NSUNZO 15
Omutagihe Yezu, Weddegena Murenddele
“Murenddele wa Mulugu, onpitha thontho ya muthu onere okoya mirima na mobuwelo enyu.”—FIL. 4:7.
JIBO 39 Murenddele wa Attu a Mulugu
DHINASUNZE IYO *
1-2. Koddi Yezu wakubanyelani?
NALI LABO nomariha na Yezu velaboni ya vati, mbwenye wali wokubanyene. Mohigonela agahitabutxiwa vina agahipiwa mmadani mwa attu akoodda oriha malamulo. Mbwenye kahiyo ejuwenevi yamukubanyiha. Iyene wannimukwela Babi waye Yehova vina wafuna amwiwelele. Yezu wanziwa wi agali womala nawale wi awodhe ovilela makattamiho aganfwanyile. Wafuna akamihedhe otxeniha nzina na Yehova. Yezu wannakwela attu vina wanziwa wila koovilela mpaka okwa attu agahikaana egumi yohimala musogorho.
2 Masiki na makattamiho odhugudheya vina dhoweha dha omattiyu obule, Yezu wahikaana murenddele. “Ddinouthiyedhani murenddele”, wahapanga anamafwara aye. (Jo. 14:27) Iyene wahikaana “murenddele wa Mulugu”, abale anna mandano ofiyedheya na Yehova anofuniwana okurumuwa vina ofwasa. Murenddele obu, bubwene waana Yezu muyubuweloni vina mmurimani mwaye.—Fil. 4:6, 7.
3. Txini enasunze iyo mwari mwa mutoma obu?
3 Kavo mmodhavo wa iyo onafwanyiwe dhoweha dhakene ninga dhafwanyiwe Yezu, mbwenye anamafwara otene a Yezu anele ofwanyiwa makattamiho. (Mt. 16:24, 25; Jo. 15:20) Ninga Yezu, iyo ninodhugudheyaga masaka mena. Ninakose dhavi wila nihittiye odhugudheya oniyelelihe murenddele? Mwari mwa mutoma obu ninele wona dhilobo ttaru dhimukamihedhile Yezu bali velaboni ya vati mwari mwa mabasa aye vina ninawodhe dhavi omusaza nigafwanyiwa makattamiho.
YEZU WANLOBELA MUDHIDHI WOTENE
Nlobelo ninonikamihedha okana murenddele wa mmirimani (Koona ddima 4-7)
4. Mowiwanana na 1 Tesalónika 5:17 kavaha yotagiha entonyihedha wi Yezu wahilobela dila dhinjene agali velaboni ya vati.
4 Kengesa 1 Tesalónika 5:17. Yezu wahilobela venjene siku naye nomariha velaboni ya vati. Iyene wahija Mattanga a okwa waye, ahinatti oviriha mukatte na vinyu wahilobela. (1 Kor. 11:23-25) Vamaliliye oja mattanga, wahilobela na anamafwara aye. (Jo. 17:1-26) Iyene na anamafwara aye ahidhowa vamwangoni wa Olivera omattiyu obule balobela dila dhinjene. (Mt. 26:36-39, 42, 44) Nlobelo naye nomariha wahiloga mazu menjene. (Lk. 23:46) Yezu wafuna wi Yehova akale na iyene mudhidhi obule wa makamaka mwigumini mwaye.
5. Arumiwi akooddelini oliba murima?
5 Elobo yina emuwodhihile Yezu ovilela dhoweha na makattamiho yali ya omukumbirha nikamihedho Yehova na malobelo. Arumiwi kawodhile ovilela sabwani kalobeliletxe omattiyu obule. Nona vafiyile mudhidhi wa dhoweha kawodhile oliba murima. (Mt. 26:40, 41, 43, 45, 56) Dhawene nigafwanyiwa makattamiho, ninawodhe oliba murima nigafara yotagiha ya Yezu vina ‘nigalobelaga mudhidhi wotene.’ Nilobele nikumbiraga eni?
6. Nroromelo ninanikamihedhe dhavi okana murenddele?
6 Enowodheya iyo omulobelela Yehova nikumbiraga ‘wenjedhedhiwa nroromelo.’ (Lk. 17:5; Jo. 14:1) Jofuneya iyo olibiha nroromelo nehu sabwani notene ninga anamafwara a Yezu ninele wehiwa na Satana. (Lk. 22:31) Nroromelo ninanikamihedhe dhavi okana murenddele masiki nigagumanana makattamiho ottiyana-ttiyana? Nigakosa muli mwetemwene wi niwodhe owanana makattamiho ehu, nroromelo ninele onikamihedha ottiya makaniya mmadani mwa Yehova. Sabwani iyo ninokuluvela wi iyene onowodha ogomiha makattamiho ehu opitta nanya, oziwa ejene enonivaha murenddele wa mmirimani.—1 Ped. 5:6, 7.
7. Ninsunzavo eni na dhologa dha Roberto?
7 Nlobelo ninonikamihedha okana murenddele wa mmurimani masiki na masoso. Koona yotagiha ya Roberto, munddimuwa wa mulogo onna vyaka 80. Iyene ohiloga: “Malago ali munivuruni na Filipi 4:6, 7 ahiddikamihedha owanana makattamiho a mwigumini mwaga. Miyo ddahifwanyiwa mayelego. Vina ddahittiya okala munddimuwa wa mulogo.” Elobo gani yamukamihedhi Roberto okaanavi murenddele? “Ddigona wi ddinodhugudheya, Momaguva-mwene miyo olobela” owenjedhedha. “Miyo ddigalobelaga ddinowona wi ddinokaana murenddele.”
YEZU WANLABA NA MURIMAWOTENE MABASA A OLALEYA
Olaleya onnikamihedha okana murenddele wa mmirimani (Koona ddima 8-10)
8. Mazu gani alogiwe munivuruni na Joau 8:29 amukamihedhile Yezu okana murenddele mmirimani?
8 Kengesa Joau 8:29. Masiki afwara-fwariwaga Yezu wahikaana murenddele wa mmirimani, iyene wanziwa wi agahimuttabiha Babe. Wannimwiwelela Yehova masiki akala yali yorutxa. Wannimukwela Babe, dhotene dhakosiye dhewanana na efunelo ya Babe. Ahinatti odha velaboni ya vati walaba ninga ‘mesirhi wa mabasa’ a Mulugu. (Gano 8:30) Vadhiliye velaboni ya vati, iyene wahikaana gari ya wasunziha attu mwaha wa Babe. (Mt. 6:9; Jo. 5:17) Mabasa aba animwagalaliha.—Jo. 4:34-36.
9. Ovilevela na murima wotene mabasa a olaleya annikamihedha dhavi okana murenddele mmirimani?
9 Iyo ninimutagiha Yezu modhela omwiwelela Yehova vina ‘nizuzumelaga mabasa a Nabuya.’ (1 Kor. 15:58) ‘Nigavilevelaga na murima wotene’ mabasa olaleya ninele owodha owanana makattamiho annipatta. (Mer. 18:5) Ninga motagiha, attu enjene mmuruddani mwehu anofwanyiwa makattamiho ottiyana-ttiyana vina ottabwaya opitta ehu. Awene agasunza omukwela Yehova nanda avirihagamo malagoya anokaana egumi yottugarheya. Mudhidhi bu mudhidhi onoonihu esidha opadduwa ninokuluvela wi Yehova onele onikoya. Nikuluvelo ntto ninonikamihedha okana murenddele wa mmirimani. Murogora dhahi owanile na goi ya okubanya vina mubuwelo wa wila kali elobwene wahifanya ebaribari. Ohiloga: “Ddigakala mmalaleyoni, ddinkala wofwasa vina w’ohagalala. Ddinoziwa wi mabasa a olaleya anoddivaha gari ya onfiyedha Yehova.”
10. Ninsunzavo eni na dhologa dha Brenda?
10 Koona vina yotagiha ya murogora onittaniwa Brenda. Iyene na mwanaye wa muyana ahipattiwa eredda enittaniwa esclerose múltipla. Brenda wanfwanyela okana mpaddo wa maroda sabwani maningo aye kanetxa guru. Egawodheya iyene onolaleya numba na numba, mbwenye vamaromo onlabihedhetxa onamoona wa oleba makarta. Iyene ohiloga: “Miyo dinorumela wi mwilaboni mpuno mudhalile obure kaddinavulumuwe, egali dhawene ddinzuzumela mabasa aga a olaleya. Mwebaribari, olaleya onoddikamihedha odduwala masoso aga. Ddinzuzuemeletxa wakamihedha attu a mmulogoni vina a mmuruddani mwaga. Ddikana njedhelo na musongorho.”
YEZU WANRUMELA NIKAMIHEDHO NA AKWAYE
Okana amarho aderetu onnikamihedha okana murenddele wa mmirimani (Koona ddima 11-15)
11-13. (a) Anamafwara a Yezu na attu ena o’nihile dhavi okala amarho a Yezu? (b) Yezu woonilemo dhavi nikamihedho n’akwaye?
11 Nsaka nakosa Yezu mabasa aye velaboni ya vati wangumana makattamiho, mbwenyi akwaye ebaribari ali anamafwara aye anvaha nipangarhazo. Ebaribari wi awene anvirihamo mazu a nivuru na gano anloga wi ‘akalawo aliba wandana anvolowelana opitta obali.’ (Gano 18:24) Yezu wanavaha ttima akwaye. Omaromo wa mabasa aye a olaleya kaliwo mmudhaye wamuroromela. (Jo. 7:3-5) Wahikalawo mudhidhi dhahi walogile amudhaye wi ohiroma otaduwa. (Mk. 3:21) Mottiyana na ejuwene, Yezu wahiloga dhahi na anamafwara aye ororomeleya: “Nyuwo muli abale akalilevi na miyo mmasosoni onilemi.”—Lk. 22:28.
12 Arumiwi aye dila dhina ahimunyimula, mbwenye Yezu kafwaseyela dhovirigana dhawale, iyene wanziwa wi awene animuroromela. (Mt. 26:40; Mk. 10:13, 14; Jo. 6:66-69) Omattiyu womariha velaboni ya vati, wahiloga na akwaye aye: “Ddinowirani akwaga, sabwa dduziwihani dhetene dhimwiwale miyo Babaga.” (Jo. 15:15) Kavali waganyedha wi wahitamaalela venjene sabwa yokaana akwaye anvaha nipangarhazo. Arumiwi a Yezu ahimukamihedha ofwanya murenddele wa mmirimani vina ohagalala mmabasani a olaleya.—Lk. 10:17, 21.
13 Ottiya arumiwi aye bahi, iyene wahikaana akwaye ena alobwana na ayana amukamihedha mmabasani a olaleya. Ena animuwobela vatakulu vawa oja elobo-txilobo amukamihedhaga na poso nawo. (Lk. 10:38-42; Jo. 12:1, 2) Ena annedda na iyene muleddoni amukamihedhaga vina na elobo-txilobo yafuneya. (Lk. 8:3) Wahikaana amarho aderetu sabwani iyene vina wali marho waderetu. Wantanaalela dhilobo dhaderetu dhawireliye wi aziveliwe. Yezu wali muttu wawakwana, mbwenyi wantanaalela dhojombeliwa dha akwaye vina wanakamihedha. Mohaganyedha akwaye ahimukamihedha okaana murenddele wa mmirimani.
14-15. Niwodhe dhavi wakosa amarho aderetu, nanda aweneya annikamihedha dhavi?
14 Amarho aderetu anonikamihedha okala oweddeyana na Yehova. Ogakala marho waderetu onele owodha watamela amarho aderetu ninga weyo vina. (Mt. 7:12) Motagiha, Bibilia ononiswagiha wi enofuneya olabihedha mudhidhi na guru dhehu wi nakamihedhena abale anunlela ‘okamihedhiwa.’ (Ef. 4:28) Koddi mmulogoni mwehu ohikalamo muttu ontamela nikamihedho? Akala ohikalawo mbali ohiwondha wedda, jowodheya omudhowela omusika? Ogahiwodha onvaha elobo yoja mbali onfwanyiwa mayelego nanda ohina kobiri yogulana oja? Akala onoziwa marhe a olabihedha jw.org® website na JW Library® app, enowodheya wakamihedhe abali a mmulogoni oziwa vina otamela mafumo attima omuyani? Nigazuzumela wakamihedha attu ena ninofwanya ohagalala.—Mer. 20:35.
15 Amarho ehu anele onikamihedha owanana makattamiho vina ofwanya murenddele wa mmirimani. Moligana na Eliyú wanvuruwana Job alogaga masoso aye, amarho ehu ebaribari anokamihedha ofwaseyelaga ovuruwana n’okurumuwa dhologa dha masoso ehu. (Job 32:4) Kanijeedhele wi amarho ehu anivahe dhosakula dha mwigumini mwehu, mbwenyi iyo nili attu a mirugu jofuneya ovuruwana nofwaseya malago andela mBibiliani. (Gano 15:22) Moligana na mwene David warumeelile n’oviyeviha nikamihedho na akwaye, kanikale aliba ovittukulela wi nirutxiwege orumela nikamihedho na akwehu oku nigafunaga. (2 Sam. 17:27-29) Mwebaribari, wotene ole oli marho waderetu nvaho wa Yehova.—Tia. 1:17.
NIWODHE DHAVI OKANA MURENDDELE
16. Mowiwanana na Filipi 4:6, 7, elobo gani ennikamihedha okaana murenddele wa mmirimani? Katapulela.
16 Kengesa Filipi 4:6, 7. Yehova onlogela nni wi iyo ninakela murenddele ‘modhela Yezu Kristu’? Sabwaya jawi iyo ninafanye murenddele akala ninomuroromela Yezu odduwene onakwanihedhe efunelo ya Mulugu. Motagiha, sabwa ya ononelamo mukutto wa Yezu, ninoziwa wi notene nittega ninofuna oleveleliwa. (1 Jo. 2:12) Wubuwela ejuwene enonivaha ofuru! Ninga mwene wa Omwene wa Mulugu, iyene onele omutolotxa Satana na dhilobo dhetene dhili mwilaboni mpuno dhinnitotela matabuwo. (Iza. 65:17; 1 Jo. 3:8; Ovuh. 21:3, 4) Oziwa ebaribari ya dhilobo esi enonivaha njedhelo! Yezu ohinittomela mabasa orutxa, mbwenye nili vamodha, kaninyanyalile, ononikamihedha na makattamiho angumanana iyo masaka abano omariha. (Mt. 28:19, 20) Oziwa ejuwene enokamihedha oliba murima! Ofuru, njedhelo, oliba murima—esi nipara namakamaka ninwodha onikamihedha okaana murenddele wa mmirimani.
17. (a) Akristu anawodhe dhavi okaana murenddele wa mmirimani? (b) Mowiwanana na Joau 16:33, elobo gani enwodha iyo okosa?
17 Okaana murenddele wa mmirimani onawuvune dhavi mwari mwa makattamiho? Jowodheya otagiha merelo a Yezu. Yoroma, olobela mudhidhi wotene. Yanawili, mwiwelelege Yehova vina olaleyege na murima wotene masiki egakala yorutxa. Yaneraru, orumeelege nikamihedho na amarho awo. Murenddele wa Mulugu onele okweya murima wawo. Moligana na Yezu onele owodha opemberha makattamiho awo.—Kengesa Joau 16:33.
JIBO 6 Nlobelo na Mudhari wa Mulugu
^ par. 5 Notene ninofanyiwa makattamiho a ojombeliwa murenddele. Mwari mwa mutoma obu ninele ologa dhilobo ttaru dhikosile Yezu dhinanikamihedhe iyo okaanavi murenddele nigagumana makattamiho.
