1. Elobo gani entamela okosa adhari etene a Mulugu, nanda sabwaya jani? (Koona foto ya kapa.)

YEZU KRISTU waharuma anamafwara aye eraga “dhowaní, . . . mwasunzihe athu a malogo otene.” (Mt. 28:19) Adhari ororomeleya a Mulugu anosunza mawodhelo a ‘ovilibihedha mowakwana na mabasa awa,’ mabasaya aba awene ahiroma. (2 Tim. 4:5) Mwa mabasa otene aliwo, aba mabasa a makamaka vaddiddi vina a namaguve sabwani anovuna dhigumi. Noona dila dhina vanokala makattamiho a oviperhekela mudhidhi wehu ninga mwafunelihu.

2. Maguddulano gani angumanana iyo abuwene ahinniwodhiha olaba mowakwana mabasa ehu?

² Ahikalawo mabasa mena amakamaka anfuna mudhidhi na guru dhehu. Iyo nikaana mabasa ovisapelana nanya vamodha na amudhehu. Masaka mena txino ninokaana muttorho wa wakamihedha amudhehu anpattiwa masaso a maredda, odhugudheya na wuluvala. Ninawodhe dhavi wakwanihedha mabasa ehu vari va maguddulano ninga aba?

3. Ninsunzavo eni na mazu alogile Yezu ali munivuruni na Mateu 13:23?

³ Kuwobane akala mikalelo dha mwigumini mwawo kadhinuttiya olaba mabasa a Yehova ninga munfuneliwe. Yezu wanziwa wi muttengo wa dhobala dhehu Dhomuyani dhigahittiyana. (Kengesa Mateu 13:23.) Yehova onottittimiha esile dhinimukosela iyo na murima wotene bari munwodhelihu. (Aheb. 6:10-12) Dhihikalawo dhipaddi dhinawodhe iyo okamihedha akala mikalelo dha mwigumini mwehu dhinonirumeliha wi nikose dhilobo dhinjene. Mwari mwa mutoma obu ninele otanaalela mawodhelo a wika mabasa a olaleya  vamburoni voroma vina wunuwiha mabasa ehu a olaleya na osunziha. Vamaromo, ninfuna niloge txini entapulela ovilibihedha mowakwana mabasa ehu a olaleya.

4. Ovilibihedha mowakwana mabasa ehu entapulela eni?

⁴ Na mazu ohirutxa, ovilibihedha mowakwana mabasa ehu entapulela olaba ninga munwodhela iyo olaleya vina osunziha. Mbwenye okosa ejoya enofuneya oviperhekela olaba mudhidhi mwinjene. Ninkosela ejuwene sabwani elobo yamakamaka vamentoni va Yehova. Ninolaba ninga munwodhela iyo sabwani ninomukwela Yehova vina anamwanddamani ehu. * (Mk. 12:30, 31; Kol. 3:23) Omulaba Yehova na murima wotene kuloga olabihedha guru dhehu, eziwelo na ewodhelo yehu mmabasani aye. Iyo ninotamaalela vaddiddi gari ya mabasa a wakosa anamafwara nanda ninovilibihedha okosa na murima wotene.

5-6. Kavaha yotagiha enoniha wi jowodheya muttu ohina mudhidhi wika mabasa a olaleya vamburoni voroma.

⁵ Motagiha, kobuwela wi okalawo muzombwe onziveliwa omoba viyola. Iyene onoziveliwa-wene nanda onomoba na ewodhelo yaye yotene. Mbwenye iyene okuweliwa mwego mungulihiwa dhoja wi amobegemo viyola sabuddu na ddimingu. Kobiri enttambirha iyene ehiyeva vaddiddi. Noona ohitamela mabasa a muloja abuwene anlabiye txiposi mpaka ishano. Masiki vanlabiye muloja, onokwelavi omoba viyola. Onotamela wenjedhedha ewodhelo yaye ya wiba wi akale mabasaye, masiki akanaga mudhidhi mung’onovi iyene onodhowavi amobaga viyola.

⁶ Moladdana, txino weyo kuna mudhidhi mwinjene wa okosa mabasa a olaleya. Mbwenye onoziveliwa olaleya. Weyo onovilibihedha wenjedhedha ewodhelo yawo wi owodhe oddiginya mirima dha attu na miselu dhapama. Vowi ohikaana mittorho dhina dhawakwanihedha, enorutxa okosa mabasa a olaleya ninga munfuneliwe.

7-8. Iyo ninawodhe dhavi omutagiha Yezu na mukalelo wa olaleya?

⁷ Mukalelo wona Yezu mabasa a olaleya yotagiha enddimuwa vaddiddi wa iyo. Elobo ya makamaka yazuzumeliye yali ologa Omwene wa Mulugu. (Jo. 4:34, 35) Yezu ohedda makilometro na makilometro wi awodhe olaleya muttitti mwinjene wa attu. Iyene wanloga vattaddo na attu enjene vina numba na numba, kattiya vego nne vina mudhidhi ovira s’olaleya. Mabasa aye velaboni ya vati ali olaleya.

⁸ Epaddi mmodha ya omusaza Yezu ja otamela olaleya miselu dhapama mudhidhi-mudhidhivi vina vego-vegovi vanfwanyiwehu. Vina nili wotapuwa wila niwodhe ovilevela mmalaleyoni. (Mk. 6:31-34; 1 Ped. 2:21) Ena mmulogoni anokala apionero a vawoka, ena mudhidhi wotene obe okamihedha. Abali anosunza elogelo yina wila amwalele wego onjombeliwa anamalaleya. Mabasa menjene a olaleya ankosiwa na anamalaleya ahinwodhetxa olaba mudhidhi wotene mbwenye anovilibihedha. Masiki dhawene Yehova kanakokela okosa ehinwodhani. Iyene onfuna wi notene niziveliwe na ovilibihedha wehu olaleya ‘muttaka operhengezeliwehu, ondha wa Mulugu wottittimeya vina wotamaleleya.’—1 Tim. 1:11; Olib. 30:11.

9. (a) Paulo owodhile dhavi wika mabasa a olaleya vamburoni voroma masiki akosaga mabasa mena? (b) Nivuru na Merelo 28:16, 30, 31 ninlagiha dhavi mubuwelo wa Paulo na mabasa a olaleya muttaka wa pama?

⁹ Murumiwi Paulo ohinittiyedha yotagiha yina ya muttu wikile mabasa a olaleya vamburoni voroma mwigumini mwaye. Oleddo waye wanawili wa omisionario wahivira o Korinto, iyene waana kobiri eng’onovi noona wantamela mudhidhi wa omaga misasa wi avisapelena. Masiki dhawene, Paulo kawona mabasa a omaga misasa ninga a ttimaya-ttimaya. Iyene walabela wi awodhe okamihedhana mabasa a olaleya miselu dhapama o Korinto ‘ahimulogosaga muttu.’ (2 Kor. 11:7) Murumiwi Paulo wankosa mabasa a ovisapelana, mbwenye iyene wazuzumeletxa mabasa a olaleya ekaga vamburoni voroma, wandowa olaleya muttaka wa pama na Masabuddu. Murumiwi Paulo mwamaleliye ogumanana makattamiho, wahiwararela mabasa a olaleya. Iyene ‘wavilevela mabasa a olaleya, alibihaga vali Ayuda wi Yezu ddi Kristu.’ (Mer. 18:3-5; 2 Kor. 11:9) Osogorhowa, vafugeliwiye o Roma wanalaleya adha omoona vina wanalebela makarta. (Kengesa Merelo 28:16, 30, 31.) Wahigana okosa mabasa a olaleya muttaka. Iyene Wahileba: “Mulugu onithomela mabasa aba . . . , nona kaninojeyela.” (2 Kor. 4:1) Ninga Paulo kaninfuna onyonga mudhidhi na mabasa mena ankosihu, jofuneya wonaga mabasa a olaleya ninga a makamaka.

10-11. Ninawodhe dhavi ovilibihedha mowakwana mabasa ehu akala nili aredda?

¹⁰ Akala weyo kunwodha olaleya numba-numba sabwa ya masoso a mwigumini ninga wuluvala, katamela marhe meena a olaleyana. Vyaka zana dhoroma, anamalaleya ena anlaleya vego-vegovi vafwanyani attu. Awene ampura gari eli yotene wi alaleya ebaribari murampani, numba-numba—‘vanamwinjini obe vattaddo.’ (Mer. 17:17; 20:20) Akala kaninwodha wedda, nitamelege vego vangumana attu vamurunti nigilati nalaleyaga attu alivo. Nitamelege olaleya modheela ovaha onamoona wagari, oleba makarta,  ologa na muttitto. Anamalaleya enjene ana makattamiho ahitagiha malabelo aba nanda ahifanya mareliho menjene na mabasa a olaleya.

¹¹ Akala weyo vina onofwanyiwa makattamiho oligana, jowodheya ovilibihedha mowakwana mabasa awo. Karoma woona yotagiha eji ya murumiwi Paulo. Iyene ohiloga: “Ddinowodha dhetene na guru dha Kristu onddilibiha.” (Fil. 4:13) Txibarene murumiwi Paulo wahitamela olibihiwa mudhidhi wafanyiwe iyene eredda muleddoni mwaye wa omisionario. Iyene wahalebela akadda Galásia dhahi: “Munowubuwela wi dila yoroma yuperhekelenimi muthaka, ddali muredda.” (Gal. 4:13) Moligana, mubulelani mwenyu munofwanyamo gari ya olaleya muttaka wapama abale anda owoonani, adotoro, enfrimero, aredda ena vamodha na abale anukamihedhani. Attu aba, enjiya kankala vatakulu mudhidhi onkosa abalihu ena mabasa a olaleya mmuruddani numba-numba.

12. Mento “othorhorha” entapulela eni?

¹² Yezu ohiloga: “Mento ji panti ya maningo: agathorhorha, maningo awo anowedda muwaryani.” (Mt. 6:22) Dhologa esi dhintapulela nni? Dhintapulela ozuzumela elobo modha, akala ninfuna nivugulela dhokosa dha mwigumini mwehu, kaninrumeela ozuzumihiwa na dhilobo dhina. Yezu mwinyene wali tagiha wa mazu aye, mwigumini mwaye walibela mabasa a olaleya vina wakamihedha anamafwara aye omulabela Yehova na Omwene waye. Iyo ninimutagiha iyene  sabwani ninzuzumela mabasa a Okristu ‘nitamelaga voroma Omwene wa Mulugu na wira dholigana.’—Mt. 6:33.

13. Txini eganikamihedhile ozuzumela mabasa a olaleya?

¹³ Dila yina ya ozuzumela mabasa ehu a olaleya ja ovugulela dhokosa mwigumini mwehu, dhawene iyo ninele okana mudhidhi wa wakamihedha attu okana eziwelo vina omukwela Yehova. * Ninga motagiha, enele owodheya weyo olaba mudhidhi mung’onovi mabasa mena, wi winjivihe mabasa a olaleya? Obe ovugula mavego mena agajile mudhidhi mwinjene?

14. Masasanyedho gani akosile atelani aba wi afwanye mudhidhi mwinjene wolaleya?

¹⁴ Jijuwene ekosile munddimuwa wa mulogo onkuweliwa Elias na mwadhiye. Iyene ohiloga: “Iyo kanawodha oroma olaba ninga apionero, dhahikalavo dhilobo dhafuneya wi nirome otadela. Nahikosa matxinjo mang’onovi mwigumini mwehu nanda nahiroma olaleya. Motagiha, nahiroma ovugula dhogula, ogwadda mavego aninongela mudhidhi, nahiloga na azugu ehu omabasani wi anivahe mabasa omaguva wi niwodhege oworuwa namutanene. Nahifwanya yopurelamo, okosa mabasa a olaleya namattiyu, weddiha masunziho a Bibilia, vina nambudduwa mmalaleyoni dila bili vasumanani mweri wotene. Eji yahinagalaliha vaddiddi!”

15-16. Mowinanana 1 Timóteo 4:13, 15, ninawodhe dhavi wunuwiha ewodhelo yehu mmabasani a olaleya? (Koona kasha “ Dhogana Dhinaddikamihedhe Ovilibihedha Mowakwana.”)

¹⁵ Mukalelo mwina wa ovilibihedha mowakwana mabasa ehu bwa wunuwiha ewodhelo  yehu mmabasani a olaleya. Motagiha, mowiwanana na nibasa tti nibasa, anamalabaya anofwanyela oshagihiwa. Yokokene enopadduwa vina na anamalaleya. Enofuneya iyo odhowagavi banigasunza wi niwodhe wunuwiha ewodhelo yehu mmabasani a olaleya.—Gano 1:5; kengesa 1 Timóteo 4:13, 15.

¹⁶ Ninawodhe dhavi odhowavi nunuwihaga ewodhelo yehu mmabasani a olaleya? Modhela ofwaseyela malago ali mu Yeddelo Yehu Yokristu mmatugumanoni vari va sumana. Matugumano aba anonishagiha odhowavi banigonuwiha ewodhelo yehu mmabasani a olaleya. Motagiha, akala musogorheli wa matugumano ononivaha malago aniwanana na epaddi ekosile iyo, nivilibihedhe wakwanihedha malagoya wi anikamihedhe wunuwiha mabasa ehu. Nittiddihedhe malagoya dila yina nigalogaga na muttu sabwa ya ebaribari. Nigafuna ninvuze musogorheli wa nikuru na mabasa a olaleya wi anikamihedhe mmalaleyoni, namalaleya wa ewodhelo, pionero, obe musogorheli wa murudda. Jofuneya osunza olabihedha Dhipano Dhosunzana, venevo iyo ninele ohagalala na mabasa a olaleya vina osunza dhilobo dhinjene.

17. Elobo gani enagumele weyo ogavilibihedha mowakwana na mabasa awo?

¹⁷ Mohaganyedha Yehova onivaha gari ‘yolaba vamodha’! (1 Kor. 3:9) Weyo ogakaana ‘ebaribari yoziwa dhilobo dhattima’ ozuzumelaga mabasa a olaleya ‘onele omulaba Yehova n’oziveliwa.’ (Fil. 1:10; Masal. 100:2) Ninga mwimeleli wa Mulugu, onele okana ebaribari wi iyene onele wuvaha guru dhinfuniwe wi ovilibihedha mowakwana mabasaya masiki ogumanagana makattamiho menjene. (2 Kor. 4:1, 7; 6:4) Akala onokosa apale vanwodhela weyo mmabasani a olaleya masiki vang’onovi obe venjene ‘onele okaana ohagalala.’ (Gal. 6:4) Ogavilibihedha mowakwana mabasa awo, onowoniha wi txibarene onomukwela Yehova vina mwanddamani wawo. “Kalelá ntidi esidhá. Dhahene onovivuna weyo, vina abale anuvuruwana.”—1 Tim. 4:16.