1. Mowiwanana na Éfesio 6:10-13 elobo gani entonyihedha wi Yehova ononikamihedha? Kavaha yotagiha.

ELOBO modha enoniha wi Yehova txibarene ononikwela ja wakamihedha emeleli aye owodha opemberha muya dhabure. Mwiddani wehu ddi Satana na adomonyo aye. Yehova ononivaha malago vina nikamihedho wi niwodhe owanana. (Kengesa Éfeso 6:10-13.) Nigarumeela nikamihedho na Yehova na murima wotene, ninowodha owanana mwiddani wehu. Iyo ninele owodha omutagiha murumiwi Paulo, ologile dhahi: “Akala Mulugu oli na iyo, onniwodha bani?”—Rom. 8:31.

2. Dhilobo gani dhinasunze iyo mwari mwa mutoma obu?

² Ninga Akristu ebaribari, kaninrumeela manyengetto a Satana na adomonyo aye. Iyo ninzuzumela osunza malago a Yehova vina omulabela na murima wotene. (Masal. 25:5) Masiki egali dhawene ninotamela ozinddiyela dhimanya dhamakamaka dhinlabana Satana. Sabwaya? Sabwani kaninfuna ogwela mmadani mwaye. (2 Kor. 2:11) Mwari mwa mutoma obu iyo ninele osekeserha dhimanya dhinlabana Satana na adomonyo aye wi anyengettena attu. Ninele osunza vina marhe anawodhena iyo ompemberha.

3-4. (a) Muya dhabure txini? (b) Muttengo wa attu anrumeela okalawo wa muya dhabure oli dhavi mowiwanana dha dhopepesa dhikosiwe?

³ Murega mmodha onlabetxana Satana bwa muya dhabure. Abale anlabihedha muya dhabure anoona ninga dhinowakamihedha obe waputtula na mikalelo dhihinwodha ononelamo  attuya. Motagiha ena anloga wi muya esi dhihikaana ewodhelo ya woona vina ologa dhilobo dha musogorho na dhottanddiwa dha wirimu. Ena anrumeela wi dhinowodha ologa na amarafula. Ahikalawo anlabihedha makaga vina okwiri wi atabutxena akwawa. *

⁴ Ebaribari wi attu enjene mwilaboni anorumeela okalawo wa muya dhabure. Motagiha, matibelo a dhopepesa akosiwe ehooneya wi dhilabo 18 dha América Latina vina o Caribe mwari mwa attu araru, agavuziwa mmodhayavo onorumeela okalawo wa masarhapitto, akumbaisa, akwiri, ottamagela muttengo woligana mwari mwa dhilabo dhina anorumeela wi enowodheya ologa na adomonyo. Dhopepesa dhina dhikosiwe dhihooniha vina wi mu Afrika dhilabo dhowakwana 18 attu owinjivaya anorumeela wi akwiri ahikalawo. Kavali waganyedha wi masiki okale wuvi onofwanyela oviyang’anela na muya dhabure. Ebaribari wi Satana ‘onawakwekwettela mubureni attu otene.’—Ovuh. 12:9.

5. Monelo wa Yehova buvi modheela muya dhabure?

⁵ Yehova ddi ‘Mulugu wororomeleya.’ (Masal. 31:6) Kito iyene onoona dhavi muya dhabure? Onowidda! Yehova wahiloga dhahi na nlogo na Izrayel: “Mwa nyuwo kamukale muthu onimuddumeya mwanaye wamulobwana peno wamuyana amwiraga mukutho; kamukale muthu onombeza makaga peno onombezela dhosongorho. Kakalegemo vina muliba muniya, kampadde murobwe wa epipi, kamwaroromele anamudda, kamutamele wavuzaga azimu. Onira esene onomugwiha mara Nabuya.” (Olib. 18:10-12) Ebaribari wi Akristu a masaka abano kali mutxiddo mwa malamulo avahile Yehova nlogo na Izrayel. Mbwenye monelo wa Yehova ttangwi ya olabihedha muya dhabure kusadduwile.—Mal. 3:6.

6. (a) Satana onlabihedha dhavi muya dhabure wi aputtulena attu? (b) Mowiwanana na Kohelét 9:5, ebaribari mwaha wa amarafula jivi?

⁶ Yehova ononivaha malago a orebettana muya dhabure sabwani onoziwa wi Satana onlabana esuwene wi aputtulena attu. Satana onoziwa olabihedhe deretu ottambi—ofiyedha warumeeliha attu wi muttu agakwa onokalawovi. (Kengesa Kohelét 9:5.) Satana onolabihedha vina muya dhabure wi amwalanihe attu na Yehova. Iyene onfuna attu akuluvelege muya dhabure ottiya omukuluvela Yehova.

7. Malago gani anivahile Yehova?

⁷ Vamaromo nihoona wi Yehova ohivaha malago anloga wi jofuneya oziwa mirega dha Satana na adomonyo aye wi niwodhe otxatxama. Ovano ndoweni nirome otanalela mikalelo dhinlibiha nroromelo nehu wi ninamageye na mirega dha Satana na adomonyo aye.

8. (a) Elobo gani enikamihedha orabelana muya dhabure? (b) Nivuru na Masalmo 146:4 ninvanya dhavi ottambi wa Satana mwaha wa abale akwile?

⁸ Wengesa Mazu a Mulugu vina otanaalela. Obu mukalelo wa okooddana ottambi wa muya dhabure. Nzu na Mulugu nili ninga supadda nogwaddana ottambi wa Satana. (Ef. 6:17) Motagiha, Nzu na Mulugu ninologa wi aliba okwa kana ewodhelo yologa  makani naliba okalawo. (Kengesa Masalmo. 146:4.) Ninologa vina wi ddi Yehova bahi ona ewodhelo ya ologa mowakwana mapadduwo a musogorho. (Iza. 45:21; 46:10) Nigamwengesaga Bibilia nanda nitanaalelaga masiku otene esile dhinengesa iyo, ninele okala womala-nawale wi nikoodde ottambi na owogo onnifunana muya dhabure wi nirumelege.

9. Merelo gani ankosa epaddi ya muya dhabure anfwanyela iyo orabela?

⁹ Orabele elobo-txilobo eniwanana na muya dhabure. Ninga Akristu ebaribari kaninkosa elobo eniwanana na muya dhabure. Motagiha, iyo kaninonbeza makaga vina kanninloga na amarafula. Ninga musunzile iyo na mutoma ovirile, ninorabela dhilemelelo dhinloga wi muttu agakwa onottiya maningo a omuttu badhowa okalagawo mburo mwina. Kaninlabihedha dhottanddiwa dha wirimu nne vina kaninwodha wombeza dha musogorho, mbwenyi ninosunza ebaribari ya musogorho. (Iza. 8:19) Iyo ninoziwa merelo obe dhilemelelo dhawopiha dhiganittukulele okosa mandano na Satana vina na adomonyo aye.

10-11. (a) Elobo gani ekosile Akristu a vyaka zana dhoroma? (b) Mowiwanana 1 Korinto 10:21 Ninfwanyelela nni watagiha aKristu oroma nanda ninawodhe dhavi okosa yakene?

¹⁰ Orabele dhilobo dhiniwanana na wombeza makaga. Attu ena akala elabo ya Éfeso vyaka zana dhoroma anlabihedha muya dhabure. Mbwenye musunzile awene ebaribari ahikosa masadduwo manddimuwa momaguva. “Aliba makaga na alawula enjene andhana dhawa dhawombezana na manivuruyá, addumeyaga vathaddo. Muthengo wa manivuru na wa dhina dhowombezana dhiddumeyiwe, wali ninga kobiri matxikwi makumatanu dha parata.” (Mer. 19:19) Attu aba ahigana-wene orabela muya dhabure, txino manivuru abale awene ahinongela kobiri dhinjene. Ottiya ottukulela mburo mwina obe wavaha attu  ena aloddumeya. Awene atanalela wandana wawa na Yehova opitta kobiri dhanongeliwe manivuru.

¹¹ Ninawodhe dhavi watagiha Akristu a vyaka zana dhoroma? Egahikala yapama orabela elobo-txilobo enkosa epaddi ya muya dhabure. Orabela okuluvela ettumwa, epipi, dhilobo dhinatxutxa attu, obe nibarelo na muya dhabure.—Kengesa 1 Korinto 10:21.

12. Mavuzo gani anfwanyela iyo okosa nigafunaga osakula mavego ehu?

¹² Wanga’nanihe ogasakulaga mavego awo. Ovivuze: Manivuru anengesemi obe miselu dhintomola miyo mwinternetini s’oviteya dhinkosa epaddi ya muya dhabure? Jibo dhinvuruwana miyo na dhilobo dhina dhinonemi mu TV dhinotonyihedha masarhapitto? Ddinovolowela mavego ankosa epaddi ya muya dhabure? Ahikana maladdaniho a attu anatakuna attu akwawa (vampiros na zumbis) obe ammwa nikami vina dhonttaddiwa dhina dhihinnoneyelamo deretu? Mavego annyimula, anlabihedha masarhapitto, dhizinddiyelo dha okwiri obe ovokela obure? Kahiyo mavego otene anvolowelana na dhilemelelo dha adomonyo. Ogafunaga osakula mavego awo oromege wang’ananiha wi orabele dhilobo dhinidda Yehova. Ninofuniwana okosa guru “yoweddana murima woligana vamentoni va Mulugu.”—Mer. 24:16. *

13. Txini ehinfwanyelihu okosa?

¹³ Orabelege ologa mapadduwo obe dhitxirhape dha adomonyo. Nikale txenjewa, nisaze yotagiha ya Yezu. (1 Ped. 2:21) Ahinatti odha velaboni ya vati, Yezu wakala wirimu  vina wanziwa dhilobo dhinjene mwaha wa Satana na adomonyo aye. Mbwenye iyene kaloga merelo a Satana na adomonyo aye. Yafuna iyene yali ovaha onamoona mwaha wa Yehova, Kaagilatela owaza dhisango-sango dha Satana na adomonyo aye. Enowodheya iyo vina osaza yotagiha ya Yezu nikooddaga ogilatela ologa merelo a Satana na adomonyo aye. Mbwenyi, ‘mmurimani mwehu nizuzumele dhili dhapama’ obe dhebaribari.—Masal. 45:2.

14-15. (a) Sabwaya jani enkoddela iyo ottamagiwa marimaddi na muya dhabure? (b) Masaka abano dhilobo gani dhinoniha wi Yehova onobarela nlogo naye?

¹⁴ Kuttiddiwe marimaddi a wova muya dhabure. Masaka abano orutxa, ottiya Satana, dhilobo dhabure ninga ngovi, maredda obe okwa dhinopadduwa mohijeedheleya. Nigafwanyiwa dhilobo ninga esuwene, kanubuwele wi dhimpadduwela sabwa ya muya dhabure. Bibilia onloga wi ‘masaka orutxa na dhilobo dhohijedheleya’ dhinowafwanya attu otene. (Koh. 9:11) Mottiyana na adomonyo, Yehova ohoniha guru dhaye wapitta awene. Motagiha, Yehova kamuttiyile wi Satana ampe Job. (Job 2:6) Nsaka na Mizé, Yehova ohoniha wi iyene Mulugu wa guru wapitta anddimuwa na akumbaisa a Mwijipitu. (Obud. 8:18; 9:11) Yehova ohimvaha Yezu ewodhelo enddimuwa ya wattamagihana wirimu Satana na adomonyo aye bavokela elabo ya vati, musogorho iyene onele wafugela muvayani, agattiya mwenemo anere orimeliwa ewodhelo yotene ya watxutxa attu.—Ovuh. 12:9; 20:2, 3.

¹⁵ Ovano nihikana dhotagiha dhinjene dhinoniha wi Yehova onobarela nlogo naye. Karoma otanalela nipadduwo ntti: Iyo ninolaleya vina ninosunziha elabo yotene. (Mt. 28:19, 20) Ninowodha ovitula dhimanya dhetene dha Satana. Mohaganyedha, Satana kokana ewodhelo ya ogomihana mabasa ehu, iyene agahigomiha, mbwenye kanwodha. Noona kavali mwaha wa iyo ottamagiwa marimaddi na muya dhabure. Iyo ninoziwa wi: “Nabuya onowona dhetedhene dhiniriwa mwilaboni; iyene onoatanala abale animuroromela.” (2 Map. 16:9) Akala iyo ninomuroromela Yehova, adomonyo kanawodhe onirela obure.

16-17. Kavaha yotagiha ya oliba murima ofiyedha opemberha muya dhabure.

¹⁶ Enofuneya oliba murima wi niwodhe owanana muya dhabure, makamaka akala akwehu obe anamudhi ofiyedhana anonifwarafwara. Mbwenyi Yehova onowaruriha abale antonyihedha oliba murima. Ndoweni nitanaalela yampadduwele murogora Erica onkala elabo ya Gana. Mwakwanihedhiye vyaka 21 wahiroma omusunza Bibilia. Iyene wali mwana wa munddimuwa wa kapela walabihedha masarhapitto, noona amudheya anjedhela wi iyene vina aganlabihedha dhilemelelo dha oja dhinama dhakutteliwa amilugu a babe. Mukoddele Erica okosa dhilemelelo eso, amudhaye onile ninga iyene wela waruwana amilugu a babe. Awene obuwela wi amilugu abale agihimutabutxa.

¹⁷ Anamudhi a Erica ahimukokela wiwelela dhimelelo esile, mbwenye iyene karumelile ofiyedha ottamagihiwa vatakulu va babe. Anamoona a Yehova ahimwakela bagakalana vatakulu vawa. Yehova wahimureliha Erica modhela wafwanya anamudhi a nroromelo noligana adhile okala ninga abale. (Mk. 10:29, 30) Masiki attamagihiwe vatakulu va amambali aye vina addumeyeliwe dhilobo dhaye, Erica walivi wororomeleya na Yehova ofiyedha obatiziwa vina okala pionera wa mudhidhi wotene. Iyene karumelile otxutxiwa na adomonyo. Modhela anamudhi aye iyene ohiloga wi: “Miyo ddinolobela masiku otene wi amudhaga amuziwe Yehova awodhe ofureleya na muya dhabure vina amulabege Yehova Mulugu wokwela.”

18. Mareliho gani anakele iyo nigamukuluvela Yehova?

¹⁸ Wehiwa wa nroromelo nehu onottiyana. Enofuneya iyo notene owanana muya dhabure vina nimukuluvelege Yehova. Nigera dhawene ninele wakela mareliho menjene vina ninele opemberha mirega dha Satana. Kaninattamagiwe marimaddi ananittiyihe omulabela Yehova. Ottiya ejo, ninele owaraliha mandano ehu na Yehova. “Mukurumuwelegení Mulugu.” Olebile ddi murumiwi Tiago. “Mmukoddege satana; iyene onere owuthawelani uddayi-wene. Mmususele Mulugu, iyene onowususelani.”—Tia. 4:7, 8.