NSUNZO 39
Nzina Nawo Nihilebiwa ‘Munivuruni na Egumi’?
‘Vamentoni vaye nilebiwa nivuru nowawubuwela abale animova Yehova.’—MAL. 3:16.
JIBO 61 Anamoona, Muttangarhame!
DHINASUNZE IYO *
Oromana wale, Yehova onowenjedhedhavi mazina ‘munivuruni na egumi’(Kang’ana ddima 1-2)
1. Mowiwanana na Malakiya 3:16, nivuru gani ninleba Yehova vina txini enfwanyeyamo?
MWA vyaka matxikwi na matxikwi, Yehova onodhavi alebaga nivuru namakamaka. Munivuruni ntti munofwanyeya mazina menjene, nzina noroma tta Abel, munamoona wororomeleya woroma. * (Lk. 11:50, 51) Mwari mwa vyaka dhinjene, Yehova onowenjedhedhavi mazina munivuruni ntti, ovano munofwanyeya matxikwi na matxikwi a mazina. Mbibiliani, nivuru ntti ninkuweliwa ‘nivuru na wubuweliwa,’ ‘nivuru na egumi,’ vina ‘rolu ya egumi.’ Mwari mwa nsunzo ntti, nivuru ntti ninakuweliwe ‘nivuru na egumi.’—Kengesa Malakiya 3:16; Ovuh. 3:5; 17:8.
2. Mazina gani analebiwe munivuruni na egumi vina txini enfwanyelihu okosa wi nzina nehu nilebiwe munivuruni ntti?
2 Muniivuruni ntti na makamaka munofwanyeya mazina a alabeli etene a Yehova animova obe animusiba vina anriha nzina naye. Awene ahikana gari ya wakela egumi yamukalakala. Nsaka novanene enowodheya olebeliwa mazina ehu munivuruni ntti na egumi, nigawunuwiha mandano ehu na Yehova modhela yobolo ya Mwanaye Yezu Kristu. (Jo. 3:16, 36) Iyo notene ninofuna wi nzina nehu nilebiwe munivuruni ntti—kintanala akala njedhelo nehu t’okala velaboni ya vati obe wirimu!
3-4. (a) Sabwa ya nzina nehu olebiwa munivuruni na egumi, entapulela wi ninele okalawo namukalakala? Katapulela. (b) Mavuzo gani anakulihu mwari mwa nsunzo ntti vina nsunzo nindawo?
3 Eji entapulela wi abale alebeliwe mazina awa munivuruni ntti na egumi anele okana egumi yamukalakala? Ninele ofwanya yowakulaya na mazu alogile Yehova na Mizé, anfwanyeya va Obudduwa 32:33. Yehova ohiloga: “Ddinanfudhemo oddule oddithegele bahi.” Nona, mazina alebiwemo anodhaga ofudhiwamo obe ottimihiwamo enkala ninga, Yehova oromile oleba na lapi. (Ovuh. 3:5) Nona ninofwanyela okana nikuluvelo nawi merelo ehu agakala a deretu nzina nehu ninele okalavi munivuruni ntti ninga nilebiwe na tinta.
4 Veneva vanowiteya mavuzo aba. Motagiha, Bibilia onloga eni mwaha wa abale alebiwe mazina awa munivuruni na egumi na abale ahilebiwemo? Abale alebeliwe mazina awa munivuruni ntti na egumi anele wakela egumi yamukalakala? Ki abale akwile ahikanile gari y’omuziwa Yehova? Mazina awa anele olebiwa munivuruni na egumi? Mavuzo aba anele wakuliwa mwari mwa nsunzo ntti na ntto nindawo.
BANI ALEBIWE MAZINA AWA MUNIVURUNI?
5-6. (a) Mowiwanana na Filipi 4:3, bani alebiwe mazina awa munivuruni na egumi? (b) Mudhidhi gani onkala mazina awa munivuruni na egumi se ofudhiwa?
5 Bani alebiwe mazina awa munivuruni na egumi? Wi nakule nivuzo ntti, ninele osekeserha makuru matanu a attu ottiyana. Mwa makuru aba, ena mazina awa ahilebiwa munivuruni na egumi, ena kalebiwemo.
6 Nikuru noroma tta abale asakuliwe wi alamulele na Yezu wirimu. Mazina awa anofwanyeya munivuruni na egumi? Ndde. Mowiwanana na mazu a murumiwi Paulo alebeliye ‘akwaye’ alabiliyena o Filipi, mazina a attikitteliwi awobeliwe olamulela na Yezu, ovano anofwanyeya munivuruni na egumi. (Kengesa Filipi 4:3.) Eji entapulela wi mazina awa anele okalavi munivuruni, agakalavi ororomeleya. Agamala opidiwa ezinddiyelo yomariha, mazina awa kanafudhiwe vina munivuruni na egumi, eji enpadduwa awene ahinatti okwa obe goi enddimuwa ehinatti oroma.—Ovuh. 7:3.
7. Ninnonelamo nni na Ovuhulela 7:16, 17 sabwa ya muttitti munddimuwa wa mabila mena mazina awa okalavi munivuruni na egumi se ofudhiwa?
7 Nikuru nanawili tta muttitti munddimuwa wa mabila mena. Mazina awa anofwanyeya munivuruni na egumi? Ndde. Mazina awa anele okalavi munivuruni na egumi agaviluwa koddo ya Armagedon? Ndde. (Ovuh. 7:14) Yezu ohiloga wi abale ali ninga mabila anele wakela “egumi yohimala.” (Mt. 25:46) Mbwenye abale anaviluwe koddo ya Armagedon kanakele momaguva egumi yohimala. Mazina awa anele okalavi munivuruni na egumi na lapi, dhahene ninga mulebiwani. Mwari mwa Olamulela wa Vyaka Txikwi, Yezu “onere okala mukumbuzi wawa, onowavelela muli fukuwa dhinbudduwa manje ankaliha egumi.” Abale anamwiwelele Kristu omamalelowa attongiwa na Yehova oneya wi bororomeleya mazina awa kanafudhiwe anele okalavi munivuruni na egumi.—Kengesa Ovuhulela 7:16, 17.
8. Bani mazina awa ahilebiwe munivuruni na egumi nanda txini enapadduwele?
8 Ankosa mpaddi wa nikuru nanewuraru mbuzi, abale attongeliwe otolotxiwa va Armagedon. Mazina awa kanfwanyeya munivuruni na egumi. Yezu ohiloga wi awene “anele ottongeliwa otolotxiwa namukalakala.” (Mt. 25:46) Mulugu ohinvuhulela Paulo, oleba wi “okoniwa wawa onakale otolotxiwa ohimmala.” (2 Tes. 1:9; 2 Ped. 2:9) Yakane enowaddaniwana abale addawele muya wokoddela na ofuna wawa. Awene vina anele otolotxiwa namukalakala. Kanakele egumi yohimala, eji enowoniha kakamwe wi kanavenyihiwe mukwani. (Mt. 12:32; Mk. 3:28, 29; Aheb. 6:4-6) Ovano ndoweni nisekeserhe makuru meli a attu anavenyihiwe mukwani velaboni ya vati.
ABALE ANAVENYIHIWE MUKWANI
9. Ninga munlagiha Merelo 24:15, makuru gani meli a attu anavenyihiwe mukwani velaboni ya vati nanda ottiyana gani oliwo wa makuru aba omeli?
9 Bibilia onologa makuru meli a attu anavenyihiwe mukwani wi akale velaboni ya vati okala nokala-wene, ‘aligani’ na ‘ahiligani.’ (Kengesa Merelo 24:15.) ‘Aligani’ babale amulabeli Yehova nororomeleya. Mwa mpaddi mwina, ‘ahiligani’ babale ahimulabeli Yehova ofiyedha okwa wawa. Kuloga, dhilobo dhinjene dhakosani baliwo kadhali dholigana. Sabwa ya makuru aba omeli ovenyihiwa mukwani, kuloga wi mazina awa anofwanyeya munivuruni na egumi? Wi nakule nivuzo ntti, ndoweni nisekeserhe entapulela nikuru nimodha-nimodha.
10. ‘Aligani’ anavenyihedheliwe eni mukwani nanda gari gani enajevo ena? (Kang’ana vina mu revistani ntti “Mavuzo Ankosa Anamengesa” abale anavenyihiwe velaboni ya vati.)
10 Nikuru nanonai tta ‘aligani.’ Ahinatti okwa, mazina awa ahilebiwa munivuruni na egumi. Mukwelani mazina awa ahifudhiwa munivuruni na egumi? Nne, sabwani muyubuweloni mwa Mulugu awene ‘ahikalawovi.’ Yehova “Mulugu kayiye Mulugu wa athu okwa, ddwa athu okalawo vowi onakalihawo ddi iyene.” (Lk. 20:38) Eji entapulela wi aligani agavenyihiwa mukwani, mazina awa anele ofwanyeya munivuruni na egumi, vamaromo balebiwe “na lapi.” (Lk. 14:14) Kavali waganyedha wi, ena mwa awene anele ovenyihiwa wi akaane gari yokala “amwene mwilaboni.”—Masal. 45:17 [Masal. 45:16, Tradução do Novo Mundo].
11. Txini enasunze ‘ahiligani’ mazina awa ahinatti olebiwa munivuruni na egumi?
11 Ovano ndowe nisekeserhe nikuru na neutanu, ‘ahiligani.’ Txino awene kaziwa malamulo a Yehova, nona keddilena nsaka nikalilaniwo. Sabwa ya ejuwene mazina awa kalebiwe munivuruni na egumi. Awene agavenyihiwa mukwani, Mulugu onele wavaha gari yawi mazina awa alebiwe munivuruni na egumi. ‘Ahiligani’ aba anele oveda nikamihedho ninjene. Ahinatti okwa ena mwa awene ahikosa dhilobo dhinjene dhabure, nona enele ofuneya osunzihiwa okalawo mowiwanana na magano oligana a Yehova. Wi afwanye nikamihedho ntto, Omwene wa Mulugu onele wita porogarama ehinattigi opadduwa yowasunziha attu a elabo yotene.
12. (a) Bani anasunzihe ahiligani? (b) Txini enapadduwele abale ankodda ovirihamo esile dhisunzihiwani?
12 Bani onasunzihe ahiligani? Muttitti munddimuwa vina aligani anavenyihiwe mukwani. Wi mazina awa alebiwe munivuruni na egumi, enele ofuneya awene wunuwiha mandano na Yehova vina oviperheka wa iyene. Ovenyedha wirimu, Yezu Kristu vamodha na attikitteliwi, anele ofwaseyela wang’ana akala anovirihamo esile dhinsunzihiwani. (Ovuh. 20:4) Abale ahinarumele nikamihedho ntti—kanakalewo masiki akaane vyaka 100. (Iza. 65:20) Yehova na Yezu, anowona dhili mmurimani vina awene kanarumele wi muttu ddi muttu atatamule makattamiho mwilaboni eswa.—Iza. 11:9; 60:18; 65:25; Jo. 2:25.
ANAVENYIHEDHIWE OKALAWO VINA OTTONGIWA
13-14. (a) Wale iyo nanonelamo dhavi, mazu a Yezu anfwanyeya va Joau 5:29? (b) Txini enfwanyelihu oziwa mwaha wa mazu aba?
13 Yezu onologa vina sabwa ya abale anavenyihedhiwe okala velaboni ya vati. Motagiha, iyene ohiloga dhahi: ‘Kamutikine esidhá ninofiya nsaka ninewe aliba mmasiye nzu naye, ninavenyani mukwani. Abale erile dhapama anele ovenya mukwani wi akalewovi; abale erile dhabure, anere ovenyela ottongiwa.’ (Jo. 5:28, 29) Yezu wafuna aloge eni na mazu aba?
14 Wale iyo nanonelamo wi mazu a Yezu, atonya merelo a abale anavenyihiwe mukwani, kuloga dhinakosani agamala ovenyihiwa mukwani, ena agavenyihiwa mukwani anele okosa dhilobo dhapama oku enagu agavenyihiwa anele okosa dhilobo dhabure. Mbwenye apa Yezu kalogile wi abale anavenyihiwe mmasiye anakose dhapama obe anakose dhabure. Iyene wawaddana abale ‘erile dhapama’ vina abale ‘erile dhabure.’ Eji entonya dhilobo dhikosilani ahinatti okwa. Eji enononeleyamo? Enononeleyamo. Sabwani mwilaboni eswa, kavo onarumelihiwe okosa dhilobo dhabure. Eji enoniha wi ahiligani akosile dhilobo dhabure ahinatti okwa. Ovano ninanonelemo dhavi mazu a Yezu sabwa ya abale ‘anavenyihiwe wi akele egumi’ vina ‘anavenyihedhiwe ottongiwa’?
15. Bani ‘anavenyihiwe wi akele egumi,’ nanda sabwaya jani?
15 Aligani, abale akosile dhilobo dhapama ahinatti okwa, anele ‘ovenyihiwa wi akele egumi,’ sabwani mazina awa amala olebiwa munivuruni na egumi. Eji entapulela wi, ovenyihiwa wa attu abale ‘erile dhapama,’ onfwanyeya va Joau 5:29 kuvenyihiwa wakene wa ‘aligani’ onlogiwa va Merelo 24:15. Ononelamo oku oli mumodhani na mazu anfwanyeya va Roma 6:7, anloga dhahi: ‘Oddule okwile dhottega dhaye dhihimala oleveleliwa.’ Aligani agakwa Yehova onolevelela dhottega dhawa. Mbwenye iyene onowubuwelavi merelo awa ororomeleya, akosilani bali mento. (Aheb. 6:10) Txibarene aligani anavenyihiwe mukwani, anofwanyela okalavi ororomeleya wi mazina awa akalevi munivuruni na egumi.
16. Txini entapulela ‘ovenyihedhiwa ottongiwa’?
16 Txini enapadduwele abale akosile dhilobo dhabure ahinatti okwa? Vakwile awene dhottega dhawa dhihimala oleveleliwa. Masiki dhawene awene kamulabela Yehova. Sabwa ya ejuwene mazina awa kalebiwe munivuruni na egumi. Nona ovenyihiwa wa abale ‘akosile dhilobo dhabure’ ku ovenyihiwa wakene wa ‘ahiligani’ onlogiwa va Merelo 24:15. Awene anele ‘ovenyihiwa wi attongiwe.’ * Eji entapulela wi Yezu onele opepesa dhili mmurimani mwawa. (Lk. 22:30) Ottongiwa oku onele ottukula mudhidhi, wi yoneye txibarene akala anofwanyelela mazina awa olebiwa munivuruni na egumi. Ahiligani ananyanyale mweddelo wawa wotakala baviperheka wa Yehova mazina awa anele olebiwa munivuruni na egumi.
17-18. Txini enfwanyela okosa abale otene anavenyihiwe wi akele “egumi” velaboni ya vati vina txini entapulela mabasa eddilanina anlogiwa va Ovuhulela 20:12, 13?
17 Kintanala akala wale awene ali aligani obe ahiligani, abale anavenyihiwe mukwani, anofwanyela wiwelela malamulo anafwanyeye muroluni enafuguliwe mwari mwa vyaka 1.000. Murumiwi Joau ohiloga yoniliye muwonihiwani: ‘Ddihawona amarafula, anddimuwa na ayima, emelile vasogorho va mpaddo. Venevo ahifuguliwa marolu. Rolu yina ehifuguliwa, yali rolu ya egumi. Amarafulaya ahittongiwa apimiwagana mabasa erilani, bari dhilebiwe murolunimwa.’—Ovuh. 20:12, 13.
18 Abale anavenyihiwe “mukwani” anattongiwe dhavi mowiwanana na esile dheddilanina? Anattongiwe mowiwanana na esile dheddilanina ahinatti okwa? Nne! Kobuwela wi mumalilani okwa dhottega dhawa dhihileveleliwa. Egalogiwa dheddilanina, kintonya merelo eddilanina ahinatti “okwa.” Ottiya ejo antonya merelo aneddena awene mowiwanana na maswagiho anakelani mwilaboni eswa. Masiki dhawene alobwana ororomeleya ninga Nowé, Samuwel, Davidi vina Daniyel anele osunzihiwa sabwa ya Yezu Kristu vina ororomela mukutto wa yobolo. Akala alobwana aba ororomeleya enele ofuneya wi asunze, ahiligani anofwanyela osunza venjene!
19. Txini enapadduwele abale anayanyale gari eji yamakamaka?
19 Txini enapadduwele abale ananyanyale gari eji yamakamaka? Ovuhulela 20:15 onnaddela dhahi: ‘Etene ahalebiwe mazina awa munivuruni na attu eddilena egumi ya Mulugu, avokeliwa velalani ya motto.’ Ndde awene anele otolotxiwa kakamwe. Nona jamakamaka ovilibihedha wi nzina nehu nilebiwe munivuruni na egumi vina nikalevi mwenemo!
Mbali akosaga mpaddi wa porogarama enddimuwa ya osunziha enapadduwe mwari mwa Vyaka Txiki (Kang’ana ddima 20)
20. Mabasa gani anakosiwe mwari mwa Olamulela wa Vyaka Txikwi? (Kang’ana foto ya kapa.)
20 Mwari mwa Olamulela wa Vyaka Txikwi, onakale mudhidhi wowagalaliha! Mudhidhene obo nlogo na Mulugu ninele weddiha porogarama, ya masunziho anakosiwe mwilaboni mwetemwene. Onakale vina mudhidhi onapepesiwe mweddelo wa makuru aba omeli, aligani na ahiligani. (Iza. 26:9; Mer. 17:31) Porogarama eji ya masunziho eneddihiwe dhavi? Nsunzo nindawo ninele onikamihedha ononelamo vina ovaha ttima masasanyedho aba amakamaka.
JIBO 147 Egumi Yamukalakala
^ Mwari mwa nsunzo ntti ninele osekeserha wogoleliwa wa ononelamo wehu wa mazu alogile Yezu anfwanyeya va Joau 5:28, 29 anloga mwaha wa ‘anavenyihedhiwe okalawo’ vina ‘anavenyihedhiwe wi attongiwe.’ Ninele osunza entapulela ovenyihiwa oku vina anavenyihedhiwe okalawo na abale anavenyihedhiwe ottongiwa.
^ Nivuru ntti niromile olebiwa “ovenyana omaromo wa elabo,” kuloga, mulebiwe mazina a attu ana gari yoleveleliwa dhottega dhawa modhela yobolo ya Yezu Kristu. (Mt. 25:34; Ovuh. 17:8) Enoneya ninga muttu woroma olebiwe munivuruni ntti ddi muligani Abel.
^ Wale nzu ntti ‘ottongiwa’ nilabihedhiwe veneva natapulelamo ninga ottongiwa wohifwanyelela obe okoniwa. Mwebaribari nzu ntti ‘ottongiwa’ txino ninotapulela ejuwene. Nsunzo ntti iyo nihona wi Yezu ohilabihedha nzu ntti ‘ottongiwa’ awaddagana attu otene, kuloga iyene onele owodha opepesa ejile eli mmurimani mwa muttu-muttu obe ninga munlogela dicionariu ya Agregu ofwaseyela opepesa “mweddelo wa muttu.”
