Makaniya anonikamihedha oziwa wila Paulo waddana efunelo ya miselu dha Mulugu ninga mulebiwani mBibiliani.

Mudhidhi mwina, Ahebreu 4:12 onologiwa mmanivuruni mwehu wila Bibilia ddwebaribari vina ohikaana ewodhelo ya osaddula dhigumi. Mwa dhahene jamakamaka otamela ononelamo txini yafuna ologa Paulo alebaga mazu aba va Ahebreu 4:12. Wela walibiha Akristu Ahebreu wi eeddege mowiwanana na efunelo ya Mulugu. Dhifunelodha dhinjene dhafanyeya mmaleboni a Bibilia. Paulo wahaloga ninga tagiha ana Izrayel avuniwe na Mulugu mudharini o Ejipitu. Awene ahikaana njeedhelo na wakela ‘elabo yadhalile mukaka na wiyi’ egadhilani ofwanya ofwasa webaribari.—Obudduwa 3:8; Olibiha 12:9, 10.

Eji yali efunelo ya Mulugu. Mbwenye ana Izrayel ahikoodda ofara malamulo a Yehova, noona enjiya kawodhile ovolowa mufwaseyani. (Olebeliwa 14:30; Josuwé 14:6-10) Paulo wahenjedhedha wila “epikirhele Mulugu yovolowa mu withuwani na iyene, enodhowavi.” (Ahebreu 3:16-19; 4:1) Noona ‘nlibelo’ ntti mohaganyedha epaddi ya esile dhavuhuleli Mulugu na efunelo yaye. Dhahene ninga Akristu a Ahebreu, ninofanyeela wengesa vina ottiddihedha mabasa efunelo eji ya Mulugu. Wi alibihe wila nlibelo ntti nindela Mmaleboni, Paulo wahiloga mazu ali va Wita 2:2 vina Masalmo 95:11.

Eji enoddiginya murima wehu sabwani niziwa wila ‘ninele ovolowa mu withuwani nwa [Mulugu].’ Nihikaana ebaribari wi elogile Mulugu wila ninele wittuwa na iyene ebaribari vina enowodheya, nanda ninokosa guru wi nivolowe mu wittuwanimwa. Iyo kaninkosa esodha nifaraga Malamulo a Mizé obe wila nirumeeliwe na Mulugu. Mbwenye sabwa ya omuroromela wehu Mulugu, ninokosa kukuttu wi needdege mowiwanana na efunelo yaye. Attu enjene orugunuwa elabo ejino, aroma omusunza Bibilia wi aziwe epikirele Mulugu na ofuna waye. Eji enowakosiha attu enjene osaddula mubuwelo wa egumi yawa ofiyedha obatiziwa ninga mukalelo wa olagiha nroromelo nawa. Mukalelo ompattiwa awene na mazu aba yolagiha yebaribari wi “Nzu na Mulugu tholaba, ninowira enlogani.” Epikirhele Mulugu mBibiliani ehiddiginya murima wehu nanda enele olabavi mwigumini mwehu.