1. Attu ammaga dhavi omarho?

NINGA munziwelihu, ttarho yoroma ya attu okala amarho ja otamela mudhidhi wa ologaga vamodha. Mugaroma ologa makani enyu, muttu-muttu aziwaga dha mukwaye, omarho wenyo onolibiheya. Mbwenye okala marho wa Yezu ohittiyana vang’onovi, mwari mwa omarho obu munofwanyeya dhorutxa. Dhorutxa gani?

2. Yorutxa gani yoroma engumanihuna?

² Yorutxa yoroma jawi iyo kanimoni Yezu. Akristu enjene a masaka zana oroma ahikana makattamiho akakene. Masiki dhawenevi murumiwi Pedro ohiloga: “Nyuwo muhimonilevi Yezu, munomukwela; ddabuno vina wohimonene, munomuroromela.” (1 Ped. 1:8) Dhahene, enowodheya okana omarho onddimuwa na Yezu masiki nihimonilevi.

3. Yorutxa yanawili engumanihuna jivi?

³ Yorutxa yanawili jawi iyo kaniwodha ologa na Yezu. Iyo nigalobelaga ninloga na Yehova. Ebaribari wi ninolobela na nzina na Yezu, mbwenye kaninloga kakamwe na iyene. Yezu vina kanfuna wi iyo nimulobelelege iyene. Onkoddela nni? Sabwani nlobelo ninokasa mpaddi wa webedha, onfwanyela webedhiwa ddi Yehova bahi. (Mt. 4:10) Masiki dhawenevi enowodheya iyo woniha omukwela wehu Yezu.

4. Makattamiho gani agumanihuna, vina txini enasekeserhihu mwari mwa mutoma obu?

 ^{4 4} Yorutxa yaneraru jawi Yezu onkala wirimu, iyo kaniwodha okala na iyene. Mmbwenye ninowodha oziwa dhinjene dhikosiliye masiki ahikalaga vakuvi na iyo. Ninele wona mikalelo minayi dhinanikamihedhe wunuwiha mandano ehu na iyene. Voroma ninfuna nisekeserhe yopurelamo enkanihu mwa okana mandano na Yezu.

5. Sabwaya-sabwaya jivi ennittukulela okala amarho na Yezu? (Kang’ana kasha “ Omarho na Yezu Ononithukulela Okala Marho na Yehova” na yina ena mutoma “ Wubuwela Wopimeleleya wa Mabasa a Yezu.”)

⁵ Akala iyo ninfuna nikale attu a wiwananeyana na Yehova, ninofwanyela okana omarho woliba vaddiddi na Yezu. Ninlogelani dhawene? Karoma wona mwaha minli. Woroma, Yezu ohapanga dhahi anamafwara aye: “Iyenene Baba onoukwelani, sabwa nyuwo muddikwela, vina murumela wi miyo ddidhile wa Mulugu.” (Jo. 16:27) Ohenjedhavi: “Miyo ddili dilayá, ddili ebaribari, ddili egumi. Kawo onfiya wa Baba, ahivirile mwa miyo.” (Jo. 14:6) Otamela okala marho wa Yehova nihiromile owaraliha omarho wehu na Yezu enkala ninga otamela ovolowa mba nihiviraga vamusuwova. Yezu ohiloga yotagiha yakakene siku ntile nilogiliye wi iyene “mulago omvulowana mabila.” (Jo. 10:7) Mwaha wanawili bwawi Yezu otagiha moligana-mwene ekalelo ya Babe. Iyenene ohawaddela anamafwara aye: “Oddonile miyo, omona Baba.” (Jo. 14:9) Nona ttarhoya-ttarhoya enfwanyelihu olupela wi nimuziwe Yehova, ku osunza venjene mwaha wa dhawira dha Yezu. Iyo nigasunzaga venjene dhokosa dhaye omukwela wehu onowinjiva. Omarho wehu na Yezu  ogalibiheyaga omukwela wehu Yehova ogela winjiva.

6. Mwaha mwina wa iyo otamela okala marho na Yezu buvi? Kavaha yotagiha.

⁶ Iyo ninofwanyela okana omarho woliba na Yezu wi malobelo ehu akuliwege. Veneva vanofuneya okosa dhinjene, kahiye ologavi mazu alemeletxihu ologa mwari mwa nlobelo nehu, aba awi, “na nzina na Yezu”. Ninofwanyela ononelamo mulabelo onlaba Yehova mumodhani na Yezu wi akule malobelo ehu. Yezu ohawaddela anamafwara aye: “Dhetene dhinloba nyuwo na nzina naga, miyo ddinouvahani.” (Jo. 14:13) Enoziweya wi Yehova ddunvuruwana vina ddunakula malobelo ehu, masiki dhawenevi iyene ohinvaha Yezu onddimuwa wa wimelelaga dhogana Dhaye. (Mt. 28:18) Yina vina enfwanyelihu oziwa jawi, Mulugu ahinatti wakula malobelo ehu, onroma wona mmirimani mwehu akala nihikanamo malago anivahile Yezu a walevelela attu akwihu. Ninga motagiha Yezu ohiloga: “Nyuwo mugàlevelela athu anuthegelani, Babinyu vina onoulevelani. Vano mugakodda walevelela, Babinyu vina kanauleveleleni.” (Mt. 6:14, 15) Kunona wi vahikala yopurelamo enddimuwa vaddiddi ya iyo waweddiha attu akwihu dhahene ninga munaweddihedha Yehova vamodha na Yezu?

7. Bani ampurelamo mukutto wa Yezu?

⁷ Ampurelamo mukutto wa Yezu, babale antamela olibiha omarho wawa na iyene. Ninziwa dhavi ejuwoya? Yezu wahiloga wi “Kawo onna okwela ompitha ole onalevela akwaye agumi yaye.” (Jo. 15:13) Attu ororomela akalewo Yezu ahinatti odha velaboni ya vati anela osunza dhirileyi bafiyedha omukwela venjene. Alobwana abo na ayanaya, ninga Abrahamu na Sara, Mizé, na Raab anela ovenyihiwa mukwani, otaganyiha na aligani otene abuwene amulabela Yehova wale, anela ofuna olibiha omarho wawa na Yezu wi akane egumi yohimala.—Jo. 17:3; Mer. 24:15; Aheb. 11:8-12, 24-26, 31.

8-9. Ninga munlogeliwani va Joau 15:4, 5, omarho wehu na Yezu onniwodhiha okosa nni, vina ejuwoya ekalele nni ya ttima?

⁸ Iyo nihikana gari ya olaba na Yezu mmabasani a olaleya vina osunziha miselu dhapama dha Omwene wa Mulugu. Yezu bali velaboni ya vati, wali namasunziha. Vowi iyene mwimeleli wa mutugumano, onodhowavi eddihaga mabasa a olaleya vina a osunziha. Yezu onowona vina onotamalela guru enkoseliwe mabasa aba a wakuwelela attu omuziwa iyene vamodha na Babi waye. Txibarene, ennikosiha owodha vina wakwaniha mabasa aba tti nikamihedho ninnivaha Yehova na mwanaye Yezu.—Kengesa Joau 15:4, 5.

⁹ Mazu a Mulugu anosunziha mwawakwana-mwene wi iyo ninofwanyela owaraliha omukwela wehu Yezu wi niwodhe omuttittimiha Yehova. Ovano ndoweni noneni ttarho ttaru dhinnittukulela okala marho a Yezu.

10. Elobo gani yoroma enfwanyelihu okosa wi ninakene omarho na Yezu?

¹⁰ (1) Omuziwa Yezu. Eji ninawodhe nigengesa nivuru na Mateu, Marko, Luka, na Joau. Nigatanalelaga mapadduwo ali mBibiliani anloga dhawira dha Yezu bali velaboni ya vati, ninofiyedha ofuna omukwela vina omuriha Yezu sabwa ya supaje yaweddihiyena attu. Enoziweya wi iyene wali Nabuya vina munddimuwa wa anamafwara aye, mbwenye kaweddihile ninga adhari. Iyene wahawaddela wi awene ahikana ttima enddimuwa vaddiddi vamentoni vaye. (Jo. 15:15) Yezu ohitabuwa vina ohunla na awene. (Jo. 11:32-36)  Masiki amwiddani aye, anziwa wi ankala amarho a Yezu babale aniwelela vina amvirihamo muselu waye. (Mt. 11:19) Nigatagiha mweddihedho wawaddiha Yezu anamafwara aye, omarho wehu na attu ena onela oliba; ninela okala wohagalala vina omuttabela wehu Kristu onela winjiva.

11. Ttarho gani yanawili enawuttukulele okala marho wa Yezu vina ekaleleni yofwanyelela?

¹¹ (2) Otagiha Mubuwelelo vina merelo a Yezu. Omuziwa vina omutagiha wehu ogenjivaga, pavenevo vanamageye omarho wehu na iyene. (1 Kor. 2:16) Ninawodhe dhavi omutagiha Yezu? Karoma wona yotagiha modha. Yezu wazuzumeletxa wakamihedha attu akwaye ottiya ovizuzumela mwinya. (Mt. 20:28; Rom. 15:1-3) Iyene wali muttu wazuzumela opama wa akwaye, nona wanziwa olevelela. Kanyaguleya momaguva mwaha wa esile dhammagedhana attu ena. (Jo. 1:46, 47) Nne vina katota manyazo attu mwa ologa obure okosile awene wale. (1 Tim. 1:12-14) Iyene ohiloga: “Mugakwelanaga,—athu etene anoziwa wi muli anamasunza aga.” (Jo. 13:35) Onkoddela nni ovivuza dhahi: “Miyo ddinotagiha merelo a Yezu mwa ovilibihedha wi ddandane na abali vina na arogoraga?”

12. Ttaro yanawuraru enanittukulele okala marho wa Yezu jivi vina ninawodhe dhavi olupela ttarhoya?

¹² (3) Wakamihedha abali a Kristu. Iyo nigakamihedhaga abali ottikitteliwa, Yezu onnona ninga ninimukamihedha iyene. (Mt. 25:34-40) Mabasa oroma anakamihedhihu iyo abali a Kristu ba olaleya na nttokoso muselu wa Omwene vina okosa mabasa osunziha abuwene attiyedhe Yezu anamafwara aye wi apulihe. (Mt. 28:19, 20; Mer. 10:42) Na nikamihedho na ‘mabila mena’ abali a Kristu anowodha okosa mabasa olaleya muselu wa Mulugu orugunuwa elabo yotene. (Jo. 10:16) Akala weyo oli munikuruni na mabila mena, mudhidhi bu mudhidhi onkamihedhiwe mabasa aba onowoniha okwela wawo, ottiya wakwelavi abali a nikuru nottikitteliwa, onowoniha vina wi onomukwela Yezu.

13. Ninawodhe dhavi ovirihamo malago a Yezu alebiwe va Luka 16:9?

¹³ Yina vina ennikosiha owaraliha wanddana wehu na Yehova vina na Yezu, ku okamihedha na dhokana dhehu mabasa aneddihiwa na awene. (Kengesa Luka 16:9.) Ninga motagiha, enowodheya iyo okosa mvaho wi okamihedhiwena abale anlaleya mimburo dholapelana na mmuttetteni, okamihedhiwena abale ammaga vina amvenyihedha numba dha webedhamo, vina wakamihedha abali abale anfwanyiwa efoyo na dhokana dhehu. Enowodheya vina iyo okosa mvaho wi nikamihedhena osasanyedhiwa wa numba yehu ya omwene vina wakamihedha abale anjombeliwa mmulogoni mwehu. (Gano 19:17) Merelo a wakamihedhana abali a Kristu, babene.

14. Ninga munlogela Éfeso 4:15, 16, enfuneya txini wi nimage mandano na Yezu?

¹⁴ (4) Okamihedha masasanyedho a mmulogoni mwa Okristu. Iyo ninlibiha wandana wehu na Yezu oli musoro wa mutugumano, nigewananeyagana na abale attomiwe wi emelele mulogoya. (Kengesa Éfeso 4:15, 16.) Ninga motagiha, iyo ninovilibihedha weddiha mofwanyela-mwene Numba dhehu dha Omwene wi dhikalegevi dhosasanyedheya-dhene. Mwari mwa ejuwene, milogo dhina dhinotugumanaga numba ya omwene modhene, midhidhi dhottiyana vina vanokosiwaga masasanyedho a wiwananela mirudda dholaleya. Masasanyedho aba anokamihedhaga vaddiddi winaneliwa wa dhokana dha Omwene. Veli-veli, vanofuneyaga okosiwa  masasanyedho a anamalaleya. Anamalaleya aba ororomeleya, abali anlabaga mwari mwa mudhidhi mwinjene mulogo mmodhene, nona anofiyedhaga walemela venjene abali a mwenemo. Mbwenye anokumbirhiwaga wi atugumanege milogo dhina. Txibarene Yezu onottittimiheya venjene agonaga wiwawana vina okamihedhiwa wa masasanyedho ninga aba!

15. Omarho wehu na Yezu onenjivevi dhavi musogorho?

¹⁵ Abale attikitteliwe na muya wokoddela ahikana njenedhelo na olaba vamodha na Yezu okala nokala-wene, akosaga mabasa awa mumodhani, Mumweneni mwa Mulugu. Anele okala na Kristu, amonaga, alogaga na iyene vina ewananelaga mabasa awa. (Jo. 14:2, 3) Abale anjedhela okala velaboni ya vati Yezu onela waweddiha n’okwela. Awene anela ojavo egumi esasanyedhile Yehova na Yezu, masiki eziweyaga wi kanamonege nne kanakalege vamodha na Yezuya.—Iza. 9:6, 7.

16. Maruriho gani anakelihu nigakala amarho a Yezu?

¹⁶ Iyo nigakela niwobo na Yezu na okala amarho aye, ninorurihiwa venjene. Ninga motagiha, malabo abano iyene ononeddiha n’okwela vina ononittiddela. Ninovahiwa gari ya okalawo na mukala-kala. Yattabiha yina jawi omarho wehu na Yezu onela onittukulela okana nifumo nddimuwa vaddiddi—okala marho wa Babe, Yehova. Eji gari enddimuwa vaddiddi ya okala marho wa Yezu; kunrumela!