Winston kanaddelelemo mukalelo omuziwiliwe Mulugu.

Miyo ddibaliwe ntakulu naana relijiau. Nakala murudda weettaniwa Queensland elabo ya Australia wali murudda wolapelana na dhina, miyo kaddana mandano na attu ena ottiya na amudhihu. Vana miyo vyaka 12 ddahiroma otamela ebaribari ya Mulugu. Ddahilobela ddikumbirhaga wi Mulugu addikamihedhe oziwa ebaribari. Mmalelimi ddavenyamo mmuruddani mpule baddidhowa otamela ganyo epaddi yemara murudda mwina weettaniwa Adelaide ogusuni elabo ya Australia. Mwakwanihedhe miyo vyaka 21 ddahibudduwa feriya baddidhowa waredha elabo ya Sydney wenewo omuziwilemi Pam. Iyene wahiddaddela nikuru na relijiau enittaniwa Israelismo-Britânico, relijiau eji enloga wi akadda britânico anokosa epaddi ya “maziza a malogo kumi arimeelile a Izrayel.” Mowiwanana na dhorumeela esi, malogo kumi orimela malogo a omwene wa omadhulu wa Izrayel, adhowele wutxedhiwani mwari mwa vyaka 800 na 700 Kristu ahinabaliwa. Mwiyelele miyo omabasani elabo ya Adelaide ddahimwaddela mukwaga mmodha womabasani makani aba. Iyene wela oroma-wene omusunza Bibilia na Anamoona a Yehova, nahimala mawora menjene nitakunelaga yeddelo obe dhirumela Anamoona a Yehova. Pavenevo vonile miyo wi malobelo akosilimi ddigali mwana elawakuliwa. Ddela osunza ebaribari ya Muttanddi waga vina Omwene waye! Yali ninga ddafwanyile “mafumo a ttima.”—Mt. 13:45, 46.

Pam, weyo vina oromile otamela mafumo omuyani ogali mwana, kanaddelemo. Ofwanyile dhavi?

Miyo ddileliwe na anamudhi ana relijiau. Nakala o Coffs Harbour, epaddi y’ogusuni ya Nova Gales. Amambali aga afwara elemelelo ya Israelismo-Britânico. Miyo murogoraga mimaya  na mbalaga munddimuwaya vamodha a anavili aga otene nasunzihiwe wi mulugu onareeliha ziza na akadda Britânica. Mbwenyi mmirimani mwaga miyo kaddarumela. Ddanfuna oziwa ebaribari ya Mulugu. Mwakwanihedhe miyo vyaka 14, ddahivolowa mmakapelani menjene ninga Anglicana, na Batista, na Adventista do sétimo dia na meena. Masiki egali dhawene ddahikanavi nttona na ebaribari.

Mmalelani nahimwalela o Sydney na amudhaga. Pavenevo vamuziwile miyo Winston wali aredhaga wenewale. Ninga mulogeliye, iyo nanloga makani menjene modhela relijiau, ejo yahimuttukulela omusunza Bibilia na Anamoona a Yehova. Majangarha addiperhengeziye anekamo malebo menjene a Bibilia! Vamaromo-vene miyo ddahizuzuma—ddahisilidhiwa vaddiddi. Vang’ono-vang’ono ddahiroma ozinddiyela txeza yebaribari.

Yaka ya 1962, ddahimwalela elabo ya Adelaide wi ddimwaddamele Winston. Iyene wahimala wakumbirha atelani a Anamoona a Yehova ettaniwa Thomas na Janice Sloman wi addittambirhe ddikalege nawene o Papua-Nova Guiné. Aweneya ahiddeddiha noderetu. Mbwenyi miyo ddana vyaka 18, ahiddikamihedha wunuwa mpaddi womuyani. Miyo ddahiroma omusunza Bibilia vina ddahoona wi ovano ddifanya ebaribari. Mutelani iyo kanigoneli, nilovolowa mmabasani a Yehova abuwene anivahile mareliho menjene. Ebaribari wi nangumanana makattamiho, mbwenyi makattamihoya ahinikosiha okwela mafumo omuyani afanyile iyo.

Winston, kanaddelelemo dhupadduweleni vyaka dhoroma mmabasani a Yehova.

Nigaana vyaka dhing’onovi ninga atelani, Yehova wahiroma ofugula ‘musuwo munddimuwa ottiddana mabasa a Nabuya.’ (1 Kor. 16:9) Onilagihile musuwo woroma ddi mbali Jack Porter. Masaka abale iyene wali musogorheli wehu wa murudda. (Ovano ninlaba vamodha ninga asogorheli a Katti ya Betel ya Australásia.) Jack na mwadhiye Roslyn, ahinikamihedha okala apionero a mudhidhi wotene. Nahikaana gari ya okosa mabasa aba mwari mwa vyaka tanu. Mwakwanihedhe miyo vyaka 29 nahiwobiwa wi nikale asogorheli a murudda suwa dha ogusuni waddamana bara ya Pacífico, nsaka nttile mirudda esile dhasogorheliwa na Betel ya Fiji. Mwari mwa epaddi ejile y’attomeliwehu naneddela mirudda dha Samoa Americana, Samoa, Kiribati, Nauru, Niue, Toquelau, Tonga, Tuvalu ofiyedha o Vanuatu.

Nsaka nttile, attu akala suwa dholapelana anna waganyedha Anamoona a Yehova. Noona yanfuneya okala wofwaseyene vina wamalago. (Mat. 10:16) Milogodha dhali ming’ono, dila dhina kadhana mikalelo dha onitamelela mburho wi nikalegevo. Noona dila dhinjene iyo nandowa wakumbirha anamawani akala mirudda dhing’ono, awene annittambirha noderetu.

Winston, weyo onoziveliwa vaddiddi mabasa a otapulela. Efuneloya ejo odhilena wuvi?

Nsaka nttile abali a suwa ya Tonga ana mafolhetu na malivretu mang’onovi a elogelo ya Tonganês—elogelo yadhela murudda wa Polinésia. Wi niwodhe weddiha nsunzo na Bibilia nalabihedha nivuru A Verdade Que Conduz à Vida Eterna na elogelo ya engelezi. Nahikaana eskola ya anddimuwa a mulogo yamalile sumana ttaru. Abali araru ahaziwa deretu engelezi ahivaha monelo wa otapuleliwa nivuru na Verdade na elogelo ya Tonganês. Pam wahileba na makina manivuru otene alebiwe na mada, iyo baniperhemgezela o Betel ya Estados Unidos wila nipidiwe. Mabasa otene attukula sumana tanu na ttaru. Masiki na mukalelo wa otapuleliwa okale wohifanyeelela, nivuruna nihikamihedha attu enjene aloga elogelo ya Tonganês osunza ebaribari. Pam na miyo kanili anamatapulela, mbwenye yotagiha eji ehinivaha efunelo ya mabasa aba.

Pam, kanaddeleni ottiyana wonilenyu bamuli vasuwa vina bamuli elabo ya Austrália?

Y’ahittiyana vaddiddi! Mowiwanana mburoya, nahiwana na dhibu, oviha na oridha, matxilu, maredda, dila dhina oja wakala vang’ono.  Wila nidduwale vang’ono nadhowa wona bara yokoddela. Iyo nakala misasa enromoliwa fale nzina ya elogelo samoano entonyihedhaga numba dhimmagiwa elabo y’oPolinésia dhinpibeliwa na mani dhihina erugu. Agakalawo mamweri mmusasanimwa mwanvolowa txeza, nanoona mundduri dha minazi dhaputtamele mbara. Dhali midhidhi dhokoddela vaddiddi dhanittukulela otanalela vina olobela. Mudhidhi obo nandduwala dhorutxa dhotene dhanipadduwela vina natanaalela dhilobo dha pama.

Iyo nannakwela aima! Awene anziveliwa waredha vaddiddi vina aimaya antikina vowi nali anawedda vina nali azugu. Labo nimodha nikosaga oleddo nidhowaga o Niue, mwana dhahi wahifiya vakuvi battidda moya mono wa Winston bela: “Ddiziveliwa na mattengawo.” Ddinoona wi mwana oddule ali ahinatti wona mono na moya ninga obule, nona kaziwa mazu gani agalabihedhile iyene.

Elobo yina yaniribiha murima yali ya wona attu akalaga na mikalelo dhorutxa. Awene akala mmuruddani mokoddela vaddiddi, mbwenye manje awa kali a deretu. Abali ehu akala ninga kanzuzumela manjeya. Mwa awene manjeya akalela. Awene anagalala sabwaya okala vakuvi na amudhawa, okana mburo wa omwebedha Yehova vina omulabela. Yotagiha eji ehinikamihedha iyo ozuzumela dhilobo dhamakamaka vina ovugula dhokanetxa.

Dila dhina, Pam, weyo wantamela okana manje vina opiya na ekalelo yorutxa. Wawodha dhavi?

Babani oddisunziha dhilobo dhinjene vina olabihedha, noona ddinomutamaalela. Motagiha, ottiddiha motto na mattuwa, opiya na mattuwa vina olabihedha dhilobo dhing’ono. Vadhowile iyo oleddo o Kiribati, na ttiyiwe numba dhahi ya mirhanzi yapibeliwe na maani. Nigafunaga opiya natiba vati kanalabihedha mattuwa a wimela, wi mottoya odhowevi bugathidda ddavokelamo makumbi awuma. Wi nigumele manje naruga vatxelani mbwenyi miyo ddankaana mbigiddi wa wajeedha ayana ena arugevo. Vatxelaniva vali muttepu wana muri wamageliwa kabala eng’ono ninga ya emezo. Ottiya wikawo emezo omagomelo wa kabalaya amagelelawo lanta. Wi muyana awodhe oruga manje wela ottiddela muriya bazugunutxa nladda naye momaguva ninga onokasula, agamala baweliha otakulu. Muttepuya wa lanta wazugunuwa momaguva bamudhala manje. Venevo ddahiloga: Kinrutxa! Mpaka miyo ofiyedhiwa. Ddatuputxedhamo lantana dila dhinjene mbwenye manjeya kayamo, navadda vadhulu-vadhulu banigamberhuwa! Mmalele odditeya ayana akwaga wahikalavo mmodha wadhile oddikamihedha. Attuya a wenewale baderetu vaddiddi.

Nyuwo moheli mwahiziveliwa na mabasa a mirudda dha vasuwa. Karomani onaddelelamo masaka ozivela avirile nyuwo!

Winston: Vahivira mudhidhi wi nisunze dhilemelelo dha wenewale. Mutagiha abali aganiwobela oja, awene elopiya banivaha dhojadha dhetene nabiyaya. Kanaziwa wi yeddelo yawa yali yawattiyedhamo anya. Dhetene dhanipiyelani nabiyaya neloja kanattiyedhamo. Movira wa mudhidhi nahidha oziwa banigattiyedhamo. Masiki na dhovirigana dhehu abaliya anniziwelela. Dhigavira myeri mitanu na mmodha, nigadhowa waweddelela dila yina awene akala oziveliwene. Sabwani kaliwo Anamoona a Yehova ena aziwani ottiya abali a mmulogoni mwawa.

Waredhela wehu wanvaha onamoona vamuruddani. Attu enjene obuwela wi Anamoona a Yehova yali relijiau yetiwe na abali a mulogo wa wenewale. Mbwenyi mwawonani attu a dhilabo dhina alaleyaga, anamawani annonelamo wi milogo esile kadhali woka, awene antikina venjene.

Pam: Elobo modha ehindduwalimi epadduwile o Kiribati. Mulogoya wana abali ang’onovi na munddimuwa wa mulogo mmodha wettaniwa Itinikai Matera. Iyene wankosa guru wi anittambirhe mofanyelela. Siku dhahi iyene wahidhana arhingofa mwali nzayi nimodha. Wahiloga wi: “Ntti ttenyu.” Mazayi wenewale anrameya  vaddiddi ogumelawa yali yorutxa. Yakosiliye yali elobo yatonyihedha wawakela aleddo, nahitikina vaddiddi.

Pam, movira wa mudhidhi nyuwo mwahifwanyiwa ngovi ya orayileya wa yari. Elobo gani yaukamihedheni ovilela?

Indde, yaka ya 1973 miyo ddahikaana yari nigali elabo ya Ogusuni wa bara ya Pacífico. Nahiyelela o Austrália, movira wa miyeri minayi nahimuyelela mwanehu wafuna obaliwa. Winston vina wahikubanya vaddiddi. Okubanya waga wanvuguwa vang’ono-vang’ono mbwenye wadhile ogoma kakamwa mwakelelihu a Sentinela wa 15 wa abrili wa 2009. Wahikaana mutoma waloga “Perguntas dos Leitores” wandana nivuzo naloga wi: “Existe esperança de ressurreição para um bebê que morre no ventre da mãe?” Mutomaya waddikamihedha ononelamo wi makani aba ali mmadani mwa Yehova, Iyene dila dhotene onowira dhilobo dholigana. Iyene onele omuttiya mwanaye wi ‘atolotxe mabasa a Ddiabo’ vina onele ogomiha makattamiho otene anagwela attu a mwilabo. (1 Jo. 3:8) Mutoma obu ohilibiha monelo wa “mafumo” ana nlogo na Yehova. Iyo nigaali dhavi kohikaana njedhelo na Omwene?

Mmuyelelihu mwanehu wafuna obaliwa, nahiyelela mabasa a mudhidhi wotene. Nahikala mweri dhing’onovi o Betel ya Austrália, mmalelani nahiyelela wili mabasa a weddelela milogo. Yaka ya 1981, dhigavirile vyaka nayi ninga anameddelela milogo dha muttemba mirudda dha Ogusuni Nova Gales vina o Sydney, nahikuweliwa wi niyelele o Betel ya Austrália, wenewo omlaba iyo mpaka ovanene.

Winston, Weyo onoona ninga mudhidhi omaliliwe olabaga ogusuni waddamela bara ya Pacífico, ehikamihedha ewodhelo yawo yokala musogorheli wa Katti ya Betel ya Australásia?

Indde, na mikalelo dhottiyana. Voroma Austrália wahittomeliwa mabasa mirudda dha Samoa Americana vina o Samoa. Mmalelani vahikala omwadheya wa Austrália na Nova Zelândia. Ovano mirudda dhinag’aneliwa na Betel ya Australásia dhinofiya o Austrália, Samoa Americana na Samoa, suwa dha Cook, Nova Zelândia, Niue, Timor-Leste, Toquelau na Tonga—esi mirudda dheddelelaga miyo ninga murumiwi wa Katti. Dhotagiha dhifanyile miyo na abali vina arogora dhiddikamihedha vaddiddi, ovano vali miyo okuno o Betel ddinowodha wakamihedha.

Ddihinatti ofuga, ddigaziveliwa ologa wi ninga epadduwile na miyo vina Pam, kahiye anddimuwavi bahi animutamela Mulugu. Azombwe anotamela vina “mafumo a ttima”—masiki akala okoveni wa anamudhi kuntonyihedha efunelo. (2 Amwe. 5:2, 3; 2 Map. 34:1-3) Mohaganyedha Yehova Mulugu wa ttagaraga, iyene onfuna wi azombwe na anddimuwa ajevo egumi!

Nitamelaga ebaribari miyo na Pam okwaranya vyaka 50 mundduni, kanaana monelo wa wego oganittukulele dhotameladha. Mohaganyedha ebaribari ya Omwene mafumo ahina muttengo. Iyo nigana ottiddela mafumo aba na guru yotene!