1. Yehova onivahile njedhelo gani?

 YEHOVA ohinivaha njedhelo notikiniha wi musogorho nikane egumi yamukalakala. Attu ena anojedhela okala wirimu na mukala-kala. (1 Kor. 15:50, 53) Mbwenye attu owinjiva njedhelo nawa tta okala na mukala-kala velaboni ya vati na egumi yowakwana vina nohagalala. (Ovuh. 21:3, 4) Njedhelo nehu elobo ennivaha ttima, kintanala akala njedhelo nehu tta odhowa wirimu obe okala velaboni ya vati.

2. Njedhelo nehu niniwanana na nni, nanda ninlogela nni dhahene?

² Mbibiliani mazu aba “njedhelo” entapulela “ojedhela dhilobo dhapama dhinapadduwe.” Iyo kaninaganyedha wi esile dhinjedhela iyo wakela musogorho dhinele wakwanihihedheya, sabwani dhinda wa Yehova. (Rom. 15:13) Iyo ninoziwa dhipikirheli Yehova onivaha nanda nihikana ebaribari ya wi iyene onowakwanihedha dhopikirhela dhaye. (Oleb. 23:19) Iyo kaninaganyedha wi Yehova ohikana efunelo vina ewodhelo ya osasanyedha dhotene dhinfuniye wi akose. Njedhelo nehu kahiye elobo yoroha, nihikana matibelo.

3. Ninasunze nni mwari mwa nsunzo ntti? (Masalmo 27:14)

³ Babihu wa wirimu onokwela vina onfuna wi nimukuluvele (Kengesa Masalmo 27:14.) Akala ninomukuluvela Yehova vina nroromelo nehu ttoliba, ninele owodha okwaranya makattamiho anagumanena iyo musogorho n’oliba murima vina ohagalala. Ninele wona mukalelo onnibarela njedhelo, voroma ninfuna niziwe sabwaya enladdanihiwa njedhelo na nángura vina txapewa. Ninawodhe dhavi olibiha njedhelo nehu.

4. Nroromelo ninladdanihedhiwa eni na nángura? (Ahebreu 6:19)

⁴ Murumiwi Paulo alebelaga akadda Hebreu ohiladdaniha njedhelo na nángura. (Kengesa Ahebreu 6:19.) Iyene  dila dhinjene wankosa oleddo aviraga mwiko, noona wanwodha ozinddiyela ttima ya nángura namulikiha paporo akodda wedda bure-bure. Nsaka dhahi iyene wahifwanyiwa otagala akosaga oleddo na paporo, iyene wannawona anamatxerhenga anponyedhaga nángura mwiko wi abarele paporo anatweye na malugu. (Mer. 27:29, 39-41) Dhahene ninga nángura ninimwimetxa [estabiliza] paporo, nroromelo nehu ninonimetxa pwi nikooddaga omuttiya Yehova vina ninonibarela nittiyaga wedda zerhu-zerhu ninga kanina mwimeleli akala ninogumanana dhilobo dhorutxa. Nroromelo nehu ninonikamihedha owodha opemberha makattamiho a mwigumini sabwani nikana nikuluvelo wi dhilobo dhinele osadduwa, enofuneya. Wubuwela wi Yezu wahittaga ologa wi nigahifwara-fwariwa. (Jo. 15:20) Otanalela mareliho anakele iyo musogorho enonikamihedha odhowavi banigeedda mudila yoligana nimulabelaga Yehova nororomeleya.

5. Njedhelo nimukamihedhile dhavi Yezu awodha oliba murima na esile dhafuna ogumanana iyene mudhidhi ogapiwiye?

⁵ Njedhelo niwodhile dhavi omukamihedha Yezu okwaranya makattamiho afuna iyene ogumanana masiki aziwaga wi okwa waye ogali wokubanyiha. Labo na Pentekoste 33 Kristu babaaliwe, murumiwi Pedro wahiloga nivuhulo na Masalmo, ninloga na mukalelo wofwanyelela wi Yezu agahikala wokurumuwa-ene vina wodhaleliwa nikuluvelo: “Txibarene nyuwo kamunaddileve mukwani, kamuthiye mwimeleli wenyu ovudda mwikuthani. . . . Mukalaga na miyo, ddinothaba venjene.” (Mer. 2:25-28; Masal. 16:8-11) Masiki aziwaga wi agahikwa, Yezu wahikana njedhelo noliba wi mulugu agahinvenyiha mukwani vina agahinfanya wagalala wokala wili na Babe wirimu.—Aheb. 12:2, 3.

6. Mbali dhahi ologile nni mwaha wa njedhelo?

⁶ Njedhelo nehu ninowakamihedhaga abali enjene owodha ovilela. Koona yotagiha ya Leonard Chinn mbali woweddeyana okalilewo elabo ya Inglaterra. Koddo Yoroma Erabiwe Elabo Yotene, iyene wahifugeliwa sabwa ya okodda ovitaganyiha na anyakoddo. Iye wahimala myeri minli battiwe vaye-vene mukambura, mmaleliye wahikokeliwa okosa mabasa a ovadda. Iye ohiloga: “Dhigumanilena miyo dhihoniha wi enofuneya iyo okana njedhelo wi niwodhe ovilela. Iyo nihikana dhotagiha dha Yezu, arumiwi na anamavuhulela vina nihikana malibelo menjene attima anfwanyeya mBibiliani. Dhotedhene esi, dhinonivaha njedhelo na musogorho na guru ya owodha ovilelana.” Njedhelo nahimukalela ninga nángura mbali Leonard, wa iyo vina jowodheya onikalela ninga nángura.

7. Makattamiho anwodha dhavi owaraliha nroromelo nehu? (Roma 5:3-5; Tiago 1:12)

⁷ Akala ninogumanana makattamiho nanda banoona mukalelo onnikamihedha Yehova ejo enonivaha nikuluvelo wi Yehova ononirumeela. (Kengesa Roma 5:3-5; Tiago 1:12.) Dhahene nroromelo nehu ninoliba vaddiddi okwaranya mudhidhi oromile iyo osunza ebaribari. Satana onfuna wi makattamiho ehu anobanihe, mbwenye na nikamihedho na Yehova ninele owodha opemberha.

8. Njedhelo ninladdanihedhiwa nni na txapewa? (1 Tesalónika 5:8)

⁸ Bibilia onoladdaniha njedhelo nehu na txapewa. (Kengesa 1 Tesalónika 5:8.) Txapewa wa nibarelo onovuna musoro wa. munyakoddo na mattere agamulatile. Mpaddi womuyani enofuneya obarela dhubuwelo dhehu dhinbeddegela Satana. Iyene ononikwekwettela dhilobo dhigadhile oputtula  mubuwelo wehu. Moligana na txapewa onvuna musorho wa munyakoddo, njedhelo nehu ninovuna mubuwelo wehu wi nikale attu ororomeleya vamentoni va Yehova.

9. Elobo gani na attu ahina njedhelo?

⁹ Njedhelo nehu n’okana egumi ya mukalakala ninonikamihedha wubuwela na mirugu vina malago aderetu. Mwa mpaddi wina nroromelo nehu nigobana nirumela nipakelo na elabo, egumi ya mukalakala enele okala ninga elobo eli wolapa vaddiddi. Koona epadduwile na Akristu ena akala o sidadi ya Korinto. Awene ahirimeliwa nroromelo na nipikirelo noliba navahile Mulugu—njedhelo novenya mukwani. (1 Kor. 15:12) Murumiwi Paulo ohiloga wi abale ahinrumela njedhelo n’ovenya mukwani okalawo wawa kwa labo-labo. (1 Kor. 15:32) Masaka abano attu enjene ahinrumela dhogana dha Mulugu ankalawo ninga kuli elobo yina mangwana alibelaga dhilobo dhomaningoni mudhidhi wotene. Mbwenye iyo, nihittiyana sabwani ninokuluvela malibelo a Mulugu anakwanihedheye musogorho. Njedhelo nehu nili ninga txapewa ombarela mubuwelo wehu, ninonikamihedha ohizuzumela dhehuvi sabwani okosa ejo egahidha ononga mandano ehu na Yehova.—1 Kor. 15:33, 34.

10. Njedhelo ninnibarela dhavi na dhubuwelo dhohikala?

¹⁰ Njedhelo nehu ninonikamihedha opemberha mubuwelo obu wawi, kili yofuneya omwagalaliha Yehova. Motagiha, ena anofiyedha wubuwela wi ‘miyo kaddili elobwene kaddinawodhe okala na abale anakalewo na mukalakala. Kaddinawodhe ovirihamo malago a Mulugu mowakwana-mwene.’ Mbwenye kamubuwele Elifaz marho wosaringele wa Job wana mubuwelo wakakene. Elifaz ohiloga: “Kawo muthu ohinvirigana, kawo onkodda ofwanyiwana muladdu. Mulugu kanaroromela kakamwe anju aye.” (Job 15:14, 15) Oku ottambi! Dhubuwelo ninga esene dhindha wa—Satana. Iyene onoziwa wi akala muttu onofiyedha wubuwela dhahene njedhelo naye ninele wobana, egali dhahene enofuneya okodda ottambi oku nizuzumele mapikirhelo a Yehova. Kuwaganyedhe wi iyene onfuna wi okalewo na mukalakala iyene onele wukamihedha mpaka weyo owodha ofwanya mperhe obu.—1 Tim. 2:3, 4. 

11. Enfuneyela nni ovilela oku nimujedhaga Yehova wi akwanihedhe dhogana dhaye?

¹¹ Kahiye elobo yovevuwa ottiddelavi njedhelo nehu. Ninofwanyela omujeedhela Mulugu na ovilela. Mbwenye enofuneya wubuwela wi Yehova Mulugu wa mukalakala, mukalelo onona iyene mudhidhi ohittiyana na mukalelo onona iyo. (2 Ped. 3:8, 9) Iyene onele wakwanihedha dhogana dhaye na mukalelo wofwanyelela, txino kinakale ninga mpule munfunelihu. Elobo gani enanikamihedhe ovilela oku nijedhaga mudhidhi onakwanihedhe Mulugu dhogana dhaye?—Tia. 5:7, 8.

12. Mowiwanana na Ahebreu 11:1, 6, njedhelo ninladdana dhavi na nroromelo?

¹² Ninele owodha okanavi njedhelo noliba nigakala wofiyedheya na Mulugu onvaha nikuluvelo wi njedhelo nehu ninele wakwanihedheya. Pumwenemo, Bibilia onoladdaniha njedhelo na nroromelo wi Yehova “Mulugu okalawo, vina onoathuva abale animutamela.” (Kengesa Ahebreu 11:1, 6.) Venevo vandhowa iyo nikuluvelaga wi Yehova Mulugu webaribari, nroromelo nehu ninoliba niziwaga wi onele wakwanihedha dhotedhene dhipikireliye. Ndoweni none ttarho dhinanikamihedhe wunuwiha nroromelo nehu mwa Yehova nilibihaga njedhelo nehu.

13. Ninawodhe dhavi onfiyedha Mulugu?

 ¹³ Omulobelele Yehova vina omwengese Bibilia. Ebaribari wi iyo kaninwodha omona Yehova na mento ehu, mbwenye jowodheya onfiyedha. Ninowodha ologana mmalobeloni, na nikuluvelo nawi iyene ononivuruwana. (Jer. 29:11, 12) Jowodheya iyo onvuruwana Mulugu akala ninomwengesa Bibilia vina ninotanaalela dhinengesihu. Nigengesa Bibilia nona mukalelo wakoyile Yehova adhari aye a nsaka nawale njedhelo nehu ninoliba. “Dhetene dhilebiwe wale m’Bíbiliani, dhilebeliwé onisunziha, olibiha nroromelo nehu na guru, na ntidi, dhindhamo.”—Rom. 15:4.

14. Ekaleleni yamakamaka otanalela esile dhinakosela Yehova attu ena?

¹⁴ Katanalela mukalelo wakwanihedhe Mulugu dholibela dhaye. Kobuwela emukoseli Mulugu Abramu na Sara. Awene ahifiyedha okala anakalaba ahinatti okana mwana. Masiki dhawene, Mulugu wahapikirhela wi awene agahikana mwana. (Wita 18:10) Abramu okosile nni? Bibilia onloga wi: ‘Iyene wahiroromela wi agahikala nikolo na malogo menjene.’ (Rom. 4:18) Moonelo wa muttu ejile yali elobo yoneya ninga kigawodheyile wakwanihedheya, mbwenye Abramu wahikana nikuluvelo wi Yehova agahakwanihedha dholibela Dhaye. Njedhelo na mulobwana oddule wororomeleya kanali nebewene. (Rom. 4:19-21) Mapadduwo ninga aba anonikamihedha omuroromela Yehova wi onowakwanihedha dhogana dhaye, masiki nonaga ninga elobo yorutxa wakwanihedheya.

15. Ninfwanyelela nni wubuwela esile dhimalile onikosela Yehova?

¹⁵ Katanalela dhinukosela Yehova. Katanalela malibelo ali mBibiliani akwanihedheyile mwigumini mwawo. Motagiha, Yezu wahiloga wi Babe wa wirimu agahuvaha dhinujombela wi okalegewo. (Mt. 6:32, 33) Yezu  ohuttiyedha nikuluvelo na wi Yehova onele wuvaha muya waye wokoddela ogamukumbirha. (Lk. 11:13) Yehova onowakwanihedha malibelo aba. Txino, weyo onowubuwela malibelo mena akwanihedhile Yehova mwigumini mwawo. Motagiha, iyene ohilibela wulevelela, wupangarhaza vina wuvaha oja mpaddi womuyani. (Mt. 6:14; 24:45; 2 Kor. 1:3) Otanalela esile dhukoseli Yehova enele olibiha nroromelo nawo wi Yehova onele wukosela dhilobo dhina musogorho.

16. Njedhelo nikaleleni nvaho wattima?

¹⁶ Njedhelo nehu na wakela egumi yamukalakala nvaho wa ttima wa Mulugu. Ninojeedhela na nikuluvelo notene mapikirhelo a musogorho—nihaganyedhaga wila Yehova onele wakwanihedha. Njedhelo nehu ninlaba ninga nángura, nttiwene ninimetxa wi niwodhe okwaranyana dhorutxa ninga ofwara-fwariwa, nihovaga okwa. Ninolaba vina ninga txapewa, nibarelaga dhubuwelo dhehu wi niwodhe orabela dhilobo dhonyakuwa vina nittiddeele dhilobo dhottittimiheya. Nroromelo nehu nindela mBibiliani ninonikamihedha onfiyedha Mulugu vina ninowoniha wi iyene ohikana okwela onddimuwa wa iyo. Ninele okana mareliho menjene mwigumini akala njedhelo nehu ttoliba.

17. Ninfwanyelela nni wagalala na njedhelo nehu?

¹⁷ Murumiwi Paulo ohiloga dhahi mukartani yalebeliye akadda Roma “hagalalaní muroromelani.” (Rom. 12:12) Murumiwi Paulo wahikana mwaha wohagalala sabwa ya wi iyene kaganyedha wi kokalavi wororomeleya agahikana mperhe wa egumi ya mukalakala wirimu. Wa iyo vina jowodheya wagalala na njedhelo ninehu sabwani kaninaganyedha wi Yehova onele wakwanihedha dholibela dhaye. Ninga mulogele munasalmo: ‘onagalala ddule onimukuluvela Yehova, Mulugu onroromeleya mudhidhi wotene.’—Masal. 146:5, 6.