1-2. (a) Ottambi gani enlabihedha Satana wila anyegettena attu? (b) Txini enasunze iyo mwari mwa mutoma obu?

SATANA ddi ‘babi w’ottambi,’ iyene onowanyengetta attu oromana nsaka nipaddutxiwe nlogo na attu. (Jo. 8:44) Mwa ottambi onlabihedhiye ottambi mmodhaya bubu wa masunzo a onyengetta anloga wila muttu agakwa onokalawovi. Dhilemelelo na masarhapitto a mizimu ankosiwa na attu mwilaboni andela mwari masunziho abuwene. Mwaha wa ejuwene, abali na arogora ehu enjene ‘anowanana nroromelo’ akala mmudhawa okwa obe muttu agakwa mmuruddani mwawa.—Juda 3.

² Akala weyo onofwanyiwa dhoweha, onakose eni wi owodhe otonyihedha dhinsunziha Bibilia mwaha wa amarafula? (Ef. 6:11) Onawodhe dhavi wapangarhaza vina walibiha abali a mmulogoni agadideliwa na dhilemelelo dhinimusilidha Mulugu? Mwari mwa mutoma obu ninele wona malago annivaha Yehova. Vamaromo, ndoweni none enloga Bibilia mwaha wa abale akwile.

3. Ottambi woroma odhilena yopurelamo gani?

³ Mulugu kafunile wila attu akwege. Mwapaddutxeliye Adamu na Eva wafunana wi akalegewo na mukalakala, Yehova wahavaha malago ohirutxa aloga: “Ohije-wene milima dha muri onziwiha opama n’obure, vawi sikuntho ninaje weyo, onere okwa.” (Wita 2:16, 17) Satana ohidhana makattamiho. Alabihedhaga nowa ologa dhahi na Eva: “Nne kamunakwe.” Mokubanya-mwene, Eva wahirumela ottambi obule baattukula mulimaya baja. Nomala banvaha mamunaye vina baja. (Wita 3:4, 6) Mwa dhawene, ottega na okwa ohapatta attu otene.—Rom. 5:12.

4-5. Satana onanyengetta dhavi attu enjene?

 ⁴ Adamu na Eva ahikwa, ninga mwalogile Mulugu. Mbwenye Satana kattiyilevi ozivala mwaha wa okwa. Movira wa mudhidhi, iyene onowitavi ottambi mwina mwaha wa okwa. Ottambi mwinaya, bwa masunzo awi maningo bankwa mbwenye epaddi yina ya muttuya enokalawovi, txino ninga muzimu. Ohikalawo ottambi onanyengettaniye attu mpaka masaka abano.—1 Tim. 4:1.

⁵ Attu enjene anrumelelani onyengettiwa? Sabwaya jawi kavo muttu ona efunelo y’okwa. Vowi iyo nittanddiwe n’efunelo yokala nokala-wene. (Koh. 3:11) Iyo ninoona okwa ninga mwiddani wehu. (1 Kor. 15:26) Nona, Satana onottidda mubuwelo obo wa attu wi anyengettena attu enjene.

6-7. (a) Satana onowodha ovita ebaribari mwaha wa okwa? Katapulela. (b) Ekaleleni ya deretu oziwa ebaribari enloga Bibilia mwaha wawova amarafula?

⁶ Masiki akose muli mwetemwene, Satana kanwodha wavitela attu etene ebaribari mwaha wa okwa. Txibarene, masaka abano attu enjene anoziwa ebaribari ensunziha Bibilia mwaha wa okwa vina njedhelo na ovenyihiwa mukwani musogorho. (Koh. 9:5, 10; Mer. 24:15) Ebaribari eji enonipangarhaza, enogomiha wova wehu vina waganyedha. Motagiha, iyo kaninawova abale akwile, nne wubuwela wila amudhihu akwile anotabuwa. Iyo ninoziwa wi awene ahikwa vina kanwodha onitabutxa obe onitxutxa. Ali ninga angona tturho enddimuwa. (Jo. 11:11-14) Iyo ninoziwa wila amarafula kanoona ovira wa mudhidhi. Nona, ovenyihiwa mukwani ogaroma, masiki abale akwile wale okwaranya vyaka zana, kanubuwele wi vahivira masaka.

⁷ Kunrumela wi ebaribari mwaha wa amarafula bwa wiweya vina bononeleyamo? Ehittiyana na ottambi wa Satana wohaganyedheya! Ottiya wanyengetta attu, onologa ottambi apigidhaga oderetu wa Muttanddi wehu. Wi ninonelemo goi entota Satana ninele wona dhowakula dha mavuzo aba: Ottambi wa Satana ompigidha dhavi oderetu wa Yehova? Ottambi obu onveyiha dhavi mukutto wa yobolo okosile Yezu? Onttabwiha dhavi otabuwa na goi ya attu?

8. Ninga munlogela Jeremiya 19:5, ottambi wa Satana ompigidha dhavi oderetu wa Yehova?

⁸ Ottambi wa Satana mwaha wa okwa onopigidha oderetu wa Yehova. Ottambi obu  bwa masunzo onyengetta awi muttu agakwa ondowa omottoni. Masunziho ninga abo anomusilidha Yehova! Dhavi? Ottambi obu ononihedhamo wi Yehova kanna okwela vina ddwabure ninga Ddiabo. (1 Jo. 4:8) Ononamo dhavi na mubuwelo obu? Yehova ononamo dhavi? Mwebaribari, Yehova onowidda obure na opanga.—Kengesa Jeremiya 19:5.

9. Ottambi wa Satana ompatta dhavi mukutto wa yobolo okosile Yezu ninga munlogela nivuru na Joau 3:16 na 15:13?

⁹ Ottambi wa Satana mwaha wa amarafula onveyiha dhavi mukutto wa yobolo okosile Yezu. (Mt. 20:28) Ottambi mwina wa Satana bwa ologa wi maningo anokwa mbwenyi muzimu onovenyamo. Akala jijuwene iyo notene nigankalawovi. Kristu kafwanyela ovaha egumi yaye wila okale mukutto wa yobolo wi akuputte dhotega dhehu nivahiwe gari yokalawo namukalakala. Mbwenye okwa wa Yezu nlagiho na okwela onddimuwa ottambirile nlogo na attu. (Kengesa Joau 3:16; 15:13.) Kobuwela mukalelo wewilemo Yehova na Mwanaye sabwa ya masunziho amputtula mukutto wa yobolo!

10. Ottambi wa Satana onttabwiha dhavi otabuwa na goi ya nlogo na attu?

¹⁰ Ottambi wa Satana mwaha wa okwa onottabwiha otabuwa na goi ya nlogo na attu. Mwana agakwa ababe txino anowiwa wi mwanenyu odhowile odhulu Mulugu omuttukula. Ottambi obu onopangarhaza obe onttabwiha goi ya ababe? Ottambi mwina bwa oddumeyihiwa omottoni. Awene anosunziha wi Mulugu onowatxutxa attu na motto. Ena akoodda masunziho abo abure a makapela atomeyiwa va pingirizini addumeyiwaga na motto. Mowiwanana na nivuru Inquisição Espanhola, attuya akosa dhobure eso obuwela wi anowavaha a hereges “nlagiho nawi awene agahitabutxiwa na mukalakala modhela oddumeyiwa na motto,” ahinatti okwa anfuneya otxinuwa wi ahidhowe omottoni. Attu enjene mwilaboni anowebedha, anolobelela obe ohela mukutto wa amarafula wi akele maruriho. Ena ankala ninga akana murenddele sabwani annova otabutxiwa na amarafula. Mokubanya, ena anorumeela ottambi wa Satana ohinvaha nipangarhazo. Onowatabutxa na wova vina odhugudheya abale anrumeela.

11. Marhe gani anlabihedha Akwehu na anamudhiya wi anizuzumihe?

¹¹ Omukwela Mulugu na Mazu aye enele onikamihedha omwiwelela Yehova nigafara-fariwaga na akwihu obe na anamudhi ehu, masiki akaanaga efunelo yaderetu vannididelani okosa dhilemelelo dhihiniwanana na malamulo a Yehova. Txino awene anowubuwela onizuzumiha modhela ologa wi iyo kanaziveliwa na marafulaya obe modhela ologa wi sabwa ya iyo okodda okosa elemeleloya, muzimu wa marafulaya kunadhowe, mbwenye onelege watxutxa attu aliwo. Nigagumanana makattamiho ninga abene ninawodhe dhavi obarela ebaribari ya mbibiliani? Koona magano a bibilia ananikamihedhe vina mikalelodha dha olabihedha.

12. Dhilemelelo gani dhihiniwanana na Bibilia?

¹² Kakala ‘womala nawale wi orabele’ dhilemelelo dhihiniwanana na magano a Bibilia. (2 Kor. 6:17) Elabo y’oKaribi attu enjene anorumeela wi muttu agakwa “muzimu” waye onoroma okalawo mudhidhi mung’onovi na attu aliwo wi aatabutxe abale okoddile onvaha ttima. Nivuru dhahi ninloga wi: “muzimu” onodha “otota mbigiddi munddimuwa mmuruddani.” Elabo ya Afrika attu anozugunutxa supeyo eli vatakulu va marafulaya. Sabwaya? Attu ena anubuwela wi marafulaya onowooneya  musupeyoni! Iyo ninga emeleli a Yehova, kanirumele okosa mpaddi wa dhilemelelo eso dhinwaraliha ottambi wa Satana!—1 Kor. 10:21, 22.

13. Mowiwanana na nivuru na Tiago 1:5 txini enfanyeliwe okosa ogaganyedhaga elemelelo enimusilidha Yehova?

¹³ Akala weyo onowaganyedha elemelelo ehiniwanana na Bibilia, kalobela okumbiraga nikamihedho. (Kengesa Tiago 1:5.) Ngamala kapepesa vina kawona enloga manivuru mwaha wa mutoma obo. Egakala yofuneya kaavuze anddimuwa a mmulogoni. Awene kanaloge enfanyeliwe okosa mbwenye anele wukamihedha modhela magano attima ali mBibiliani, ninga abale oonilehu mundduni. Ogafara magano aba onele oshagiha “ewodhelo yawo ya othiyaniha” vina onele owodha “othiyaniha dhabure na dhapama.”—Aheb. 5:14.

14. Txini enfanyeelihu okosa wi ninakwakwattutxe attu ena?

¹⁴ ‘Mwiraga elobo jilobo, tamelaní omuthithimihana Mulugu, mweddelo wenyu kumukwakwattutxe muthu.’ (1 Kor. 10:31, 32) Elobo yina enfanyeelihu oziwa nigafunaga ogana okosa elobo, ja wubuwela mukalelo ononelemo attu ena, ttabwa-ttabwa abalihu omuyani. Kaninfuna omukwakwattutxa muttu! (Mk. 9:42) Ottiya ejuwene, ninfuna nikale pasope wi ninasilidhe abale ahili Anamoona. Okwela onele onittukulela ologa na awene na mukalelo wofanyeela, obuwene onimuhagalaliha Yehova. Iyo txipo kaninfuna owakulana na awene nne kaninfuna obedda obe oteya dhilemelelo dhawa. Wubuwelege wi okwela ohikana ewodhelo! Nigalagihaga okwela modhela olagiha nriho na ntanaalelo, ninodha oddiginya murima wa anamudhi ehu na akwehu ahili Akristu.

15-16. (a) Ekalele nni yamakamaka waziwiha attu ena wi nili Anamoona a Yehova? Kavaha yotagiha. (b) Ninalabihedhe dhavi mazu aba a Paulo anfwanyeya munivuruni na Roma 1:16?

¹⁵ Kaziwiha mmuruddani mwawo wi weyo oli Munamoona wa Yehova. (Iza. 43:10) Anamudhi na anamwanddamani awo txino anosilidhiwa sabwa ya weyo okodda okosa dhilemelo dha muruddani mwawo, mbwenye akala awene anoziwa wi oli Munamoona wa Yehova, kinawurutxe owanana makattamiho abo. Francisco onkala elabo ya Moçambique, ohileba: “Vasunzilehu ebaribari miyo na mwadhaga Karolina nihawaddela amudhihu wi kanina webedha vina amarafula. Nsaka nikwile mbale  wa Karolina nroromelo nehu nahehiwa. Elemelelo ya vamuruddaniva jawi vagakwa muttu mmudhi wofiyedheya wa marafulaya agone mattiyu mararu vakovani vahabihiwe marafulaya. Attuya anorumeela wi elemelelo eji enokurumutxa muzimu wa marafula. Vowi Karolina wali mmudhi ofiyedheya wa marafulaya, anamudhi ena afuna wi iyene agone vakovani.”

¹⁶ Txini ekosile Francisco na Karolina? Francisco onotapulela: “Iyo ninomukwela Yehova vina ninfuna nimuhagalalihe, egali dhawene, nahikoodda okosa elemelelo ejile. Anamudhi a Karolina ahidhugudheya vaddiddi. Awene ahiloga wi ekosilihu yalagiha wi kanina nriho na amarafula vina agagwadda onamudhi. Vowi iyo nahimala watapulelamo nroromelo nehu, kanakulile dhalogani bali osilidhiwene. Anamudhi ena ahinonelamo, nona kasilidhiwe vowi ahimala oziwa yeddelo yehu. Movira wa mudhidhi anamudhi a Karolina ahikurumuwa vina nahiyelela wili onamudhi wehu. Ena ahifiya vatakulu vehu akumbirhaga manivuru”. Ogagumana na makattamiho ninga aba kukane manyazo mwa ologa ejile enrumeeliwe, kaloga ebaribari mwaha wa amarafula!—Kengesa Roma 1:16.

17. Txini enanikamihedhe okala amarho a ebaribari akala mbalihu onokubanya sabwa y’okweliwa?

¹⁷ Mbali obe murogora agakweliwa mmudhi wokweleya, ninofwanyela okosa kukuttu wi nikale amarho a ebaribari, ninga munlogela Bibilia: “Mukwawo-mukwawo, ddule oniwanana na weyo midhidhi dhetedhene; nsaka n’osegedheya akalá mmudhawo.” (Gano 17:17) Ttabwa-ttabwa akala mbaliya obe murogoraya ondideliwa okosa dhilemelelo dhihiniwanana na Bibilia. Egapadduwa dhawene ninakose eni wi nilagihe okala ‘a marho a ebaribari’? Akalawo magano meeli ali mBibiliani ananikamihedhe wapangarhaza abale ankubanya sabwa y’okweliwa anamudhi.

18. Txini emuthukuleli Yezu otomola kutto, nanda ninsunzavo eni na yotagiha eji?

¹⁸ “Onlaní na abale anunla.” (Rom. 12:15) Dila dhina kaninwodha osakula mazu ologa na muttu onkubanya sabwa y’okweliwa mmudhaye  wokweleya. Mudhidhi ninga obo, mintori dhehu dhinologa vaddiddi opitta mazu. Vakwile Lazaro marho wa Yezu, arogoraye Marta, Maria na akwaye enjene anunla. Vafiyile Yezu vahivira malabo manayi, iyene ‘wahitomola kutto’ vawoneliye akwaye onlaga, masiki aziwaga wi agahinvenyiha mukwani. (Jo. 11:17, 33-35) Mintori dha Yezu dhinolagiha mukalelo oniwamo Yehova nigatabuwaga, eji ehoniha kakamwe mukalelo wakwela Yezu anamudhi a Lazaro, dhawene kavali waganyedha wi Marta na Maria ahakela nipangarhazo. Na mukalelo wakakene abali a mmulogoni agoona okwela wehu na ntanaalelo, anele oziwa wi kali oka, vowi akaana amarho anakwela vaddiddi.

19. Akala mukristu onokweliwa mmudhaye ninawodhe dhavi olabihedha Kohelét 3:7 wi nimpangarhaze?

¹⁹ “Nsaka n’omàla, nsaka n’ologa.” (Koh. 3:7) Mukalelo mwina wa ompangarhaza Mukristu okweliwe mmudhaye, bwa okala namewa waderetu. Kamuthiye iyene ologa dhotene dhili mmirimani mwaye vina kuvahe ttima ‘mazu ohitanaleleya.’ (Job 6:2, 3) Txino mbaliya osilidhiwa vaddiddi sabwa ya mmudhaye ohili Munamoona. Akala eli dhawene, kalobela na iyene, omuttidde myeddo Yehova ‘namakela malobelo’ onomukamihedha mbaliya okana guru vina wubuwelaga nofwasa. (Masal. 65:2) Egawodheya kamwengese Bibilia na iyene, obe wengese mmanivuruni mwehu mitoma dhinfanyeelela makaniya, ninga mapadduwo a mwigumini wi anpangarhaze.

20. Txini enasunze iyo mmutomani onfarela?

²⁰ Yehova onivaha gari enddimuwa ya oziwa ebaribari mwaha wa okwa vina njedhelo na ovenyihiwa mukwani! (Jo. 5:28, 29) Nona kuwove ologa ebaribari ya mBibiliani, egawodheya mudhidhi mudhidhivi kaloga ebaribari na attu ena. Mbwenyi mukalelo mwina onlabihedha Satana wi apupurutxe attu bubu: Masarhapitto, anfwanyeya mmavegoni vina dhokosa dhehu dha siku-siku. Mutoma onfarela, ninele wona mwahaya onfwanyelihu orabela.