1, 2. (a) Elabo eji yotabala, enladdanihiwa dhavi na panga odhowa opiwa? (Koona foto eli omaromo.) (b) Abale ali wirimu na velaboni ya vati, anarumele eni elabo eji egatolotxiwa?

KAMUBUWELE mulobwana wa panga ottongeliwe okwa. Iyeneya adhowiwagana omapeliwo asupai animwang’anela anokuwa: ‘Marafula-wé!’ Awene anlogela nni dhawene? Ttangwi yowila panga oddu oneddavi wamento-wene, oli mukambura nanda ottongeliwe opiwa vina ohalile mudhidhi mung’onovi. Noona onkala ninga okwile. *—Koona yowenjedha.

² Elabo ejino yotabala, ovanene eli ninga panga oddu ottongeliwe opiwa. Bibilia onloga wila: “Elabo na dhowunlela dhaye dhetene dhinovira.” (1 Joau 2:17) Yehova ohilibela wila elabo eji enele ogoma ovanene, nanda kuli waganyedha wila onele ogomiha-wene. Ogoma wa elabo, ohittiyana vaddiddi na opiwa wa panga ole ologiwe. Txino attu enjene  anele ologa wila muladdu wa panga oddu kuttongiwe deretu, obe anele opambiha wila anapiwe. Mbwenye, Yehova onttonga n’oligana, vina yolibela yaye ya ogomiha vina otolotxa elaboya joligana. (Olibiha 32:4) Otolotxiwa oku kunatxeleliwe. Elabo eji egamala otolotxiwa, etene ali wirimu vina a velaboni ya vati anele orumeela wila ottonga wa Yehova kwebaribari. Onele okalawo ovuneya onddimuwa!

3. Makattamiho gani manai anagome Omwene wa Mulugu ogafiya?

³ “Elabo” na “dhowunlela dhaye” entapulela eni? Entapulela dhilobo dhetene dhabure dhimpadduwa masaka abano. Dhilobo esi dhetene dhinele ovira. Eji epaddi ya “miselu dhapama dha Omwene.” (Mateu 24:14) Mwari mwa mutoma obu ninele ologa makattamiho manai anagome Omwene wa Mulugu ogafiya: attu otabala, makuru antota obure, mabasa onyakuwa vina mikalelo dhabure. Mwa makattamiho aba ninele oziwa (1) mukalelo onnipattani, (2) Txini enakose Yehova, vina (3) bani anahale vamburoni vawa.

4. Attu otabala annipatta dhavi?

⁴ Koddi attu otabala annipatta dhavi? Murumiwi Paulo wahibaza ologa wila masaka omariha “aner’odhana dhawopiha.” Nanda wahenjedhedha: “Athu abure, anamanyengetha, anere othabwaga okala abure.” (2 Timóteo 3:1-5, 13) Weyo onowoonaga esidha? Enji mwa iyo txino okala walupeliwe na atimbwini, oligiwa obe opujiwa sabwa y’ottiyana wa ttebe. Enjiya mwa abuwene kanvuba dhinkosani. Enaya anivikosiha ninga anfuna wakamihedha akwawa oku agaali atabala. Masiki akala kanigumanilena dhilobo esi, oziwa wila ahikalawo atabala, enonipatta vaddiddi. Ninowundeya guru nigewa mukalelo onakosanina ayima, akalaba obe attu-attuvi ahinwodha ovibarela. Merelo otabala, anowasaddula anameraya okalaga ninga anenama a muddebe obe adomonyo. (Tiago 3:15) Yohagalaliha ja oziwa wila Nzu na Mulugu ninonivaha njedhelo.

5. (a) Attu otabala anna gari gani mpaka ovanene? (b) Txini enapadduwele abale ankodda okosa masadduwo?

⁵ Txini enakose Yehova? Ovanene Yehova ohavaha gari atabala wila asaddule merelo awa. (Izaiya 55:7) Masiki elabo eji edhowaga otolotxiwa, ovanene awene kattongiwe. Kito ogafiya mudhidhi wa goi enddimuwa, abale ankamihedha elabo ejino vina ankodda osaddula merelo awa anakose eni? Yehova olibela wila onele watolotxa atabala etene velaboni ya vati. (Kengesa Masalmo 37:10.) Masaka abano, attu enjene anovuba dhilobo dhabure dhinkosani wila anasottottiwe. (Job 21:7, 9) Mbwenye Bibilia ononubutxedha: “Mento a Mulugu anowona dhetene dhinkosa muthu, anomuloddiha munvireye. Kaiwo epipi nne addima munwodha ovitala abale anira dhotakala.” (Job 34:21, 22) Txibarene kuli mburo onwodha ovitalavo muttu wila anooniwe na Yehova. Iyene onowoona dhetene dhinkosa atabala. Armagedóm agavira, ninele wang’ana mwavitalani, kaninawonemo. Awene anele otolotxiwa mutolowelo!—Masalmo 37:12-15.

6. Bani onakalewo atabala agatolotxiwa, nada muselu obu okaleli eni wapama?

 ⁶ Bani anavuluwe Yehova agatolotxa attu otabala? Yehova olibela wila: “Vano akurumuwi aner’okala anya a elabo, aner’ojavo murenddele munddimuwa.” Musogorhomwa wa masalmo akakene onloga: “Athu apama aner’okala anya a elabo, akalegemo masiku etene.” (Masalmo 37:11, 29) Koddi “akurumuwi” na “athu apama” bani? Akurumuwi babale asunzile vina amwiweleli Yehova. Attu apama babale ankwela dhilobo dhetene dholigana dhinkwela Mulugu. Masaka abano, mwilaboni muhidhala attu abure vina atabala opitta attu apama. Mbwenye mwilaboni eswa, munakale bahi attu okurumuwa vina apama, nanda anele okosa elabo okala paraizu!

7. Makuru otabala annipatta dhavi masaka abano?

⁷ Makuru antota obure annipatta dhavi ovanene? Epaddi enddimuwa ya makattamiho anooneya masaka abano antotiwa na makuru anziveliwana esuwene. Makuru menjene a marelijiau anowanyengetta attu. Motagiha, anozivalela ebaribari ya Mulugu, anologa wila Bibilia kankuluveleya vina anopupurutxa njedhelo n’attu na musogorho. Alamuleli enjene anotota koddo, widdana sabwa ya ottiyana wa ttebe vina anowatabutxa attu ahinwodha ovibarela. Alamuleli abo anokalaga areli vina a ewodhelo, sabwa ya arumeela mabeho. Makuru abo a awogo, anotakaliha elabo, anotolotxa dhorela dhelabo vina anowapura ttu wila avikalihe areli. Txibarene, makuru menjene akaana muladdu sabwa ya makattamiho anooneya mwilaboni masaka abano.

8. Bibilia onloga ni enfuna opadduwa na makuru anooneya ninga bovadda masaka abano?

⁸ Txini enakose Yehova? Goi enddimuwa enarome alamuleli a elabo agamala otolotxa makuru etene a relijiau, antonyiwa mBibiliani ninga muyana wa jeberuwa onna nzina na Babilónia Munddimuwa. (Ovuhulela 17:1, 2, 16; 18:1-4) Makuru abo a marelijiau anele otolotxiwa-wene mutolowelo. Kito txini enapadduwe na makuru antota obure? Bibilia onladdaniha makuru aba ninga myango na visuwa sabwa ya otibeleya wawa. (Kengesa Ovuhulela 6:14.) Onowenjedhedha alogaga wila alamuleli otene vamodha na makuru ankodda okamihedha Omwene wa Mulugu anele otolotxiwa. Eji enapadduwe omagomelo wa goi enddimuwa. (Jeremiya 25:31-33) Nomala mwilaboni mwetene kamunakale viina makuru antota obure!

9. Txini ennivaha ekuluvelo yawi elabo eswa enele okala yosasanyedheya?

⁹ Elobo gani enahale vamburoni va makuru abure? Armagedóm agavira, anele okalawo makuru meena velaboni ya vati? Bibilia onloga: “Apa enjyedha iyo, bari mpikirhele Nabuya, ji erimu na elabo eswa, muneddege dhetedhene ninga munfuneliye.” (2 Pedro 3:13) Erimu na elabo ya wale entapulela alamuleli na attu anattongani. Abaya agatolotxiwa txini enahale vamburoni vawa? “Erimu na elabo eswa.” Erimu eswa onaddiwana olamulela oswa wa Omwene wa Mulugu munkosa epaddi Yezu Kristu vina attikitteliwi  144.000. Elabo eswa enaddiwana nlogo na attu analamuleliwe na Omwene wa Mulugu. Yezu na attikitteliwi analabiyena anele omutagiha kakamwe Yehova oli Mulugu wa masasanyedho. (1 Korinto 14:33) Noona “elabo eswa” enele okala yosasanyedheya. Munele okala attu apama aneeddihe dhilobo dhetene n’oligana. (Masalmo 45:16) Attuya abo onasogorhele ddi Yezu na 144.000. Nsaka ntto nigafiya, makuru otene antota obure anotolotxiwa nanda vamburoniva nikiwevo nikuru nimodha bahi nowiwanana nihinakose dhilobo dhabure!

10. Mabasa gani otabala ankosiwa mmuruddani mwawo, nanda anupatta dhavi na amudhawo?

¹⁰ Mabasa onyakuwa annipatta dhavi ovanene? Iyo ninkalawo masaka adhaalile merelo onyakuwa, ohikuluveleya vina opanga elabo yotene. Mavego a elabo, anolagiha merelo aba ninga aderetu, oku apwazaga malamulo a Yehova anzinddiyeliha obure na oderetu. (Izaiya 5:20) Amambali, anofanyeela okosa guru wila abarele anawa sabwa ya mapakelo a elabo. Akristu ebaribari anokosa guru eli yotene wila abarele vina alibihe mandano awa na Yehova mwilaboni mpuno mudhaalile obure.

11. Mukalelo ottongile Yehova kwatti dha Sodoma na Gomorra onnisunziha eni?

¹¹ Txini enakose Yehova na mabasa abo onyakuwa? Kobuwela yakosile Yehova na mabasa onyakuwa akosiwa mu sidadi dha Sodoma na Gomorra. (Kengesa 2 Pedro 2:6-8.) Loti na murala waye, masiki valani attu apama, ampattiwa dhilobo dhonyakuwa dhakosa attu akala mukwattinimwa. Yehova wahitolotxa kwatti esi dhotene vamodha na merelo onyakuwa etene akosiwamo. Iyene okosa eji wila “asunzihe” attu ankosa obure masaka abano. Vowi Yehova wahigomiha merelo a ogonihana wonyakuwa masaka a mundduni, onele okosa yakakene ovanene agatolotxaga elabo.

12. Mabasa gani anjedhiwe woona elabo eji yotabala egavira?

¹² Elobo gani enahale vamburoni va mabasa abure? Mwilaboni eswa, ninele okaana mabasa menjene ohagalaliha. Motagiha ninele osaddula elabo wila ekale paraizu vina omaga numba wila nikalegemo vamodha n’abale anavenye mu okwani. Ninele okaana gari ya wamoyela matxikwi-na matxikwi a attu anavenyihiwe, vina wasunziha malago a Yehova na dhetene dhikoseliye nlogo na attu. (Izaiya 65:21, 22; Merelo 24:15) Masaka abo, ninele okaana mabasa ozivela vina animuttittimiha Yehova!

13. Osadduwela opadduwile mu Edeni witile makattamiho gani?

¹³ Mikalelo dhabure dhinnipatta dhavi ovanene? Sabwa ya elabo odhaleliwa attu otabala, makuru antota obure vina mabasa onyakuwa, ovanene anowooneya mikalelo dhabure. Notene ninofanyiwaga makattamiho ninga koddo, oyelega, ottiyana wa ttebe, maredda na okwa. Mikalelo esi dhabure dhitoteyile sabwa ya Satana, Adamu na Eva okodda  omwiwelela Yehova. Osadduwela oko okosile awene, ononipatta iyo notene.

14. Yehova onakose eni na merelo abure anooneya mwilaboni?

¹⁴ Txini enakose Yehova na mikalelo eso dhabure? Kobuwela dhotagiha esi. Yehova olibela wila onele ogomiha koddo dhotene. (Kengesa Masalmo 46:8, 9.) Onele ogomiha maredda etene. (Izaiya 33:24) Okwa kunakalewo viina. (Izaiya 25:8) Onele ogomiha oyelega. (Masalmo 72:12-16) Yehova onele oburutxamo merelo abure etene aliwo antakaliha egumi. Onele oburutxavo vina mapakelo etene abure antota Satana na adomonyo aye!—Éfeso 2:2.

15. Dhilobo gani dhihinadhe wooneye vina Armagédon agavira?

¹⁵ Musogorho ninele osanzaya okala mwilaboni muhinakale koddo, maredda na okwa! Kamunakale anyakoddo, futti obe wubuweliwa dhilobo dha koddo. Kamunakale sipitale, ang’anga, obe masiye. Opanga kunakalewo noona kamunakale asupayi, obe kaninafugege misuwo! Merelo abure anazuzumiha attu masaka abano anele ogoma na mukalakala.

16, 17. (a) Abale anaviluwe na Armagedón anavyone dhavi? Katagiha. (b) Ninona dhavi wila ninele okalawo-wene elabo eji yotabala egavira?

¹⁶ Egumi enakale dhavi mikalelo dhabure dhigagoma? Txibarene kaninwodha wubuwela. Ninkalawo na mikalelo dhabure mwari mwa mudhidhi mwinjene, vina kaninwodha wubuwela goi dhinnitotelani. Motagiha attu ankala waddamela muwaje, anotabuwa n’orumawa. Attu ankala vego vanponyedhiwa zungu, anotabuwa n’onukawa. Txibarene Yehova agaburutxavo merelo otene abure onele okalawo ovuneya onddimuwa!

¹⁷ Txini enakale vamburoni va matabuwoya aba otene anonihu ovanene? Masalmo 37:11 onloga: “Akurumuwi aner’okala anya a elabo, aner’ojavo murenddele munddimuwa.” Oziwa wila Yehova onfuna ejuwene, enonipangarhaza vaddiddi! Mwari mwa mudhidhi obu wa makattamiho, kakosa guru eli yotene wila wandane na Yehova vina nikuru naye. Njedhelo nawo na musogorho elobo yattima vaddiddi, noona katanalela, vina kakaana ebaribari wila wapangege attu eena. (1 Timóteo 4:15, 16; 1 Pedro 3:15) Ogakosa ejuwene, onele okaana ebaribari yawi elabo eji egafiya omagomo, weyo onele okala wowimelene, vina wohagalala na mukalakala!