1. (a) Txini yakosile attu aba eeli: Jefté na Ana? (Koona foto eli omaromo.) (b) Ninakule mavuzo gani mwari mwa mutoma obu?

JEFTÉ wali musogorheli woliba murima vina woviliviha. Ana wali muyana woviyeviha, wamuriha mamunaye vina ntakulu naye. Attu aba oheeli ali emeleli a Yehova. Mbwenye ekala elobo yewanana mwari mwa attuya ba. Jefté na Ana ahimpikirhela elobo Yehova nanda avirihamo dhopikirhela dhawa na nroromelo. Awene yotagiha yaderetu wa alobwana obe ayana a masaka abano anfuna ompikirhela Yehova. Ninfuna noone dhowakula dha mavuzo mararu: Opikirhela ontapulela eni? Ompikirhela Yehova okalelini elobo yohivegana? Yotagiha ya Jefté na Ana ennisunziha eni?

2, 3. (a) Opikirhela entapulela eni? (b) Malebo entapulela eni sabwa ya ompikirhela elobo Mulugu?

² Mbibiliani, opikirhela ontapulela elobo eganile muttu wi anvahe Mulugu. Motagiha, txino muttu onompikirhela Mulugu wila onele oviperhekela mabasa a vawoka, obe onyanyala merelo abure. Opikirhela onkosiwa mowiwanana na ofuru wosakula. Kavo muttu ondideliwana  opikirhela. Noona akala muttu onokosa ejuwene, Yehova onowona wila kahiyo elobo yovegana, vina onoriha. Mbibiliani, opikirhela onoligana na malibelo. Olibela elobo enkosa muttu, alogaga akala onele obe nne okosa elobo-elobovi. (Wita 14:22, 23; Ahebreu 6:16, 17) Bibilia onlogela nni wila ovirihamo dhopikirhela dhehu wa Yehova, elobo yohivegana?

³ Mu Nlamuloni na Mizé, ninowengesamo wila mulobwana wampikirhela Yehova elobo, wanfuniwana wi peno onddubelela ovimana enubuweliye, “akwanihe ovirihamo dhetene.” (Olebeliwa 30:3) Musogorhomwa Salomau oleba: “Ogapikirela vamentoni va Mulugu wira elo, kugonelihe ovirihamo. Ntowa thabale anvuluviha. Weyo erá epikireliwe.” (Kohelét 5:3) Yezu wahilagiha wila ompikirhela Yehova kumvegiwana: “Muziwa yaddeliwe athu awale: ‘Kuddubele yawota, ovirihemo emuddubelele weyo Mulugu.’”—Mateu 5:33.

4. (a) Ompikirhela Mulugu okaleli eni elobo yohivegana? (b) Opikirhela wakosile Jefté na Ana onnisunziha eni?

⁴ Txibarene, ovirihamo dhetene dhimpikirhelihu Yehova elobo yohivegana. Dhopikirela dhinkosihu, dhinopatta mandano ehu na Yehova. David wahitapulela deretu vavuziliye dhahi: “Bani onfwanyela owela mwango wa Nabuya?” Nanda wahakula nivuzo ntti vaalogiliye wila Yehova onoziveliwa na ole “ohitakalile mada, onna murima wothorhorha.” (Masalmo 24:3, 4) Txini yapikirheli Jefté na Ana? Koddi attu aba karutxiwa ovirihamo yapikirhelani?

5. Jefté wakosile nipikirhelo gani? Txini yadhilevo?

⁵ Jefté wahikosa nlibelo wa Yehova mudhidhi wadhowiye oraba koddo na akadda Amon. Ziza ntti nali amwiddani a nlogo na Mulugu. (Anamathonga 10:7-9) Jefté wahimukumbirha Yehova wila apemberhe, noona wahikosa nipikirhelo-ntti: “Mugaddivaha mmadani mwaga akadda Amon, ddiyelela owani waga na mperhe, ole onroma obudduwa mba mwaga addifwarelaga miyo, ddinomulevela Nabuya.” Mulugu wahakula nlobelo na Jefté nanda wahimukamihedha opemberha koddoya. Mbwenye Jefté eyelelaga owani waye, mwanaye wamuyana wamukweletxiye ddibudduwile baganfwarela. Ddudduwene wafuniye “omulevela Nabuya.” (Anamathonga 11:30-34) Ejiya yatapulela eni?

6. (a) Jefté na mwanaye karutxiwe ovirihamo yampikirhelani Mulugu? (b) Dhopikirhela dhilebiwe va Olibiha 23:21, 23 na Masalmo 15:4 dhinnisunziha eni?

⁶ Wila avirihemo mowakwana nipikirhelo na babe, mwana wa Jefté wahidhowa  omulabela Yehova mmusanani. Koddi Jefté wakosile s’ohubuwela nipikirhelo ntti? Kahiyo mwenemo. Enkala ninga iyene wanziwa wila mwanaye agaali woroma obudduwa wi anfwarele. Masiki akala kaziwa, ovirihamo nipikirhelo ntti yali elobo yorutxa vaddiddi mwa Jefté vina mwanaye. Jefté ologa wila mmoneliye mwanayeya, wahundeya guru. Mwanaye wahidhowa wunla ‘okwa waye munamwalini.’ Sabwaya? Jefté wana mwana mmodha bahi, nanda odduya kagadhile oteliwa nne ombala mwana. Nzina na murala wa Jefté nigahirimeela. Masiki dhawene, Jefté na mwanaye ahoona wila ottiya wubuwela etanaalelo yawa bahi, anfanyeela okosa elobo yina. Jefté ologa: “Ddimwirela Nabuya nipikirhelo, nihinwodha miyo wiyelihedha mundduni.” Mwanayeyá omwakula: “Ddikoseleni, dhiddubelelinyu.” (Anamathonga 11:35-39) Jefté na mwanaye aali attu ororomela, nanda anziwa wila txipo kagattiyile ovirihamo yampikirhelani Mulugu masiki valani yorutxa.—Kengesa Olibiha 23:21, 23; Masalmo 15:4.

7. (a) Ana wapikirheli eni, nanda sabwa yani? Iyene wonamo dhavi yopikirhelaya? (b) Yopikirhela ya Ana yatapulela nni mwa Samuwel? (Koona yowenjedha.)

⁷ Ana wahikosa nipikirhelo masaka afwanyiwiye segedho. Iyene wahundeya guru sabwa yowi kábala, vina wansuttiwa sabwa ya ejuwene. (1 Samuwel 1:4-7, 10, 16) Wahimwaddela Yehova mukalelo wewamo iyene, nanda wahikosa nipikirhelo dhahi: Eh “Nabuyaga wowodha-wodha, mone segedho dha mwimeleli wenyu, muddubuwele, kamuddidduwale miyo mudhari wenyu; mugaddivaha mwana-mulobwana, ddinoulevelani nyuwo, Nabuya okalawo waye wotene; nthithi naye kannegiwe.” * (Koona yowenjedha.) (1 Samuwel 1:11) Yehova wahivuruwana nlobelo na Ana nanda yaka modha musogorhomwa iyene wahimbaala mwana banvaha nzina na Samuwel. Ana wahagalala vaddiddi! Masiki dhawene kadduwalile yampikireliye Yehova. Mumbaleliye mwana, iyene ologa: “Miyo ddimulobile Nabuya.”—1 Samuwel 1:20.

8. (a) Yali elobo yovevuwa Ana ovirihamo yapikirheliye? (b) Masalmo 61 ennubutxedha eni na yotagiha ya Ana?

⁸ Samuwel vaniyena vyaka ttaru bahi, Ana wahivirihamo yampikirheliye Yehova. Wahimudhowana Samuwel wa Namakutta Munddimuwa Elí wakala otabernakulu o Silo nanda ologa: “Mmone mwana wamulobetximi Nabuya; iyene oddivaha. Miyo vina ddinomulevela Nabuya. Amwiwelelege iyene okalawo waye wotewene.” (1 Samuwel 1:24-28)  Oroma venevo, Samuwel wakala otabernakulu. Bibilia onloga wila Samuwel wela wunuwavi “vamentoni va Nabuya”. (1 Samuwel 2:21) Ovirihamo yapikirheli Ana kayali elobo yovevuwa. Eji entapulela wila iyene kagakalile vina na mwanaye masiki vamukweliye. Ana kagonile munuwelo wa mwanaye. Masiki dhawene Ana wahivirihamo s’ovega nipikirhelo namukoseliye Yehova. Ana wali womala na wale wila avirihemo yampikirheliye Mulugu.—1 Samuwel 2:1, 2; kengesa Masalmo 61:1, 5, 8.

9. Txini enasunzihu musogorho?

⁹ Vowi nihinonelamo wila ompikirhela Yehova kahiyo elobo yovegana, ndowe nakule mavuzo aba: Mapikirhelo gani anakosihu masaka abano? Ninawodhe dhavi olibiha dhopikirhela dhinkosihu?

10. Nipikirhelo gani namakamaka ninkosa Akristu otene? Ejoya entaganyiheya na eni?

¹⁰ Nipikirhelo nddimuwana ninkosa Mukristu oli wotene ku oviperhekela Yehova egumi yaye yotene. Muttu onokosa  nlobelo balivo yeka alogaga wila onele olabihedha egumi yaye yotene wi amuhagalalihena Yehova, masiki dhipadduwe dhilobo dhorutxa. Yezu wahiloga wila ‘nivikodde’ nanya, eji entapulela omwika Yehova vamburoni voroma. (Mateu 16:24) Oroma labo-nene ntto, ‘ninimukalelawo Yehova.’ (Roma 14:8) Nivirihemo s’ohivegana oviperheka wehu wa Yehova. Japama omutagiha munasalmo walogile: “Ddinamutamalele dhavi Nabuya, ddonaga dhapama dhetene dhinddireliye? Ddinovirihamo dhimpikirhele miyo Nabuya vamentoni va nlogo naye notene.”—Masalmo 116:12, 14.

11. Txini yapadduwile labo na obatizu wawo?

¹¹ Weyo ohimperhekela Yehova egumi yawo, nanda ohilagiha oviperhekawa na obatiziwa mmanjeni? Akala ohikosa, ehikala! Onowubuwela wila mbali akosaga diskursu y’obatizo wahuvuza akala wahiviperhekela Yehova vina akala wannonelamo wila “obatiziwa wawo onowulagiha ninga Munamoona wa Yehova”? Mwakuleliwe, anamewa etene alivo, ahoona wila wahiviperhekela Yehova vina wanrumeeliwa ninga mwimeleli waye. Ejo ekosile weyo emuhagalaliha vaddiddi Yehova!

12. (a) Mavuzo gani anavikosiwe weka? (b) Pedro onnikokomeza wila nunuwihe mikalelo gani?

¹² Labo nibatiziwe weyo, wahimpikirhela Yehova wila ogahilabihedha egumi yawo wi omulabele iyene bahi, ovirihagamo malamulo aye etene. Noona, obatizo ku omaromowa. Movira wa mudhidhi, muttu-muttu onodhowavi bagavipepesa mwinyene. Txino onovivuza: ‘Mandano aga na Yehova anedda dhavi oroma labo nibatiziwemi? Koddi ddinomulabela na murima waga wotene? (Kolosi 3:23) Ddinolobelaga mudhidhi wotene? Ddinomwengesaga Bibilia malabo otene? Ddinowoonaga matugumano otene? Ddinodhowaga omabasani olaleya? Obe ddihobanela mabasaya aba?’ Murumiwi Pedro ologa wila jawopiha vaddiddi wobanela mabasa a Yehova. Ninele orabela wobana oko nigalaba vaddiddi wila nunuwe na nroromelo, ononélamo, opimelela, omuthithimiha Mulugu.—Kengesa 2 Pedro 1:5-8.

13. Mukristu onfwanyeelela eni oviperheka vina obatiziwa?

¹³ Nigakosa nipikirhelo n’omulabela Yehova, txipo kaniyelele mundduni. Muttu onlemana omulabela Yehova, obe weddiha egumi yaye ninga Mukristu txipo kaloge wila kamulabeli deretu Yehova obe oviperheka waye kuttiddile mpirha. * (Koona yowenjedha.) Akala muttu oviperhekeli Yehova onokosa yottega enddimuwa, iyene onele omunyimula Yehova vina mulogo. (Roma 14:12) Kaninfuna okala ninga abale awaddana Yezu alogaga: “Ddabuno kunna ekalelo y’okwela ninga mwa wale.” Ottiya eji ninfuna anilogena dhahi: “Ddiziwa mabasa awo, okwela wawo, ororomela wawo;  ddiziwa vina wi ddabuno onowaralela mabasa opitta wale.” (Ovuhulela 2:4, 19) Ninfuna nikalewo na nroromelo ninga mpikirhelihu omuhagalaliha Yehova.

14. Nipikirhelo nanawili ninkosa mukristu ttivi? Vina sabwaya jani?

¹⁴ Nipikirhelo nanawili ninkosa muttu tta okosa matelo. Matelo borihiwa. Yehova onowona matelo ninga nipikirhelo nohivegana. Venevo muteliwi na muteli vankosani nipikirhelo, awene anlibela vamentoni va Yehova vina va anamewa. Anolibela wila anele okwelana vina orihana muttu na mukwaye, mudhidhi onakalani oheeli velaboni ya vatti mowiwanana na efunelo ya matelo etile Yehova. Enaya kanvirihamo mazu aba mowakwana, masiki dhawene anokosa nipikirhelo wa Mulugu. Agakosa nipikirhelo ntto aweneya anokala atelani. Otelana ontapulela okala vamodha egumi yotene. (Wita 2:24; 1 Korinto 7:39) Yezu ologa: “Muthu ahimwalanihe egumanihile Mulugu.” Attu atelanile kajedhele wila akala matelo awa kaneedda deretu, amwalane.—Marko 10:9.

15. Sabwaya jani Akristu kanoona matelo ninga munoonela attu a mwilaboni?

¹⁵ Sabwa yawi kuli attu oligana, kuli vina matelo oligana. Noona Bibilia ononaddela wila atelani “anowona makathamiho.” (1 Korinto 7:28) Masaka abano, attu enjene akaana moonelo wottiyana wa matelo. Awene anubuwela wila akala dhilobodha kadhineedda deretu, japama omwalana. Koddi moonelo wa Akristu sabwa ya matelo bubuwene? Awene anoziwa wila ahipikirhela vamentoni va Mulugu. Vina anoziwa wi okodda ovirihamo nipikirhelo ntto eli ninga omunyengetta Yehova, nanda Mulugu onowidda ottambi. (Onamakutha 19:12; Gano 6:16-19) Akristu atelanile, anofwanyeela wubuwela mazu a murumiwi Paulo: “Weyo otelile; kumwalanena mwadhiyo.” (1 Korinto 7:27) Paulo waloga eji aziwaga wila Yehova onowawidda abale ammwalana vahili muladdu.—Malakiya 2:13-16.

16. Txini enloga Bibilia sabwa ya omwalana obe ottiyana?

¹⁶ Yezu wahisunziha wila Malebo anrumeela wi akala muttu mmodha onokosa mararuwo, mukwaye podi osakula omwalana obe olevelela. (Mateu 19:9; Ahebreu 13:4) Koddi Bibilia onologa sabwa ya oroma ottiyana? Onologa. (Kengesa 1 Korinto 7:10, 11.) Malebo kanloga wila attu atelanile attiyane. Mudhidhi mwina anokalagawo makattamiho txino animuttukulela Mukristu wona wila japama omuttiya mukwaye wa matelo. Motagiha eena anorumeela wila egumi yawa obe mandano awa na Yehova anele opattiwa vaddiddi agadidela okalavi na muttu wotabala obe ohiniwelela malamulo. * (Koona yowenjedha.)

17. Atelani a Akristu anakose eni wila matelo awa alibe?

¹⁷ Dila dhina akala atelani anowafiyedha anddimuwa a mulogo akumbirhaga  nikamihedho wi alibihe matelo awa, anddimuwaya anowavuzaga akala ahona vidiyu Okwela Webaribari Txini? Obe akala ahisunza brochura Enowodheya Okaana Wagalala Vamuralani Vawo. Dhipano esi dhinologa magano a Bibilia ankamihedha matelo okala oliba. Atelani dhahi aloga: “Vasunzilehu brochura ntti, matelo ehu aliba opitta mwalani wale.” Murogora dhahi onna vyaka 22 dha matelo obuwela wila matelo aye ahiroma wobana. Nomala wahoona vidiyu. Iyene ologa: “Iyo noheeli nibatiziwa, masiki dhawene kanewananela elo-wene. Vidiyu eji edhile mmudhidhini wafuna iyo! Dhinkosihu ovanene s’atelani-wene.” Akala atelani anovirihamo malago a Bibilia, matelo awa anele okala oliba vina ohagalala.

18, 19. (a) Txini enkosaga amambali enjene a Akristu? (b) Txini enalogihu n’abale aviperhekeli mabasa a mudhidhi wotene?

¹⁸ Omaromo nihiloga nipikirhelo nakosile Jefté na Ana. Sabwa ya opikirhela oko, mwana wa Jefté vina mwana wa Ana, ahilabihedha egumi yawa wi amulabele Yehova mudhidhi wotene. Amambali enjene a Akristu masaka abano, anowalibihaga anawa wila avolowe mmabasani a mudhidhi wotene. Noona iyo notene nihikaana gari ya walibiha azombwe wila ahagalalevi mmabasani ankosani.—Anamathonga 11:40; Masalmo 110:3.

¹⁹ Mpaka ovanene, ohikala muttengo wa 67.000 wa abali avileveli mmabasani a Vawoka a Mudhidhi Wotene. Abali aba enaya anlaba o Betel, omaga Numba dha Omwene, obe weeddelela milogo. Ena ankosa mabasa ninga apionero a vawoka, amisionario, emeleli a Numba dha Asembeleya, obe osogorhela dhiskola dha Bibilia. Aba otene akosa Nipikirhelo na Wiwelela vina Oyelega (“Voto de Obediência e de Pobreza.”) Agakosaga nipikirhelo ntto awene anolagiha wila anele olaba na guru dhawa dhotene mabasa-mabasavi anattomeliwani, anele ovevutxa agumi yawa vina kanalabe mabasa meena s’orumeelihiwa. Enavaha ttima kahiyo omuttu wawa, mbwenye mabasa ankosani. Awene ali omala na wale wila avirihemo kakamwe nipikirhelo nawa mudhidhi wotene onakalani mmabasani abo.

20. Nineddihe dhavi esile dhimpikirelihu Mulugu? Sabwa yani?

²⁰ Mutoma obu nihisunza mapikirhelo mararu animukosela iyo Mulugu. Txino weyo omala okosa mapikirhelo aba weka. Ninoziwa wila japama olibihavi vina odhowanavi vasogorho nipikirhelo nehu nihivegagana. (Gano 20:25) Akala kaninvirihamo mowakwana empikirhelihu Yehova, vanele okala magudulano menjene. (Kohelét 5:6) Nona japama omutagiha munasalmo wamulogeli dhahi Yehova: “Dhawene ddinere wibela nzina nenyu vamukala-kala, ddinere ovirihagamovi dhipikirhelimi.”—Masalmo 61:9.