1. Abramu olagihile dhavi wila wanroromela ottonga woligana wa Yehova? (Koona foto eli omaromo.)

“NAMATHONGA wa elabo yotene onosorhiha na mukalelo wovirigana?” (Wita 18:25) Kahiyo wila Abramu wela waganyedha vakosiliye nivuzo ntti. Wakosile nivuzo ntti aziwaga wila Yehova agahittonga n’oligana kwatti ya Sodoma na Gomorra. Iyene wanrumeela wi Yehova kagapile “aligani vamodha na athegi.” Abramu ‘wanziwa’ ejuwene. Yehova musogorhomwa wahiviloga mwinyene eraga: “Iyene ddi mwango wehu, mabasa aye bawakwana, dhothonga dhaye somyala. Iyene ddi Mulugu wawiwananeyana, kampela malago, ddoligana, ddwa murima mmodha.”—Olibiha 31:19; 32:4.

2. Koddi Yehova onowira dhilobo wovirigana?

² Abramu wana dhavi ebaribari yawi Yehova wanttonga n’oligana? Iyene wahikaana ebaribari sabwa yawi Yehova yotagiha ya muttu woligana vina wapama. Mmaleboni a Ebraiko, mazu aba ‘opama’ na ‘oligana’  anaddiwana elobo modhene. Vowi malamulo a Yehova boligana, iyene onele ottonga n’oligana. Bibilia onloga: “Nabuya onoziveliwa na weddeyana, na omyala murima.”—Masalmo 33:5.

3. Kaloga mpujelo ompujiwa mwilaboni masaka abano?

³ Oziwa wila Yehova ddoligana enonipangarhaza. Masiki dhawene, elabo edhaala obure. Motagiha attu enjene ahifugeliwa mukambura s’ohikana muladdu. Mmalelani opepesiwa mowakwana makaniya enjiya kafwanyiwena muladdu. Merelo abo opuja anowasilidha attu enjene. Mbwenye ohikala makattamiho meena ohiligana vina opuja aliwo, anrutxa ovilelawa. Aboya bavi?

4. Nroromelo na Mukristu ninehiwa dhavi?

⁴ Akristu enjene anojeedha ogumanana makattamiho mmimburoni mottiyana. Mbwenye nroromelo nawa ninowehiwa agagumanana makattamiho orutxa okwaranyawa mmulogoni. Egopadduwela dhawene onakose dhavi? Onele ottiya esodha owobaniha?

5. Ninkoddela eni otikina nigagumanana merelo ohiligana mmulogoni?

⁵ Iyo notene n’attu ohiligana vina ninovonya, noona mudhidhi mwina, mbali ononikosela obe ninomukosela elobo yabure. (1 Joau 1:8) Opadduwa wa dhilobo esi, kahiyo rurumutxa wa Akristu ororomela, obe kinawobaniha. Yehova ononivaha malago apama ali mBibiliani, anwodha onikamihedha olibiha nroromelo nehu niganyimuliwa.—Masalmo 55:12-14.

6, 7. Dhilobo gani dhabure dhagumanilela mbali Diehl, nanda txini emukamihedhile?

⁶ Kobuwela yampadduweli Willi Diehl. Oromana yaka ya 1931, Mbali Diehl walaba o Betel o Bern, Suíça. Yaka ya 1946 wahiwobiwa wila okale nikuru na notanu na ttaru na Eskola ya Gilead o Nova Iorque, U.S.A. Mmalelani wahittomiwa wila eeddelele milogo dha murudda w’o Suíça. Mmapadduwoni a mwigumini mwaye Mbali Diehl ologa wila mweri wa Mayu wa 1949, wahilebela o katti y’o Suíça wila wafuna atele. Abali ahimwaddela wila agahittihiwa mabasa attomeliwiye. Yafuniye orumelihiwa ogaali opionero bahi. Mbali  Diehl ologa: “Ddahittihiwa okosa diskursu.” “Abali enjene kanilejela, anona ninga attu ottamagihiwa mmulogoni.”

⁷ Mbali Diehl wakosile eni? Iyene ologa: “Naziwa wila otela kahiyo elobo enkoddihiwa Mbibiliani, noona nanlibavi na malobelo vina omukuluvela Yehova.” Masiki abali enjene vakooddani ononelamo makani a matelo, musogorhomwa awene ahidha ononelamo, nanda Mbali Diehl wahiyihedhiwa mabasa attomeliwiye. Yehova wahareliha sabwa ya weddeyana wawa. * (Koona yowenjedha.) Ndoweni nivivuze nanya: ‘Ddigagumanana dhilobo dhonyimula  ninga esuwene, ddinele ovilela ddijeedhaga wila Yehova akule moligana makaniya? Obe ddigavikuluveli ddamwinya wila ddiwanena makattamihoya?’—Gano 11:2; kengesa Mikeya 7:7.

8. Txini egamukosihile muttu wubuwela wila iyene obe mukwaye ohipujiwa?

⁸ Nigagumanana makattamiho ninga abuwene mmulogoni, nirome otanalela akala ejoya ebaribari. Sabwaya? Nili attu ohiligana obe kannonelimo deretu. Kaninziwa deretu etotile makaniya. Peno ninonelamo deretu makaniya, obe nne, enofuneya omuloba Yehova, omukuluvela vina okalavi oweddeyana na iyene. Ejo enele onikamihedha okala oliba nirabelaga ‘omusadduwela Yehova.’—Kengesa Gano 19:3.

9. Mutoma obu na ondawo onanisunzihe dhotagiha gani?

⁹ Ndoweni naloge alobwana araru a masaka a Bibilia apujiwe. Mutoma obu ninele omusunza mudhuli wa Abramu, José na dhilobo dhamukoseli abal’aye. Mutoma ondawo ninele ologa mweddelo omweddihile Yehova Mwene Akab, vina makattamiho agumanilena murumiwi Pedro valiye o Antikiya w’o Síria. Mudhidhi wosunza dhotagiha esi katamela marhe olibihana omarho wawo na Yehova, makamaka ogoona wila muladduya bomagedhiwa.

10, 11. (a) Mpujelo gani wapujiwe José? (b) Gari gani yana José valiye mukambura?

¹⁰ José wali mwimeleli wororomeleya wa Yehova, wakoseliwe dhilobo dhabure n’attu ahaziwiye. Mbwenye yampetxa mmurimani mwaye, dhali esile dhamukosele abali aye. José vaniye vyaka 17, abali aye ahimuguliha ninga mudhari. Mmaleliye ohittukuleliwa w’Ejipitu. (Wita 37:23-28; 42:21) Musogorhomwa José wahizivaleliwa wila wahinvenyedha mwadhi mwinya, nomala wahifugeliwa mukambura muladduya ohinatti ottongiwa. (Wita 39:17-20) Dhivira vyaka 13 José atabuwaga ninga mudhari vina munyaperhezo. Akala abalihu anonipuja, yotagiha ya José ennikamihedha dhavi ovilela?

¹¹ José balivi mu kambura, munddimuwa wa emeleli a vameza va mwene wahifugeliwa. Omattiyu dhahi munddimuwayá wahiroha elobo, nanda Yehova wahimukamihedha José otapulela yorohaya. José wahimwaddela wila iyene agahifuruliwa mukambura wila eyelele omulaba fumu waye Faraó. Apo José  wahilabihedha gari ejo wila ampange makattamiho aye mulobwana oddule. Ninele osunza deretu dhilobo dhalogile José vina dhahalogiliye.—Wita 40:5-13.

12, 13. (a) Ninziwa dhavi wila José kakalela orumelavi opujiwa? (b) Txini yakooddile José omwaddela munddimuwa wa vameza va mwene?

¹² Kengesa Wita 40:14, 15. Kobuwela wila José wahiloga wi ‘wilottukuliwa.’ Mazu anlabihedha Bibilia epaddi eji, vina podi otapulela muttu ‘w’owiyiwa.’ Esile dhakoseliwiye dhali ebewene. José wanziwa wila kaana muladdu vina wafugeliwe ebewene. Noona wahimukumbirha munddimuwa wa vameza va mwene wila anfiyedhena makani aye mwene Faraó. Koddi yofuna yaye yali evi? Iyene wakumbirha wila ngafuna ‘akutxiwemo mukamburamwa.’

¹³ Koddi José wela orumeela bahi dhotene esi dhampadduwela, nne kakosa elo-wene? Kahiyo mwenemo! José wanziwa wila dhetene dhampadduwela ebewene. Noona iyene wahimuloba munddimuwa wa emeleli a vameza va mwene wila amukamihedhe. Malebo kanloga wila José wahimwaddela muttu obe Faraó wila abali aye bamugulihile.  Apo mfiyeli abali a José w’Ejipitu nanda ateyihana, Faraó wahiloga na abali a José wi “ddinousakulelani mu Ejipitu elabo yapamayámo, munajege nyuwo milima yozivayá ya mpuno.”—Wita 45:16-20.

14. Txini enanikamihedhe ovilela akala ninopujiwa na abali a mmulogoni?

¹⁴ Akala ninowubuwela wila okala mbali onipujile mmulogoni, nikale pasope wila ninadhe nivuwihe dhilobo dhohifanyeela. Ninoziwa wila mudhidhi mwina japama okumbirha nikamihedho na anddimuwa a mulogo obe wawaddela akala nimoona mbali ottegile. (Onamakutha 5:1) Mbwenye akala ekosile mbaliya kahiyo yottega enddimuwa, iyo podi oteyihana na iyene s’ohawaddela anddimuwa a mulogo. (Kengesa Mateu 5:23, 24; 18:15.) Japama ottiddihedha mabasa malago a Bibilia. Mudhidhi mwina ninowona wila kananonelamo deretu makaniya obe kanipujiwe. Nigakosa ejuwene ninele ohagalala oziwa wila kanivuwihile dhilobo dhabure dhigamunyimulile mbali wehu! Kanidduwale wila peno nihipujiwa obe nne, waloga na dhilobo dhohikala abali, kungomiha muladdu. Omukwela wehu Yehova vina abali, onele onibarela okosa yottega ninga eji. Munasalmo wahiloga wila okalawo “onira dhomyala.” Muttu ninga odduwene, “ddule ohinaba, ohinimwirela yabure muthu ddi muthu, ohimpuja-wene.”—Masalmo 15:2, 3; Tiago 3:5.

15. Mandano a José na Yehova amurelihile dhavi?

¹⁵ Yotagiha ya José enonisunziha elobo yina yamakamaka. Mwari mwa vyaka 13 bali mukambura vina mudharini, José wahikaana monelo wa Mulugu na makattamiho amugwela. (Wita 45:5-8) Iyene txipo kampwattelihile Yehova muladdu wa makattamiho aye. José kadduwali opujiwa-wapujiwiye, masiki dhawene iyene kanyimuwile. Iyeneya kattiyile wila ohiligana wa attu eena obe merelo awa abure obanihe vina ammwalanihe na Yehova. Ororomela wana José omukamihedha omoona Yehova akulaga mowakwana makattamiho aye, vina omureliha na murala waye.

16. Ekaleli eni yaderetu onfiyedha Yehova nigagumanana makattamiho mmulogoni?

¹⁶ Na mukalelo wakakene, enokala olibiha vina wang’anela mandano ehu na Yehova. Kanittiye merelo ohiligana attu, wobaniha omukwela vina omwebedha wehu Mulugu. (Roma 8: 38, 39) Nigagumanana makattamiho ninga abuwene mmulogoni, ndoweni nimutagihe José vina nilibihe mandano ehu na Yehova. Kavilibihedhe wila wonege makaniya ninga munonela Yehova. Nigakosa guru wila nigomihe makaniya nilabihedhaga magano a Bibilia, ninele ottiya makaniya mmadani mwa Yehova. Nikaane ebaribari yawi iyene onele ogomiha makattamiho ehu mudhidhi onfuniye.

17. Ninalagihe dhavi wila ninomukuluvela “namathonga wa elabo yotene”?

¹⁷ Nigalivi mwilaboni mpuno motakala, nikaane ebaribari yawi ninele ogumanana makattamiho menjene opujiwa. Dila dhina, weyo obe muttu onimuziwa weyo txino podi opujiwa mmulogoni. Kaninyimuwe. (Masalmo 119:165) Omuroromele Yehova, olobele okumbirhaga nikamihedho. Kobuwela wila sabwa yokala attu ohiligana, mudhidhi mwina kaninnonelamo mowakwana makaniya, obe kaninziwa ebaribariya. Kamutagihe José nanda orabele ologa dhilobo dhabure dhigattabwihile makaniya. Ottiya ovikuluvela wamwinya, omuroromele Yehova vina omujedhe n’okurumuwa wila agomihe makattamiho awo. Ogakosa dhawene onele wakela mareliho menjene a Yehova ninga mukoseli José. Okaane ebaribari yawi Yehova “namathonga wa elabo yotene” onele okosa dhilobo dhapamavi, vowi “dhothonga dhaye somyala.”—Wita 18:25; Olibiha 32:4.

18. Mutoma ondawo onanisunzihe eni?

¹⁸ Mutoma ondhawo ninele woona dhotagiha bili dha attu agumanilena makattamiho opujiwa masaka a Bibilia. Dhotagiha eso dhinele onikamihedha woona wila oviyeviha na olevelela, onokamihedha omutagiha Yehova wi nikaane monelo woligana na makattamiho annigwela.