1, 2. (a) Nabot na anaye agumanilena makattamiho gani? (b) Mutoma obu onanisunzihe mikalelo gani mili?

ALOBWANA eli, ammagedha muttu dhahi muladdu munddimuwa vaddiddi. Dhinloga alobwana abo ozivala-wene. Muttu oddu opwattela muladdu, vina ondowa apiwe. Attu amuziwile mulobwana oddule na anaye ahiwa opa vaddiddi vawonani avokeliwaga malugu mpaka okwa! Eji kahiyo gahala. Empadduwela mwimeleli wa Yehova wakuweliwa Nabot, okalilewo masaka alamulela Mwene Akab mu Izrayel.—1 Amwene 21:11-13; 2 Amwene 9:26.

² Mutoma obu ninele woona yampadduweli Nabot. Ninele ologa vina yottega enddimuwa yakosile munddimuwa wa mulogo wa masaka a wale, mmulogoni w’okristu. Dhotagiha esi bili dhinele onikamihedha woona wila oviyeviha vina olevelela samakamaka akala ninofuna-wene omutagiha Yehova na ottonga waye woligana.

3, 4. Nabot wali muttu wa mikalelo gani, nanda wakoddele eni omugulihedha Mwene Akab mundda waye?

³ Nabot wali muttu wamukwela Yehova, masiki attu enjene mu Izrayel vafwarani dhotagiha dha Mwene Akab, vina mwadhiye mutabala Musano Jezabel. Awene amwebedha mulugu wosemiwa Baal, vina ahittiya omwiwelela Yehova na malamulo aye. Masiki dhawene Nabot wannimwebedha Yehova vina wanvirihamo malamulo aye opitta egumi yaye.

⁴ Kengesa 1 Amwene 21:1-3. Labo nimodha, Akab ologa na Nabot wila wanfuna mundda waye obe amugulihedhe na kobiri dhafuniye, Nabot bakodda. Sabwaya? Nabot wahimwakula: “Kaddinwodha ougulihedhani nddebe nithiyedhiwemi na makolo aga.” Nabot wahikoda orumela yokumbirha ya Mwene Akab sabwani nlamulo na Yehova wa ana Izrayel naloga wila kakalewo muttu onvaha obe onguliha nifumo nttiyedhiwiye. (Onamakutha 25:23; Olebeliwa 36:7) Txibarene, Nabot wannimwiwelela Yehova.

5. Jezabel wakosile eni wila ahalena mundda wa Nabot?

⁵ Mukoddihedhi Nabot omugulihedha mundda waye Mwene Akab, Akabiyá na mwadhiye amukosela dhilobo dhabure vaddiddi. Musano Jezabel, afunaga wila attukule mundda obule, oharuma olobwana eeli wila ammagedhe Nabot muladdu womveyiha mwene. Yodhavoya, Nabot na anaye apiwa. Yehova woonilemo dhavi muladdu obu wabure vaddiddi?

6, 7. Yehova olagihile dhavi wila onokwela dhilobo dholigana nanda ejoya yalibihile dhavi anamudhi na amarho a Nabot?

⁶ Yehova wahimuruma namavuhulela Eliya wila amusaddeye Akab. Eliya wahimwaddela Akab wila wahikosa dhilobo dh’opanga vina ombava. Yehova wafuna amwirele eni Akabiyá? Akab, mwadhiye na anaye agahipiwa ninga mmukoselani Nabot na anaye.—1 Amwene 21:17-25.

⁷ Anamudhi na amarho a Nabot, ahikubanya vaddiddi n’ejile yakosile Akab. Noona Yehova wahakula momaguva merelo a Akab. Yakosile Yehova, yahapamgarhaza vaddiddi awene. Oviyeviha na omukuluvela wawa Mulugu wahidha wehiwa musogorho-mwa.

8. Txini yakosile Akab mwiwaliye mpaganyo wa Yehova, nanda txini yadhilevo?

⁸ Akab mwiweliye yamuttongeli Mulugu, “otaya guwo dhabalileye, ohabala masala, othuga; vagoniye wakunela saku, eddaga woworamene.” Akab wahiviyeviha! Txini yadhilevo? Yehova wahimwaddela  Eliya: “Muhona ovikurumutxa ovikurumutxile Akabe vamentoni vaga? Na mukalelo obu kaddinamugwihedhe ntowa okalawo waye wotene ddinadhe ogwihedha mmudhi mwaye nsaka na okalawo wa mwanaye.” (1 Amwene 21:27-29; 2 Amwene 10:10, 11, 17) Yehova ‘onnona murima’ wahoona mutxinuwelo watxinuwile Akab nanda wahimulevelela.—Gano 17:3.

9. Oviyeviha wabareli dhavi anamudhi vina amarho a Nabot?

⁹ Nroromelo na amarho vina anamudhi a Nabot, nahidha wehiwa monelani wila murala wa Akab kugagwihedhiwe ntowa, mpaka mudhidhi ogakwile Akabiyá. Mbwenye okurumuwa na oviyeviha wahakamihedha obarelana nroromelo nawa. Sabwaya? Awene anziwa wila anfanyeela omwebedha Yehova, okuluvelaga wila dholibedha dha Yehova dhinowakwanihedheya. (Kengesa Olibiha 32:3, 4.) Musogorho, murala wa Nabot anele ojavo gari ya wawona amudhawa avenyihiwaga mu okwani. Ottonga oku onele omuhagalaliha Nabot vina anaye. (Job 14:14, 15; Joau 5:28, 29) Muttu  woviyeviha onoziwa wila ‘Mulugu webaribari ddinttonga n’oligana, akala dhilobodha sapama obe nne.’ (Kohelét 12:14) Yehova onowoona mikalelo dhihinwodhihu woona nanya. Noona oviyeviha onele onibarela olibihavi nroromelo nehu na Yehova.

10, 11. (a) Dhilobo gani dhineha nroromelo nehu? (b) Oviyeviha onnibarela dhavi?

¹⁰ Anddimuwa a mulogo agaukosela elobo ehinrumeliwe obe ehinnoneliwemo onakose eni? Motagiha, kowiliwa weyo obe mukwawo onottihiwa, mabasa akosiye mmulogoni ogakosile eni? Akala mukwawo wa matelo, mwanawo obe mukwawo wofiyedheya, onoburutxiwa mmulogoni, nanda weyo ohirumeelaga yubuwelo ya anddimuwa a mulogo ogakosile eni? Onakose eni ogoona wila yosakula ya anddimuwa a mulogo ya omulevelela muttu oddawile kahiyo yapama? Dhilobo esi dhinoweha nroromelo nehu na Yehova vina mukalelo oneeddihiye nlogo naye masaka abano. Oviyeviha onokamihedhe dhavi, ovilela makattamiho ninga aba? Ndowe noone ttarho bili dhofwara.

¹¹ Voroma, oviyeviha onele oukamihedha woona wila kunziwa makaniya mowakwana. Masiki noonaga wila niziwa mowakwana makaniya, onziwa deretu-deretu ddi Yehova onnona murima wa muttu. (1 Samuwel 16:7) Nigobuwela ejuwene, ninele woona wila txibarene kaninziwa dhilobo dhetene, ottiya ejo japama wogolela mobuwelo wehu. Vanawili, akala naromaga opujiwa, oviyeviha onele onikamihedha okala wowiwelela nijedhaga wila Yehova eddihe mowakwana makaniya. Bibilia onloga: “Onimukurumuwela Mulugu, dhetene dhinireye somyala.” Wili-wili Bibilia onowenjedhedha: “Vano athu otakala murima, dhinirani kampurana elo.” (Kohelét 8:12, 13) Okala woviyeviha onele onikamihedha wabarela otene ampattiwa na makattamihoya.—Kengesa 1 Pedro 5:5.

12. Makani gani analogihu ovanene nanda sabwa jani?

¹² Akristu oroma o Antiokiya w’o Síria, ahigumanana makattamiho ehile nroromelo vina oviyeviha wawa. Ndowe noone dhapadduweli Akristu aba nigamala nitanaalele n’ekalelo yehu ya nlevelelo. Enele onikamihedha wona sabwa enalabihedha Yehova attu ohiligana ahikitihaga moonelo wawa.

13, 14. Murumiwi Pedro wattomeliwe mabasa gani, nanda ovirihamowa onnilibiha dhavi?

¹³ Murumiwi Pedro wali munddimuwa wa mulogo waziwiwa n’attu etene mwa Akristu oroma. Wahikaana mandano ofiyedhana na Yezu vina wahittomeliwa mabasa manddimuwa. (Mateu 16:19)  Motagiha, yaka ya 36, Pedro wahittomeliwa omulaleya muselu wapama Kornélio vamodha na etene aali vanive. Yakaleli eni yamakamaka? Kornélio kali Muyuda, iyene wali Mmalabo wohitxetteliwa. Mumaleli Kornélio vina etene aali vanive wakela muya wokoddela, Pedro wahoona wila wanfwanyeela wabatiza ninga Akristu. Iyene ologa: “Ninwodha dhavi wakoddiha obatiziwa na manje athu aba amalile [wakela] muya wokoddela ninga iyo?”—Merelo 10:47.

¹⁴ Yaka ya 49, arumiwi na anddimuwa a mulogo o Jeruzalemi, ahilogela makani awi Akristu etene aali Amalabo atxetteliwe. Va mutugumanoni abo, Pedro wahawaddela abali alivo wila wahawona Amalabo ohitxetteliwa akelaga muya wokoddela. Yologa ya Pedro, yahakamihedha abali a nikuru nolamulela okosa dhosakula dhapama odheela makaniya aba. (Merelo 15:6-11, 13, 14, 28, 29) Mohaganyedha, Akristu aali Amalabo vina Ayuda ahagalala vaddiddi mwiwelani makani alogile Pedro. Akristu aba mohigoneela ahimukuluvela murumiwi oddu wororomela vina wa malago!—Ahebreu 13:7.

15. Yovirigana gani yakosile Pedro valiye o Antiokiya w’o Síria? (Koona foto eli omaromo.)

¹⁵ Mumaleli matugumanoya o Jeruzalemi, Pedro wahidhowa o Antiokiya w’o Síria. Vafiyiliye wakala na abali abele aaligi Amalabo. Awene anziveliwa vaddiddi okala na murumiwi Pedro. Mohaganyedha awene ahizuzuma vina ahoona opa vaddiddi monelani wila Pedro wahittiya oja na awene. Pedro waharaviha monelo obu Akristu aali Ayuda ninga Barnabé na eena. Murumiwi oddu weziwelo vina wa malago wakoseli nni elobo ninga eji yafuna ogawa mulogo? Koddi yovirigana ya Pedro ennisunziha eni enanikamihedhe akala ninonyimuliwa na mazu obe merelo a munddimuwa wa mulogo?

16. Pedro wasaddeiwe dhavi, nada mavuzo gani andhavo?

¹⁶ Kengesa Galásia 2:11-14. Pedro wawovetxa attu. (Gano 29:25) Pedro wanziwa moonelo wa Yehova na Amalabo. Iyene wova wila Akristu a Ayuda otxetteliwa adhowa o Jeruzalemi, anadhe ahimurihe sabwa ya okosa mandano na Akristu Ohitxetteliwa. Murumiwi Paulo wahimwaddela Pedro wila mobuwelo waye wali wogwaragwambi. Sabwaya? Sabwani Paulo wahimwiwa Pedro abarelaga Akristu Amalabo omatugumanoni o Jeruzalemi yaka ya 49. (Merelo 15:12; Galásia 2:13) Akristu Amalabo onilemo dhavi na merelo opuja a murumiwi Pedro? Koddi awene agahobana sabwa ya ejuwene? Pedro agahittiya okosa mabasa attomeliwiye sabwa ya yovirigana yaye?

17. Pedro opurilemo dhavi elevelela wa Yehova?

¹⁷ Noviyeviha Pedro wahirumeela osaddeyiwa na Paulo. Malebo kanloga wila Pedro wahittiya okosa mabasa attomeliwiye. Enziwa iyo jawi musogorho wahirumeliwa oleba karta bili dhinkosa epaddi ya Bibilia. Mu kartani yaye yanawili, onomukuwela Paulo ninga “mbalihu wokweleya.” (2 Pedro 3:15) Merelo ovirigana a Pedro ahanyimula vaddiddi Akristu a Amalabo. Masiki dhawene, Yezu oli musorho wa mulogo, wahidhowavi bagamulabihedha Pedro. (Éfeso 1:22) Abali etene a mmulogoni ahikaana gari ya omutagiha Yezu na Babe, modhela omulevelela Pedro. Yapamaya jawila kavo wobanile sabwa ya yovirigana ya muttu oddo wohiligana.

18. Mudhidhi gani onfwanyelihu otagiha yubuwelo ya ottonga woligana wa Yehova?

¹⁸ Vowi kamwali muttu woligana mmulogoni mwa Akristu oroma, kuli muligani vina mmulogoni mwa Akristu masaka abano. Bibilia onloga: “Iyo notene ninovirigana venjene.” (Tiago 3:2) Eji kinrutxa ononelamowa, mbwenye ninakose eni akala mbali wehu ononikosela elobo yabure? Ninele omutagiha Yehova na ottonga waye woligana? Motagiha, onakose eni akala munddimuwa wa mulogo onologa elobo enunyimula? Onele ovittiya wobana sabwa ya elobo yonyimula yulogeli munddimuwa wa mulogo? Ottiya omaguvela ologa wila mbaliya kanfwanyeela okala munddimuwa wa mulogo, onojeedha wi Yezu musorho wa mulogo agomihe makaniya na mudhidhi waye? Ottiya wang’ana dhovirigana dhikosiliye, onele wang’ana makamaka, vyaka dhiviriliye akosaga mabasa a Yehova n’oviyeviha? Akala mbaliya wupujile onokalavi munddimuwa wa mulogo, obe onottomeliwavi mabasa, weyo onele oziveliwana? Ogakala muttu woviyeviha, onele okamihedha ottonga woligana wa Yehova.—Kengesa Mateu 6:14, 15.

19. Txini enakose iyo?

¹⁹ Sabwa yawi ninokwela oligana, txibarene ninowang’ana maka osogorho, nsaka ninagomihe Yehova obure wotene ototile Satana na elabo yaye yabure. (Izaiya 65:17) Noona akala muttu ononikosela elobo yabure, japama na oviyeviha wona wila makaniya kaninnonelamo mowakwana vina nimulevelele kakamwe muttuya onipujile. Nigakosa dhawene ninele omutagiha Yehova na ottonga waye woligana.