Mokubanyiha-mwene, vakwanihedhimi viyaka 13, omukwela waga Yehova wahiroma odeba. Yakala ninga akwaga a oskola ahikana ofuru wowakwana, nanda ddakala ninga ddayelela. Miyo ddobuwela wi malamulo a amambalaga na magano a Okristu kaddivaha ofuru, vina mabasa omuyani ali orutxa vaddiddi. Kaddaganyedha okalawo wa Yehova, mbwenye kaddavyonana ofihedheya na iyene.

Miyo kaddattihile olaleya, mbwenye ddalaleya vang’onovi. Ddigadhowaga mmalaleyoni, kaddavisasanyedha, nona yanddirutxa oroma makani vina odhowanavi vasogoro makaniya. Sabwa y’ejuwene, mabasa akosimi kadhowa vasogoro, nona kaddaziveliwetxa olaleyawa. Miyo ddanivivuza, ‘Enwodheya dhavi muttu okosa mabasa aba, sumana na myeri dhotedhene?’

Vakwanihilemi viyaka 17, ddanfuna okana ofuru. Nona, miyo ddahimaga guwodhaga, baddibudduwa vatakulu, baddidhowa o Australia. Yogana eji yahakattamiha amambali aga. Awene ahizuzuma, mbwenye obuwela wila miyo ddigahidhowavi ddimulabelaga Yehova.

O Australia, miyo ddahidebavi mpaddi womuyani.  Ddadhowa omatugumanoni ddigafuna. Ddanziveliwa wedda na azombwe ali ninga miyo, akala ddabuno omatugumanoni, mangwana mudiskotekani, atxettaga vina bamalile olezela. Ddigobuwela dha mundduni, ddinonelamo wi ddahimala ogaweya, mpaddi mmodha mwibaribarini mpaddi mwina mwilaboni, mbwenye dhipaddi esi dhobili kadhaddagalaliya.

Muvirile vyaka bili musogorhomwa ddahimuziwa murogora dhahi, mweddelo waye oddikamihedha otanalela deretu egumi yaga. Miyo ddakala ntakulu vali arogora atanu aziye, iyo nahimuwoba nameddelela mulogo, na mwadhiye Tamara, wi akale na iyo sumana yantero. Mudhidhi wazuzumela mamune dhilobo dha mulogo, Tamara wakala na iyo alogaga makani vina niteyaga. Eji yanddizivela vaddiddi. Tamara wali muttu wofiyedheya vina wanlogeyana makani. Ddahiziveliwa venjene omuziwa muttu woliba omuyani vina wowaredheyana.

Tamara wanziveliwa venjene ovaha. Okwela waye ebaribari vina olaleya wannattukulela attu amona ofuna okosa yakakene. Iyene wakana wagalala watxibare sabwa ya omulabela venjene Yehova, oku miyo ddihikanaga wagalala sabwa ya omulabela Yehova vang’onovi. Mikalelo dhaye dhapama vina wagalala watxibarene waniyena wahiddikamihedha venjene. Yotagiha yaye eddubutxedha ebaribari eji yamakamaka enfwanyeya Mmaleboni: Yehova onfuna wi iyo notene nimulabele “n’oziveliwa” vina nifiye “vali iyene na jibo dhogalamuwa.”—Masal. 100:2.

Miyo ddanfuna okana wagalala wakakene wana Tamara, mbwenye wi ejo ewodheye ddanfuna okosa matxinjo menji. Vahivira mudhidhi, mbwenye vasogorhova ddahittukula ttarho. Ddanvisasanyedha deretu ddigadhowaga olaleya, vina mudhidhi mwina ddanlaba ninga pionera wokamihedha. Eji yanddikamihedha ohisilidhiwetxa vina ddanvikuluvela. Sabwa y’omulabihedha Bibilia malabo etene mmalaleyoni, olaleya wanddizivela. Mohigonela ddahiroma olaba ninga pionera wokamihedha myeri dhotene.

 Ddahiroma okana mandano na attu a dhihimo dhotene, aganile omulabela vina anvilibihedha mmabasani a Yehova. Dhotagiha dha amarho aba dhihiddikamihedha otanalela dhilobo dhanfwanyela okala vamburoni voroma, vina omwengesaga Bibilia malabo etene. Ddandhowavi ddiziveliwaga olaleya, venevo ddahikala pionera wa mudhidhi wotene. Eji yali dila yoroma ekanelimi wagalala vina ottugareya mmulogoni mvireli mudhidhi mwinjene.

Muvireli yaka modha, ddahimuziwa Alex, mulobwana wa ttagaraga, onimukwela Yehova vina mabasa olaleya. Iyene wali mudhari wokamihedha vina ondha alabaga ninga pionero wa muddhidhi wotene mwari mwa vyaka tanu na modha. Alex vina wahilaba elabo ya Malawi murudda wajonbeliwa anamalaleya. Wenewo wahaziwa amisionario ali yotagiha yapama vina amukamihedhile odhowavi azuzumelaga mabasa o Mwene vamburoni voroma.

Miyo na Alex nitelilena Yaka ya 2003, vina ninolabavi mmabasani a mudhidhi wotene. Nihisunza dhilobo dhinjene vina Yehova ohiniruriha dila dhinjene.

Yaka ya 2009, nawobeliwa odhowa olaba ninga amisionario elabo yo Timor-Leste, elabo eng’ono waddamela o Indonesia. Iyo nahitikina, nahiziveliwa vina nahisilidhiwa, dhotedhene esi mudhidhi wakakene. Muvireli meri mitanu, nahifiya o Dili, katti ya Timor-Leste.

Wi niwodhe olaba elabo ejile yanfanyela okosa matxinjo manddimuwa. Dhotedhene dhahittiyana, yeddeloya, elogeloya, dhojadha vina mikalelo dha okalawo nona nanfwanyelela oviparhapattela. Mmalaleyoni, nannafwanya attu oyelega, ahasunziletxe vina apujiwa. Attu owinjivaya ahikana mambazi mmurimani vina mmaningoni mwawa atoteyile na otimbwini vina koddo. *

 Mabasa a olaleya antikiniha! Motagiha, labo nimodha ddahimuziwa mwana-muyana wa vyaka 13, weettaniwa Maria. * Egumi yaye yali yokubanyiha. Maye okwile vyaka dhing’onovi mundduni, Maria wanrutxiwa vaddiddi ogumana na babe. Dhahene ninga anayana ena aligana na iyene, Maria kaziwa yafuniye okosa mwigumini mwaye. Miyo ddinowubuwela siku nimodha nonlileye addaddelagamo dhampadduwela. Mbwenye miyo kaddanonelimo pama dhalogiye vowi ddela osunza wene elogeloya. Miyo ddahimuloba Yehova, ddikumbirhaga wila addikamihedhe wi ddimpangarhaze mwana-muyana oddule, venevo ddahiroma omwengesela malebo agawodhile ompangarhaza. Vyaka dhafwarela, ddihiwodha wona mukalelo osaddulile ebaribari egumi yaye yotene. Iye ohibatiziwa, ovanene onowodha weddiha masunzo ayene a Bibilia. Ovano Maria ohikana anamudhi enji mpaddi w’omuyani animukwela venjene.

Yehova onorurihavi mabasa ankosiwa o Timor-Leste. Anamalaleya enjene a elabo ejile esunzile ebaribari vyaka kumi mundduni. Masiki dhawene awinjivaya apionero, adhari okamihedha vina anddimuwa a milogo. Ena anlaba kambirhinya dhotapulela dhili wolapelana na Betel, akamihedhaga osasanyedha manivuru a omuyani na elogelo ya wenewale. Ddihagalala vinjene sabwa ya wona oziveliwa wanani ebaga mmatugumanoni, vina wunuwa mpaddi w’omuyani.

Mabasa attomeliwehu o Timor-Leste ahittiyana venjene na anihuna o Austrália, mbwenye wagalala ona iyo kunladdahiwa na elo. Mudhidhi mwina nanfunyiwa mukaroni sabwa ya winjivamo attu, vina mwankala makonyo a oba na anyaganserha a milima dhadhowa ogulihiwa oferáni. Malabo mena nanneddiha nsunzo na Bibilia ntakulu dhahi; na nzuwa mbamwa wanviha mudhidhi mwina nafwanya monyetta-mwene vina mwattamaga anaku oku-n’oku. Masiki na dhorutxa esi dhotene, miyo ddanubuwela: ‘Eji yaddagalaliha!’

Ddigang’ana mundduni ddinomutamaalela Mulugu sabwa ya amambali aga okosa mpaka vawodhelani wi addisunzihe sabwa ya Yehova vina oddikamihedha na makattamiho agumanelimina mupalini mwaga. Mazu anfwanyeya va Gano 22:6 ahiddipadduwela. Amambali aga anoziveliwa na miyo vina na mamunaga Alex; awene anowagalala sabwa ya onoona nimulabelaga Yehova. Oromana yaka ya 2016 ninlaba ninga anameddelela milogo a mirudda dhinang’aneliwa na filiali y’o Austrália.

Munowodha orumela wi miyo kaddaziveliwa odhowa mmabasani a olaleya? Ovano ddinoziveliwa olaleya! Ddihinonelamo wi masiki na makattamiho ampadduwa mwigumini mwehu iyo ninowodha okana wagalala watxibarene nigamulabelaga Mulugu na murima wotene. Mohaganyedha vyaka esi 18 dhinimulabela miyo Yehova vamodha na Alex, dhinodhowavi dhiddagalalihaga venjene. Ovano ddinononelamo wi munasalmu David kavonyile mulogeliye dhahi na Yehova: “Anthawela vali nyuwo, athabe, ebegevi n’otamuwa. . . . Munowathangarhamiha etene ankwela nzina nenyu.”—Masal. 5:12.