1, 2. (a) Elifaz na Bildad alogile eni sabwa ya moonelo wa Mulugu na mabasa ankosihu? (b) Txini yalogile Yehova sabwa ya makaniya aba?

VYAKA dhinjene mundduni, alobwana araru adhowa ologa na mwimeleli wa Mulugu wakuweliwa Job. Mmodhaya wali Elifaz mukadda Temá, iyene wahinvuza Job, dhahi: ‘Muthu wa mada, masiki aziwe dhetedhene, onomureliha Mulugu? Muthu woweddeyana, ohinna-wene muladdu na athu, Namawodha-wodha ononpurana elo? Muttu wononelamo onomulabela Mulugu mowakwana?’ (Job 22:1-3) Elifaz obuwela wila dhowakula dha mavuzo aba wali nne. Mulobwana mwina Bildad, mukadda Suwa, wahenjedhedha eraga; kinwodheya muthu wa mada okala wawakwana vamentoni va Mulugu.—Kengesa Job 25:4.

² Elifaz na Bildad afuna amurumeelihe Job wila guru dhakosiye wi amwebedhe Yehova dhali dha vayovi. Alobwana aba afuna amukwekwettele Job orumeelela wila kanina ttima vamentoni va Mulugu, obe nili ninga munyoka, mutipa  obe etagano yotowa mabasa. (Job 4:19; 25:6) Yalogiha alobwana aba wali oviyeviha obe nne? (Job 22:29) Ninoziwa wila nigela niviladdanihe na Mulugu, iyo nili ang’onoya. Nigawela vadhulu va mwango wolapa vaddiddi, nanda nimwang’ana muttu oli mutxiddo, ninele woona wila nili ang’ono vamentoni va Mulugu. Koddi Yehova onoonamo dhawene na guru dhinkosihu wila nimulabele mmabasani a Omwene? Nne! Yehova wahimwaddela, Elifaz, Bildad na Sofar wila dhalogani wali ottambi. Nomala Yehova wahiloga wila wanziveliwa na Job, noona wahimukuwela “mwimeleli waga.” (Job 42:7, 8) N’eji, nikaana ebaribari yawi attu masiki valani attegi ‘ba ttima vamentoni va Mulugu.’

3. Txini yalogile Eliyú sabwa ya ovivelela wehu omulaba Yehova? Eji entapulela eni?

³ Muzombwe wakuweliwa Eliyú wali venevo baganvuruwana Job alogaga na akwaye araru. Nomala Eliyú wahinvuza Job sabwa ya Yehova: ‘Ogakala muttu womyala murima, kunimpuriha elo?’ (Job 35:7) Mazu a Eliyú afuna atapulele wila guru dhinkosihu wi nimulabele Mulugu sa vayovi? Nne. Yehova kamusaddeyile Eliyú ninga mwakoseliyena alobwana abale eena. Monelo wa Eliyú wali wottiyana na wawa. Wafuna aloge wila yofuna ya Yehova kahiyo yowebedhiwavi. Yehova ddoligana. Kuli elobo enakosihu enampurihe, obe enamulibihe. Txibarene, guru dhetene dhinehu, dhindha wa Yehova vina onoziwa mukalelo onlabihedhihu.

4. Yehova onoonamo dhavi nigakosela oderetu attu eena?

⁴ Nigalagiha wakwela abale animwebedha Yehova, iyene onowona merelo abo ninga onkoseliwa ddi iyenene. Va Gano 19:17, ninowengesavo: “Onrumela oboleyiwa na muyelegi, omboleyile Nabuya; onapereke ddi Nabuyene.” Yehova onowoona dila dhotene dhinawirelihu oderetu attu eena. Masiki bali Muttanddi wa elabo, iyene onowoona merelo abo ninga elobo emboleyiwiye, nanda onele opitxa na mareliho menjene. Yezu mwana Mulugu, onovaha onamoona wa esuwene.—Kengesa Luka 14:13, 14.

5. Ninfuna nakule mavuzo gani ovanene?

⁵ Masaka a mundduni, Yehova wahimuwoba namavuhula Izaiya wila akale mwimeleli vina amulabele mowakwana. (Izaiya 6:8-10) Mohigoneela Izaiya wahirumeela niwobo nanda wahiloga: “Ddili veneva! Ddirumení!” Masaka abano, Yehova onowavaha gari attu enjene wila alabe mabasa aye. Matxikwi menjene a emeleli a Yehova, anovivelela na murima wotene ninga mwakoseli Izaiya. Awene ali omala na wale wila arumeele ottomeliwa mabasa-mabasavi, obe mburo-mburovi masiki na makattamihoya. Masiki dhawene, muttu-muttu onovivuza: ‘Ddinoziveliwa na gari eji ya oviperhekela  mabasa a Yehova, kito dhinkosimi-dha dhinottidda-wene mpirha? Ohikalavo waga onotximiha mabasa a Yehova?’ Waromaga wubuwela dhawene? Ndoweni nisunze dhapadduweli emeleli eli a Yehova a wale, Débora na Barak, vina noone maakulo a mavuzo aba.

6. Enoneya dhavi wila anyakoddo a Jabin agahiwodha wabuddugela akadda izrayel?

⁶ Barak wali munyakoddo wa akadda Izrayel, Débora wali namavuhulela wa muyana. Mwari mwa vyaka 20, akadda Kanaá alamuleliwa na Jabin ‘aanapuja’ ana Izrayel. Anyakoddo a Jabin aali onyulu vaddiddi vina ana Izrayel akala mmuttetteni-mwa anova ottiya numba dhawa. Anyakoddo a Jabin aana karo 900 dha koddo na karonga dha mijila, oku ana Izrayel kaana dhipano dhorabana koddo nne vina dhovibarelana mukoddoni.—Anamathonga 4:1-3, 13; 5:6-8. * (Koona yowenjedha.)

7, 8. (a) Voroma Yehova omushagihile dhavi Barak? (b) Akadda Izrayel agonjihile dhavi anyakoddo a Jabin? (Koona foto eli omaromo.)

⁷ Nigang’ana mvaddelo wa anyakoddo a Jabin, ana Izrayel kaali elobwene. Yehova wahimwaddela Débora wi aloge na Barak mazu aba: “Wathukule athu matxikwi kumi a nihimo na Neftali na a nihimo na Zabulau, odhowena o mwango Tabor. Nabuya onere omutotela odhowa o muwulo Kison, Sízera, munddimuwa wa anyakoddo a Jabin, na myuva dhaye, na makuru ayeyá; wenewo onere wagwihedha mmadani mwawo.”—Anamathonga 4:4-7.

⁸ Muttengo wa attu afuneya wahooneya, nanda attu owakwana 10.000 ahidhowa otugumana o mwango Tabor. Venevo Barak na alobwana aye ahidhowa owana na amwiddani awa o Taanak. (Kengesa Anamathonga 4:14-16.) Koddi wali Yehova wakamihedhile akadda Izrayel? Ndde. Ahiroma orubwa muzogwe, nanda mburoya warabiwa koddo wahisadduwa bukala murove. Eji yahavaha ana Izrayel gari ya opemberha. Barak wahattamagiha anyakoddo a Sízera kilometuru 24, mpaka o Haroset. Sízera attawaga, karo dhaye dha koddo dhahiroma orobela mmaroveni. Sízera otomowa mmuvani mwaye ottamaga mpaka o Besanim, vakuvi va Kades. Iyene ottawela mmusasani mwa muyana wakuweliwa Jael. Sízera wahilema vaddiddi nanda wahiroma ogona. Agonaga, Jael omaga murima ompa. (Anamathonga 4:17-21) Yehova wahavaha ana Izrayel gari ya wapemberha amwiddani awa! * (Koona yowenjedha.)

9. Va Anamathonga 5:20, 21 ninsunzavo nni sabwa ya koddo yarabiwe na Sízera?

⁹ Ninele ononelamo vaddiddi mapadduwo alebiwe va kapitulu 4, ya Anamathonga, nigengesa kapitulu yina endawo. Va Anamathonga 5:20, 21 vanloga: “Odhulu vina dhineneri dhiwana, mimburoni mwalani dhiwana na Sízera. Muwulo  Kison, muwulo wawale oakumba na ngwarha ya manje.” Eji entapulela wila angelo ahakamihedha ana Izrayel oraba koddoya, obe wali muzogwe bahi warubwile? Bibilia kantapulela elo-wene. Mbwenye enkala ninga Yehova wahivuna nlogo naye amurubwihaga muzogwe, waromile orobeliha karo 900 dha anyakoddo wila ahiwodhe weedda. Va Anamathonga 4:14, 15, ninowengesavo dila ttaru wila ddi Yehova wavahile ana Izrayel gari ya opemberha. Mwa anyakoddo abale 10.000 a ana Izrayel kavo agawodhile wapemberha amwiddani abale.

10, 11. Meroz wali nni? Nanda wagwiheliwe nni malavi?

¹⁰ Ovano ndoweni noone elobo yamakamakayá. Mmaleli ana Izrayel wapemberha amwiddani awa, Débora na Barak ahimutamalela Yehova. Awene ahiba: “‘Ogweliwe malavi muthethe wa Meroz, agweliwe malavi athuyá ankalamo; aweneyá kadhile omukamyedha Nabuya, anyakoddo awa kadhowile omuwanela.’”—Anamathonga 5:23.

¹¹ Muttette wa Meroz buvi? Iyo kaninziwa deretu. Mohaganyedha ntowa nattongeliwe muttette obu nahidha wakwanihedheya ofiyedha odduwaliwa kakamwe. Txino attu akala muttette wa Meroz, kadhile ovitaganyiha na Barak wila arabe koddo. Nlogo nakala o Meroz nahiwa atameliwaga alobwana 10.000, ovivelela wila arabe koddo na akadda Kanaá, mbwenye kafunile odhowawo. Obe Meroz wali muttette wattaweli Sizera amuttawaga Barak. Obe akadda Meroz ahimoona Sízera attawaga, mbwenye kafunile omuttidda. Kobuwela awene bagamona munyakoddo oddu attamagaga murampani mwa muttette wawa! Awene agahikosa elobo wila akamihedhe ottonga wa Yehova. Kokosa dhawene agahakela mareliho a Yehova. Awene ahikaana gari enddimuwa wi akose elobo-elobovi y’omukamihedhana Yehova, nne kafunile. Nlogo nakala o Meroz nali nottiyana vaddiddi na Jael walibile murima.—Anamathonga 5:24-27.

12. Ninga mulogeliwani va Anamathonga 5:9, 10, monelo wa attu wattiyanile dhavi? Ejiya ennipatta dhavi?

¹² Nimala woona va Anamathonga 5:9, 10, wila yimelelo ya attu abale 10.000 aviveleli, yahittiyana n’abale akooddile ovivelela. Débora na Barak ahitamaalela eraga: “Nyuwo anddimuwa a Izrayeli, nyuwo vina mvilevele oraba koddo: murima waga oli na nyuwo, mutamalení Nabuya.” Awene ahittiyana vaddiddi na attu eedda na “buru” avyona ninga akosa mabasa ovilevela. Attu aba anlogiwa ninga agilatela “makukwe” ajagavo ofuru, mottiyana n’abale ovivelela akala ninga anedda “mmadila.” Attu aba ovivelela ahidhowa oraba koddo omyangoni dh’o Tabor, mmuwuloni w’o Kison. Abale agilateli ofwasa ahaddeliwa: “Ewaní!” Awene anfuniwana wila maru ddeyá wi atanaalele gari yanani ya omukosela Yehova mabasa ovilevela akooddilani. Masaka abano, ninofanyela  vina otanaalela efunelo yehu ya ovilevela mabasa a Mulugu.

13. Monelo wa nihimo n’akadda Rúben, Dan, Aser, wattiyanile dhavi na wa nihimo na Zabulau na Naftali?

¹³ Attu abale matxikwi kumi, aviveleli ahikaana gari ya woona na mento awa, mukalelo onlabihedha Yehova Ottonga waye Onddimuwa. Awene ankaana ebaribari agalogaga dha mabasa ‘oligana a Yehova.’ (Anamathonga 5:11) Mottiyana-mwene attu a nihimo na Rúben, Dan na Aser, ‘azuzumela dhorela dhawa’ ninga mabila na pangaya awa ottiya ozuzumela mabasa a Yehova. (Anamathonga 5:15-17) Eji kintapulela wi mahimo etene aali dhawene. Nihimo na Zabulau na Naftali “aleva egumi yawa mukoddoni ahovelelaga opiwa” wi amukamihedhe Débora na Barak. (Anamathonga 5:18) Ninosunzavo elobo yamakamaka na moonelo obu wottiyana wa attu avileveli mabasa a Mulugu n’abale akooddile.

14. Ninriha dhavi onddimuwa wa Yehova masaka abano?

¹⁴ Masaka abano kaninraba koddo ninga mwakoseliwani wale wi nikamihedhe ottonga waye. Masiki dhawene ninokamihedha ottonga waye venevo vanlaleya iyo miselu dhapama na ntidi. Mopitta masaka a mundduni, enofuneyavi attu ovilevela gwé wi akose mabasa a Yehova. Matxikwi menjene a Abali, azombwe na owunuwelavo, anovilevela mabasa ottiyana-ttiyana a mudhidhi wotene. Motagiha, enjiya anlaba ninga apionero, o Betel, omaga Nuba dha Omwene, okamihedha mabasa a asembeleya vina a kongeresu. Anddimuwa a mulogo eena anlaba na Mabasa a Egumi Mmasipitale, vina masasanyedho a kongeresu. Nikaane ebaribari yawi Yehova anoziveliwa na guru enkosihu wi nimulabele vina txipo kananidduwale.—Ahebreu 6:10.

15. Ninakaane dhavi ebaribari yawi mabasa ehu a Yehova kobanile?

 ¹⁵ Japama otanaalela efunelo yehu yovilevela mabasa. Enokala deretu ovivuza nanya-nanya: ‘Ddinowattiyedhaga attu eena mabasaya? Ddinozuzumela dhilobo dhomaningoni opitta mabasa a Yehova? Ddinosazaga nroromelo na Débora, Barak, Jael vamodha na abale 10.000 aviveleli, wila ddilabihedhe guru dhaga dhotene mmabasani a Yehova? Ddinowubuwelaga omwalela kwatti yina wila ddifwanye ganyo ya korowa yinjene? Akala ejo enopadduwa, ddinomuloba Yehova wila addivahe ttotto ya wubuwela mukalelo ompattiwa murala waga vina mulogo na mereloya aba aga?’ * (Koona yowenjedha.)

16. Masiki Yehova bana dhetene, txini enfanyeelihu omperhekela?

¹⁶ Yehova onivaha gari enddimuwa ya okamihedha olamulela waye. Oromana masaka a Adamu na Eva, Ddiabo onfuna wila attu etene amusadduwele Yehova. Noona nakamihedhaga olamulela wa Yehova ninolagiha epaddi elihu. Nroromelo na weddeyana wehu ononikosiha ovilevela mabasa a Yehova, nanda ejo enomuhagalaliha vaddiddi. (Gano 23:15, 16) Mulugu onolabihedha okamihedha wehu wila akule obedda na osadduwela wa Satana. (Gano 27:11) Wiwelela wehu, elobo enfanyeelihu omperhekela Yehova, nanda enomuhagalaliha vaddiddi.

17. Va Anamathonga 5:31 ninsunzavo eni sabwa ya esile dhinapadduwe musogorho?

¹⁷ Momaguva attu etene velaboni ya vati anele ofuna-wene olamulela wa Yehova. Ninojeedhela n’ohagalala mudhidhi obo! Japama omutagiha Débora na Barak eeba eraga: “Amwiddani enyu, Nabuya, atolowege dhawene; anukwelani akalege ninga nzuwa, ninpathuwa n’ozerimela waye wotene.” (Anamathonga 5:31) Eji enele opadduwa nsaka ninatolotxe Yehova elabo eji yabure na Satanayá. Koddo ya Armagedón egaromaga, Yehova kanafune viina attu ovivelela wila atolotxe amwiddani. Ottiya eji, ninere “wimela ovyethekene” wi noone ‘mvunelo onanivunena Yehova.’ (2 Mapadduwo 20:17) Ovanene nikaana gari enddimuwa ya okamihedha olamulela wa Yehova na mabasa ehu a olaleya na ntidi.

18. Mabasa awo a vawoka anakamihedha dhavi attu ena?

¹⁸ Débora na Barak ahiroma jibo yawa yopemberha y’omutamaalana Yehova ottiya attu. Awene eeba dhahi: ‘Mutamalení Nabuya; anddimuwa a Izrayel avenyela owana, athu n’ofuna wawa atimurha vamodha na awene!’ (Anamathonga 5:1, 2) Na mukalelo wakakene, akala ninomulabela Yehova wego-wegovi onfuneya anamalaleya, ninowalibiha attu eena ‘omutamaala Nabuya!’