ninoroma ovittittimiha. (1 Timóteo 2:9, 10) Nigahang’ane ninele oroma wawaddela attu eena esile dhinfanyeelani okosa obe nne.—1 Korinto 4:6.

9. Attu eena aromile dhavi okala anamavittukulela? Kaloga yotagiha ya Bibilia.

⁹ Kinrutxa okosa dhilobo n’ovittukulela, ttabwa-ttabwa nigahang’anele yubuwelo yehu yabure. Enjiya akaana efunelo yovittukulela sabwani anofuna osibiwa, wakaanela nrima akwawa obe kanwodha wang’anela etanaalelo yawa. Eji epadduwa na enaya alebiwe mBibiliani, ninga Absalau, Oziya na Nabukodonosor. Yehova wahalagiha wila awene anfanyeela oviyeviha.—2 Samuwel 15:1-6; 18:9-17; 2 Mapadduwo 26:16-21; Daniyel 5:18-21.

10. Ninfanyeelela eni orabela ottonga dhubuwelo dha attu eena? Kaloga yotagiha ya Bibilia.

¹⁰ Txino ehikalawo sabwa yina enakosiha attu okooddaga okala okurumuwa. Ndoweni nitanaalele yotagiha ya Abimelek na Pedro. (Wita 20:2-7; Mateu 26:31-35) Koddi awene ali anamavittukulela? Niloge wila awene kanonelamo deretu makaniya obe aloga s’ohubuwela? Vowi kaninwodha wengesa murima wa muttu, bahito kaninfanyeela ottonga mubuwelo wa attu eena.—Kengesa Tiago 4:12.

11. Txini enfanyeelihu ononelamo?

¹¹ Muttu wokurumuwa onoziwa epaddaye mmasasanyedhoni a Mulugu. Yehova Mulugu wa masasanyedho. Mulugu ohavaha mabasa attu etene a mmulogoni. Noona iyo notene nili ofuneya. N’okwela Yehova onivaha ewodhelo ya okosa elobo nanda ohinivaha marhe a olabihedhawa. Nigakala attu oviyeviha, ninele olabihedha mowakwana nvaho wa Yehova ninga munfuneliye. (Roma 12:4-8) Ninoziwa wila Yehova onfuna nilabihedhe ewodhelo ejo wi nimuttittimihe vina nakamihedhena attu eena.—Kengesa 1 Pedro 4:10.

12, 13. Txini enfanyeelihu wubuwela akala ninotxinja mabasa ehu a Yehova?

¹² Esile dhinkosihu mmabasani a Yehova na mudhidhiya podi osadduliwa. Motagiha kobuwela masadduwo menjene agumanilena Yezu. Voroma, iyene wali na Babe bahi. (Gano 8:22) Musogorhomwa, wahimukamihedha Yehova wattandda angelo, erimu vina attu. (Kolosi 1:16) Nomala, wahirumiwa odha velaboni ya vati. Wahibaaliwa ninga mwana muttu, nanda baleliwa mpaka wunuwa. (Filipi 2:7) Mmaleliye okwa, Yezu wahiyelela wirimu, nanda yaka ya 1914 ohikala Mwene wa Omwene wa Mulugu. (Ahebreu 2:9) Oroma venevo, ottonga wotene oromana wirimu mpaka velaboni ya vati ottiyedhiwe iyene. Musogorho, agamala olamulela ninga Mwene mwari mwa vyaka txikwi, Yezu onele omwiyihedha Omweneya Babe Yehova, nomala “Mulugu oner’okala mwinya wa etene na dhetene.”—1 Korinto 15:28.

¹³ Iyo viina ninowonaga masadduwo menjene mwigumini mwehu. Mudhidhi mwina ettomo na dhosakula dhehu vano dhinotxinja. Motagiha, txino nali aziye mmalelihu banitela. Obe okaana mwana. Musogorhomwa txino ninofuna okosa  masadduwo mang’onovi wila nimulabe Yehova na mudhidhi mwinjene. Mudhidhi mwina masadduwo anodha sabwa ya makattamiho angumanana iyo. Txino ninowodha okosa mabasa menjene, obe vang’onovi. Mbwenye akala nili muzombwe obe kalaba, nikaana egumi yaderetu obe nne, Yehova onoziwa enfanyeelihu okosa wi nimulabe deretu. Iyene kanjeedhela wila nikose ejile ehinwodhihu. Iyene onohagalala na esile dhaderetu dhinkosihu.—Ahebreu 6:10.

14. Okurumuwa onnivaha dhavi ohagalala nigagumanana makattamiho?

¹⁴ Yezu wanagalala na mabasa etene avahiwiye na Yehova, iyo vina podi ohagalala vopitta. (Gano 8:30, 31) Muttu wokurumuwa, onohagalala na mabasa ankosiye vina attomeliwiye mmulogoni. Iyene kankalela wang’anavi esile dhinkosa attu eena. Ottiya eji, iyene onohagalala na epaddi ettomeliwiye munikuruni na Yehova. Onoziwa wila ettomeliwiye enda wa Yehova. Muttu wokurumuwa vina woviyeviha onkala womala nawale wi arihe attu eena vina akamihedhe. Onononelamo wila Yehova onvaha epaddi yaderetu.—Roma 12:10.

15. Yotagiha ya Jedeau ennisunziha eni?

¹⁵ Jedeau yotagiha yaderetu ya oviyeviha vina okurumuwa. Vattomiwiye na Yehova wila avunele nlogo na Izrayel mmadani mwa Medián, Jedeau ologa: “Mwa nihimo na Manassé, murala woyelegetxayá bwehu, miyo ddili muñgonoyavo.” (Anamathonga 6:15) Masiki dhawene Jedeau wahimukuluvela Yehova vina wahirumeela mabasa  attomeliwiye. Mohaganyedha Jedeau wanziwa yanfunana Yehova noona wahilobela akumbirhaga nikamihedho naye. (Anamathonga 6:36-40) Jideau wali mulobwana woliba murima vina waguru, masiki dhawene wali muttu weziwelo vina wa malago. (Anamathonga 6:11, 27) Musogorhomwa vasakuliwiye wila alamulele nlogo, iyene wahikoodda. Mmaleliye okosa yattomeliwiye na Yehova, iyene wahiyelela owaniwaye.—Anamathonga 8:22, 23, 29.

16, 17. Muttu wokurumuwa ondowa dhavi vasogorho?

¹⁶ Akala muttu onorumeela elobo ettomeliwiye mmulogoni, obe akala onofuna okosa mabasa meena, ejo kintapulela wila muttuya kaniviyeviha obe kankurumuwa. Bibilia onloga wila mwimeleli oli wotene wa Yehova, onofanyeela ovilibihedha wi alabele mowakwana abalaye. (1 Timóteo 4:13-15) Egali dhawene ninojeedhela ottomiwa wi niwodhe odhowa vasogorho? Nne. Iyo notene ninofanyeela weeddiha deretu ekalelo yehu ya Okristu vamodha na ewodhelo yehu wi nakamihedhena attu eena, sabwani ejoya efunelo ya Yehova.

¹⁷ Muttu wokurumuwa ahinatti orumeela ettomo onoroma otanaalela txini enjedhiwa mwa iyene. Onolobela na ofwasa vina onotanaalela akala onele owodha mabasaya. Onokaana-wene mudhidhi waderetu vina guru wi akose mabasa meena amakamaka? Akala kanakaane mudhidhi, bahito attiye wi attu ena asogorhena, iyene ahalena nibasa nimodha. Agamala otanaalela deretu, muttu woviyeviha onowodha woona akala onele owodha weddiha mabasaya ninga munfuneliwani. Akala n’attu oviyeviha vina okurumuwa, nanda noona wila kaninwodha jaderetu ologa nne.

18. (a) Muttu wokurumuwa onkosa eni agattomeliwa mabasa maswa? (b) Nlebo na Roma 12:3 ninnikamihedha dhavi okala okurumuwa?

¹⁸ Yehova onfuna wila needde na “okurumuwa vamentoni va Mulugu.” (Mikeya 6:8) Noona nigattomeliwa mabasa maswa, ninofanyeela wiwelela malago aye vina omukumbirha nikamihedho, ninga mwakoseli Jedeau. Ninofanyeela otanaalela vina enloga Yehova odheela Bibilia vamodha na nikuru naye. Nubuwele wila dhetene dhinwodhihu okosa mmabasani aye, kahiyo wila sabwa ya guru dhehu, mbwenye sabwa yawi Yehova ddokurumuwa vina womala na wale wi anikamihedhe. (Masalmo 18:35) Muttu wokurumuwa vina woviyeviha ‘kanobuwele na etanaalelo yaye.’—Kengesa Roma 12:3.

19. Ninfanyeelela eni okala okurumuwa?

¹⁹ Muttu wokurumuwa onoziwa wila onfanyeela ottittimihiwa ddi Yehova bahi, sabwani iyene ddi Muttanddi vina Namadhulu-dhulu wa elabo yotene. (Ovuhulela 4:11) Nigakala muttu wokurumuwa, ninele ohagalala na mabasa-mabasavi a Yehova ankosihu. Ninele oriha etanaalelo vina moonelo wa abali, nanda ejoya enele odhana wiwanana. Muttu wokurumuwa onoroma wubuwela deretu ahinatti okosa elobo, nanda onorabela okosa dhottega dhinddimuwa. Yehova onohagalala n’abale aniviyeviha. Noona oviyeviha kwamakamaka mwari mwa nlogo na Mulugu. Mutoma ondawo onele onikamihedha woona mukalelo onfanyeelihu okala okurumuwa vina oviyeviha masiki egali yorutxa.