1. Txini enfwanyela iyo notene okosa?

OGAHIZIVELIWA okumbiriwa okosa mavurano a ottamaga oku weyo oziwaga wi kunapemberhe, txino sabwa ya eredda obe okumuwa? Mohaganyedha kugafunile. Mbwenye murumiwi Paulo, ohiloga wi Akristu ebaribari, ali muttamagani. (Aheb. 12:1) Iyo notene, peno azombwe vina andimuwa, aguru obe awobana, akala ninfuna nakele mperhe onipikirele Yehova, ninofuniwana ovilela ofiyedha omagomo.—Mt. 24:13.

2. Ninga mulogela 2 Timóteo 4:7, 8, Paulo ologele nni mazu a wakela mperhe ahiworamihaga kove?

² Paulo ohiloga, “eddihálile wakela mperhe”; mazu aba Paulo kalogile aworamihaga kove sabwani wahimala opemberha. (Kengesa 2 Timóteo 4:7, 8.) Murumiwi oddule walogana mperhe gani?

3. Paulo alogaga dha mperhe walogana mperhe gani?

³ Masaka mena Paulo wanloga mavurano akosiwa na akadda Gresia wi asunzihena masunziho a ttima vaddiddi. (1 Kor. 9:25-27; 2 Tim. 2:5) Iyene wanladdaniha dhawira dha Mukristu na mavurhano ottamaga. (1 Kor. 9:24; Gal. 2:2; Fil. 2:16) Muttu onroma ottamagela “mperhe” agamperhekela egumi yaye Yehova vina agamala obatiziwa. (1 Ped. 3:21) Iyene onfiya mmaddileni mwa ottamaga waye mudhidhi onimukuluveliha Yehova onvaha egumi yohimala.—Mt. 25:31-34, 46; 2 Tim. 4:8.

4. Txini dhinfunihu osunza mwari mwa mutoma obu?

⁴ Oladdana gani olivo wa anamattamagela mperha na okalawo  wa Mukristu? Vahikala dholigana dhinjene. Ndoweni nilogeni ttaru. Yoroma, iyo ninofuniwana ottamaga mudilamwa; yanawili, ninofwanyela ozuzumela ofiya mmaddilenimwa, vina yanawuraru, ninofwanyela ovilela dhorutxa dingumanihuna muttamaganimwa.

5. Dila gani enfwanyelihu wedda, vina sabwaya jani?

⁵ Abale anttamagela mperhe, anofuniwana ovira mwari mwa maddile asasanyedhiwe na anamabigihaya wi ahiyelele mperheya. Yakakene jimpadduwa na abale anttamagela egumi yohimala, enofuneya weddana magano a Okristu, obe wedda dila enafwanyihe egumi. (Mer. 20:24; 1 Ped. 2:21) Mbwenye Satana vamodha na abale animutagiha anfuna wi iyo nisakule dila ennittukulela wupupuruwani; yofuna yawa jawi ‘nedde na awene dila yawa yotakala’. (1 Ped. 4:4) Awene anoruwana vina anoveyiha dila y’egumi eneddihu, obuwelaga wi merelo awa banfwanyiha murenddele. Anofwanya-wene murenddele?—2 Ped. 2:19.

6. Empadduwele Brian ennisunziha nni?

⁶ Abale anttamaga vamodha na Satana anela ozinddiyela ovanene wi dila esakulani kinattukulela mmurenddeleni; enattukulela okala adhari. (Rom. 6:16) Karoma wona yotagiha ya Brian. Amambali aye amulele na dila ya Okristu, enttukulela wigumini. Mbwenye mufiyedhile Brian vyaka dha muzombweni, wanivivuza txini dhigamuwodhihile ofwanya ofuru. Iyene ohisakula ottamaga na abale anttamaga na Satana. Mwinyene ohiloga: “Ddihizinddiyela wi esile dhinlogiwa wi dhinovaha murenddele sisilene dhiddittukulele ogwela mubureni.” Vasogorhova ohenjedha, “Mwa ovira wa mudhidhi ddahiroma okala mulezeli vina ddahiroma ogwela mmereloni onyakuwa. Mwari mwa vyaka dhinjene, kaddawodha okala s’ohimwa yolezeliha; ddali mudhari wa garafwa. . . . Ddahiroma oguliha mirobwe dhinnonga ogogo, wi ddigulena dhopana ekarho yaga.” Musogorhomwa Brian ohigana weddana malago a Yehova. Iyene wahifiyedha ottiya dhotakala dhotene, babatiziwa yaka ya 2001. Ddabuno onohagalala vaddiddi sabwa ya okala muttu onfwara dila ya Mukristu enttukulela wigumini. *

7. Ninga mulogela Mateu 7:13, 14, dila gani bili dhiliwo?

⁷ Johagalaliha vaddiddi oziwa wi iyo ninedda ddila yomyala! Satana onfuna wi iyo nitxelele ottamaga dila yokattamiha wi nilupele dila enavelela “athu murimelani”; enfuniye ja iyo ogomela mmaddileni mungometxa attu a elabo ejino. Dila eji jinedda attu enjene, nne vina kinrutxa weddawa. Mbwenye “enowavelela  athu murimelani.” (Kengesa Mateu 7:13, 14.) Akala iyo ninfuna nittamage dila ennittukulela egumi nihizuzumiheyaga, ninofwanyela omukuluvela vina omvuruwana Yehova.

8. Namattamaga agakwakwattuwa agwa, txini enkosiye?

⁸ Abale ankosa mavurano ottamaga anowang’ana ddila enfwarani wi anadhe okwakwattuwa. Masiki dhawenevi, enodha opadduwa iyene okwakwattuwa obe namattamaga mukwaye omukwakwattutxa. Akala namattamagaya onogwa, onovenya baroma ottamaga wili. Iyene kanzuzumeletxa wang’ana emugwihile, onzuzumeletxa ogomiha mavurhano aye wi akele mperhe.

9. Txini enfwanyelihu okosa nigakwakwattuwa?

⁹ Muttamagani mwehu iyo ninodha okwakwattuwa dila dhinjene, nikosaga dhovirigana mwari mwa merelo ehu vina na dhologa dhehu. Anamattamaga akwehu anodha oninyimula. Eso dhigapadduwa kaninfwanyela otikina. Notene nattegi, ninttamaga ddila modhene yegumi, vina yorutxa. Nona, masaka mena ninodha “omukwakwattutxa” mukwehu. Paulo ohinonelamo wi na masakaya ninodha ‘othegelana dila dhinjene.’ (Kol. 3:13) Mbwenye kanikalelege wang’anagavi dhinnikwakwattutxa, muttu-muttu azuzumelege ottamagela mperhe waye. Akala ninokwakwattuwa, nihiyelele mundduni, nivenyeni, niromeni ottamaga wili. Nigattiya wi dhoninyonya obe ttogorogo onitximiha ovenya, kaninawodhe ogomiha ottamaga wehu nne vina kaninakele mperheya. Kahiye ejuwenevi vina yohakela mperhe; yawopiha yina jawi ninodha okala gorhomonddo ninakwakwattutxa abale anivilibihedha ottamaga dila yoyeva enttukulela egumi.

10. Txini enfwanyelihu okosa wi nihikale “gorhomonddo ninakwakwattutxa” akwihu?

¹⁰ Ekalawo yina enfwanyelihu orabela wi nihikale “gorhomonddo ninakwakwattutxa” abalihu anttamagihuna vamodha, jofuneya orabela wasisigula abalihu mwaha wa dhosakula dhawa. (Rom. 14:13, 19-21; 1 Kor. 8:9, 13) Paveneva vanoneya ottiyana wa muttamagelo wehu na aliba mavurano a mwilaboni. Awene anttamagela ovurhana na anamattamaga ena,  vina namattamaga mmodha-mmodha onovilibihedha wi akale mperhe okale wayene. Anamattamaga aba kanazuzumela akwawa. Ena anofiyedha watukuma akwawa mudilanimwa wi awene avire. Mottiyana-mwene, iyo kaninovurana nne. (Gal. 5:26; 6:4) Ninfuna wi attu enjene attamage vamodha na iyo vina notene nipemberhe mperhe wa egumi yohimala. Jijene enivilibihedhihu ovirihamo malago a Paulo awi ‘nihizuzumelege dhehuvi, nitabuwelege vina dhakwehu.’—Fil. 2:4.

11. Txini enzuzumeletxa namattamaga, vina sabwaya jani?

¹¹ Anamavurana a mwilaboni kankalela wang’anavi dilaya bahi, awene anozuzumela ofiya mmaddilenimwa. Masiki awene ahonaga maddile anfunani ogomela, mbwenye anovubuwela bali mmaddilenimwa vina akelaga mperhe wawa. Nona eji enowakosiha okanelavi guru ottamaga wawa.

12. Yehova onanivahe nni?

¹² Muttamagani mwehu, Yehova ononikuluveliha-wene wi onela wavahedha attu otene mperhe onapemberhani—egumi yohimala mparaizo, velaboni ya vati. Malebo anoninonihedhamo vang’onovi mperhe ofunihu wakela, nona jofuneya otanalelaga ekalelo ya egumi yehu ya musogorho. Iyo nigakanelaga owara wubuwela vina weka mmirimani mwehu mperhe onavahiwehu, pavenevo vanakumuwehu banifiyedha okwakwattuwa kakamwe.

13. Yopurelamo gani enihuna ennittiyaniha na anamavurhana a mwilaboni?

¹³ Anamattamaga a Agrego anfwanyela okwaranya dhorutxa, ninga olema na wiwa opa. Mbwenye awene anfwanyela omukuluvela na murima wetene namaswagiha vina guru dhawa. Muttamagani mwehu, iyo ninoladdanihiwa na anamattamaga abale. Mbwenye iyo nihikana yopurelamo opitta awene. Guru dhehu onnivaha ddi Yehova. Iyo nigamukuluvela Yehova, iyene onela oniswagiha vina onela oniwaraliha!—1 Ped. 5:10.

14. 2 Korinto 12:9, 10 oniwodhiha dhavi okalavi oliba masiki mwari mwa dhorutxa?

¹⁴ Paulo wahifwanyiwa dhorutxa dhinjene. Ottiya oruwaniwavi na ofwara-fwariwa, masaka mena iyene wantowiwa guru, vina wahikana ejile ekuweliye yososa yali ninga ‘mwinga walata mmaningoni mwaye.’ (2 Kor. 12:7) Mbwenye ottiya okumuwa na dhuratxa ninga eso, iyene wona ninga gari ya omukuluvelavi Yehova mwari mwa dhokattamiha dhaye. (Kengesa 2 Korinto 12:9, 10.) Yehova ohimukamihedha sabwani iyene ohiwodha oliba mmakattamihoni mwaye.

15. Nigamutagiha Paulo, txini enakosihu?

¹⁵ Enodha opadduwa iyo vina oruwaniwa obe ofwara-fwariwa mwaha wa nroromelo nehu. Obe ninodha okana egumi yodeba peno okumuwa. Mbwenye nigamutagiha Paulo, masoso ehu anodha onivaha gari ya woniha omukwela vina omuttittimiha wehu Yehova.

16. Masiki akala weyo wa muredda, txini enfwanyeliwe okosa?

¹⁶ Weyo onedda na kadera ya maroda obe onkala mudhidhi wetene vakamani sabwa ya oredda? Meddo dhawo dhihimala olema obe mento awo ahiroma okana makattamiho? Akala eli dhawene, enowodheya ottamagaga na abale ali azombwe obe ana egumi yoliba? Enowodheya-wene! Anakalaba na areddaya enjene anottamaga dila enttukulela egumi. Awene kankosa mabasa aba na guru dhawa. Enkosa abali aba ja okumbirha olibihiwa na Yehova mwa ovuruwanaga matugumano a Okristu na muttitto obe mwinternetini. Awene vina anokosa mabasa a osunziha;  anowalaleya adotoro onumbani ya egumi vina anamudhi awa. Ena anolaleya na muttitto obe na makarta.

17. Yehova onawona dhavi abale ana makattamiho a egumi?

¹⁷ Txipo kupeleye malago awi eredda yawo peno okumuwawa, dhorutxa dhihinaniwodhihe ottamaga dila ya egumi. Yehova onowukwela sabwa ya nroromelo nawo vina sabwa ya ovilela ononihiwe. Onofuna nikamihedho naye ovanene, opitta masaka a mundduni. (Masal. 9:11) Vina Yehova onela okalavi vakuvi na weyo. Murogora dhahi ona makattamiho a egumi, ohiloga: “Ddihona wi kinwodheya miyo walaleya attu enjene sabwa ya makattamiho a egumi. Mbwenye masiki dhawenevi, guru dhaga dhing’onovi dhinohagalaliha murima wa Yehova.” Ogakumuwa, onofwanyela wubuwela wi kuli weka. Kobuwela yotagiha ya Paulo, vina katanalela mazu aye olibiha: “Ddinothabela wobana waga, . . . vanobanimi, panliba miyo.”—2 Kor. 12:10.

18. Makattamiho gani mena angumana abalihu?

¹⁸ Ena anttamaga dila enttukulela egumi anofwanyiwa dhorutxa dhina. Awene anofwanyiwa dhorutxa dhihinnonelamo attu ena. Ninga motagiha, awene anofwanyiwa eredda yokubanya obe onozuzumela dha musogorho. Enlogeliwa nni wi makattamiho a abali aba borutxa vaddiddi opitta a attu ena? Sabwani muttu agaragala, obe agakala muredda attu otene anowona wi iyene onofuna nikamihedho. Mbwenye attu aba anottiyana na abale anfwanyiwa makattamiho a yubuwelo, kavo onona dhinapadduwela nne kavo onziwa otabuwa wawa. Wiwa opa wawa onoligana na wa attu abale aniwa opa sabwa ya orurumuwa mono obe abale anfuna kadera ya maroda wi eddena.

19. Yotagiha ya Mefiboset ennisunziha nni?

¹⁹ Akala weyo ohikana makattamiho a egumi vina onona ninga akwawo kanutanalana, yotagiha ya Mefiboset enela wukamihedha okana guru. (2 Sam. 4:4) Ottiya okalavi muragali, iyene wahipujiwa na Mwene David. Mefiboset kaddawile elobwene. Mbwenye iyene konihile okala muttu wa ttogorogo; wahitamalela sabwa ya esile dhaniye mwari mwa egumi yaye. Ohitamalela sabwa ya mwene David omweddiha na okwela masaka a mundduni. (2 Sam. 9:6-10) Nona mmuttongele David nohiligana, Mefiboset wahifiyedha ononelamo muvirele makaniya. Iyene kattiyile wi ovonya wa David omukumule. Vina kammagedhile Yehova sabwa ya David ompuja. Mefiboset ohikosa guru dhotedhene wi amukamihedhe muttikitteliwi wa Yehova, mwene David. (2 Sam. 16:1-4; 19:24-30) Nona Yehova alebiha yotagiha  eji ya malago Munzuni Naye, wilele wi nitagihe.—Rom. 15:4.

20. Dhozuzumiha dhinapatta dhavi abali ena, mbwenye ebaribari gani enfwanyelani okana?

²⁰ Abali enjene anokalaga odhogudheyene sabwa ya dhozuzumiha; mwari mwa egumi yawa yotene ankala ozuzumene. Awene anorutxiwa okala vamodha na abali ena, mbwenye anodhowavi onaga matugumano mmulogoni, matugumano a murudda na a ttattamwa. Anorutxiwa ologa na anawedda, masiki dhawenevi anovilibihedha ologa na attu ena mmabasani a olaleya. Akala onopadduweliwa dhawene, oziwe wi kuli weka. Akalawo abali ena anfwanyiwa makattamiho akakene. Oziwe wi Yehova onottittimiha ovilibihedha wawo. Sabwa ya weyo okalavi wovilelene ofiyedha ovanene, eji ononiha wi Yehova onowururihavi, vina onowuvahavi guru dhinfuniwe. * (Fil. 4:6, 7; 1 Ped. 5:7) Akala onomulabavi Yehova masiki na oredda vina na dhorutxa dhinufwanya, oziwe wi abo maruriho aye; ddi iyene onuweddiha.

21. Na nikamihedho na Yehova, txini enawodhe iyo okosa?

²¹ Mohagalaliha-mwene vahikala ottiyana wa anamavurana a mwilaboni na ottamaga walogana Paulo. Mavurano a masaka a Bibilia, wapemberha mperheya wakala muttu mmodha. Eji enottiyana na abale anttamagela mperhe wa egumi, Mukristu wotene onakalevi wororomeleya onela wakela mperhe wa egumi yohimala. (Jo. 3:16) Mmavuranoni a mwilaboni, anamattamaga otene anofuniwana okala agumi, agahikane egumi yawakwana, enowaganyedheya vaddiddi awene opemberha. Mbwenye mottiyana-mwene, enjene wa iyo nihikana dhinnikattamiha mwigumini mwehu, masiki dhawenevi, kanintxelela. (2 Kor. 4:16) Na nikamihedho na Yehova ninela owodha ogomiha ottamaga wehu!