1-2. Enlogeliwani wi jowodheya ofwara ttarho dha Yezu? Kavaha yoladdaniha.

KAVYUBUWELE okosaga mpaddi wa nikuru na attu ankosa oleddo, nanda anvira mmuruddani mwettekiwe mina. Mbwenye mukana musogoreli oninfwarenyu. Mwa ovira wa mudhidhi kamunwodha omoona musogorheliya. Mbwenye munviriye munowodha woneya! Masiki bili dhawene weyo kunova. Ottiya ejo, nyuwo munowodha ofwara ttarho dha musogorheliya sabwani munowodha wona mpule mwanyigaliye!

² Ninga Akristu ebaribari, nili mmakattamihoni akakene nindha needdaga mwego mwettekiwe mina—elabo eji yabure. Mohagalaliha-mwene Yehova ohinivaha Musogorheli woligana—Mwanaye Yezu Kristu, onittiyedhe yotagiha enfwanyelihu ofwara. (1 Ped. 2:21) Mowiwanana na nivuru na anamapepesa a Bibilia, Pedro wakosa nladdaniho, mwa omuladdaniha Yezu na musogorheli. Dhahene ninga musogorheli ononeya mpule muviriliye, Yezu ohinittiyedha ttarho dhinfwanyeelihu ofwara. Ndoweni nitanaalele mavuzo mararu aniwawanana na ofwara ttarho dha Yezu—txini entapulela ofwara ttarho dha Yezu? Sabwaya jani enfwanyelihu ofwara ttarho dha Yezu? Ninawodhe dhavi ofwara ttarho dha Yezu?

3. Txini entapulela ofwara ttarho dha muttu?

³ Txini entapulela ofwara ttarho dha muttu? Mbibiliani mazu aba “wedda” na “onyigala” entapulela mweddelo onttukula muttu mwigumini mwaye. (Wita 6:9; Gano 4:26) Dhopadduwa dha mwigumini mwa muttu dhinoladdanihiwa, na ttarho obe  manyalo anttiya muttu munviriye. Dhahene ofwara ttarho dha muttu entapulela ofwara yotagiha yaye.

4. Txini entapulela ofwara ttarho dha Yezu?

⁴ Koddi, txini entapulela ofwara ttarho dha Yezu? Na mukalelo wohipipiriha entapulela ofwara yotagiha yaye. Va nleboni ntti, murumiwi Pedro walogana makamaka ofwara yotagiha yapama enittiyedhi Yezu ya ovilela matabuwo; ottiya ejo, dhihikalawo mikalelo dhina dha omutagiha Yezu. (1 Ped. 2:18-25) Txibarene ninofwanyela ofwara yotagiha enittiyedhi Yezu—dhologa dhaye vina dhokosa dhaye—na dhetene dhiriliye sapama mwa iyo.

5. Enwodheya dhavi attu ohiligana ofwara yotagiha yoligana ya Yezu? Katapulela.

⁵ Enowodheya iyo attu ohiligana ofwara yotagiha yoligana ya Yezu? Ndde, enowodheya. Pedro kalogile wi ninofwanyela ofwara ttarho dha Yezu mwawakwana-mwene—ottiya ejo, iyene wile “mufware mvirileye.” Masiki banili attu ohakwana, nigafwaseyela ofwara ttarho dha Yezu, nikosa mpaka vanwodhelihu, ninela wiwelela mazu a murumiwi Joau anloga: ‘Enofuneya wedda ninga yeddile Kristu.’—1 Jo. 2:6.

6-7. Ninlogelani wi ofwara ttarho dha Yezu dhinela onikamihedha okala ofiyedheya na Yehova?

⁶ Ofwara ttarho dha Yezu enele onikamihedha okala ofiyedheya na Yehova. Ninlogela nni dhawene? Yoroma, Yezu onittiyedha yotagiha yapama ya okalawo na mukalelo onimuzivela Mulugu. (Jo. 8:29) Iyo nigafwara yotagiha ya Yezu ninele omwagalaliha Yehova. Nikaane ebaribari yawi Babihu wa wirimu onele okala ofiyedheya na abale antamela okana mandano na iyene.—Tia. 4:8.

⁷ Yanawili, Yezu wahimutagiha Babe mowakwana-mwene. Nona Yezu wahifiyedha ologa dhahi: “Oddonile miyo, omona Baba.”  (Jo. 14:9) Ninawodhe omwagalaliha Yehova—nigatagiha mukalelo waweddiha Yezu attu ena na okwela—ninga motagiha, ttagaraga yamweddeliye muliba maranya, mukalelo wamukubanyedhiye muyana wali muredda vyaka dhinjene, vina ntanalo naniye na amamukwela. (Mk. 1:40, 41; 5:25-34; Jo. 11:33-35) Nigatagihaga mikalelo dha Yehova, ninele okala ofiyedheya na iyene.

8. Katapulela mukalelo onnikamihedha ofwara ttarho dha Yezu owodha “okona” elabo.

⁸ Ofwara ttarho dha Yezu enonikamihedha ohizuzumela dha elabo ejino yabure. Omattiyu womariha wa Yezu velaboni ya vati, wahifiyedha ologa wi: ‘Miyo ddipemberha elabo.’ (Jo. 16:33) Iyene karumelile wi dhogana na dhokosa dhaye dhipattiwe na mobuwelo wa attu a elabo ejino. Yezu txipo kadduwalile yadheeliye okosa velaboni ya vati—ottittimiha nzina na Yehova. Koddi iyo ninfwanyela okosa eni? Mwilaboni mpuno dhikalamo dhilobo dhinjidhene dhigadhile onizuzumiha. Mbwenye dhahene ninga Yezu, iyo nigazuzumela okosa efunelo ya Yehova ninele owodha “okona” elabo.—1 Jo. 5:5.

9. Txini enfwanyelihu okosa wila needdegevi mudilani ennittukulela wigumini ya mukala-kala?

⁹ Ofwara ttarho dha Yezu ononiwodhiha wakela egumi yohimala. Mwavuzeli muzombwe dhahi yafwanyeliye okosa wi akele egumi yamukala-kala, Yezu wahimwakula: “Odhe, oddifware.” (Mt. 19:16-21) Yezu wahawaddela dhahi Ayuda aharumeela wi iyene ddi Kristu: “Mabilaga, . . . anoddifwara. Ddinowavaha egumi yamukala-kala.” (Jo. 10:24-29) Nikodemu, musogorheli mmodha wa anddimuwa a Mmuttegoni muromeliye okana efunelo ya oziwavi masunziho a Yezu, Yezu wahiloga wi abale “animuroromela” agahakela “egumi yohimala.” (Jo. 3:16) Iyo ninlagiha wi ninomuroromela Yezu, mwa ovirihamo masunziho aye, vina ofwara merelo aye. Nigakosa dhawene ninele weeddavi mudila ennittukulela wigumini yohimala.—Mt. 7:14.

10. Txini eniwanana na “omuziwa” Yezu deretu? (Joau 17:3)

¹⁰ Nihinatti ofwara ttarho dha Yezu, ninofwanyela omuziwa deretu. (Kengesa Joau 17:3.) “Omuziwa” Yezu elobo enfwanyelihu okosaga mudhidhi wetene. Ninomuziwa deretu—nigasunza mikalelo dhaye, mobuwelo aye na magano aye. Kintanala mudhidhi olihu mwibaribarini, ninofwanyela okosagavi guru ya omuziwa Yehova vamodha na Mwanaye.

11. Txini dhinfwanyeya Mmittakani esi minai?

¹¹ Na okwela waye, Yehova ohikihamo mBibiliani Mittaka minai wila dhinikamihedhe omuziwa Mwanaye pama. Mwari mwa Mittaka esi muhikala masunziho na mabasa akosile Yezu. Manivuru aba anoniziwiha esile dhilogile  Yezu na dhikosiliye, vina mukalelo wampattani. Txibarene manivuru aba manai anonikamihedha ‘ofwara ttarho’ dha Yezu. (Aheb. 12:3) Mmuttakanimwa munofwanyeya ttarho dhittiyile Yezu. Mukalelo mmodha wa omuziwa Yezu pama, bwa osunza Mittaka esi minai. Nigakosa dhawene ninele owodha wedda mpule mvirileye.

12. Mittaka dhinnipuriha dhavi?

¹² Wila nipurelemo pama miselu dhili mwari mwa Manivuru aba manai, kaninfwanyela okalela wengesavi bahi. Enofuneya mudhidhi wi nisunze na ofwaseya vina nitanaalele na mukalelo wapama. (Kaladdaniha na Josuwé 1:8; woone nota, Bibilia Tradução do Novo Mundo.) Ninela woona marhe meeli ananikamihedhe otanaalelaga vina ovirihamo esile dhinengesihu Mmuttakani.

13. Ninawodhe dhavi ononelamo pama mapadduwo alebiwe Mmuttakani?

¹³ Vamaromo, enofuneya ononelamo pama mapadduwo alebiwe Mmuttakani. Kalabihedha mobuwelo wila woone, wiwe vina ononelemo mapadduwoya. Wila owodhe okosa ejo, jofuneya opepesa vina osunza manivuru anvuwihiwa na nikuru na Yehova. Opepese—vina otamele oziwa dhireyile mundduni na omamalelo wa dhopadduwadha dhinsunziwe. Otamele miselu dhina dhintapulela mapadduwoya vina mukalelo wapattilani attu ena. Oladdanihe mapadduwo ansunza weyo na abale alebiwe mmanivuruni mena a Mittaka. Sabwani masaka meena Mmuttakani mina munokala miselu dhinttiyana na dhilebiwe nivuru nina, masiki makaniya bali mamodhene.

14-15. Ninawodhe dhavi olabihedha mwigumini mwehu esile dhisunzilihu Mmuttakani?

¹⁴ Yanawili, kavirihamo dhinsunziwe Mmuttakani. (Jo. 13:17) Ogamala wengesa n’ofwaseya mapadduwo anfwanyeya Mmuttakani kavivuze dhahi: ‘Nipadduwo ntti niddisunzihile elobo gani enfunemi olabihedha mwigumini mwaga? Ddinawodhe dhavi olabihedha nipadduwo ntti wila ddakamihedhena attu ena?’  Kamubuwele muttu agafuniliwe omwaddela esile dhisunziliwe, mbwenye na okwela vina oleleya.

¹⁵ Ndoweni none yotagiha modha enanisunzihe mukalelo wolabihedha marhe aba meli alogiwe mundduni. Ninfuna nisekeserhe nipadduwo na mamukwela wa muyelegi, wamoonile Yezu mumparhani.

16. Katapulelamo mapadduwo anfwanyeya nivuru na Marko 12:41.

¹⁶ Ononelamo pama mapadduwoya. (Kengesa Marko 12:41.) Wubuwele yapadduwile. Nali siku, 11 na Nisani yaka ya 33 N.K. [Nsaka na Kristu]—ahalagawo masiku mang’onovi wi Yezu akwe. Yezu ondha asunzihaga mumparhani mwari mwa masiku menjene. Asogorheli a marelijiau anonfwara-fwara Yezu. Vamaromo, awene ahinvuza odhiliyena owodha wa wirana mabasa. Ena ahitamela omweha na mavuzo mwaha wa esile dhasunzihiye. (MK. 11:27-33; 12:13-34) Ovano Yezu onodhowa mpaddi mwina wa mparha. Mburo obule ontxemerhiwa—Nttaddo na Ayana—wenewale iyene onowodha woona yobo munikiwa mivaho dha mmusanani. Vagilatiliye onowawoona attu adhowaga operheka mivaho dhawa muyoboni. Iyene onowawoona areeli enjene adhagana korowa dhawa dha mivaho. Txino wanwodha wiwa oruma wa korowa esile dhimottelaga muyoboni mwa mivaho.

17. Txini ekosile mamukwela wa muyelegi, onlogiwa va Marko 12:42?

¹⁷ Kengesa Marko 12:42. Vasogorhova, onofiya muyana oninfwaseyela Yezu omwang’ana. Oddoyá, ‘muyana wamuyelegi,’ vina mamukwela. (Lk. 21:2) Iyene muyana wosegedheya, wila atamele yovikalihana onotabuwa vaddiddi. Masiki dhawene, mohooneya-mwene, iyene onodhowa operheka korowa dhaye bili muyoboni mwa mivaho; sabwa ya oyeva txino kadhiniweya orumawa. Mbwenye Yezu onoziwa muttengo wikileyemo—dhali korowa bili dhakuweliwa lépton dhalabihedhiwa nsaka nttilene. Muttengoya wahittabwa oyeva; nne ngafuna kuwakwanela ogulana amariye, dhalí balame dha muttengo mung’onovi.

18. Mowiwanana na Marko 12:43, 44, txini elogile Yezu mwaha wa mvaho okosile mamukwela?

¹⁸ Kengesa Marko 12:43, 44. Yezu wahitikina venjene sabwa ya mamukwela oddu. Iyene wahakuwela anamasunza aye wila afwaseyele omoona mamukwela ole, mmaleliye ohiloga: “Mamukwela oddu operheka opitha ena etene.” Vasogorhova ohitapulelamo sabwaya elogeliye dhawene: “Abo [makamaka areli] aperekilé dhohalavodhá, oku oddu aperhekaga yakuluveliye ovikalihana.” Yamuttukulele mamukwela ole wororomeleya operheka korowa yotene siku nttile, nali nikuluvelo naniyena nawi Yehova agahimukamihedha okana esile dhamujombela.—Masal. 26:3.

19. Txini ensunzehu na mazu alogile Yezu mwaha wa muyana wa mamukwela?

¹⁹ Kavirihamo nipadduwona mwigumini mwawo. Kavivuze, ‘Ddinsunzavo eni na mazu alogile Yezu mwaha wa muyana wamamukwela?’ Karoma omutanaalela mamukwelaya. Kavali waganyedha wila iyene agahiziveliwa onvaha venjene Yehova. Txibarene iyene ohikosa ejile yawodhiye, ohinvaha Yehova yattima yaniyena. Vina Yezu wahiziwa wila Babe wahagalala na mvaho obule. Apa iyo ninosunzavo elobo yamakamaka: Yehova onagalala niganvaha dhattima dhinehu—na murima wetene, mmabasani animukoselihu. (Mt. 22:37; Kol. 3:23) Yehova onohagalala agoona wi iyo ninovilibihedha okosa dhetene dhinwodhihu! Eji eniwanana na mudhidhi vina guru enkosihu wila nenjedhedhe omulabela wehu Yehova  ninga, odhowa mmabasani a olaleya, odhowa omatugumanoni na mabasa mena animukoselihu.

20. Weyo onawodhe dhavi ovirihamo esunzilewi na yotagiha ya mamukwela? Kavaha yotagiha.

²⁰ Weyo onawodhe dhavi ovirihamo nipadduwo ntti na mamukwela? Katanalele abali anaziwiwe, txino onodha onfwanya muttu w’ojeyile sabwa ya ohiwodha omukosela Yehova ninga mwafuneliye. Motagiha, weyo onomuziwa murogora wowunuwelavo onna makattamiho a mwigumini vina ohinwodha olaba venjene mmalaleyoni ninga mwakoseliye wale sabwa yawi kanna guru? Obe txino onomuziwa mbali okumuwile na eredda ehina murobwe, ejuwene ehinimuwodhiha woona matugumano etene? Bili dhawene weyo onofwanyela omukamihedha mwa ologa na iyene ‘mazu apama wila omulibihena.’ (Ef. 4:29) Omulogele mazu olibiha ansunziha yotagiha ya mamukwela wa muyelegi. Dhawene onela omukamihedha ononelamo wila Yehova onowagalala nigakosa guru mpaka vanwodhelihu. (Gano 15:23; 1 Tes. 5:11) Weyo ogaatamalela abali sabwa ya omulabelaga Yehova na guru dhawa dhetene—onele woniha wi onofara ttarho dha Yezu.

21. Txini eganile weyo okosa?

²¹ Ninowagalala sabwa yawi mmuttakani ninofwanyamo dhilobo dhinjene mwaha wa esile dhikosile Yezu, esuwene dhinnikamihedha ofwara ttarho dha Yezu na ororomeleya! Munona ninga egahikala yowodheya olaganela wila Vawebedhani Wantakulu murome osunza mapadduwo alebiwe Mmittakani? Kanidduwale wi nigafuna opurelamo masunziho ali Mmuthakani ninofwanyela ononelamo pama mapadduwoya vina ovirihamo mwigumini mwehu. Mwawenjedhedha, kaninfwanyela otagihavi bahi dhikosile Yezu, enofuneya vina nivuruwane esile dhilogiliye. Nsunzo ninfwarela ninela wona txini enasunzehu na mazu omariha alogile Yezu, bali vati apano.