Va 1 Korinto 15:8, Paulo ologile dhahi: “Omagomelowá oddoneyela miyo vina, ddili ninga mwana obaliwe sikuná nihinathi.” Wale, iyo nihitapulela wi wafuna aloge ejile empadduwele mudhidhi omoniliye Yezu munttittimihoni wirimu. Eji yakala ninga wakuluveliwena nttittimiho nobaliwa obe ovenyihiwa mukwani wi akale wirimu ogapadduwile vyaka dha musogorho. Mbwenye, vasunziwe venjene versu eji ehifuneya okosiwa matxinjo mowiwanana na ejile yanonelamo iyo wale.

Ebaribari wi versu eji Paulo onlogana ejile empadduwele mudhidhi okaliliye Mukristu. Txini yafuniye ologa na mazu aba ‘obaliwe sikuná nihinatti’? Mazu aba antonya dhotapulela dhottiyana-ttiyana.

Empadduwele wi akale Mukristu yali yotikiniha vina yohijedheleya. Dila dhina mwana ombaliwa sikuna nihinafiya enkalaga elobo yohijedheleya. Dhahene ninga Saulo (odhile oziwiwa vasogorhova ninga Paulo) mudhidhi wadhowiye o Damasku wi afwarafware Akristu a wenewale, iyene kajedhela wi agahimona Yezu wavenyihiwe mukwani muwonihiwani. Emuttukuleli Paulo okala Mukristu kimutikinihile iyenevi, ehatikiniha vina Akristu a sidadi ejile wadhowiye wafwarafwara. Ottiya ejo, ehipadduwa vina elobo yotikiniha mwa mudhidhi mung’onovi wahitweya mento, kawodha wona.—Mer. 9:1-9, 17-19.

Iyene okalile Mukristu “mudhidhi wohijedheleya.” Mazu aba “ddili ninga mwana obaliwe sikuná nihinathi,” na elogelo ya Egrego antapulela “muttu obaliwe mudhidhi wohifwanyelela.” Bibilia wo Jeruzalemi versu eji ologile dhahi: “Eli ninga ddabaliwe mudhidhi wohijedheleya.” Mudhidhi okalile Paulo Mukristu, Yezu wahimala wiyelela wirimu. Mottiyana na abale alogile Paulo versu dhoroma, iyene odhile omona Yezu bali wirimu ottiya mudhidhi ovenyihiwiye bakala velaboni ya vati. (1 Kor. 15:4-8) Mohijedheleya, Yezu ohimuttanyuwela Paulo anvahaga gari ya omona mmaleliye ovenyihiwa mukwani masiki valani “mudhidhi wohifwanyelela.”

Iyene waloga nekalelo yoviyeviha. Ninga munlogela anamasunza ena, mazu alabihedhe Paulo versu eji enkala ninga iyene waloga na mukalelo woviyeviha. Akala jijuwene yana Paulo muyubuweloni, iyene wannonelamo wi kafwanyelela ettomo ejile yavahiwiye. Pumwenemo, iyene wafuna aloge dhahi: “Miyo mwa arumiwi ddilí mimayámo; kinddinfwanyela withaniwa murumiwi, vowi ddahidda Mutugumano wa Mulugu. Apa na mahala a Mulugu, elimi jijene ekalilemi.”—1 Kor. 15:9, 10.

Enoneya ninga, Paulo waddana mukalelo wohijedheleya vina wotikiniha omuttanyuweli Yezu mudhidhi obuwene okaliliye Mukristu obe afuna aloge wi kafwanyelela dhowoniha dhotikiniha dhomuyani dhoniliye. Kintanala emuttukuleli ologa mazu aba, Paulo wandhowavi avahaga ttima esile dhoniliye. Oroma apalene mpaka musogorho Paulo kaganyedha wi Yezu wahivenyihiwa mukwani. Mudhidhi walaleya Paulo attu ena sabwa ya ovenya mukwani, dila dhinjene wanloga nipadduwo ntti notikiniha vina nohijedheleya nimuttukuleli okala Mukristu.—Mer. 22:6-11; 26:13-18.