Yezu ahinatti okwa ologelini mazu a David anfwanyeya va Masalmo 22:1?

Mwari mwa mazu omariya alogile Yezu anofwanyeyamo aba ali va nlebo na Mateu 27:46: “Mulugu waga, Mulugu waga, muddinyanyalele nni?” Sabwa ya Yezu ologa mazu aba, iyene ohivirihamo mazu a munasalmo David anfwanyeya va Masalmo 22:1. (Mk. 15:34) Egahikala yabure wubuwela wi Yezu ologile mazu aba sabwa ya onyimuleya obe sabwa ya orimeliwa nroromelo. Yezu wannonelamo deretu sabwaya yafwanyeleliye okwa vina wali omala-nawale wi ejo empadduwele. (Mt. 16:21; 20:28) Iyene wanziwa wi ogafiya mudhidhi wa iyene okwa, Yehova kaganvahile ‘nibarelo.’ (Job 1:10) Dhawene, Yezu agahoniwa wi wali oweddeyana na Yehova ahitanalaga mukweloya ogakwiliye.—Mk. 14:35.

Txini emuttukuleli Yezu ologa mazu aba a masalmo? Vowila kanina monelo wowakwana, ndowe none sabwa dhig’onovi. *

Sabwa ya Yezu ologa mazu aba afuna onihe wi Babe kagabarelile okwa waye? Yezu wanfwanyela opitxa yobolo s’ohitamela nikamihedho na Yehova. Iyene wali muttu womaningoni nona wanfwanyelela okwa ninga mutto womaningoni wi na ‘okwa waye attu etene apurelemo.’—Aheb. 2:9.

Txino Yezu wahiromola mazu mang’onovi a masalmo, wi attu ena awodhe wubuwela mazu etene anfwanyeya kapitulu ejile ya salmo. Nsaka nikalilewo Yezu Ayuda ahikana elemelelo yokoya mmusoroni malebo a masalmo. Venevo  agewa nilogiwaga nzu nimodha na masalmo awene momaguva-mwene annubuwela mazu otene anfwanyeya mmasalmonimwa. Akala jijuwene yana Yezu muyubuwelini, txino wafuna akamihedhe anamafwara aye aali Ayuda wubuwela wi salmo nttile mwanfwanyeya mavuhulo ewanana na okwa waye. (Masal. 22:7, 8, 15, 16, 18, 24) Ottiya ejo, mazu omariya a versu eji ya masalmo, anomuttittimiya Yehova vina anomuloga ninga mwene wa elabo yotene.—Masal. 22:27-31.

Na mazu aba a David, Yezu txino afuna oniye wi kaana muladdu. Ahinatti okwa, wahittongiwa na makani ahana matibelo vina bamagedhiwa muladdu womusutta Mulugu. (Mt. 26:65, 66) Ottongiwawa okosiwe momaguva-mwene vina vari va mattiyu nanda muttongeloya kuwewanana na magano oligana ottongana miladdu. (Mt. 26:59; Mk. 14:56-59) Mulogeli Yezu mazu aba: “Mulugu waga, Mulugu waga, muddinyanyalele nni?” iyene txino wafuna atonyihedhe wi kakosile elobwene yanfwanyeliha opiwa na mukalelo obule.

Yezu txino wafuna awubutxedhe attu ena wi otabuwa wa David onlogiwa mmasalmuni kuwatonyihedha wi Yehova wele omunyanyala. Nivuzo nakosile David kanatonyihedha wi wahirimeliwa nroromelo. Vowi mmaleliye okosa nivuzona, iyene wahiloga wi onokuluvela guru dhovuna dha Yehova nanda Yehova wahidhowavi amururihaga. (Masal. 22:23, 24, 27) Na mukalelo wakakene, Yezu “Mwana David,” vatabuwiye vapingirhizini, kiyatonyihedha wi olonyanyaliwa na Yehova.—Mt. 21:9.

Yezu txino woniha mukalelo wewamo iyene opa sabwa yohikana nibarelo na Yehova mudhidhene obule. Vamaromo-vene, Yehova kana efunelo ya wi Mwanaye atabutxiwe vina apiwe. Mbwenye eji ekalile yofuneya sabwa ya ovanya wa Adamu na Eva. Yezu kattegile, mbwenye yanfuneya otabuwa vina akwa wi awodhe wakula mavuzu akosile Satana, vina apereke mukutto wa yobolo wi obolele esile dhayelelile Adamu. (Mk. 8:31; 1 Ped. 2:21-24) Eji egawodheyile bahi mudhidhene-obule, Yezu kuyelela nibarelo na Yehova.

Yezu txino wafuna akamihedhe anamafwara aye ononelamo sabwaya ettiyile Yehova wi mwanaye akwe na mukalelone obulene. * Yezu wanziwa wi attu ena agahikakattuwa sabwa ya iyene okwa va pingirhizini ninga timbwini. (1 Kor. 1:23) Oku anamafwara aye kotanalela sabwa ya okwa waye agahinonelamo deretu entapulelani. (Gal. 3:13, 14) Dhawene pagawodhilani omona ninga mvuni ottiya omona ninga timbwini.

Masiki nihiziwaga mwahaya wamuttukulele Yezu ologa mazu aba, enziwehu jawi iyene wanziwa wi enofuneya okwa vapingirhizini wi akwanihedhe ofuna wa Yehova. Mumalele Yezu ologa mazu a munasalmo iyene bela: “Dhetene dhipula!” (Jo. 19:30; Lk. 22:37) Txibarene masiki vahanihena nibarelo na Yehova mudhidhi obulene, iyene wahakwanihedha dhetene dharumeliweyi odha velaboni ya vati. Vina ohiwodha wakwaniha dhilobo dhinjene mwaha waye “dhilebiwe munivuruni na Mizé na anamavuhulela, mmasalmuni vina.”—Lk. 24:44.